REIREI 29
Tera ae E na Riki Ngkana Ti Mate?
E a tia ni mate temanna ae tangiraki iroum? N taai aika karawawata aikai, ko bae n iango ni kangai: “Tera ae e na riki ngkana ti mate? Iai te tai ae ti na manga kaitiboo iai ma naake a tangiraki iroura?’ Nori ana kaeka te Baibara aika karaunano, n te reirei aei ao are imwina.
1. Tera ae e na riki ngkana ti mate?
E kabotaua Iesu te mate ma te matunako. Te aomata ae matunako e aki ataa te bwai ae riki i rarikina. E kangaa n titeboo te mate ma te matu? Ngkana e mate te aomata, e aki namakina te maraki. E aki namakina ae e tiku n tii ngaia, e ngae ngke e rangi n tangiriia raoraona ke ana utu. E kangai te Baibara: “A bon aki ataa te bwai teuana akana mate.”—Wareka Te Minita 9:5.
2. Ti kangaa ni kakabwaiaaki n ataakin te koaua ibukin te mate?
A bati aomata aika mamaaka te mate ao a maakuia naba aomata ake a mate! Ma e kona ni karauaki nanom man te bae taekinaki n te Baibara ibukin te mate. E taku Iesu: “E na kainaomataingkami te koaua.” (Ioane 8:32) E kaokoro ana reirei te Baibara ma Aaro tabeua, bwa e aki taekinaki n te Baibara bwa iai taamnein te aomata ae teimatoa ni maiu imwini matena. Ngaia are akea ae teimatoa ni kammarakaki imwini matena. Ao kioina ngkai akea naba te bae a ataia maate, a aki kona ni kaikoakira. Ngaia are ti aki riai ni bubutii nakoia ke n taromauria, ao ti aki naba riai n tataro ibukia.
A taku tabeman bwa a kona ni maroro ma maate. Ma e aki kona n riki anne. N aron ae ti a tibwa reiakinna, a “aki ataa te bwai teuana” akana mate. Naake a iangoia bwa a maroro ma aia koraki ake a a tia ni mate, a boni maroro ma taimonio ake a baka n riki bwa aomata ake a a tia ni mate. Ngaia are ataakin te koaua ibukin te mate, ti a kamanoaki iai mairouia taimonio. E anga te kauring Iehova bwa ti na aki kataia ni maroro ma maate, bwa e ataia ae ti kona n ruanikai ngkana ti reitaki ma taimonio.—Wareka Te Tua-Kaua 18:10-12.
REIAKINA AE BATI RIKI
Nori riki ana reirei te Baibara ibukin te mate, ao kakorakoraa onimakinan te Atua ae tatangira ae e aki kona ni kammarakiia ake a a tia ni mate.
3. Noria bwa tera raoi aroia maate
A kakaokoro aia koaua aomata ni katobibia te aonnaba, bwa tera ae e na riki ngkana ti mate. Ao aia koaua akanne, a bon aki kona n eti.
Baikara koaua aika taabangaki ibukia maate n am aono?
Ngkana ko na nora ana reirei te Baibara, kaota te TAAMNEI.
Wareka Te Minita 3:20, ao maroroakin titiraki aikai:
Ni kaineti ma te kibu aei, tera ae riki nakon te aomata ngkana e mate?
Iai te bwai ae teimatoa ni maiu imwini maten te aomata?
E kaongoira te Baibara taekani maten Rataro, are raoraon Iesu ni kaan. Ngkana ko wareka Ioane 11:11-14, nora aron Iesu ni kabwarabwaraa te baere riki nakon Rataro. Ao maroroakin titiraki aikai:
E kabotaua Iesu te mate ma tera?
Tera ae ti tuangaki n te kabotau aei, ni kaineti ma te mate?
Tera am iango n ana kabwarabwara te Baibara aei ibukin te mate?
4. Ti kakabwaiaaki n te koaua ibukin te mate
Ataakin te koaua ibukin te mate e a kainaomataira mani maakakia maate. Wareka Te Minita 9:10, ao maroroakina te titiraki aei:
A kona maate ni kaikoakira?
Ana koaua te Baibara aei e kamanoira mani kakoauaan ae a riai ni bubutiiaki ke n taromauriaki naba maate. Wareka Itaia 8:19 ao Te Kaotioti 4:11, ao maroroakina te titiraki aei:
N am iango, tera ana namakin Iehova iroun te aomata ae taromauria te mate ke n ukera buokana mairouna?
Te koaua ibukin te mate e kainaomataira mani katei ake a aki kakukureia Iehova
5. Ti kabebeteaki n te koaua ibukin te mate
A bati aomata ake a a tia n tuangaki bwa ngkana a mate, ao a na boni kammarakaki ibukini baike a karaoi rimoa. Ma ti kabebeteaki n ataakin ae akea ae kammarakaki imwini matena, n ikotaki naba ma are e kakaraoi mwakuri aika rangi ni buakaka. Wareka I-Rom 6:7, ao maroroakina te titiraki aei:
Ngkai ti wareka te Baibara ao e oti bwa te mate e kabwaraa ke e kainaomataa te aomata man ana bure, n am iango e kona ngkanne ni kammarakaki te aomata ibukin ana bure ake rimoa?
Ngkana ti a kinaa riki Iehova, ti a kakoauaa riki ae e na bon aki kariaia te aomata ae mate bwa e na kammarakaki. Wareka Te Tua-Kaua 32:4 ao 1 Ioane 4:8, ao maroroakin titiraki aikai:
E kona te Atua ae iai irouna aroaro aika taekinaki ni kiibu aikai, ni kariaia kammarakaia aomata ake a a tia ni mate?
E kabebeteaki nanom n te koaua ibukin te mate? Bukin tera?
A TAKU TABEMAN: “I maaka te bae e na riki nakoiu ngkana I mate.”
Baikara kiibu n te Baibara aika karaunano aika ko kona n tibwai?
KAKIMOTOTOANA
Ngkana iai ae mate, e a toki ikanne maiuna. A aki kammarakaki maate, ao a aki naba kona ni kaikoakiia ake a maiu.
Kauring
Tera ae e na riki ngkana ti mate?
Ti kangaa ni kakabwaiaaki n te koaua ibukin te mate?
Ti kangaa ni kabebeteaki n te koaua ibukin te mate?
NORI NABA AIKAI
Noria bwa e katuuaaeia aomata aika buakaka te Atua i moone ke e aki.
Ti riai ngkanne ni maakuia maate?
Taamneia Maate —A Kona ni Buokira ke ni Kaikoakira? Bon Iai Ngaiia? (boroutia)
Nora aron te mwaane temanna ni kabebeteaki nanona ngke e a ataa te koaua bwa tera ae e na riki nakoira ngkana ti mate.