Mwakoro Uabwi
Kakaantaninga Rokon Ana Bong Iehova
1. Tera am kaantaninga ngke ko moan ongora bwa e a kaan kamaiuara man taian rawawata aika ituia aomata ngkai?
TEUANA mai buakon bwaai ake ko moan reiakin man te Baibara, bon ana kaantaninga Iehova ae e tangira te aonnaba bwa e na riki ni baretaiti. N te aonnaba ane boou anne, e na akea iai te buaka, mwakuri ni kakeru, te kainnano ibukin akean te kaubwai, te aoraki, ao ai te mate. A na maiu naba maate. Ai raoiroi ra te kaantaninga aei! Kaanin rikin bwaai aikai, e kateretereaki ni bwaai ni kakoaua aika a kaotia bwa e moanaki menan Kristo ma aomata n arona n Uea n te aro ae aki-nonoraki, n 1914, ao e a moanaki naba iai boong aika kaitira ibukin te aonnaba ae buakaka aei. N tokin boong aika kaitira aikai, Iehova e na kamauna te waaki ae buakaka ae ngkai, ma ni karokoa te aonnaba ae boou are e a kamani beritanaki!
2. Tera “ana bong [Iehova]”?
2 Te Baibara e arana te kamaunanakoaki ae nang roko aei bwa “ana bong [Iehova].” (2 Betero 3:10) Boni “bongin unin Iehova” are e na un nakon ana aonnaba Tatan ae bwanin. (Tebania 2:3) E a roko n tokina, n “te buaka n te bong are kakanato are ana bongi te Atua, ae Moan te Mwaka . . . ae aranaki n aia taeka Ebera ba Are-Maketon [Aremaketon],” are a na kamaunaki iai “uean aonaba ni bane.” (Te Kaotioti 16:14, 16) Ko kaotia n anuani maium bwa ko kakoauaa kaanin “ana bong Iehova” aei?—Tebania 1:14-18; Ieremia 25:33.
3. (a) E na roko n ningai ana bong Iehova? (b) Bukin tera bwa e raoiroi riki ngkai Iehova e aki kaota “te bong anne ma te tai anne”?
3 E aki tuangira te Baibara bwa te bong raa are e na roko Iesu Kristo ni karaoa ana motikitaeka Iehova i aon ana waaki Tatan. “Ma akea ae e ataia ba ningai te bong anne ma te tai anne. A aki ataia anera i karawa, e aki ataia naba te Nati; bon ti te Tama ae e ataia,” e taekina anne Iesu. (Mareko 13:32, BK) Aomata ake e aki korakora irouia tangiran Iehova, a na bae ni kakiriariaa i nanoia rokon Ana bong, ma n uaiakina riki bwain te maiu aei. Ma te koraki ake a tangira raoi Iehova, a na beku irouna ma korakoraia ni kabane, n aki ongeia bwa e na roko n ningai tokin te waaki ae buakaka ae ngkai.—Taian Areru 37:4; 1 Ioane 5:3.
4. Tera ana kauring Iesu?
4 E kauringia taan tangira Iehova, Iesu ni kangai: “Kamarurungingkami, taratara, ba kam aki ataia ba ningai te tai anne.” (Mareko 13:33-37, BK) E kaungaira bwa ti na aki kariaia te amwamwarake ke te momoi bwa e na karika “tabeaiangan te maiu aei” iroura, n te aro ae ti na kabanea korakorara iai, ao ti na mwaninga nako n aron kakawakin te tai aei.—Ruka 21:34-36, BK; Mataio 24:37-42.
5. Ni kaineti ma are e kabwarabwaraa Betero, tera ae e na riki n ana bong Iehova?
5 N aron anne, Betero e reireinira naba bwa ti na kakaantaninga rokon “ana bong [Iehova] . . . are e na mauna iai karawa n te rurunga ae korakora, ao a na waanako bwaai n te kabuebue.” A na kamaunaki taiani “karawa” aika aia tautaeka ni kabane aomata. E na kamaunaki naba te “aonaba,” ae taekan te natannaomata ae buakaka, ao “bwaai,” aika iango ao mwakuri aika kakaraoaki n te aonnaba ae buakaka aei, n aron te kan inaaomata mairoun te Atua, te wene ni bure, ao te mataai ni kanibwaibwai. A na oneaki mwiia n te “karawa nabangkai” [ae ana Tautaeka n Uea te Atua i karawa] ao te “aonaba nabangkai” [te natannaomata ae boou] ike “e na mena iai te raoiroi.” (2 Betero 3:10-13) Mwakuri aika kakawaki aikai a na karina n riki n te bong ao te aoa ae aki kaantaningaki.—Mataio 24:44.
Kamarurungko n Tarataraa te Kanikina
6. (a) Tera irekereken ana kaeka Iesu nakon aia titiraki taan rimwina, ma tokin aia waaki I-Iutaia ngkoa? (b) Baikara mwakoron ana kaeka Iesu aika kaineti riki ma bwaai aika riki ao aia kaantaninga aomata, ni moa man 1914?
6 Ibukin taai aika ti mena i nanoia ngkai, ti riai n ataa raoi kanoan te kanikina ae kotokotei boong aika kaitira, ae ‘tokin te waaki i aon te aonnaba.’ Uringnga bwa ngke e kaekaa aia titiraki taan rimwina Iesu ae koreaki ni Mataio 24:3, ao bwaai tabeua aika taekinaki ni kibuna 4 nakon 22, a kakoroaki moa bukiia ni kaineti ma aia waaki I-Iutaia, i marenan ririki aika 33 ao 70 C.E. Ma kakoroan bukin te taetae ni burabeti aei ae kakannato riki e waaki ni moa man 1914, are tain ‘menan Kristo ma [aomata], ao tokin te waaki i aon te aonnaba.’ E tuangira Mataio 24:23-28 bwa tera ae e na riki man 70 C.E. ni karokoa tain menan Kristo ma aomata. Bwaai aika taekinaki ni Mataio 24:29–25:46, a riki i nanon tain te toki.
7. (a) Bukin tera bwa ti riai n ataa aron kakoroan bukin te kanikina anne ngkai? (b) Kaekai titiraki aika mena n te barakirabe aei, ni kaota aron kakoroan bukin te kanikina ni moa man 1914.
7 Ti riai ni mutiakin bwaai aika riki ao aroaroia aomata ake a kakoroa bukin te kanikina anne. Ngkana ti nora irekereken bwaai aikai ma taetae ni burabeti n te Baibara, ao ti na buokaki iai bwa ti na kakaantaninga rokon ana bong Iehova. E na buokira naba ni kona n taetae ma nanora ni koaua ngkana ti kauringia aomata tabeman taekan kaanin te bong anne. (Itaia 61:1, 2) Ibukin iangoan karaoan anne, ti na rinanon titiraki ake a kaatuui tabeua mwakoron te kanikina are taekinaki ni Mataio 24:7 ao Ruka 21:10, 11.
Tera aron kakoroan bukin ‘teiraken te botannaomata teuana n eka nako te botannaomata teuana,’ ni moa man 1914? Baikara buaka ake a riki imwin anne?
Tera te aoraki ae kamamate ae butanako n 1918, are e kamateia aomata aika mwaiti riki nakoia ake a mate n te Moan Buaka ae Kabuta te Aonnaba? Baikara aoraki aika a teimatoa ni kamateia aomata aika mirion ma mirion mwaitiia, e ngae ngke e a rikirake aia rabakau taani kuakua?
Baikara roongo ake a a tia n rota te aonnaba i nanon te tienture are nako, e ngae ngke e a rikirake te rabakau?
Tera ae e kakoauaa nakoim bwa te 2 Timoteo 3:1-5, 13 e aki kabwarabwaraa aroaroia aomata ae e taneiai n nonoraki, ma e kabwarabwaraa rikiraken te buakaka ae nonoraki ngkai ti a kaan ma tokin boong aika kaitira?
Kaokoroaia Aomata
8. (a) Tera are kabwarabwaraki iroun Iesu ni Mataio 13:24-30, 36-43, are e na riki naba n tokin te waaki n te aonnaba ae ngkai? (b) Tera ae nanonaki n ana kaikonaki Iesu aei?
8 Iai riki bwaai aika kakawaki ake a taekinaki iroun Iesu, ae a irekereke ma tokin te waaki n te aonnaba ae ngkai. Teuana mai buakon bwaai aikai boni kaokoroaia “natin uean te Atua” ma “natin teuare buakaka.” Iesu e taekina aei n ana kaikonaki ae taekan te tawana are e unikaki iai te uita, are e a manga unika te titania iai te kairiribai. N ana kaikonaki aei, te “uita” e tei ibukia Kristian ni koaua aika kabiraki. Taian “titania” bon aomata aika aongkoa Kristian ma ni koauana bon “natin teuare buakaka,” ibukina bwa a tatangira te aonnaba aei ae tautaekanaki iroun te Riaboro. A kaokoroaki te koraki aikai ma “natin uean te Atua,” ao a kanikinaeaki bwa a na kamaunanakoaki. (Mataio 13:24-30, 36-43) E a tia n riki aei?
9. (a) Imwin te Moan Buaka are Kabuta te Aonnaba, tera te kaokoroaki are riki i marenaia aomata ni kabane aika a taku bwa Kristian ngaiia? (b) A kanga Kristian aika kabiraki ni kakoauaa bwa boni ngaiia taani beku ni koaua ibukin te Tautaeka n Uea?
9 Imwin te Moan Buaka are Kabuta te Aonnaba, a kaokoroaki aomata aika a taku bwa Kristian ngaiia, nakon uakoraki: (1) Mataniwi n Aaro ni Krititentom ao taan rimwiia ake a kakorakoraia ni boutokoa te Botaki ni Botannaomata, ao e korakora naba te nanonnaba irouia, ao (2) Kristian ni koaua aika a onimakina ana Tautaeka n Uea te Atua rinanon te Mesia ao tiaki aia tautaeka aomata. (Ioane 17:16) Te koraki aikai a kakoauaa bwa boni ngaiia taani beku ni koaua ibukin ana Tautaeka n Uea te Atua, ngke a tabeakina te mwakuri n uarongorongoa “euangkerion uean te Atua” ni katobibia te aonnaba. (Mataio 24:14) Tera mwin aia mwakuri?
10. Tera moan uaan te mwakuri n tataekina te Tautaeka n Uea?
10 A ikotaki moa nikiraia taani kabiraki n taamnein te Atua, ake a kaantaningaia bwa a na uaia ni mena ma Kristo n te Tautaeka n Uea i karawa. E ngae ngke a mena i buakoia botannaomata nako te koraki aikai, ma a katiteuanaki i nanon te botaki teuana. E a kaan kabanean kanikinaeaia taani kabiraki aikai.—Te Kaotioti 7:3, 4.
11. (a) Tera te mwakuri n ikotiia aomata ae e waakinako ni karokoa ngkai, ao tera te taetae ni burabeti are e kakoroaki iai bukina? (b) Tera ae kaotaki ni kakoroan bukin te taetae ni burabeti aei?
11 I aan ana kairiri Kristo, e a waakinaki ngkanne ikoikotakia kaain “te koraki ae uanao . . . mai buakoia botanaomata ni kabaneia, ma baronga ma natanaomata ma taian taetae ni bane.” Te koraki aikai bon “tiibu tabemang” ake a na kamaiuaki man “te rawawata are korakora,” ma n rin nakon ana aonnaba ae boou te Atua. (Te Kaotioti 7:9, 14; Ioane 10:16) Te mwakuri n tataekina rongorongon ana Tautaeka n Uea te Atua imwain rokon te toki, e boni waaki nako naba ni karokoa ngkai. A kakaonimaki kaain te koraki ae uanao aika tiibu tabemwaang aika mirion ma mirion mwaitiia ngkai, ni buokia nikiraia taani kabiraki bwa a na kabuta nako rongorongon te Tautaeka n Uea ae kakawaki. Te rongorongo aei e a tabe ngkai n ongoraeaki irouia botannaomata ni kabane.
Tera ae E Mena Imwaira?
12. E na maanra riki tataekinan te rongorongo imwain rokon ana bong Iehova?
12 Bwaai aika taekinaki i eta a kaotia bwa ti a kaan ngkai ma tokin boong aika kaitira, ao e a rangi ni kaan ana bong Iehova. Ma iai riki taetae ni burabeti tabeua aika a na kakoroaki bukiia imwain rokon te bong ane kakamaaku anne? Eng. E tuai n tia kaokoroaia aomata ni kaineti ma aroaroia nakon te Tautaeka n Uea. N taabo tabeua, ike e a korakora iai te bwainikirinaki ngkoa i nanon ririki aika mwaiti, e a manga rikirake iai ngkai mwaitiia taan rimwin Kristo aika boou. E ngae ngkai aomata n taabo tabeua a rarawa ni butimwaea te euangkerio, ma e oti ana nanoanga Iehova man arora n tataekina te rongorongo nakoia. Ngaia are ti na teimatoa ni mwamwakuri! E karaui nanora Iesu n tuangira bwa e na roko te toki ngkana e tia te mwakuri aei.
13. N aron are koreaki n te 1 I-Tetaronike 5:2, 3, tera te bwai ae kakawaki ae tuai n riki, ao tera ae na nanonaki iai ibukira?
13 E kangai te taetae ni burabeti riki teuana ae kakawaki: “Ngkana a kangai aomata: ‘Ti a rau ma ni mwengaraoi!’, ao e na rina ni bakariia te kabuanibai, n ai aron rokoni marakin te aine ae e ariri, ao a na aki kona n tibanako ma ngaia.” (1 I-Tetaronike 5:2, 3, BK) E na bon noraki n taina ae riai bwa tera aron katanoatan te ‘rau ma te mwengaraoi.’ Ma e aki nanonaki iai bwa taan tautaeka n te aonnaba a na bon tokanikai ni kaeta aia kangaanga aomata. Te koraki ake a kakaantaninga rokon ana bong Iehova, a na aki mwamwanaaki n te katanoata anne. A ataia bwa n te tai ae waekoa imwin te katanoata anne, ao e na karina n roko te kamaunanakoaki.
14. Baikara bwaai aika a na riki n tain te rawawata are korakora, ao karinani mai moana bwaai akanne?
14 Ni moan waakin te rawawata ae korakora, taan tautaeka a na eeka nako Baburon ae Kakannato, ae te botaki n Aro ae kewe ni katobibia te aonnaba, ao a na kamaunaa. (Mataio 24:21; Te Kaotioti 17:15, 16) Imwin anne, taian botannaomata a na kataia n ekia nako aomata aika a boutokoa riain ana tautaeka Iehova. Karaoan aei irouia e kauna Iehova nakoia taian tautaeka ao aia aomata, ao a na boni bane ni kamaunanakoaki iai. Anne bon Aremaketon, ae kabanean waakin te rawawata ae korakora. Imwin anne, e na kainaki Tatan ma ana taimonio n te aro are a nang aki kona ni kariria aomata. Ao ngkanne, e na roko n tokina ana bong Iehova are e na karietataki iai arana.—Etekiera 38:18, 22, 23; Te Kaotioti 19:11–20:3.
15. Bukin tera bwa e aki raoiroi iaiangoan ae e kiriaria ana bong Iehova?
15 E na bon roko tokin te waaki n te aonnaba ae ngkai n te tai are e a kaman tia ni baireia te Atua, ao e na aki iremwe. (Abakuka 2:3) Uringnga ngkoa bwa e karina ni kamaunaki Ierutarem n 70 C.E. n te tai are a aki kaantaningaia I-Iutaia, bwa a taku bwa akea te kabuanibwai ae e na riki. Ao tera aron Baburon rimoa? Bon te kaawa ae korakora ae buburakaei nonona, ao kaaina a taku bwa a mweeraoi. Ma e bwaka n tii te bongina. N aron naba anne, e na karina n roko te kamaunanakoaki i aon te waaki ae buakaka ae ngkai. Ngkana e roko, ao ti bia kuneaki i buakoia aomata aika katiteuanaki n te taromauri ae koaua, kioina ngkai ti kakaantaninga rokon ana bong Iehova.
Te Maroro Ibukin te Kauring
• Bukin tera ngkai moan te kakawaki bwa ti na kakaantaninga rokon ana bong Iehova? Ti na kanga ni kona ni karaoa anne?
• Tera rotakira ngkai a a tabe ni kaokoroaki aomata?
• Tera ae e riai moa n riki imwain rokon ana bong Iehova? Mangaia are tera ae ti riai n tabe ni karaoia?
[Taamnei n iteraniba 180]
A nang toki boong aika kaitira ngkana e a kamaunaki ana waaki Tatan