Te Reta Man te Rabwata n Tautaeka

Nakoim Ngkoe ae Ko Tangira Iehova:

E taku Iesu: “Ane kam na ataa te koaua, ao e na kainaomataingkami te koaua.” (Ioane 8:32) Ai karaunanora taeka aikai! Eng, e boni kona n reke te koaua, e ngae ngke ti a maeka ni “kabaneani boong” aika karuanikai aikai, ae e a taabangaki iai bwainan te kewe. (2 Timoteo 3:1) Ko uringa te tai are ko moan ataa iai te koaua ae kabwarabwaraaki n Ana Taeka te Atua? Ai kakukureira te tai anne!

E ngae ngke e kakawaki ataakin te koaua ae eti ao te katoatai n tataekinna nakoia aomata, ma ti riai naba ni kaboraoi aroarora ma te koaua. Ngkana ti na karaoa anne, ti riai ni kawakinira n te aro bwa ti na teimatoa n tangiraki iroun te Atua. Tera ae irekereke ma aei? E kaekaaki te titiraki aei n ana taeka Iesu are e taekinna n te tairiki are imwaini matena. E kangai nakoia ana abotoro aika kakaonimaki: “Ngkana kam kakairi n au tua nako, ao kam a teimatoa iai ni karaoingkami bwa aomata aika tangiraki irou, n aron ae I kakairi n ana tua te Tama, ao I teimatoa ni karaoai bwa te aomata ngai ae I tangiraki irouna.”​—Ioane 15:10.

Noria bwa e teimatoa n tangiraki Iesu iroun te Atua ibukina bwa e ongeaba n ana tua Tamana. E kaineti naba aei nakoira ni boong aikai. Ngkana ti kani kawakinira n te aro bwa ti na teimatoa n tangiraki iroun te Atua, ti riai ni maiuakina te koaua ni katoabong. E taku Iesu n te tairiki naba anne: “Ngkana kam atai baikai ao kam a kukurei ngkana kam karaoi.”​—Ioane 13:17.

Ti kantaningaia bwa e na boni buokiko te boki aei bwa ko na teimatoa ni maiuakina te koaua, n te aro bwa ko na teimatoa n “tangiraki iai iroun te Atua . . . are kairira nakon te maiu are aki toki.”​—Iuta 21.