“Kawakiningkami n te Aro ae Kam na Teimatoa n Tangiraki Iai Iroun te Atua”
1. Tera bukini boreetiakin te boki ae “Kawakiningkami n te Aro ae Kam na Teimatoa n Tangiraki Iai Iroun te Atua?”
1 I nanon wikin Nobembwa 1, ao ti na moana iai reiakinan te boki ae “Kawakiningkami n te Aro ae Kam na Teimatoa n Tangiraki Iai Iroun te Atua,” n ara Reirei n te Baibara n te Ekaretia. Ai ingaingara nanora ni manga reiakina te boki ae boou aei! E kangai te kabanea n taeka n te reta mairoun te Rabwata n Tautaeka are kanakoaki nakoia aomata n tatabemania nako ake a tangira Iehova: “Ti kantaningaia bwa e na boni buokiko te boki aei bwa ko na teimatoa ni maiuakina te koaua, n te aro bwa ko na teimatoa n “tangiraki iai iroun te Atua . . . are kairira nakon te maiu are aki toki.”—Iuta 21.”
2. E na buokira te boki ae boou aei n iterani maiura raa?
2 Kaman Iangoi Baika A na Rinanoaki: A kanga ni kamanenaaki booto n reirei man te Baibara n iterani maiura n aron te itamwaomwao, te kaakibotu, karinean te mwaaka ni kairiri, anuani maiura, te mare, te taetaenikawai, ao taiani katei? A na kataneiaaki mataniwin nanora ni kaineti ma kaetieti aika raraoi ake a kaotaki n Ana Taeka te Atua. (TaiAre. 19:7, 8) Rikiraken otara i aon ana kantaninga Iehova e na kairira bwa ti na kakukureia nanona ngkana ti ongeaba n iterani maiura ni kabane.—TaeRab. 27:11; 1 Ioa. 5:3.
3. Bukin tera bwa ti riai ni kabanea ara kona n anga ara ibuobuoki n te reirei ni katoa wiki?
3 Kamatoaa Nanom n Anga Am Ibuobuoki: Ngkana ko katauraoi, kateia bwa tiam kamoamoaan te Atua i buakoia ana aomata aika botaki. (Ebera 13:15) A na uaia n reiakina te boki ae boou aei kaain te ekaretia ni kabane. Te koaua ae ti na waaki i aoni mwakoron te boki ae uarereke ni katoa wiki e na kariaia bwa ti na katauraoi raoi, ao ni kakorakoraira bwa ti na tibwai nako baika ti reiakin. Ara kaeka aika kimototo aika katauraoaki raoi, e na kaungaia tabeman nakon te tangira ao mwakuri aika raraoi, ao ni karika maroroakinani kanoan te boki aei bwa e na rangi ni kaungaunga ao ni kamaiu. (Ebera 10:24) Ti kona ni karekea naba te kimwareirei ae bati mani kaotiotan ara onimaki iroura n tatabemanira nako.
4. Bukin tera ngkai e rangi ni kakawaki bwa ti na ongeaba n ana tua Iehova?
4 N ana kabanea n tairiki Iesu ni maiuna n aomata, e kairekerekea te ongeaba n ana tua Iehova ma kateimatoaan tangiram iroun te Atua. (Ioa. 15:10) Man ana ibuobuoki te boki ae “Tangiraki Iroun te Atua,” ti a kona ni kamanena riki ana boto n reirei te Baibara ni maiura ni katoa bong ao ni ‘kawakinira n te aro ae ti na kateimatoa iai tangirara iroun te Atua.’—Iuta 21.