Tera Aroni Bairean Ara Mwakuri n Uarongorongoa te Tautaeka n Uea?

E taekina ae kangai Iesu teutana te tai imwaini matena: “E na tataekinaki te rongorongo ae raoiroi aei ae taekan te tautaeka n uea, n te aonnaba ni kabutaa bwa te bwai ni kaotioti nakoia botannaomata ni kabaneia, ao ngkanne e a roko naba te toki.” (Mataio 24:14) Ma e na kangaa ni kakororaoaki te mwakuri n uarongorongo aei ni katobibia te aonnaba? Boni man touani mwin ana katoto Iesu are e kaotiotia ni menana i aon te aba.​—Ruka 8:1.

Ti kataia ni kawariia aomata ni mwengaia. E reireinia taan rimwina Iesu bwa a na tataekina te rongorongo ae raoiroi man te auti teuana ma teuana. (Mataio 10:11-13; Mwakuri 5:42; 20:20) A mwiokoaki taani kabuta te euangkerio ake n te moan tienture, bwa a na uarongorongo n aono aika kakaokoro. (Mataio 10:5, 6; 2 I-Korinto 10:13) E karaoaki naba anne ni boong aikai, e baireaki raoi ara mwakuri n uarongorongo, ao a mwiokoaki ekaretia nako te tabo ae a na kabanea ni mwakuria. Ti a kona ni kakororaoa ana kaetieti Iesu are e tua nakoira bwa ti na ‘uarongorongo nakoia aomata ao ni kaotiota raoi te rongorongo ae raoiroi.’​—Mwakuri 10:42.

Ti kakorakoraira ni kawaria aomata n taabo ake a kona n reke iai. E katea naba te banna ni katoto Iesu n uarongorongo nakoia aomata n ana tabo te botannaomata, irarikin taari ke i taun te mwanibwa. (Mareko 4:1; Ioane 4:5-15) Ti maroro naba ma aomata man te Baibara ngkana e angaraoi, n taabo ni kamaangang, marae ni wanikiba, te onnaoraki ao tabon te uaabu, ke n te tareboon. Ti uarongorongo naba nakoia raoraora, kaain ara tabo ni mwakuri, raora n reirei ao ara koraki, ngkana e angaraoi ara tai. E reke ara tai ni “kaota kamaiuan te aba” nakoia mirion ma mirion aomata ni katobibia te aonnaba, rinanon ara kakorakora ni karaoi baikai ni kabane.​—Taian Areru 96:2.

Ko a tia n iangoa temanna ae ko kan tibwaa rongorongon Ana Tautaeka n Uea te Atua nakoina, ao ni kabwarabwaraa bwa tera nanon te rongorongo anne ibukina nakon taai aika imwaina? Tai taua iroum rongorongon te kantaninga aei. Tibwaia nakoia aomata nako ngkana ko kona!

• Tera te “rongorongo ae raoiroi” ae riai ni tataekinaki?

• A kangaa Ana Tia Kakoaua Iehova ni kakairi n ana anga Iesu n uarongorongo?