Aia Titiraki Taani Wareware . . .

Bukin tera ngkai a uarongorongo man te auti teuana ma teuana Ana Tia Kakoaua Iehova?

▪ Ti kona n nora ana reirei Iesu nakoia taan rimwina n te Baibara ae kangai: “Mangaia are naako, reireinia aomata mai buakoia botannaomata nako bwa a na riki bwa taan rimwiu. . . . [ao] reireinia.” (Mataio 28:19, 20) E kaineti aio nakoia Kristian ni kabane? A mataata taan rimwin Iesu ake rimoa bwa e kaineti aei nakoia Kristian ni kabane. N te katoto, e taekina ae kangai te abotoro Betero: ‘E tua naba Iesu nakoira bwa ti na uarongorongo nakoia aomata ao ni kakororaoa kaotiotana.’ (Mwakuri 10:42) Ao e korea ae kangai te abotoro Bauro: “I kabaeaki bwa N na karaoia. Bwa I kaawa ngkana I aki tataekina te rongorongo ae raoiroi!”—1 I-Korinto 9:16.

Tiaki tii Bauro ma Betero ake a toua mwin ana reirei Iesu, ma boni Kristian ni kabane naba ake n te moan tienture naba. E moanibwai irouia aia mwakuri n uarongorongo. (Mwakuri 5:28-32, 41, 42) Ni boong aikai, a kakorakoraia naba Ana Tia Kakoaua Iehova ni karaoa aio. Titeboo aia rongorongo ma are e tataekinna naba Iesu ae taekan “te tautaeka n uea ae bwaini karawa.”—Mataio 10:7.

E riai n taetaekinaki rongorongon te Tautaeka n Uea nakoia antai? E kamataata Iesu bwa e riai n tataekinaki nakoia aomata ni kabane n taabo nako. E tuangia taan rimwina ni kangai: “Kam na riki bwa taani kakoaua ibukiu . . . nako tabon aonnaba.” (Mwakuri 1:8) E taetae ni burabetinna naba bwa imwain tokin te waaki ae ngkai, ao “e na tataekinaki te rongorongo ae raoiroi aei ae taekan te tautaeka n uea, n te aonnaba ni kabutaa bwa te bwai ni kaotioti.” (Mataio 24:14) Ibukin anne, a kakorakoraia Kristian n te moan tienture n uarongorongo, tiaki tii nakoia naake a kinaia ke aomata aika akea aia Aaro ma nakoia naba aomata nako. (I-Korote 1:23; 1 Timoteo 2:3, 4) Ai aroia naba Ana Tia Kakoaua Iehova ni boong aikai bwa a kakorakoraia ni karoko irouia aomata nako.a

Tera te anga ae rangi n uaana ibukini kabutanakoan rongorongon te Tautaeka n Uea? Ibukina bwa e ataa aroni kawaraia aomata aika bati Iesu, e a kanakoia taan rimwina nakoni kaawa aika bubura ma aika uarereke ao ni mwenga nako. (Mataio 10:7, 11, 12) A teimatoa taan rimwin Iesu n uarongorongo “n te auti teuana ma teuana,” imwini matena ao mangautina. (Mwakuri 5:42) A uarongorongo n taai aika aki baireaki ao n aia tabo botannaomata, n aron are e karaoia naba Iesu. (Ioane 4:7-26; 18:20; Mwakuri 17:17) Ni boong aikai, a uarongorongo naba Ana Tia Kakoaua Iehova nakoia aomata ni kabane n aron anne.

E kamataata Iesu bwa a na aki bane aomata ni kan ongora. (Mataio 10:14; 24:37-39) A riai ni bwara nanoia Kristian n uarongorongo ibukin anne? Iangoa te kabotau aio: Ngkana arona bwa ko kaaina te tiim ni kakamaiu ake a kakaae imwin te mwaeiei ae korakora, ko na katoka am kakaae tii ibukina bwa a karako aika a kuneaki aika maiu? Ko na bon aki, ko bae n teimatoa ni kakaae ma te kantaninga are e na reke ae na kamaiuaki. E reireinia naba taan rimwina Iesu bwa a na botumwaaka n uarongorongo, ma kantaningaan rekeia aika a na butimwaea te rongorongo ae raoiroi ae taekan Ana Tautaeka n Uea te Atua. (Mataio 10:23; 1 Timoteo 4:16) A kaotiota tangiran te Atua Ana Tia Kakoaua Iehova ao raoia ake a boto maiuia mani butimwaean ao ongoraean rongorongon te Tautaeka n Uea, n aroia ni kakaaeia aekan aomata akanne man te auti teuana ma teuana.—Mataio 22:37-39; 2 I-Tetaronike 1:8.

E kamatataaki taekan te rongorongo man te Baibara anne n te maekatin ae ko warekia aei. Ibukin rongorongona riki tabeua, taiaoka ni maroro ma Ana Tia Kakoaua Iehova ngkana a a manga kawariko, ke koroboki nakon ae e boreetia te maekatin aei.

[Titiraki ibukin te reirei]