A Kona ni Manga Maiu Maate?

TE BAE E TAEKINAKI N TE BAIBARA

‘Bon iai te mangauti.’​—Mwakuri 24:15, Te Baibara ae Tabu—Te Rairai ae te Aonnaba ae Boou

MANENANA IBUKIM

Te kabebetenano ni mateia aika tangiraki iroum.​—2 I-Korinto 1:3, 4.

Te kainaomataaki mani maakan te mate.​—I-Ebera 2:15.

Te kantaninga ni koaua ibukin te manga katiteuanaaki ma te koraki aika tangiraki iroum ake a a tia ni mate.​—Ioane 5:28, 29.

TI KONA N ONIMAKINA RAOI TE BAE E TAEKINAKI N TE BAIBARA?

Eng, bwa iai bukina aika tenua:

• Bon te tia Karika te maiu te Atua. E aranaki Iehova ae te Atua n te Baibara bwa “kakoburakean te maiu.” (Taian Areru 36:9, Te Baibara; Mwakuri 17:24, 25) Teuare e anga te maiu nakoni baika maiu ni kabane, bon iai ana konabwai ni manga kaoka te maiu nakon te aomata ae e a tia ni mate.

• E a tia te Atua ni kautiia maate n taai ake rimoa. E taekinaki n te Baibara bwa iai wanua kaututi ake a karaoaki i aon te aba, nakoia ataei, kaara, mwaane, ao aine. Iai tabeman aika mate i nanon te tai ae uarereke, ma iai temanna ae e mena n te ruanimate abong te bong!​—Ioane 11:39-44.

• E ingainga nanon te Atua ni manga kaututi. E ribaa te mate Iehova ao e taraia bwa ana kairiribai. (1 I-Korinto 15:26) E tangiria n tokanikai i aon te kairiribai anne, ni kamauna te mate rinanon te mangauti. E ingainga nanona ni kautiia te koraki ake a mena n ana ururing ao n noriia bwa a manga maiu i aon te aba.​—Iobi 14:14, 15.