Ikawairakena I Natareta

E ikawairake Iesu i Natareta ae te kaawa ae uarereke ma ni mangori. E mena i meangin Iutaia n te aba ae tabukibuki n aononi Kariraia nako maeaon te nama ae bubura ae ataaki bwa Namani Kariraia.

E kairaki Iesu mai Aikubita nako Natareta ngke tao uoua ana ririki iroun Ioteba ao Maria. E taraa n ae tii ngaia natiia n te tai aei. Ma a a manga bungiaki imwina riki tarina aika Iakobo, Ioteba, Timon, ao Iuta. A karikiia naba natiia aine aika mwaanen Iesu. Eng, bon iai tarin ao mwaanen Iesu aika onoman mwaitiia ae titeboo tinana ma ngaiia.

Bon iai riki ana koraki Iesu. Ti a kaman ataa taekan Eritabeta ao natina are Ioane. E maeka n te tabo ae raroa i maiaki i Iutaia. E maeka n uakaan ma ngaiia i Kariraia Tarome ae tao tarini Maria ao ai tinan Iesu. Buun Tarome bon Tebetaio ao iai natiia mwaane aika uoman bwa Iakobo ao Ioane aika ai tarin Iesu. Ti aki ataia raoi bwa e kakabanea ana tai ae bati Iesu ma mwaane aikai i nanon ikawairakeia ke e aki, ma n tokina ao a a riki bwa raoraon Iesu ni kaan aika beku bwa ana abotoro.

E mwakuri korakora Ioteba ibukini boutokaan ana utu ae tabe n rikirake mwaitiia. Bon te kabentaa ngaia. E kaikawaa Iesu bwa kaanga oin natina ao ibukin anne e a aranaki Iesu bwa “natin te kabentaa.” (Mataio 13:55) E reireina Iesu bwa e na riki bwa te kabentaa ao e a rabakau raoi iai. Ni koauana, a taekina Iesu aomata imwina riki ni kangai: “Ngaia te kabentaa.”​—Mareko 6:3.

E boboto maiuia ana utu Ioteba i aon taromaurian Iehova. A kakairi n ana Tua te Atua Ioteba ao Maria n aroia n reireinia natiia kaetieti ibukin te onimaki ‘ngkana a tekateka i nanon aia auti, n nakonakoia i nanon te kawai, ni weneia, ao n teirakeia.’ (Te Tua-Kaua 6:6-9) Iai te tinakoka i Natareta ao ti kona ni kakoauaa bwa e kakairiia ana utu Ioteba n taromauri ikanne. E taekinaki imwina riki bwa e nakon te tinakoka Iesu “n aron are e tataneiai iai n te bongi n Taabati.” (Ruka 4:16) A rangi ni kimwareirei naba ni mwamwanangaia nakon ana tembora Iehova i Ierutarem.