E Kamarurunga te Teinimwaane ae Taniaki n te Taimonio Iesu

Ngke a ruo rikaaki man te maunga Iesu, Betero, Iakobo, ao Ioane, ao a a kaitiboo ma te koraki ae bati. Iai te kangaanga ae riki. A katobibiaki taan rimwin Iesu irouia taani koroboki ao a kauntaeka ma ngaiia. A rangi ni kukurei aomata ngke a nora Iesu ao a biri bwa a na butimwaeia. E titiraki ni kangai: “Tera ae kam kauntaekaia ma ngaiia?”​—Mareko 9:16.

E katorobubua i matan Iesu te mwaane temanna mai buakon te koraki ao e kabwarabwaraa ni kangai: “Te tia Reirei, I uota natiu te mwaane nakoim bwa iai te taimonio irouna ae ngaia ae e a baennewe iai. Ngkana e ninia te taimonio ao e kabwakaa i aontano, ao e buroburo wina ao e kaiaiaa wina ao akea korakorana. Ao I tuangia taan rimwim bwa a na kanakoa te taimonio, ma a aki kona.”​—Mareko 9:17, 18.

A bae ni kakanikoaki taan rimwin Iesu irouia taani koroboki. Tao a bwainingarea aia kakorakora ibukina bwa a aki kona ni kamarurunga te teinimwaane. N oneani mwin are e na kaekaa te karo are taonaki n te rawawata, e a kaekaia te koraki ni kangai: “Bon te roro ngkami ae akea ami onimaki ao kam kakaraoa ae buakaka. E na maanra au tai ni memena i rarikimi? E na maanra au tai n taotaona nanou iroumi?” A boni kaineti taeka aikai nakoia taani koroboki ake a karikii kangaanga nakoia taan rimwina ngkai e aki mena i rarikia. E rairaki nakon te karo are rawawata arei ao e taku: “Kairiamai nakoiu.”​—Mataio 17:17.

Ngke e a kawara Iesu te teinimwaane arei ao e a kabwakaaki naba i aontano iroun te taimonio are e taniaki irouna, ao e a kaatikitiki naba. E rabinobino i aontano teuaei ao e buroburo wina. E titirakina te karo arei Iesu ni kangai: “Ai maanra n riki aei nakoina?” E kaeka ni kangai: “Ma ngke e uarereke, ao e bati ana tai te taimonio ni kabwakaa teuaei n te ai ao n te ran bwa e na kamatea.” E bubutii teuaei ni kangai: “Ngkana ko kona ni karaoa te bwai teuana, ao nanoangaira ma ni buokira.”​—Mareko 9:21, 22.

E kakaii nanon te karo aei ibukina bwa a aki kona ni buokia taan rimwin Iesu. Ni buokani kainnanon teuaei n ana bubutii, e a karaua nanona Iesu ni kangai: “Ko taekina ‘Ngkana ko kona’? E konai bwaai ni kabane ane e onimaki.” E a takarua naba ngkekei taman te teinimwaane aei ao e taku: “I onimaki! Buokai ni kakorakoraa riki au onimaki!”​—Mareko 9:23, 24.

E a noriia te koraki Iesu bwa a a biri ni kawaria. A bane n noria te koraki ngke e boaa te taimonio ni kangai: “Te taimonio ae ko karaoa te aomata bwa e na baennewe ma ni bonotaninga, I tua nakoim bwa ko na otinako mairouna ao tai manga okiria!” Ngke e a otinako te taimonio ao e a kakorakoraa takaruan ao kaatikitikin te teinimwaane arei. Imwina ao e a wene teuaei n aki kakammwakuri. Ngke a nora aei aomata aika bati ao a taku: “E a mate!” (Mareko 9:25, 26) Ma ngke e taua baina Iesu, e teirake “ao e a marurung naba n te tai arei.” (Mataio 17:18) E teretere bwa a boni mimi aomata n te baere e karaoia Iesu.

A a tia taan rimwina ni kona ni kanakoia taimonio mai mwaina ngke e kanakoia n uarongorongo. Ngaia are ngke a a roko n te auti ao a a titirakinna ni kangai: “E aera ngkai ti aki kona ni kaotinakoa?” E kabwarabwaraa bukina Iesu ae kaineti ma karakon aia onimaki ni kangai: “E aki kona n otinako te aeka n taimonio aei ma tii n te tataro.” (Mareko 9:28, 29) E kainnanoaki te onimaki ae korakora n ikotaki ma te tataro ni bubutii mwaakan te Atua ibukini kaotinakoan te taimonio ae korakora.

E kaota koauan anne Iesu ni kangai: “I tuangingkami te koaua bwa ngkana iai ami onimaki ae uarerekeni koraan te matitati, ao kam kangai nakon te maunga aei, ‘Mwemwenako mai ikai nako ikekei,’ ao e a mwemwenako naba, ao akea te bwai ae kam na aki kona ni karaoia.” (Mataio 17:20) Ai korakorara te onimaki!

A taraa n aki kona ni kaetaki ke ni katokaki bwaai n tutuki ao kangaanga aika totokoa rikiraken ara beku ibukin Iehova, n aron te maunga ae rangi n rietata ae kangaanga kamwaingana. Ma ngkana ti karikirakea ara onimaki, ti na bon tokanikai i aoni bwaai n tutuki ma kangaanga aika kaanga rietani maunga.