E Angania Abotoro te Reirei ni Kairiri ae Kakawaki Riki Iesu

E a tia Iesu ni kaikonaka te aroaro ae riai n reke irouia taan rimwina. A riai taan rimwina ‘ni butimwaea te ataei ae ai aron aei n arana, ao a butimwaea naba iai Iesu.’ (Mataio 18:5) A riai n iangoiia bwa kaanga aroia ataei, ae a mangori ao akea nakoaia ae rietata.

A a tibwa tia abotoro ni kauntaekaa ae antai te kabanea ni kakannato, ngaia are a bae ni butimwaea ana taeka Iesu ibukini boaakia. E a taekina ngkai te bwai teuana ae e a tibwa tia n riki te abotoro Ioane ni kangai: “Ti nora te mwaane temanna bwa e kanakoia taimonio ni kabongana aram, ao ti kataia n tukia ibukina bwa e aki irira.”​—Ruka 9:49.

E koaua bwa e iangoia Ioane bwa bon tii abotoro aika kariaiakaki ni kamarurungia aoraki ke ni kanakoia taimonio? Ngkana ngaia anne e a kangaa ngkanne te mwaane ae te I-Iutaia aei ni kona ni kanakoia taimonio? E taraa n ae e iangoia Ioane bwa e aki riai te mwaane aei ni karaoi kakai ibukina bwa bon tiaki raon Iesu ao abotoro.

Ma e mimi Ioane ngke e kangai Iesu: “Tai tukia, bwa akea temanna ae kona ni karaoa te mwakuri ni kakai n arau, ae e na kai taekina te bwai ae buakaka ibukiu. Bwa ane e aki kaaitaraira ao bon raora. Ao ane e anganingkami te mwangko n ran kioina ngkai taan rimwini Kristo ngkami, ao I tuangingkami te koaua bwa e na bon aki kabuaa kaniwangana.”​—Mareko 9:39-41.

N te tai aei e aki nanonaki bwa e riai te mwaane aei n ira Kristo bwa e aonga n tei n ana itera Iesu. E bon tuai n tei te ekaretia ni Kristian, ngaia are ngkai e aki ira Iesu teuaei, tiaki nanona bwa e a riki bwa te tia kakaaitara ke te tia boutokaa te Aro ae kewe. Ma e teretere bwa e onimakina aran Iesu teu­aei ao e oti n ana taeka Iesu bwa e na bon aki kabuaa kaniwangana teuaei.

N te itera are teuana, e boni kona ni karuanikai ngkana e kamamaraaki teuaei n aia taeka ao aia mwakuri abotoro. E taku Iesu: “Ane e kabwakaa temanna i buakoia aika uarereke aikai aika iai aia onimaki, e raoiroi riki ngkana e kabaeaki te atibu ae bubura i roroana, ma ni kaiinakoaki i taari.” (Mareko 9:42) Ao e taku Iesu bwa a riai taan rimwina ni kanakoi baika kakawaki n aroni baia, waeia, ke mataia, ngkana a na riki baikanne bwa bwaai ni kabwakabwaka nakoia. E raoiroi riki rinia n ana Tautaeka n Uea te Atua n akeani baika kakawaki aikai irouia nakon ae iai baikai ao a karenakoaki i Keenna (te Mwarua ae Innom). A a bae n tia n nora te mwarua aei abotoro ae mena i rarikin Ierutarem ike a kakabuekaki iai maange, ngaia are a kona n ota iai bwa e bon tei ibukin te kamaunanakoaki n aki toki.

E anga naba te kauring Iesu ni kangai: “Tataraingkami bwa kam na aki ribaa temanna mai buakoia aika uarereke aikai, bwa I tuangingkami bwa a aki toki aia anera i karawa n tei i matan Tamau are i karawa.” Tera aroni kakawakia “aika uarereke” iroun Tamana? E karakina temanna te mwaane ae iai 100 ana tiibu ma e bua temanna mai buakoia. E kitania ake 99 teuaei ao e nako n ukoukora temanna are bua, ao ngke e kunea ao e a rangi ni kimwareirei riki irouna nakoia ake 99. E reitia ni kangai: “E aki tangiria Tamau are i karawa bwa e na bua temanna mai buakoia aika uarereke aikai.”​—Mataio 18:10, 14.

Tao e iangoa aia kauntaeka ana abotoro ni kaineti ma antai ae e na riki bwa te kabanea ni kakannato, ngaia are e a kaumakiia ni kangai: “Karina te taoro ni maiumi, ao kateimatoa te rau i marenami.” (Mareko 9:50) E na kangkang riki te amwarake ngkana e taoronaki. E na kai butimwaeaki riki ana taeka temanna ngkana e kabongana te taoro ni kaikonaki ao ni buokaki naba iai ni kateimatoa te rau ae aki kona n reke man te kakauntaeka.​—I-Korote 4:6.

N tabetai a kona n riki kauntaeka aika kangaanga kaetakia, ma e kaota aroni kanakoraoaia Iesu ni kangai: “Ngkana e bure tarim, naako ao kaota ana bure nakoina n tii ngkoe ma ngaia. Ngkana e ongo iroum, ao ko kaoka iai tarim nakon te kawai ae eti.” Ma tera arom ngkana e aki ongo iroum? E kauring ni kangai: “Kaai n airi ma temanna ke uoman i rarikim, n te aro are e na kona ni kaetaki bwaai nako n aia kaotioti taani kakoaua aika uoman ke teniman.” Ma ngkana e aki kona ni kaetaki te kangaanga n anne, a na taetae nakon “te ekaretia” ae taekaia unimwaane aika mwiokoaki aika a kona ni karaoa te moti iai. Ma tera arom ngkana e bon aki ongo naba te tia bure? “Ko na taraia bwa kaain te aonnaba ke te tia rikoa te taekiti,” ake aomata ake a aki iraorao I-Iutaia ma ngaiia.​—Mataio 18:15-17.

A riai mataniwin te ekaretia n ira ana Taeka te Atua. Ngkana a kunea bwa e boni bure teuare karaoa te bure ao e riai n anganaki te reirei ni kaetieti, ao te baere a a tia ni motikia, e na tia naba ni “kabaeaki i karawa.” Ma ngkana a kunea bwa e aki bure te aomata ao e na tia naba ni “bwara i karawa.” A na rangi n ibuobuoki kaetieti aika katauraoaki aikai n te tai are e a tei iai te ekaretia ni Kristian. E taku Iesu ni kaineti ma karaoani mooti aika kakawaki aikai: “Ike a botaki iai uoman ke teniman n arau, ao I mena naba i buakoia.”​—Mat. 18:18-20.