REIREI 01
E na Kangaa te Baibara ni Buokiko?
Ti bane ni kan ataa riki taekan te maiu, te rawawata, te mate, ao taai aika imwaira. Ti tabeaianga naba ibukini maiura ni katoabong, n aroni karekean te maiu ao ai karekean te utu ae kakukurei. A bati aika noria bwa e aki tii kaekai aia titiraki aika kakawaki ni maiuia te Baibara, ma e angania naba te taeka n reirei ibukini maiuia ni katoabong. N am iango, e kona ni buokiia aomata nako te Baibara?
1. Baikara titiraki tabeua aika kaekaaki n te Baibara?
A kaekaaki titiraki aika kakawaki aikai n te Baibara: E riki mai ia te maiu? Tera bukini menara ikai? E aera ngkai a rawawata aomata? Tera ae riki ngkana e mate te aomata? Ngkai a tangira te rau aomata, e aera ngkai e a korakora te buaka? Tera ae e na riki nakon te aonnaba n te tai ae imwaira? E kaungaira te Baibara bwa ti na ukeri kaekaan titiraki aikai, ao iai mirion ma mirion ake a noria bwa a kaekaaki raoi iai aia titiraki.
2. E na kangaa te Baibara ni buokira bwa ti na kukurei ni maiura?
E anganira te taeka n reirei te Baibara. N te katoto, e reiakinia utu aroia ni kukurei ni koaua. E tuangira arora ae riai ngkana ti rawawata ao arora ni kimwareirei n ara mwakuri ni kareketianti. Ko na reiakini ana reirei te Baibara ibukin titiraki aikai ao aika bati riki ngkana ti rinanon te boki aei. Ane ko na kakoauaa ae “te Koroboki ae Tabu ni kabane [kanoan te Baibara a] . . . manena.”—2 Timoteo 3:16.
E aki onea mwin te Baibara te boki aei. Ma e kaungako bwa ko na nenera te Baibara. Ngaia are ti kaungako bwa ko na wareki kiibu aika karinanaki n reirei aikai ao kabotaui ma baika ko reiakin.
REIAKINA AE BATI RIKI
Nora aron te Baibara ni buokiia aomata, arom n unga ni warekana, ao bukina ngkai ko riai ni karekea buokam bwa ko aonga n ota iai.
3. E kona te Baibara ni kairirira
Te Baibara kaanga ai aron te oota ae otamwaaka. E kona ni buokira ni karaoi motinnano aika raoiroi ao n atai baika a na riki n taai aika imwaira.
Wareka Taian Areru 119:105, ao maroroakin titiraki aikai:
Tera ana iango te tia areru aei ibukin te Baibara?
Tera am iango ibukin te Baibara?
4. E kona ni kaekai ara titiraki te Baibara
E noria te aine temanna bwa a kaekaaki n te Baibara ana titiraki ake e tabeaianga iai i nanon ririki aika bati. Kaota te TAAMNEI, ao maroroakin titiraki aikai.
N aron ae oti n te taamnei, baikara ana titiraki te aine aei?
E kangaa ni buokaki n reiakinan te Baibara?
E kaungaira te Baibara bwa ti na tititiraki. Wareka Mataio 7:7, ao maroroakina aei:
Baikara am titiraki aika e kona ni kaekai te Baibara?
5. Ko kona n unga ni warekan te Baibara
A bati aomata aika unga ni warekan te Baibara, ao a buokaki iai. Kaota te TAAMNEI, ao maroroakin titiraki aikai.
N aron ae oti n te taamnei, tera aia iango ngkoa rooro n rikirake ibukin te wareware?
E ngae ngke a aki bati ni kani wawareware, ma e aera ngkai a kani wawareka te Baibara?
E taku te Baibara bwa e kona n anganira te rongorongo ae e na kabebeteira ao te kantaninga. Wareka I-Rom 15:4, ao maroroakina te titiraki aei:
E anaaki nanom n ana berita te Baibara ao te kantaninga are iai?
6. A kona ni buokira tabemwaang n ota n te Baibara
A bati aika noria bwa i rarikini warekan te Baibara i bon irouia, e ibuobuoki naba maroroakinana ma tabemwaang. Wareka Mwakuri 8:26-31, ao maroroakina te titiraki aei:
Ti na kangaa n ota n te Baibara?—Nori kibuna 30 ao 31.
E kainnanoa buokana te I-Tiobia bwa e na ota n te Koroboki ae Tabu. A bati aomata ni boong aikai aika a kunea bwa e ibuobuoki maroroakinan te Baibara ma tabeman
A TAKU TABEMAN: “E kabanetai te reirei n te Baibara.”
Tera ngkoe am kaeka? Bukin tera?
KAKIMOTOTOANA
E anga taeka n reirei te Baibara ibukin te maiu ni katoabong, e kaekai titiraki aika kakawaki, ao e angania aomata te kabebetenano ao te kantaninga.
Kauring
Tera te taeka n reirei ae ti kona ni kunea n te Baibara?
Baikara titiraki tabeua aika e kaekai te Baibara?
Tera ae ko kan reiakinna man te Baibara?
NORI NABA AIKAI
Nora aroni manenan te taeka n reirei ae n te Baibara ni boong aikai.
“Ana Reirei te Baibara Bon te Wanawana ae Teimatoa” (Te Taua-n-Tantani Na. 1 2018)
Nora aron te Baibara ni buoka te mwaane are kabokorakora ma ana namakin mangke uarereke.
Neneri ana taeka n reirei te Baibara ibukin te maiu n utu.
“Aanga Aika 12 Ibukini Kanakoraoan te Utu” (Taratara! Na. 2 2018)
Reiakina aron te Baibara ni kaeta te iango ae kairua ae taabangaki bwa antai ae taua taekan te aonnaba.
E Aera Ngkai E Raoiroi te Reirei n te Baibara? —Ae Bwanin 3:14