Ko A Kairaki Bwa Ko Na Karaoa Ae Ai Aron Are E Karaoia Iesu?
“E noriia aomata aika uanao, ao E nanoangaiia, ba ai aroia tiibu aika akea aia tia kawakinia: ao E reireiia baika bati.”—MAREKO 6:34.
1. Bukin tera bwa e aki kamimi ngkai iai aomata tabeman aika a kaotiotii aroaroia aika moan te raoiroi?
MA NGKEKEI ni karokoa ngkai, a mwaiti aomata aika a a tia ni kaotiotii aroaro aika raraoi. Ko kona n ota bwa bukin tera ngkai a karaoa anne. Bon iai iroun Iehova ae te Atua te tangira, te akoi, te tituaraoi, ao aroaro tabeua riki aika ti tatangiri. A karikaki aomata bwa katotongan te Atua. Mangaia are ti kona n ota bwa bukin tera ngkai a mwaiti aomata aika a na kaota teutana te tangira, te akoi, te nanoanga, ao aroaro tabeua riki aika a kaotaki iroun te Atua, ao ai uaana nako naba ngkai angiia aomata a kaotia bwa bon iai mataniwin nanoia. (Karikani Bwaai 1:26; I-Rom 2:14, 15) Ko na boni bae n ataia bwa aomata tabeman a kai kaotii riki aroaro aikai, nakoia ake tabeman.
2. Baikara mwakuri tabeua aika raraoi ake a karaoaki irouia aomata tabeman, ae tao a taku iai bwa a katotonga aron Kristo?
2 Tao ko boni kinaia mwaane ao aine tabeman ake aia mwaan te kakawariia ke ni buokia aoraki, te nanoangaia mwauku, ke te anga bwaai n tituaraoi nakoia aomata aika kainnano. Iangoa naba aroia aomata aika e bati aia nanoanga ao a anga nanoia ni mwakuri n taabo ike a kawakinaki rebera iai, ke aia auti ataei aika akea aia karo, ke oo-n-aoraki, ke a kataia ni buokia aomata aika akea mwengaia, ke a birinako man kangaanga aika mwaiti n abaia. Tao tabeman mai buakoia a taku bwa a katotonga Iesu, are e karaoa te katoto ibukia Kristian. Ti wareware n taian Euangkerio bwa Kristo e kamaiuia aomata man aorakiia, ao e kaamwarakeia akana a baki. (Mareko 1:34; 8:1-9; Ruka 4:40) Kaotiotan te tangira, te akoi, ao te nanoanga iroun Iesu, bon kaotan “ana iango Kristo,” ni katotonga aron Tamana are i karawa.—1 I-Korinto 2:16, Baibara ni Katorika.
3. Tera ae ti riai n iangoia, bwa ti aonga ni kona n iangoa ana mwakuri aika raraoi Iesu n te aro ae riai?
3 Ma ko a tia n noria ae n taai aikai, a mwaiti aomata aika a a tia n ringaki nanoia n ana tangira ao ana nanoanga Iesu, ma a mwanuokina te bwai teuana ae kakawaki ae e irekereke ma ana iango Kristo? E kona n reke ataakin anne iroura ngkana ti karaua moa n nenera Mareko mwakorona 6. Ti wareka iai ae aomata a kairia aoraki nakon Iesu bwa a na kamaiuaki. Ni kiibu akana irarikina, ti reireiaki naba iai bwa ngke e noria bwa a baki aomata aika ngaa ma ngaa mwaitiia ake a kawaria, ao e kaamwarakeia Iesu n te kakai. (Mareko 6:35-44, 54-56) Kamaiuaia aoraki ao kaamwarakeaia aika baki boni kaotan te nanoanga ao te tangira ae korakora. Ma te koaua bwa bwaai aikai bon aaro ake a kakawaki riki kabonganaia iroun Iesu ni buokia aomata iai? Ao ti na kanga ni katotonga riki ana katoto ae kororaoi n aron te tangira, te akoi, ao te nanoanga, kioina ngkai e katotonga aroaron Iehova iai?
Kairaki bwa E na Buoki Bwaai n Taamnei Aika Kainnanoaki
4. Baikara bwaai ake a riki n te tai are e taekinaki ni Mareko 6:30-34?
4 Iesu e nanoangaia aomata ake a mena irarikina ibukin bwaai aika a kainnanoi n te itera n taamnei. Moan te kakawaki riki bwaai aika a kainnanoaki aikai, nakon kainnanoakin bwaai n te itera n rabwata. Iangoa te rongorongo ae ni Mareko 6:30-34. Te bwai are e taekinaki iai e riki i aon mataniwin te bike n Namani Kariraia, ni uakaan ma te toa ae te Riao n 32 C.E. A unga nanoia abotoro, bwa iai bukina ae riai. A tibwa oki man te mwananga ae abwabwaki ao a kawara Iesu bwa a ingainga nanoia ni kan kaongoraea rongorongon mwanangaia. Ma e mena ikekei te koraki ae uanao. A rangi ni mwaiti, n te aro ae e a aki reke aia tai Iesu ma ana abotoro n amwarake ke ni motirawa. E tuangia abotoro ni kangai Iesu: “Kam na nako n te rereua ni kaokoroingkami, ao kam na motiki rawami teutana iai.” (Mareko 6:31) A toka n te booti tao n te tabo ae kaani ma Kaberenaum, ao a borau i nanon Namani Kariraia bwa a na kaea te tabo ae akea te aomata iai. Ma a biribiri irarikin mataniwin te bike aomata, ao a roko rimoa n te booti. Tera ae na karaoia Iesu ngkanne? E un ngke a roko aomata n urua ana motirawa? E bon aki!
5. Tera ana kaantaninga Iesu ibukia aomata aika uanao ake a kawaria, ao tera are e karaoia nakoia?
5 E ringaki nanon Iesu ngke e noria aomata aika uanao aika ngaa ma ngaa mwaitiia n ikotaki ma aoraki, aika a ingainga n tataninga rokona. (Mataio 14:14; Mareko 6:44) E korea ae kangai Mareko ngke e kamataata bwa tera ae karika te nanoanga iroun Iesu, ao te bwai are e karaoia iai: “E noriia aomata aika uanao, ao E nanoangaiia, ba ai aroia tiibu aika akea aia tia kawakinia: ao E reireiia baika bati.” (Mareko 6:34) Iesu e aki tii noriia aomata aika uanao. Ma e noria aomata n tatabemaniia nako aika iai kainnanoia n te aro n taamnei. Bon ai aroia tiibu aika a mae nako n akea te tia kairiri ae na kairiia nakon tawana aika maiureirei, ke ni kamanoiia. E ataia Iesu bwa mataniwi n Aaro aika akea aia tangira aika aongkoa a riai n riki bwa taani kairiri aika mwamwannano, a bon ribaia aomata aika mangori, ao a aki mwamwannanoa kainnanoia ni bwaai n taamnei. (Etekiera 34:2-4; Ioane 7:47-49) E na kaokoro teutana aroaron Iesu nakoia, bwa e na karaoa te kabanea n raoiroi ibukiia. E a moana reireinakiia taekan ana Tautaeka n Uea te Atua.
6, 7. (a) N aron are e kaotaki n taian Euangkerio, tera are e karimoa riki Iesu ngke e buokia aomata aika kainnano? (b) Tera ae kaira Iesu bwa e na tataekina te rongorongo ma n reireinia aomata?
6 Tara aron rinanin bwaai ake a riki iai, ao n aron taekan te rongorongo aei ni bokin te Baibara teuana, tera ae kaotaki bwa e kakawaki riki iai. Te rongorongo aei e koreaki iroun Ruka, are te tia katoki aoraki ae e rangi n tabeakina aron marurungin rabwataia aomata. “Ao aomata . . . a ri mwina [Iesu]: Ao e mwaneia n akoiia, ao E taekina uean te Atua nako ia, ao E kamaiuia ake a kai nanoia ni kani kamaiuaki.” (Ruka 9:11, ara bwai man reireiti; I-Korote 4:14) E ngae ngkai e aki karaoaki aei ni katoa tai are e karakinaki iai taekan te kakai, ma tera ae taekinaki moa n ana rongorongo Ruka are kairaki koreana? Te koaua ae Iesu e reireinia aomata.
7 E boraoi aei ma bwaai aika a katuuaki riki ni Mareko 6:34. Te kibu anne e katereterea bwa e kairaki Iesu bwa e na kaota moa ana nanoanga. E reireinia aomata, ni buoka kainnanoia n te itera n taamnei. Mai imwaina riki n ana mwakuri ni minita, Iesu e kangai naba: “I riai ba N na kaota rongorongon uean te Atua, ae raoiroi, nakoni kaawa nako: ba ngaia are I kanakomaiakaki iai.” (Ruka 4:43) Ma e ngae n anne, ti na kairua ngkana ti taku bwa Iesu e tii tataekina rongorongon te Tautaeka n Uea ibukina bwa boni ngaia tabena are e karaoia n te aro are e kabwara baena iai. E aki, ma ana nanoanga ae boto i aon tangiraia aomata, e kairia bwa e na tibwatibwa te euangkerio nakoia. Te kabanea n raoiroi are e kona ni karaoia nakoia aomata Iesu—n ikotaki naba ma aoraki, aomata aika taniaki irouia taimonio, raarikin, ao ake a baki—boni buokaia bwa a na ataa, ni butimwaea, ao n tangira te koaua ibukin ana Tautaeka n Uea te Atua. Moan te kakawaki te koaua anne ibukina bwa e kakawaki ana mwakuri te Tautaeka n Uea ni kaineti ma kateimatoan riain ao raoiroin uean Iehova, ao ibukin karekean te kakabwaia ae teimatoa n aki toki nakoia aomata.
8. Tera ana iango Iesu ibukin ana mwakuri n tataekina te rongorongo ao reiakinaia aomata?
8 Ana mwakuri Iesu n tataekina te Tautaeka n Uea boni ngaia bukina ae kakawaki are e roko iai i aon te aonnaba. Ngke e a kaani bane ana mwakuri ni minita Iesu i aon te aonnaba, e tuanga Birato ni kangai: “Te uea Ngai. I bungiaki i bukin ae te kaotiota te koaua, ao I roko i aon te aba, i bukin aei naba. Ane ana bwai te koaua ao e ongo bwanau.” (Ioane 18:37) Ti a tia n noria ni kaongora aika uoua aika a boreetiaki n te maekatin are imwain aei, bwa Iesu bon te aomata ae e korakora ana namakin—e mwamwannano, e kai kakawaraki, e mutiakinia aomata, e onimakinia, ao ae moamoa riki, e tatangira. Ti riai n ataa aroarona aikai ngkana te koaua bwa ti kan ataa ana iango Kristo. E kakawaki naba ataakin ae ana iango Kristo e nanona naba ataakin kakawakin ana mwakuri irouna, ae tataekinan te rongorongo ao reiakinaia aomata.
E Kaungai Nanoia Aomata bwa A na Tataekina te Rongorongo
9. Antai aika a riai ni moanibwaia tataekinan te rongorongo ao reiakinaia aomata?
9 Moanibwaiakin tataekinan te rongorongo ao reiakinaia aomata—aika bwaai aika a kaota te tangira ao te nanoanga—bon tiaki bwaai aika a riai ni karaoaki tii iroun Iesu. E kaungai nanoia taan rimwina bwa a na katotonga aron nanona, bwaai ake e karimoai, ao ana mwakuri. N aron anne, ngke Iesu e rineia ana abotoro aika 12, ao tera are a riai ni karaoia? E tuangira Mareko 3:14, 15 (BK): “Ao e rineia tengauni ma uoman (ake e arania ba Abotoro) ba a na riki ba raona, ao e na kanakoia ba a na reireinia aomata, ao e na angania te maka ni kanakoia taimonio.” (Ara bwai man reireiti.) Ko nora te bwai ae a moanibwaia abotoro?
10, 11. (a) Ngke e kanakoia abotoro, tera are e tuangiia Iesu bwa a na karaoia? (b) Ngke a kanakoaki abotoro, ao tera te bwai ae katuuaki riki iai?
10 Imwin tabeua te tai, Iesu e kariaia abotoro aika 12 aikai bwa a na kamaiuia aoraki tabemwaang ma ni kanakoia taimonio. (Mataio 10:1; Ruka 9:1) Ao ngkanne, e a manga kanakoia nakoia “tiibu ake a bua ake ana utu Iteraera.” Tera ae a na karaoia? E kairiia ni kangai Iesu: “Ao ngkana kam nakonako, ao kam na reirei, ni kangai, E a kan roko uean te Atua. Kam na kamaiuia akana aoraki, kaitiakiia akana rebera, kautiia maate, kanakoia taimonio.” (Mataio 10:5-8; Ruka 9:2) Ao tera are a karaoia? “Ao uakekei a nako n [1] reireiia aomata ba a na rairi nanoia. Ao [2] a kanakoia taimonio aika bati, ao a kabiriia aoraki aika bati n te bwa, ao a kamaiuia.”—Mareko 6:12, 13.
11 Ibukina bwa e aki taekinaki moa te anga reirei n rongorongo ni kabane, e kairua ngkanne taekinan ae e kaotaki n te rongorongo i eta bwa boni ngaia ae e riai ni karimoaki riki, ke bukina ae a riai ni karaoaki bwaai? (Ruka 10:1-9) Ti aki riai ni kaakea bongan mwaitin te tai are e taekinaki moa iai te anga reirei imwain ae katokakin te aoraki. Iangoa ae kaotaki ni kiibu akana irarikin te rongorongo aei. Teutana te tai imwain kanakoaia ana abotoro aika 12, e ringaki nanon Iesu ngke e taratara aroaroia aomata aika kananoanga. Ti wareka ae kangai: “Ao E nakonako Iesu ni kaawa ni kabane ma maeka nako, ao E reirei ni maneabaia, ao E tataekina euangkerion uean te Atua, ao E katoki aoraki ni kabane ma mamara ni kabane. Ao ngke E noriia aomata aika bati, ao E nanoangaiia, ba a rawawata, ao a mae nako, n ai aroia tiibu aika akea te tia kawakinia. Ao E taku nakoia ana reirei, E boni karuonako te tai, ma a karako taani makuri. Ma ngaia ae kam na butia Uean te tai ba E na kanakoia taani makuri nakon ana tai.”—Mataio 9:35-38.
12. Tera riki bukina ae a karaoi kakai Iesu ao abotoro?
12 Ni menana irarikia, abotoro a kona n reireiniia taekan ana iango Kristo. A namakinna bwa ngkana a kani kaota te tangira ao te nanoanga ni koaua nakoia aomata, a riai n tataekina te rongorongo nakoia ma n reireiniia taekan te Tautaeka n Uea—bwa bon aia mwakuri teuana ae kakawaki riki mai buakon mwakuri aika raraoi ake a na karaoi. N aron anne, e bati riki uaan aia mwakuri aika raraoi n te itera n rabwata n aron kamaiuaia aomata man aorakiia, nakon tii buokaia aomata aika kainnano. Tao n aron ae ko ataia, aomata tabeman a na anaaki nanoia ni kamaiuan taian aoraki, ao kaamwarakeaia aomata n te kakai. (Mataio 4:24, 25; 8:16; 9:32, 33; 14:35, 36; Ioane 6:26) Ma ae kakawaki riki nakon buokaia aomata ni kainnanon rabwataia, bwa mwakuri aikai a boni kairia aomata bwa a na kakoaua Iesu bwa Natin te Atua, ao “te burabeti” are e taetae ni burabetiaki iroun Mote.—Ioane 6:14; Te Tua-Kaua 18:15.
13. Tera ana mwakuri “te burabeti” are e na roko, ae e kateretereaki n Te Tua-Kaua 18:18?
13 Tera ae kakawaki ae kaotaki n atongakin Iesu bwa “te burabeti” arei? Uringnga, bwa tera te mwakuri ae kakawaki ae burabetinaki ibukin teuanne? E na tanoata taekan “te burabeti” ibukina bwa e kamaiuia aomata man aorakiia ke e kaamwarakeiia aomata aika baki n te kakai? E burabetina ae kangai Te Tua-Kaua 18:18: “N na kateirakea te burabeti temanna nako ia mai buakoia tariia, ae ai arom [are Mote]; ao N na karin au taeka i nanoni wina, ao e na atongi nako ia bwaai ni kabane aika N na tuangnga.” Mangaia are ngke abotoro a tabe n reiakina aron karekean ao kaotiotan te mwamwannano, a noria naba bwa a riai ni kaotiota ana iango Kristo irouia n te aro ae a na tataekina te rongorongo ma n reiakinia aomata. Boni ngaia te kabanea n raoiroi ae a na kona ni karaoia ibukia aomata. Bwa n te aro anne, aomata aika aoraki ao a kainnano a kona ni karekei kakabwaia aika a na teimatoa n aki toki, ao tiaki inanon te tai ae uarereke n aron uarereken maiun te aomata, ke aika a reke man te amwarake teutana.—Ioane 6:26-30.
Karekea Ana Iango Kristo ni Boong Aikai
14. Tera aron irekereken ana iango Kristo ma ara mwakuri n tataekina te rongorongo?
14 Bon akea ibuakora ae na taekinna bwa e a tii kona n reke ana iango Kristo n te moan tienture—are e kaineti nakoia Iesu ma taan rimwina ake rimoa ngke e kororeta te abotoro Bauro ni kangai: “Iai ana iango Kristo iroura.” (1 I-Korinto 2:16, BK) Ao ti kukurei ni kaotia bwa ti bae n tataekina te euangkerio ma ni kakiritiania botannaomata. (Mataio 24:14; 28:19, 20) Ma e ngae n anne, e raoiroi ngkana ti bon iangoia raoi bwa tera bukina ngkai ti karaoa te mwakuri anne. Ti aki riai ni karaoia, tii ibukina bwa ti taku bwa ti bae iai. Bukina ae kakawaki riki ae ti waakina te mwakuri ni minita moa, bon tangiran te Atua iroura, ao ngkana ti na katotonga raoi Iesu, ti riai ni kairaki n nanoangakiia aomata iroura bwa ti na tataekina te rongorongo ma n anga reirei.—Mataio 22:37-39.
15. Bukin tera moan te kakawaki te nanoanga ni kaineti ma ara mwakuri ni minita imataia aomata?
15 Te koaua bwa e aki bebete n taai nako nanoangakiia aomata aika e kaokoro aia koaua ma ngaira, ao e moamoa riki ngkana ti kaitiboo ma aomata aika a aki bwerengaki n te rongorongo, a rarawa iai, ke a kairiribai. Ma e ngae n anne, ao ngkana e bua tangiraia ao nanoangakiia aomata iroura, e kona naba ni bua iai teuana bukin waakinan te mwakuri ni minita ni Kristian ae kakawaki. Ti na kanga ngkanne ni karikirakea riki te nanoanga iroura? Ti kona ni kataia n taraia aomata n te aro are e taraiia iai Iesu, ae kaanga aomata aika a “rawawata, ao a mae nako, n ai aroia tiibu aika akea te tia kawakinia.” (Mataio 9:36) Tiaki te koaua bwa anne ngkai aroia aomata aika mwaiti n taai aikai? A kaakiaki bongaia ao a kamatakiaki n te aro n taamnei irouia taani kawakin tiibu aika taani kairiri n Aro aika kewe. Ibukin anne, a aki ataa te kairiri ae mena n te Baibara ao taekan te Baretaiti ae e na karokoaki iroun ana Tautaeka n Uea te Atua nakon te aonnaba, n te tai ae e a kaan rokona ngkai. A kaitara ma kangaanga aika katoa bong n noraki—n aron te kainnano, te aki nakoraoi n te utu, te aoraki, ao te mate—n akea te kaantaninga ibukin te Tautaeka n Uea ae na buokia. E a tia n reke iroura ae a kainnanoia: ae te euangkerio ae kakamaiu ae taekan ana Tautaeka n Uea te Atua ae e a tia ni kateaki i karawa!
16. Bukin tera ngkai ti riai n tangiria n tibwatibwa te euangkerio nakoia aomata tabemwaang?
16 Ngkana ko iangoi bwaai n taamnei aika kainnanoaki irouia aomata aika mena irarikim, tiaki te koaua bwa e kairaki nanom iai bwa ko na kakorakorako ni karaoa am kabanea n raoiroi ni kaongoiia taekan ana kaantaninga te Atua ae boto i aon te tangira? Eng, te mwakuri ae ti karaoia, bon te mwakuri n nanoanga. Arora ni kaotiota te atataiaomata n ai aron Iesu e na bon noraki n tein bwanara, matara, ao arora n anga reirei. Bwaai aikai ni kabane a na karika ara rongorongo bwa te bwai ae e na anaa riki nanoia aomata ‘aika a raoiroi n anganaki te maiu are aki toki.’—Mwakuri 13:48, NW.
17. (a) Baikara kawai tabeua aika ti kona ni kaota iai tangiraia ao nanoangakiia aomata tabemwaang iroura? (b) Bukin tera bwa e aki riai bwa ti na rinea tii teuana mai buakon karaoan mwakuri n ibuobuoki, ke karaoan te mwakuri ni minita imataia aomata?
17 Te koaua bwa te tangira ao te nanoanga ae inanora a riai ni kaotiotaki n anuani maiura ni kabane. E nanonaki naba iai akoakiia aomata aika a nakobuaka maiuiia, aoraki, ao raarikin—ae ti na karaoa ae ti kona ibukin kabebetean rawawataia. E nanona naba kabebetean rawawatan nanoia aomata akana a mate aia koraki aika tangiraki irouia, n ara mwakuri ao n ara taetae nikawai nakoia. (Ruka 7:11-15; Ioane 11:33-35) E ngae n anne, kaotiotan te tangira, te akoi, ao te nanoanga n aaro aikai, e aki riai n riki bwa ara waaki ae kakawaki iroura ae ti waakina iai karaoan mwakuri aika raraoi, n aron are a karaoia aomata tabemwaang aika a kani buokia aomata. Moan te kakawaki riki teimatoan uaan te kekeiaki ae boto i aon aroaro aika mairoun te Atua aikai, ma a kaotiotaki rinanon buokan te mwakuri ni Kristian ae tataekinan te rongorongo ao reiakinaia aomata. Uringa ana taeka Iesu ibukia mataniwi n te Aro n Iutaia: “Kam anganga kabwian ami bwai, are te minte ma te aneto ma te kumino, ao kam katuku bwaai aika bongana riki i buakon ana taeka te Atua, are te kaeti raoi taeka, ma te nanoanga, ma te onimaki: e bon riai te karaoi baikai, ao te aki kaki baikekei.” (Mataio 23:23) Iesu e bon aki rinea teuana mai buakon itera aika uoua—are buokaia aomata ni kainnanon rabwataia n te itera teuana, ke reiakinaia taekan bwaai n taamnei aika kakamaiu. Iesu, e karaoi itera aika uoua aikai. Ma e ngae n anne, e teretere bwa e moanibwaia riki ana mwakuri n anga reirei, bwa te ibuobuoki ae raoiroi are e karaoia iai, bon te ibuobuoki ae na teimatoa n aki toki.—Ioane 20:16.
18. Tera ae ti riai ni kairaki iai bwa ti na karaoia, ngkai ti a tia n nenera aron ana iango Kristo?
18 Ai korakora ra te kaitau ae ti riai ni kaotia nakon Iehova ngkai e a tia ni kaota ana iango Kristo nakoira! Rinanon taian Euangkerio, ti kona n ataa riki ana iango, ana namakin, aroarona, ana mwakuri, ao bwaai ake a karimoaki riki iroun te aomata ae te kabanea ni kakannato ae e a tia ni maiu i aon te aonnaba. Bon tabera bwa ti na wareka, n iaiangoi, man ni kamanenai bwaai aika a kaotaki n te Baibara ibukin Iesu. Uringnga, bwa ngkana ti na katotonga raoi aron Iesu, ti riai moa ni karaoa ara kabanea n raoiroi n aroia aomata aika a aki kororaoi, bwa ti aonga ni kona n iango, n namakin, ma ni karaoi moti n nano, n ai aron are e karaoia. Mangaia are ti bia kamatoai riki nanora bwa ti na karikirakea ma ni kaotiota ana iango Kristo iroura. Bon akea riki te aro ae raoiroi ibukin te maiu, akea riki te aro teuana ae raoiroi ae ti na karaoia nakoia aomata, ao akea riki te kawai teuana ae raoiroi ibukira ao ibukia aomata tabemwaang bwa ti na kona ni kaania riki teuare e kororaoi ni katotonga aron Atuara ae tatangira ae Iehova.—2 I-Korinto 1:3; Ebera 1:3.
Ko na Kanga ni Kaeka?
• Tera ae kaotaki n te Baibara ni kaineti ma aron Iesu ni mwakuri nakoia aomata aika iai kainnanoia?
• Tera ae katuuaki riki iroun Iesu ngke e kairia taan rimwina?
• Ti na kanga ni kona ni kaotiota “ana iango Kristo” n ara mwakuri?
[Taamnei n iteraniba 23]
[Taamnei n iteraniba 24]
Tera te mwakuri ae te kabanea n raoiroi ae te Kristian e kona ni karaoia ibukia aomata tabemwaang?