Ko Kona N Teimatoa N Itiaki N Te Aroaro Ni Maiu Ae Riai
“Ba bon tangiran te Atua te baei, ae tauan ana tua i roura: ao a aki rawawata ana tua.”—1 IOANE 5:3.
1. Tera te kaokoro ae noraki ni boong aikai n aroaroni maiuia aomata?
RIMOA rimoa, te burabeti are Maraki e a kairaki bwa e na taetae ni burabetina te tai are e na rangi ni mataata iai norakin korakoran te kaokoro imarenan aroaroia ana aomata te Atua ao aroaroia aomata ake a aki beku iroun te Atua. E korea ae kangai te burabeti: “Ao ane kam na oki iai ma n ata ae raoiroi ma ae buakaka, ma n ata ae toro iroun te Atua ma ae aki toro i Rouna.” (Maraki 3:18) E a tabe ni kakoroaki bukin te taetae ni burabeti aei ngkai. Tauan ana tua nako te Atua, n ikotaki ma tua ni kaineti ma te itiaki n aroaron te maiu ae riai, bon te kawai ae wanawana ma n eti. Ma e ngae n anne, e bon aki bebete karaoana n taai nako. Ni kaineti ma bukina ae riai, Iesu e taekinna bwa Kristian a riai ni kakorakoraia ngkana a na kamaiuaki.—Ruka 13:23, 24.
2. Baikara kariri aika a karika te kangaanga nakoia tabeman n aroia n teimatoa n itiaki n te aroaro ni maiu ae riai?
2 Bukin tera ngkai e rangi ni kangaanga kateimatoan te itiaki n te aroaro ni maiu ae riai? Bukina teuana bwa bon iai taiani kariri. Taani bitineti ake a kakaraoi bwaai ni kaki botu a kaota te wene ni bure bwa kaanga te bwai ae rangi ni kamaiu ma ni kakukurei, ae e kakaraoaki irouia aomata aika wanawana, ma taani bitineti aikai a rawa ni kaota uaana aika aki raoiroi. (I-Ebeto 4:17-19) N angiin te tai e kaotaki te wene n taanga imarenaia aomata aika tiaki raoi taanga ni mare. N taai nako birim ao kaongora n te TV a kaokaota te wene n taanga ae karaoaki irouia taanga ake a bon tibwa kaitiboo ao a iangoa aia iraorao arei bwa tii te bwai n takaakaro. N angiin te tai, te wene n taanga aei e aki raonaki n te tangira ao te uaia n ikarinerine. A mwaiti aomata ake a tataneiai n nonora te katei aei ma ngke a uarereke. Irarikin anne, a imanonoaki aomata irouia raoraoia bwa a na katotonga te aroaro ni maiu ae kariaiakan katokakin kukurein nanom ae e tataneiai te aba iai ni boong aikai, ao n taai tabetai aomata aika a rawa iai a kakanikoaki ke ni kabuakakaki.—1 Betero 4:4.
3. Tera bukina ae kaain te aonnaba aika mwaiti a na boni bae n irekereke ma te wene ni bure?
3 Aia namakin aomata e karika naba te kangaanga n aron bwabwainan te itiaki n te aroaro ni maiu ae riai. Iehova e karikiia aomata ma n angania namakinan te kani wene n taanga, ao e kona n rangi ni korakora te namakin aio. Nanora ni kani karaoa te bwai teuana e rangi n reitaki ma bwaai ake ti iangoi, ao te wene ni bure e reitaki ma te aro n iango ae aki boraoi ma ana iango Iehova. (Iakobo 1:14, 15) N te katoto teuana, mwiin te kakae ae e a tibwa boretiaki n te British Medical Journal, e kaotia bwa a mwaiti aomata aika a moan wene n taanga, bwa a tii kan ataia bwa tera aron te wene n taanga. Tabeman riki a kakoauaa bwa angiia aomata aika bon roroia, a kakaraoa te wene n taanga, mangaia are a tangiria naba bwa a na aki tiku ni kibono. Tabeman riki a taku bwa a mwaninga nako ni korakoran nanoia ni kani karaoia, ke “a manging teutana.” Ma ngkana ti tangiria ni kani kakukureia nanon te Atua, ao e riai ni kaokoro ara iango. Te aeka n iango raa ae e na buokira bwa ti na teimatoa n itiaki n te aroaro ni maiu ae riai?
Kamatoa Am Koaua
4. Tera ae ti riai ni karaoia bwa ti aonga n teimatoa n itiaki n te aroaro ni maiu ae riai?
4 Ngkana ti na kateimatoa te itiaki n te aroaro ni maiu ae riai, ti riai n ataia bwa e manena maiuakinan anne. E boraoi anne ma are e koreia te abotoro Bauro nakoia Kristian ake i Rom: “Kam na riki n ata Nanon te Atua, are raoiroi, are kakukurei, are koro-raoi.” (I-Rom 12:2) Ataakin ae e manena bwainan te itiaki n te aroaro ni maiu ae riai, e nanona ae bati riki nakon ae tii ataakin ae e tabuaki te wene ni bure n ana Taeka te Atua. E nanona naba ataakin bukin ae e tabuaki te wene ni bure, ao kabwaia aika a na reke iroura ngkana ti rarawa nako iai. Bukina tabeua a a tia ni maroroakinaki n te kaongora are imwain aei.
5. Tera bukina ae kakawaki, are a riai iai Kristian ni kan teimatoa n itiaki n te aroaro ni maiu ae riai?
5 Ma te anga ae moan te kakawaki, ae Kristian a na kararoa iai te wene ni bure, e bon reitaki ma ara iraorao ma te Atua. Ti a tia n reireiaki bwa e atai bwaai aika a moan tamaroa ibukira. Tangirana iroura e na buokira bwa ti na ririba te buakaka. (Taian Areru 97:10) Te Atua bon te tia Anga “angabwai aika raraoi ma bwaai n tituaraoi aika moan raraoi.” (Iakobo 1:17) E bon tangirira. N ara ongeaba irouna, ti kaota tangirana iroura ao ara kaitau ni bwaai ni kabane ake e a tia ni karaoi ibukira. (1 Ioane 5:3) Ti aki tangiria ni karaoa te bwai teuana ae e na karawawata nanon Iehova n te aro ae ti na urua ana tua aika raraoi. (Taian Areru 78:41) Ti aki kani karaoa te mwakuri teuana ae e na karika kabuakakan taromauriana ae raoiroi ma n eti. (Tito 2:5; 2 Betero 2:2) Ngkana ti teimatoa ni bwaina te itiaki n te aroaro ni maiu ae riai, ao ti na kakukureia nanon Teuare Moan te Rietata iai.—Taeka N Rabakau 27:11.
6. Tera buokara man kamataatan nanora i aon te aroaro ni maiu ae riai, nakoia aomata tabemwaang?
6 Ngkana ti a tia ni motika nanora bwa ti na teimatoa ni bwaina te itiaki n te aroaro ni maiu ae riai, ti na kamanoaki riki ngkana ti taekina ara koaua anne nakoia aomata tabeman. Kaongoia aomata bwa bon ana toro Iehova ae te Atua ngkoe, ao e matoatoa nanom ni kani kawakina ana kaetieti aika rietata. Bwa boni maium, rabwatam, ao am rinerine ae ko karaoia. Tera te bwai ae kakawaki ae irekereke iai? Am iraorao ae kakawaki ma Tamam are i karawa. Mangaia are katereterea bwa ko rawa ni kariaia bitakin am iango ni bwainan te aroaro ni maiu ae riai. Ninikoria n tei ibukin te Atua n te aro ae ko boutokoa ana reirei. (Taian Areru 64:10) Tai maamaa ni maroroakin am koaua ibukin te aroaro ni maiu ae riai ma aomata tabemwaang. Taekinan koaua aikai e kona ni kakorakorako riki, ni kamanoko, ao ni kaungai nanoia aomata tabeman bwa a na kakairi iroum.—1 Timoteo 4:12.
7. Ti na kanga ni kamatoai nanora bwa ti na teimatoa n itiaki n te aroaro ni maiu ae riai?
7 Ngkana ti a tia ni motika nanora bwa ti na bwabwaina te aroaro ni maiu ae riai ae rietata riki ao ti a tia naba ni kaongoongo, ti riai ngkanne ni karaoi babaire aika a na buokira ni kakaonimaki iai. Te anga teuana ibukin karaoan anne, ngkana ti taratara raoi n aron rineaia aomata ake ti na iraorao ma ngaiia. “Ko na nakonako ma aomata aika rabakau, ao ko na rabakau iai,” e taku te Baibara. Iraorao ma aomata aika titeboo aia iango ma ngkoe i aon te aroaro ni maiu ae riai; a na kakorakorako riki. E kangai naba te kibu aei: “Ma e na maraki te aomata ngkana e raonia akana nanobaba.” (Taeka N Rabakau 13:20) N aron ae ko kona, kararoako mairouia aomata aika a kamamaara nanom.—1 I-Korinto 15:33.
8. (a) Bukin tera ngkai ti riai ni kaamwarakea ara iango i aon bwaai aika raraoi? (b) Baikara bwaai aika ti riai n rarawa nako iai?
8 Ti riai naba ni kaamwarakea ara iango i aon bwaai aika koaua, a manena, a raraoi, a itiaki, a riai n tangiraki, a raraoi taekaia, ao aika a riai ni kamoamoaki. (I-Biribi 4:8) Ti karaoa aei n te aro ae ti karaurau n rinei bwaai aika ti na mataku iai, ao bwaai ake ti na wareki, ao anene ake ti na ongoraei. Tataekinan ae booki aika a karakina te wene ni bure a aki kona n roota nanon te aomata n te aro ae aki raoiroi, bon ai aron tataekinan ae booki aika raraoi a aki kona ni kaira nanon te aomata n te aro ae raoiroi. Uringnga bwa aomata aika a aki kororaoi a kai bwaka n te wene ni bure. Mangaia are booki, maekatin, birim, ao anene ake a karika namakinan te kani wene n taanga, a na karika tangiran ae buakaka iroum, ao naano aikai a kona ni kaira te aomata nakon te bure. Ti riai ni kaona ara iango n te rabakau mairoun te Atua ngkana ti na teimatoa ni bwaina te itiaki n te aroaro ni maiu ae riai.—Iakobo 3:17.
Mwaneka ake A Kairiri Nakon te Wene ni Bure
9-11. N aron ae e karakinaki iroun Toromon, baikara mwaneka ake a kaira te rorobuaka temanna nakon te wene ni bure?
9 N taai nako, bon iai mwaneka tabeua aika a mataata ake a kona ni kairiri nakon te wene ni bure. Ngkana e a moana touakin mwaneka aikai te aomata, ao e na rikirake ngkanne ni kangaanga irouna te kerikaki mai iai. Taraa aron kabwarabwaran aio n Taeka N Rabakau 7:6-23. Toromon e nora “te rorobuaka ae akea ana ataibwai” ke e aki raoiroi nanona. Te rorobuaka aei e “ri nanon te kawai i rarikin ana maninganinga neierei [ae te aine ae e kakabooaki], ao e toua te kawai nakon ana auti neierei; n te airo, n te tairiki.” Boni ngaia anne ana moan kairua. N tain te airo, e kamwaninganakoia oin ‘nanona,’ tiaki nakon te kawai teuana, ma nakon te kawai are e bon ataia ae e memena iai te aine ae e kakabooaki.
10 Ngkanne, ti wareka ae kangai: “Ao noria, e bo ma ngaia te aine temanna ae kunnikaia ni kunnikain te aine ae te tia wewene ni bure, ae nanowanawana.” Ngkanne, e a nora neiei! E kona n tannako mai iai ma ni manga okira ana auti, ma e a kangaanga riki karaoan anne n te tai anne, ao e a moamoa riki ngkai e boni mamaara nanona ni kan taua te aroaro ni maiu ae riai. E rabwatia neierei, ao e kaboria ma ngaia. Ngke e a tia teuarei ni butimwaea te kaboria mairoun neierei, e a manga ongora n ana taeka n anai nano: “Iai i rou karea ni kan raoi,” e taku. “I a tia ni kakoro bukin au taeka ni bau n te bong aei.” Karea ni kan raoi aikai a nanona te iriko maiu, te burawa, te oera ao ai te wain. (Nakoaia Ibonga 19:5, 6; 22:21; Warekaia Iteraera 15:8-10) Ngke e taekin bwaai aikai, tao e kaotia nakoina bwa ngaia, bon te aine ae marurung n te itera n taamnei, ao tao e kaongoa naba iai bwa a bati amwarake ao moi aika raraoi n ana auti. “Kaaraki,” e butiia, “Ti na kabatia te inga ni kangaina; ti na maie n taian inga.”
11 E aki kangaanga ataakin tokin te karaki anne. “E anaa nanona ni kabatiani karauan te taetae i rouna.” E a iria naba teuaei nakon mwengana, “n ai aron te kao ae nako ni neni kamateana,” ao “n ai aron te man ae kibakiba ae biri nakon te ao-ni-katatai.” E motika ana karaki Toromon n taeka aika rawawata aikai: “Ao e aki ataia ba kabaneani maiuna te aro aei.” E reitaki maiuna iai, ibukina bwa “E nang kabuakakaia taani wene ni bure ao taani wene ni kimoa te Atua.” (Ebera 13:4) Ai korakorara te reirei aei nakoia mwaane ao aine! Ti riai n rawa n toui moan mwaneka ake a kaira te aomata n te kawai are e na karaoa te bwai ae e na aki kakukureia nanon te Atua.
12. (a) Tera ae nanonaki n te kibu n taeka ae “akea ana ataibwai”? (b) Ti na kanga ni kona ni karikirakea te aroaro ni maiu ae riai iroura?
12 Taraia bwa te rorobuaka are taekinaki n te rongorongo aei bon “akea ana ataibwai.” Taeka aikai a kaotia nakoira bwa ana iango, nanona, bwaai ake e tangiri, ana namakin, ao tiana are e uaiakinna inanoni maiuna, a bon aki boraoi ma ae tangiraki iroun te Atua. Mamaaran nanona ni kani kawakina te aroaro ni maiu ae riai e kairia nakon te kabuanibwai. Inanon taai aika a kamamate aikai aika “boong aika kaitira,” karekean te nanokorakora n tangira te aroaro ni maiu ae riai e kainnanoa te kekeiaki mwaaka. (2 Timoteo 3:1) Bon iai bwaai n ibuobuoki ake e katauraoia te Atua ibukira. E katauraoi botaki n te ekaretia ni Kristian ake a kaunga nanora bwa ti na toua te kawai ae eti, ao a botiira ma aomata tabeman ake a uaiakin tiia aika ti uaiakin naba. (Ebera 10:24, 25) Bon iai naba unimwaanen te ekaretia ake a kairira ma n reireinira kawain te raoiroi. (I-Ebeto 4:11, 12) Bon iai naba ana Taeka te Atua ae te Baibara iroura, ae e na kairira. (2 Timoteo 3:16) Ao n taai nako ti kona n tataro ni bubutii anganakira taamnein te Atua, ae e na buokira.—Mataio 26:41.
Reireiara ae Reke man Ana Bure Tawita
13, 14. E kanga te Uea ae Tawita n irekereke ma te bure ae rawawata?
13 Te kananokawaki bwa e ngae n anne, ma boni iai naba ana toro te Atua tabeman ake a tanoata taekaia ake a a tia naba ni karaoa te wene ni bure. Temanna mai buakoia nakai bon te Uea ae Tawita ae e a tia ni kakaonimaki ni beku iroun Iehova inanon ririki aika tatabe bwi. Bon akea te nanououa bwa e korakora tangiran te Atua irouna. Ma e ngae n anne, e rinanon te bure ae korakora. N ai aron te rorobuaka are e taekinaki iroun Toromon, iai naba mwaneka tabeua ake a kaira Tawita nakon ana bure, ao nakon kabatiaan riki ana kangaanga.
14 Tao 50 tabun ana ririki ni maiu Tawita n te tai anne. Ngke e tabe ni mena i taubukin ana auti ao e a nora naba Nei Bateteba ae te aine ae moan te tamaroa, ngke e tebotebo. E kakaea taekana ao akea bwa e a reke rongorongona irouna. E a kunea bwa buuna ae Uria, e ira buakon buakanan aia kaawa kaain Ammon ae Raba. E tuatua uotakin te aine anne Tawita nakon ana baareti, ao e wene ni bure ma ngaia. E a kabatiaaki riki te kangaanga imwina—ngke e a ataia neiei bwa e a bikoukou iroun Tawita. E kaantaningaia Tawita bwa e na boni bae ni wene ma buna Uria n te tairiki ngkana e oki, ao ngaia are e a kananako okina man te tabo ni buaka. Bwa ngkana e riki anne, ngkanne e na boni bukinaki Uria bwa taman natin Nei Bateteba. Ma e aki okira mwengana Uria. E korakora nanon Tawita ni kani karaba ana bure, mangaia are e a manga kanakoa Uria nako kaawan Raba ao e anganna te reta nakon mataniwin te taanga ni buaka, are e tuatua iai bwa e riai ni kateaki Uria n te tabo teuana are e na kai mate iai ngkana e boo te buaka. E a mate iai Uria, ao Tawita e a mare ma buna, imwain ae e na ataaki irouia aomata ae e boni bikoukou.—2 Tamuera 11:1-27.
15. (a) E a kanga ni kaotaki ana bure Tawita? (b) Tera are e karaoia Tawita ngke e boaaki n te aro ae rabakau iroun Natan?
15 N taraana, e nako raoi ana waaki Tawita ibukin karaban ana bure. Ngke a bwaka nako namwakaina tabeua ao e a bungiaki te tei—ae te nati te mwaane. Ngkana arona bwa e iangoa taekan te bwai aei Tawita ngke e otea te Areru 32, ao e teretere bwa e na bon aki rau mataniwin nanona iai. (Taian Areru 32:3-5) Ma ni koauana, e bon aki raba ana bure arei iroun te Atua. E kangai te Baibara: “E buakaka te baere e karaoia Tawita i matan Iehova.” (2 Tamuera 11:27) Iehova e kanakoa te burabeti are Natan, are e rabakau ni katereterea ana mwakuri Tawita nakoina. E kaota ana bure Tawita n te tai naba anne, ao e bubutii kabwaran ana bure mairoun Iehova. Nanona n raraoma ni koaua e karekea manga raoiakinana ma te Atua. (2 Tamuera 12:1-13) E aki rawa ni boaaki Tawita. Ma e kaota te nano ae e kabwarabwaraki n Taian Areru 141:5: “Ke e oreai te aomata ae raoiroi, bon te bwai n akoi; ao ke e boaai, bon te bwa ae kabiran atuu; e na tai rawa atuu nako iai.”
16. Tera te reirei ae matoatoa are e taekinna Toromon ibukin taiani bure?
16 Tao Toromon, are ana kauoman n nati Tawita ma Nei Bateteba, e iaiangoa te rongorongo ae kananokawaki aei are e riki inanoni maiun tamana. Imwina riki e korea ae kangai: “Ane karaba ana bure nako ao e na aki kabaia: Ma ane kaotioti ma ni kitan ao e na nanoangaki.” (Taeka N Rabakau 28:13) Ngkana ti irekereke ma te bure ae rawawata, ti riai n ira nanon te reirei mairoun te Atua aei, ae bon te reirei ae matoatoa nakoira, ao te reirei n ibuobuoki naba. Ti riai ni kaota ara bure nakon Iehova ma ni kawariia unimwaanen te ekaretia ni bubutii buokara mairouia. Uotaia teuana unimwaane ae kakawaki, boni manga kaetan aroia aomata ake a bwaka n te bure ae rawawata.—Iakobo 5:14, 15.
Te Nanomwaaka i aan Uaan te Bure
17. E ngae ngkai e kabwarai buure Iehova, ma tera are e aki kamanoira mai iai?
17 E kabwara ana bure Tawita Iehova. Bukin tera? Ibukina bwa Tawita bon te aomata ae kakaonimaki nakon ae raoiroi, ibukina bwa e nanoangaia aomata tabeman, ao ibukina bwa e raraoma ma nanona ni koaua. Ma e ngae n anne, e aki kamanoaki Tawita man uaan ana bure, aika kakaiaki. (2 Tamuera 12:9-14) Boni ngaia anne arora n taai aikai. E ngae ngkai Iehova e aki karawawataia aomata aika a raraoma man aia bure n te aro are e kabatiai aia kangaanga, ma e aki kamanoia man uaan aia bure. (I-Karatia 6:7) Uaan te wene ni bure tabeua, bon te buu-raure, te bikoukou ae aki tangiraki, aoraki aika a buti n te wene n taanga, ao buan te onimakinaki ma te mwiokoaki.
18. (a) Tera ana reirei Bauro nakoia kaain te ekaretia are i Korinto, ae a riai ni karaoia ibukin te wene ni bure are e karaoaki iroun temanna ae boni kaain aia kaawa? (b) E kanga Iehova ni kaota te tangira ao te nanoanga nakoia taani bure?
18 Ngkana ti a tia ni karaoa te bure ae rawawata, ao a kona ni kai bwara nanora ngkana ti karawawataki n uaan ara kairua. Ma e ngae n anne, ti aki riai ni kariaia te bwai teuana bwa e na tukira man te raraoma ni koaua, ao manga raoiakinara ma te Atua. N te moan tienture, Bauro e kororeta nakoia kaaini Korinto n tuatua bwa a na kanakoa man te ekaretia te aomata are e wene ni bure ni kabwaroua. (1 I-Korinto 5:1, 13) Ngke e raraoma ni koaua te aomata anne, ao Bauro e reireinia kaain te ekaretia ni kangai: “E riai ba kam na kabara ana bure ma ni kabebetea nanona.” (2 I-Korinto 2:5-8) Ti nora aron ana tangira ao ana nanoanga Iehova nakoia taani bure aika a raraoma ni koaua, n te reirei ae e kairaki koreana aei. A kakatonga ni kimwareirei anera ake i karawa ngkana e raraoma ni koaua te tia bure temanna.—Ruka 15:10.
19. Te nanokawaki ae riai ibukin te bure ae karaoaki, e kona n riki iai kakabwaia raa?
19 E ngae ngkana ti nanokawaki n i rekerekera n te bure teuana, ma te nanokawaki ae ti namakinna e kona ni buokira bwa ti na ‘tarataraira bwa ti na aki manga karaoa ae buakaka.’ (Iobi 36:21) Te koaua bwa uaan te bure aika kakaiaki a riai n tukira man manga karaoan te bure anne. Tawita e kabongana reireiana ae reke man ana bure arei bwa e na manga reireinia aomata tabemwaang iai. E kangai: “Ao N na reireiia akana bwaka kawaim nako; ao a na manga rairaki taani bure nako Im.”—Taian Areru 51:13.
E Reke te Kukurei man te Beku Iroun Iehova
20. Baikara kakabwaia ake a nako man iran nanon ana tua te Atua aika raraoi?
20 “A kabaia riki akana ongo ana taeka te Atua ma ni kawakinna!” e taku Iesu. (Ruka 11:28) Te ongeaba n ana kaetieti aika raraoi te Atua e karika te kukurei ngkai ao n aki totoki. Ngkana ti a tia ni bwaina te itiaki n te aroaro ni maiu ae riai, ao ti bia teimatoa iai n te aro ae ti kabonganai bwaai n ibuobuoki ni kabane ake a katauraoaki iroun Iehova ibukin buokara. Ngkana ti a tia ni bwaka n te wene ni bure, ao a bia unga nanora n ataakin ae Iehova e tauraoi ni kabwarai aia bure te koraki ake a raraoma ni koaua, ma ni kamatoai nanora bwa ti na aki manga karaoa te bure anne.—Itaia 55:7.
21. Kamanenan te reirei raa mairoun te abotoro Betero ae e kona ni buokira bwa ti na teimatoa n itiaki n te aroaro ni maiu ae riai?
21 E na mauna te aonnaba ae buakaka aei n te tai ae e a kan roko ngkai, n ikotaki ma aroarona ao ana mwakuri aika kamwara. Ti na kakabwaiaki ngkai ao n aki totoki naba ngkana ti teimatoa n itiaki n te aroaro ni maiu ae riai. E korea ae kangai te abotoro Betero: “Ma ngaia aei, ngkami aika kam tangiraki, ngkai kam kaantaningai baikai, ao kam na kakorakoraingkami ba kam aonga n noraki ba kam raoi, ao akea baarekami,. . . ngkai kam atai baikai, ngkai a tuai n roko, ao kam na tarataraingkami ba kam kawa ni bwaka man teimatoami n anakin nanomi n aia bure akana buakaka.”—2 Betero 3:14, 17.
Ko Kona ni Kabwarabwara?
• Bukin tera ngkai e kona ni kangaanga te teimatoa n itiaki n te aroaro ni maiu ae riai?
• Baikara aaro tabeua ake a na boutokoa nanora ni kani kakairi ni kaetieti aika a rietata riki ibukin te aroaro ni maiu ae riai?
• Baikara reirei ake ti kona ni karekei man ana bure te rorobuaka are e taekinaki iroun Toromon?
• Tera reireiara ibukin te raraoma ae reke man ana katoto Tawita?
[Taamnei n iteraniba 13]
Bon te bwai ni kamanomano ngkana ko kaongoia aomata tabeman, nanom ibukin te aroaro ni maiu ae riai
[Taamnei n iteraniba 17]
E kabwara ana bure Tawita Iehova ibukina bwa e raraoma ma nanona ni koaua