Bukin Tera Ngkai E Riai Ni Karikirakeaki Te Aroaro Ae Moanibaan Te Riai?

N TAAI ake a tibwa nako, iai te mwaane temanna ae te I-Tiaban ae arana Kunihito, ae e mwaing nakon te United States.a Tabeua te wiki imwin rokon teuaei iai, e kaitara ma te kangaanga ae e kona n uruana nakoana n ana tabo ni mwakuri. E karakina ae kangai Kunihito: “Ngke te mataniwi [n au tabo ni mwakuri] e titirakinai bwa I tauraoi ni mwiokoaki n te nakoa teuana, I namakinna bwa I a tau iai. Ma ibukina bwa I kaikawaaki bwa N na iaiangoa te nanorinano bwa te aroaro ae moanibaan te riai, ao I kaeka ni kangai: ‘I aki koaua raoi bwa I kona ni karaoa anne ke I aki, ma N na karaoa au kabanea n raoiroi iai.’ Ngke e ongo anne, au mataniwi ae te I-Amerika e iangoia bwa I aki kona uotau anne ao I aki koaua raoi bwa I kona ni karaoia. Ngke I ataa anne, ao I a tibwa ataia bwa I riai ni karaoi bitaki tabeua.”

Nei Maria, are e mena i New York City, bon te tia kaea te kuura ae rietata ae e bwaati arona n reirei ao e tauraoi n taai nako ni buokia raona n reirei naba. N taai tabetai, Juan, ae raon neierei n reirei, e kakaea buokana naba iroun Nei Maria. Ma e tangira naba neiei teuare, ao e kataia n anaa nanona bwa e na bwaka irouna. E ngae ngke Nei Maria e tangiria ni bwaina te aroaro ni maiu ae riai, ma e bwaka iroun Juan Nei Maria, ao e wene ni bure ma ngaia.

E boni kangaanga kaotiotan te aroaro ae moanibaan te riai ni boong aikai, ngkai ti maekana te aonnaba ae buakaka, ae a kakaokoro nako aroia ao kateia aomata iai. Mangaia are bukin tera bwa ko na karikirakea te aroaro ae moanibaan te riai iroum? Ibukina bwa te aroaro ae moanibaan te riai e kakukureia nanon te Atua, ao angiira, ti tangiria ni karekea akoara irouna.

Ana Taeka te Atua ae te Baibara, e kaungaia taani wareware iai bwa a na karikirakea te aroaro ae moanibaan te riai irouia. N aron anne, e korea ae kangai te abotoro Bauro: “Ngkana iai te raoiroi teuana [ae “te aroaro ae moanibaan te riai,” NW] ao ngkana iai te bwai ae e kamoamoaki te aba iai, ao kam na ururingi baikai n iangoi.” (I-Biribi 4:8) Ao te abotoro Betero e kaungaira bwa ti na “tataningamarau ni kabanea, ni karekea te raoiroi [ae “te aroaro ae moanibaan te riai,” NW] n ara onimaki.” (2 Betero 1:5) Ma tera raoi nanon te aroaro ae moanibaan te riai? Bon te bwai ae e kona n reiakinaki iai aomata n taabo n reirei? Ti na kanga ni kona ni karikirakea iroura?

[Kabwarabwara ae nano]