Riki Bwa Taan Tai Aika Kimwareirei!
“E boni karuonako te tai, ma a karako taani makuri. Ma ngaia ae kam na butia Uean te tai ba E na kanakoia taani makuri nakon ana tai.”—MATAIO 9:37, 38.
1. Tera ae e buokira bwa ti na botumwaaka ni kakaraoan nanon te Atua?
NGKANA ti iangoa te bong are ti babetitoaki iai n riki bwa ana toro Iehova temanna, e ngae ngke e a rangi ni maan ke ai tibwa tabeua te ririki n nako, ma tao n ara iango, ai aron te bwai ae riki ngkoananoa. Ao e a riki karaoiroan Iehova bwa te bwai ae ti moanibwaia riki i nanoni maiura are e a tia ni katabuaki. Ngke ti kakarekea ara tai ni buokia aomata tabeman n ongora ma ni butimwaea rongorongon te Tautaeka n Uea, ti rangi n tabeakina riki ara beku iroun Iehova ae kakimwareirei. (I-Ebeto 5:15, 16) Ni karokoa te bong aei, ti noria bwa e rangi n tawe te tai, ngkana ti tabetabe “n ana makuri te Uea ni kamaiti.” (1 I-Korinto 15:58) E ngae ngkai ti kaitiboo ma taiani kangaanga, ma e kakorakoraira riki te kimwareirei ae ti namakinna ni kakaraoan nanon Iehova.—Neemia 8:10.
2. Tera ae buoka karikirakean te kimwareirei ae ti namakinna ngkana ti buoka te mwakuri n tai ni kaikonaki?
2 Kioina ngkai Kristian ngaira, ti a tabe ni mwakuri n te bong n tai aei ae kaikonakaki. Iesu Kristo e kabotaua ikoikotakiia aomata aika a na maiu n aki toki, ma tain te tai. (Ioane 4:35-38) Kioina ngkai ti tabe ni buoka te mwakuri n tai aei, a na unga nanora ngkana ti kakaaea rongorongon aia kimwareirei Kristian ake rimoa, aika taan tai naba. Ti na rinanon bwaai aika tenua aika a kabatiaa te kimwareirei ae ti namakinna n te mwakuri n tai ae wawaakinaki ni boong aikai. Bwaai aikai bon (1) rongorongon te kaantaninga ae raoiroi, (2) nakoraoin ara kakaae, ao (3) arora ni waakina ara mwakuri n tai n te raoi.
A Kanakoaki bwa Taan Tai
3. Baikara bwaai ake a kimwareirei iai taan rimwin Iesu rimoa?
3 Ai korakora ra te bitaki ae riki ni maiuia taan tai akekei—ao e a moamoa riki ni maiuia ana abotoro Iesu aika kakaonimaki ake 11—n te ririki ae 33 C.E., n te bong are a kaea te maunga i Kariraia ike a kaitiboo iai ma Kristo are e a tia ni kautaki man te mate! (Mataio 28:16) Tao “taari aika nimabubua tabun” a botaki n te tai arei. (1 I-Korinto 15:6) A bon uringa raoi taekan te mwiokoaki are e angania Iesu n te tai anne. E tuangia ni kangai: “Kam na nako ni kakiritiania botanaomata ni kabaneia, ni babetitoiia nako nanon aran te Tama ma te Nati ma te Tamnei are Raoiroi; n reireiia ba a na kabane baike I tuangngkami n tauu.” (Mataio 28:19, 20) E ngae ngke iai te bwainikirinaki ae korakora, ma a namakina te kimwareirei ae bati man te mwakuri n tai, ngke a nora katean taian ekaretia ake a kaainaki irouia taan rimwin Kristo, n te tabo teuana ma teuana. Imwin tabeua te tai, ‘e a taekinaki te euangkerio i aonnaba ni kabane ake i aani karawa.’—I-Korote 1:23; Mwakuri 1:8; 16:5.
4. Tera aroia aomata ngke a kanakoaki taan rimwin Kristo?
4 Mai imwaina riki n ana mwakuri ni minita Iesu i Kariraia, e weteia ana abotoro ake 12 ao e kanakoia bwa a na tataekina te rongorongo ae: “E a kan roko uean te Atua.” (Mataio 10:1-7) E a tia naba n “nakonako Iesu ni kaawa ni kabane [ake i Kariraia] ma maeka nako, ao E reirei ni maneabaia, ao E tataekina euangkerion uean te Atua, ao E katoki aoraki ni kabane ma mamara ni kabane.” E nanoangaia aomata Iesu ibukina bwa “a rawawata, ao a mae nako, n ai aroia tiibu aika akea te tia kawakinia.” (Mataio 9:35, 36) E rangi n riingaki nanona iai ao ngkanne, e tuangia taan rimwina ni kangai: “E boni karuonako te tai, ma a karako taani makuri. Ma ngaia ae kam na butia Uean te tai [ae Iehova ae te Atua] ba E na kanakoia taani makuri nakon ana tai.” (Mataio 9:37, 38) Titeboo naba ana taratara Iesu ni kaineti ma kainnanoakia taan tai ngke e mena i Iutaia, ngke ai tii onoua riki ana namwakaina imwain banen ana mwakuri ni minita i aon te aonnaba. (Ruka 10:2) N taai aika uoua aikai, e kanakoia taan rimwina bwa a na mwakuri bwa taan tai ngaiia.—Mataio 10:5; Ruka 10:3.
Ara Rongorongo ae Taekan te Kaantaninga ae Raoiroi
5. Te aekaki n rongorongo raa ae ti tataekinna?
5 Kioina ngkai ana toro Iehova ngaira, ti kimwareirei ni butimwaea te kakao nakon te mwakuri n tai. Te bwai teuana ae kabatiaa te kimwareirei nakoira, bon te uouota rongorongon te kaantaninga ae raoiroi nakoia aomata aika rawawata ao a bwara nanoia. N aroia taan rimwin Iesu n te moan tienture, ti rangi ni kakabwaiaki ngkai ti mwiokoaki n tataekinan te euangkerio—ae rongorongon te kaantaninga ae koaua raoi—nakoia akana a “rawawata, ao a mae nako, n ai aroia tiibu aika akea te tia kawakinia”!
6. Tera te mwakuri ae a karaoia abotoro n te moan tienture?
6 N nukan te moan tienture, te abotoro Bauro e rangi n tabetabe n tataekina te rongorongo. Ao e rangi n uaana ana mwakuri n tai, bwa e taku ngke e kororeta nakoia Kristian ake i Korinto tao n 55 C.E.: “Ao I a manga tuangngkami, taari, te euangkerio are I taekinna nako imi, are kam kaki i nanomi naba, are kam tei naba iai.” (1 I-Korinto 15:1) Bon taan tai aika a tataningamarau ni mwakuri abotoro ao Kristian tabemwaang ake rimoa. E ngae ngkai te Baibara e aki kaotia bwa iraman abotoro ake a nori bwaai ake a riki n reitaki ma kamaunan Ierutarem n 70 C.E. ao a maiu imwina, ma ti bon ataia bwa te abotoro Ioane e teimatoa n tataekina naba te rongorongo 25 te ririki imwin anne.—Te Kaotioti 1:9.
7, 8. Tera te rongorongo ae taekan te kaantaninga ae raoiroi ae e a kaumakaki riki tataekinana ngkai irouia ana toro Iehova?
7 Imwina ao e a roko te tai are a a taua aroia iai aomata, mataniwi ni Krititentom are te rabwata are kabwaoua te koaua ae arana “te aomata are buakaka.” (2 I-Tetaronike 2:3) Ngke e a kaan tokin te ka 19 n tienture, te koraki ake a kataia ni katotonga aroaroia moan Kristian a a manga tabeka rongorongon te kaantaninga ae raoiroi, ao a a tataekina te Tautaeka n Uea. E koaua bwa man te moan tai are e boretiaki iai te maekatin aei (ae n Turai 1879), ao a kaotaki naba irarikin atuna taeka aikai “Katanoatakin Menan Kristo Ma Ngaira,” “Katanoatakin Ana Tautaeka n Uea Kristo,” ke “Tataekinan Ana Tautaeka n Uea Iehova.”
8 Ana Tautaeka n Uea te Atua i karawa e tei n 1914, ao e anganaki te mwaaka iai Iesu Kristo, ao ti a tabe ngkai ni kaumaka riki tataekinan rongorongon te kaantaninga ae raoiroi. Bukin tera? Ibukina bwa mai buakon kakabwaia ake a na reke man te Tautaeka n Uea, iai naba taekan kamaunan te waaki ae buakaka ae ngkai n te tai ae e a kaan rokona. (Taniera 2:44) Iai te rongorongo ae raoiroi riki nakon anne? Iai te kimwareirei ae korakora riki nakon are e na reke iroura man buokan tataekinan rongorongon te Tautaeka n Uea aei, imwain rokon te ‘rawawata are korakora’?—Mataio 24:21; Mareko 13:10.
Te Kakaae ae Nakoraoi
9. Tera ana kaetieti Iesu nakoia taan rimwina, ao tera aron butimwaean rongorongon te Tautaeka n Uea irouia aomata?
9 Te bwai teuana riki ae na kabatiaa te kimwareirei nakoira n te mwakuri n tai, bon nakoraoin ara kakaae ibukia aomata aika a kan riki bwa taan rimwin Kristo, ao manga iriia naba ma ngaira n te mwakuri n tai. N 31-32 C.E., Iesu e reireinia taan rimwina ni kangai: “Ao ngkana kam rin n te kawa teuana ke n te maeka teuana, ao kam na titiraki iai ba antai ae raoiroi iai.” (Mataio 10:11) A aki bane n raoiroi aomata, n aron are a kaotia n aroaroia n aki butimwaea rongorongon te Tautaeka n Uea. Ma e ngae n anne, taan rimwin Iesu a tataningamarau n tataekina te euangkerio n taabo nako ike a mena aomata iai.
10. E a kanga Bauro ni kakaeia aomata aika raoiroi?
10 Imwin maten ao manga-utin Iesu e a waaki nako ni korakora kakaeaia aomata aika raoiroi. Bauro e maroro ma I-Iutaia n aia maneaba, ao riki, ma aomata ake a mena n te makete are i Atenai. Ngke e kaotioti n te Areiobako are n aia kaawa I-Erene, “a nimnim ma ngaia aomata tabemang, ao a onimaki: ao i buakoia Rionutio are kaain te Areiobako temanna, ao te aine ae arana Tamariti, ao tabemang ma ngaiia.” N taabo nako ike e nako iai Bauro, e karaoa ae moanibaan te raoiroi n arona n tataekina te rongorongo “i mataia aomata, ao n auti nako.”—Mwakuri 17:17, 34; 20:20.
11. Baikara aaro aika a kabonganaki n ririki aika nako ibukin waakinan te mwakuri ni minita?
11 I nanon kabanean ririkin te ka 19 n tienture, Kristian ake a kabiraki a ninikoria ni kakaeia aomata aika raoiroi. N te kaongora ae atuna “Kabiraki Ibukin Tataekinan te Rongorongo,” te Zion’s Watch Tower ae bwain Turai/Aokati 1881 e kaota ae kangai: “Tataekinan te euangkerio . . . e waakinaki ngkai nakoia ‘aomata aika nimamannei’—ake a tauraoi ma ni kukurei n ongora, bwa e aonga n rikirake mai iai rabwatan Kristo, aika taan uaia n ababa ma ngaia.” Taan tai ibukin te Atua a aki toki ni kaitiboo ma aomata ake a otinako man aia tabo n taromauri, ma n angania beeba aika iai rongorongon te Baibara iai, ake a boretiaki ibukin kaungan nanoia aomata aika raoiroi bwa a na kan ongora riki. Ngke a a manga iangoa aron manenan te aro ni kaotioti aei, Te Taua-n-Tantani ae bwain Mei 15 1903, e kaungai nanoia taan tai bwa a na tibwatibwai beeba aikai “man te auti teuana nakon te auti teuana, n ingabongin taian Taabati nako.”
12. Ti kanga n tia ni kanakoraoa riki uaan ara mwakuri n tataekina te rongorongo? Kaota aron anne.
12 I nanon ririki aika tibwa nako, ti a tia ni karababa riki ara mwakuri ni minita n te aro are ti a kakawaria aomata n taabo tabeua, ao ai tiaki tii ni mwengaia. E noraki nakoraoin te aro aei n aaba ike a mwaiti aomata aika a aki bati n titiku ni mwengaia ngkana ti roko iai, ibukin tabeia ae bati n aia mwakuri ke mwamwanangaia ni kakibotu. Ngke e noria iruwa aika mwaiti te tia Kakoaua temanna i Engiran ma raoraona, bwa a toka nako i aon taiani bwati ngke a a tia ni kaki botuia ni bikiniki, e a reke iai aia iango bwa a na kakorakorai nanoia bwa a na totoka i aon bwaati aikai ma ni kataia n anganako katoton Te Taua-n-Tantani ao te Awake! nakoia bwaatintia. I nanon teuana te namwakaina, ao a anganako taian maekatin n te mwaiti ae 229. A taku: “Ti aki maaku n tataekina te rongorongo nakoia aomata ake a mena n taabo ni bikiniki, taabo ni bitineti, ke ni kaaitara ma kangaanga nako, bwa ti ataia bwa e memena i rarikira Iehova.” A karekea kawain te maekatin iai, a moana te reirei n te Baibara ma te aomata temanna, ao a uaia ni karaoa te beku n auxiliary bwaiania.
13. Tera te bitaki ni kaineti ma ara mwakuri ni minita, ae kainnanoaki ngkai n taabo tabeua?
13 Ngkai e a waakinako kakaeaia aomata aika raoiroi, e kona ni kainnanoaki n taabo tabeua, manga iaiangoan aron waakinan ara mwakuri ni minita. E ngae ngkai a mwaiti taani Kakoaua ake a taneiai n tataekina te rongorongo man te auti teuana nakon te auti teuana n ingabongin te Taabati, ma n taabo tabeua, e noraki bwa e aki rangi n nakoraoi kakawarakiia aomata n te moaningabong, ibukina bwa a tuai n uti aomata. Ngkai a a bita aia babaire, ao a mwaiti taani Kakoaua ake a waakina aia kakaae n te bwakantaai, tao imwin bwaran aia botaki ni Kristian. E rangi n nakoraoi te kakaae aei. N te ririki are nako, e a raka mwaitiia taan uarongorongoa te Tautaeka n Uea, n te mwaiti ae 2.3 te katebubua. E neboaki iai Uean te tai, ao e karika te kimwareirei nakoira.
Kakaean te Rau n te Mwakuri n Tai
14. Tera aroarora ae ti na bwainna ngkana ti tataekina ara rongorongo, ao bukin tera?
14 Bukina riki teuana ae ti kimwareirei iai, e reitaki ma aroarora ni kaotiota kani kakaean te rau n te mwakuri n tai. “Ngkana kam rin n te auti teuana,” e taku Iesu, “kam na kamauriia kaaina. Ao ngkana a raoiroi kaain te auti arei, ao e na roko ami rau i aoia.” (Mataio 10:12, 13) Te taeka ni kamauri n te taetae n Ebera ao rairana n te taetae n Erene ae kabonganaki n te Baibara, a uaia ni kaota te iango ae ‘A bia nakoraoi bwaai ni kabane iroum.’ Bon aio te iango ae kairira ngkana ti kawaria aomata n tataekina te euangkerio nakoia. Ti kaantaningaia bwa a na boni butimwaea rongorongon te Tautaeka n Uea. Akana a butimwaeia, a kona n iangoa manga raoiakinaia ma te Atua ngkana a raraoma n aia bure ao a rairaki bwa a na kakaraoa nanona. Ao ngkanne, te raoi ma te Atua e na kaira te aomata nakon te maiu are aki toki.—Ioane 17:3; Mwakuri 3:19; 13:38, 48; 2 I-Korinto 5:18-20.
15. Ti na kanga ni kateimatoa te rau ngkana ti kaaitara ma te aomata ae karaoa aroarona ae aki kukurei ni kaineti ma butimwaean te rongorongo are ti taekinna?
15 Ti na kanga ni kona ni kateimatoa te raoi ngkana a butimwaeira aomata n te aro ae aki raoiroi? E reirei ni kangai Iesu: “Ngkana a aki raoiroi [kaain te auti], ao e na okiringkami ami rau.” (Mataio 10:13) Ana rongorongo Ruka ae taekan kanakoaia taan rimwin Kristo ake 70 mwaitiia, e kaota naba ana taeka Iesu ni kangai: “Ngkana tao e mena natin te raoi iai, ao e na tiku ami raoi iai: ao ngkana tao e aki mena [te raoi] iai, ao e na manga okiringkami.” (Ruka 10:6) Ngkana ti kawaria aomata ma te euangkerio, ti taetae nakoia n te aro n iraorao ao n te aro n rau. Te kaeka mairoun te aomata ae kaotia bwa e aki rangi n tabe iai, te ngurengure, ke te taeka ae aki raoiroi e boni kariaia ara rongorongo ae rau bwa e na ‘manga okirira.’ Ma e aki bua ara rau iai, ae teuana mai buakon uaan te taamnei ae raoiroi mairoun Iehova.—I-Karatia 5:22, 23.
Te Tia ae Raoiroi Ibukia Taan Tai
16, 17. (a) Tera tiara ae ti uaiakinna ngkana ti a manga okiria aomata? (b) Ti na kanga ni buokia aomata ake iai aia titiraki i aon te Baibara?
16 Ti rangi ni kukurei ngaira aika taan tai ni buoka aron ikoikotakiia aomata aika a na anganaki te maiu are aki toki. Ao ai bati ra te kimwareirei ae ti namakinna ngkana te aomata ae ti maroro ma ngaia e butimwaea raoi te rongorongo, ao e tangiria n reirei riki, are e a kaotia iai bwa boni ngaia “natin te raoi”! Tao a mwaiti ana titiraki i aon te Baibara ae e tabeki ao tao ti aki kona ni bane ni kaekai n tii teuana te tai. Tera ae e na karaoaki ngkai tao e na bae n aki raoiroi ngkana ti tiku ni maan irouna ni moan kawarana? Ti kona naba n uaiakina te tia are e kaungaki aron karaoana 60 tabun te ririki n nako.
17 “Ana Tia Kakoaua Iehova ni kabane a riai n tauraoi ni kairi reirei n te Baibara aika raoiroi ma aomata.” Te taeka aei e kaotaki n te katenua ni boki mai buakon booki aika a kaetieti ibukin te Model Study, ake a boretiaki man 1937 ni karokoa 1941. E reitia ni kangai: “Taan uarongorongo [ibukin te Tautaeka n Uea] ni kabane a riai ni kakaonimaki ni kabatiaa aia ibuobuoki nakoia aomata aika raoiroi aika a kan ongora n taekan te Tautaeka n Uea. A riai ni manga okiraki aomata aikai, a riai ni kaekaki aia titiraki aika kakaokoro nako . . . , ao ngkanne, e riai ni waakinaki te reirei ma ngaiia . . . n te tai ae waekoa.” Eng, tiara ngkana ti manga okiria aomata bon moanakin te reirei n te Baibara ma ngaiia, ao kakaraoana ni katoa tai.a Te aro n iraorao ao tabeakinaia aomata aika kan ongora ma te tangira, a kairira bwa ti na katauraoira raoi imwain te reirei, ma ni waakina te reirei n te aro ae uaana.
18. Ti na kanga ni kona ni buokia aomata aika boou bwa a na riki bwa taan rimwin Iesu Kristo?
18 N te ibuobuoki ae reke man te boki ae te Knowledge That Leads to Everlasting Life, ao boroutia n aron are Tera ae E Tangiria Mairoura te Atua?, ti kona ni waakin reirei aika uaana man te Baibara ma aomata, ao n te aro anne ti buokia iai aomata aika a kan ongora bwa a na riki bwa taan rimwin Kristo. Ngkana ti kekeiaki ni katotonga aron te tia Reirei ae Kakannato ae Iesu Kristo, aomata aika ti reirei ma ngaiia n te Baibara a na reireiaki naba man aroarora ae ti rau ma ni kimwareirei, n aroarora ni kaotioti nakoia ma nanora ni koaua, ao n arora ni karinei kaetieti ao reirei mairoun Iehova. Ngkana ti buokia aomata aika boou ni kaeka aia titiraki, ti na karaoa naba ara kabanea ni kona n reireinia bwa a na kanga ngaiia ni kona ni manga kaekaia aomata ake a titiraki nakoia. (2 Timoteo 2:1, 2; 1 Betero 2:21) Ti boni kona ni kimwareirei ngaira aika taan tai n te tai ni kaikonaki aei, ngkai iai reirei n te Baibara aika 4,766,631 mwaitiia ake a kairaki ni katoa wiki ni katobibia te aonnaba i nanon te ririki ni mwakuri are e a tibwa nako. Ti na kimwareirei riki ngkana ti mena ibuakoia taan tai are e rereke aia tai ni kaira te reirei n te Baibara ma aomata.
Teimatoa ni Kimwareirei n te Mwakuri n Tai
19. Bukin tera bwa iai bukina ae a riai ni kimwareirei iai aomata n te mwakuri n tai ae waakinaki n ana mwakuri ni minita Iesu, ao imwina teutana?
19 Bon iai bukina ae e riai ni kimwareirei te aba n te mwakuri n tai ae waakinaki n ana mwakuri ni minita Iesu, ao imwina teutana. A mwaiti aomata ake a butimwaea te euangkerio n te tai anne. E korakora naba te kimwareirei n tain Bentekota n 33 C.E., bwa n te tai arei, 3,000 tabun mwaitiia aomata ake a butimwaea te kairiri mairoun Betero, ao a anganaki te taamnei ae raoiroi mairoun Iehova, are a a riki iai bwa kaain ana botannaomata te Atua ae te Iteraera n taamnei. A ririkirake riki mwaitiia ao e kabatiaaki te kimwareirei ngke “te Uea E ikotia ma ngaiia n te bong ae koraki akana a tabe ni kamaiuaki.”—Mwakuri 2:37-41, 46, 47; I-Karatia 6:16; 1 Betero 2:9.
20. Tera ae kabatiaa te kimwareirei nakoira n ara mwakuri n tai?
20 E noraki kakoroan bukin ana taetae ni burabeti Itaia n te tai arei ae kangai: “Ko [Iehova] kaababaka te botanaomata, Ko karaka aia kimareirei: a kimareirei i matam n ai aron te kimareirei n te tai, n ai aroia aomata ngkana a tibai bwaai ni kuri.” (Itaia 9:3) E ngae ngkai ti ataia bwa e a kuri n tabwanin raoi te ‘botannaomata ae abwabwaki’ aei, ae taekaia taani kabiraki, ma e bati naba kimwareireira ngkai ti nora rikiraken mwaitiia taan tai riki ake tabeman ni katoa ririki.—Taian Areru 4:7; Tekaria 8:23; Ioane 10:16.
21. Tera ae ti na maroroakinna n te kaongora are imwin aei?
21 Bon iai bukina ae ti riai n teimatoa iai ni kimwareirei n te mwakuri n tai. Ara rongorongo ae kaota te kaantaninga ae raoiroi, arora ni kakaeia aomata aika raoiroi, ao aroarora ni mwamwakuri ma te raoi—boni bwaai aika a karika te kimwareirei nakoira, ngaira aika taan tai. Ma e ngae n anne, a kona naba n aki kukurei aomata aika mwaiti iai. E nora naba anne te abotoro Ioane. E kabureaki n te abamwakoro ae Batemoti ngkoa “i bukin ana taeka te Atua ao i bukin naba ana kaotioti Iesu.” (Te Kaotioti 1:9) Ti na kanga ngkanne ni kateimatoa kimwareireira ngkana ti kaaitara ma te bwainikirinaki ao te kairiribai? Tera ae e na buokira ni kaaitara ma aroia aomata ake a kamatoai nanoia nakon ara rongorongo ae ti taekinna nakoia? Ara kaongora ae imwin aei e na taekin reirei n ibuobuoki man te Baibara aika a na kaekai titiraki aikai.
[Kabwarabwara ae nano]
a E moan baireaki moa waakinan taian reirei n taabo ike a kona ni botaki iai aomata aika a kan ongora. Ma e aki maan imwin anne, ao e a waakinaki ngkanne taian reirei ma aomata n tii kaka temanna, ke te utuna.—Nora te boki ae Jehovah’s Witnesses—Proclaimers of God’s Kingdom, iteraniba 574, ae boretiaki irouia Ana Tia Kakoaua Iehova.
Ko na Kanga ni Kaekaa?
• Tera kaikonakan te mwakuri n tai?
• Te aeka n rongorongo raa ae ti tataekinna?
• Bukin tera bwa e rangi n nakoraoi ara kakaae ibukia aomata aika a na riki bwa taan rimwin Kristo?
• Ti kanga ni kateimatoa te raoi n te mwakuri n tai?
• Bukin tera bwa ti teimatoa ni kimwareirei n te mwakuri n tai?
[Taamnei n iteraniba 25]
N ai aron Bauro, taan tai ni boong aikai a kataia ni kawaria aomata n taabo nako ike a mena iai
[Taamnei n iteraniba 25]
Tataekina te rongorongo n te aro n iraorao