A a Tai Tawaana Ibukin te Taiaki
1. Tera te mwakuri ae e rangi ni kakawaki ae e tabe ni waakinaki?
1 E tuangia taan rimwina Iesu ni kangai imwin ana uarongorongo nakon ainen Tamaria: “Kam na tabeki matami ao tarai tawaana, bwa a a tai ibukin te taiaki.” (Ioa. 4:35, 36) E a tabe ni waakinaki ikoikotakia aomata aika raoiroi nanoia, ao e kona ni kaman noria Iesu bwa e na karaoaki te mwakuri anne n te aonnaba ni kabutaa. E rangi n teimatoa ni boutokaa te mwakuri n tai aei Iesu man ana tabo are i karawa. (Mat. 28:19, 20) Tera ae kaotia bwa e tabe ni korakora riki karaoan te mwakuri aei ngkai e a tabe n roko n tokina?
2. Baikara taian rikirake aika a kaotia bwa e a korakora karaoan te mwakuri n tai ni katobibia te aonnaba?
2 Taiakin te Aonnaba: Rinanon te ririki ni mwakuri ae 2009, iai te rikirake ni mwaitiia taan uarongorongo ni katobibia te aonnaba n te mwaiti ae 3.2 te katebubua. Iai te rikirake n aaba ake e totokoaki iai te mwakuri n uarongorongo n te mwaiti ae 14 te katebubua. E ribootinaki mwaitiia aika reirei n te Baibara ni katoa namwakaina n te mwaiti ae rianako ae 7,619,000—ae te ware ae bubura riki nakoni mwaitiia taan uarongorongo, ao e kaania te itera ni mirion te raka iai nakoni mwaitiia ake a reirei n te Baibara ae ribootinaki n te ririki ae nako. Ngkai e a rangi n rikirake te mwakuri n aono aika bati, a a mwaiti naba reeta ni bubutii ake a roko ibukia mitinare aika kataneiaaki n te Kuura ni Kireata. E aki toki ni korakora karikiuaan te mwakuri n uarongorongo n te taetae ae kaokoro n aaba aika bati. E mataata bwa bon Iehova ae e karikirakea te mwakuri n tai i nanoni kabaneani bongin te mwakuri n tai aei. (Ita. 60:22) Anne naba ae ko noria n am “tawaana” n am aono?
3. Tao tera aia iango tabeman ni kaineti ma aia aono are a taia?
3 Taiakin Am Aono: A kona n taku tabeman, “e aki rangi ni karikiuaa au aono.” Bon te koaua bwa iai aono tabeua aika aki noraki karikiuaaia n aron ake tabeua ke ai tiaki aroia ni karikiuaa n taai aika nako. Mangaia are tao a iangoia tabeman taani Kakoaua bwa a a tia ni kawaraki kaain aono aikai ma ai tii aia mwakuri ngkai ni karemrem ibukia ake nikiraia. Anne bon te bwai ae riiriki?
4. Tera ae ti riai n iangoia ibukini karaoan ara mwakuri ni minita, ao bukin tera?
4 Bon te mwakuri ni kakorakora te mwakuri n tai, mai moana ni karokoa tokina. Iangoi ana taeka ni kaumaki Iesu aikai: “E a rangi ni mwaiti te uaa ae riai n taiaki ngkai, ma a karako taani mwakuri. Mangaia ae butiia Mataniwin te tai bwa e na kanakoia taani mwakuri nakon taiakin ana uaa.” (Mat. 9:37, 38) Iehova boni Mataniwin te tai ae e nako mairouna mwiokon te mwakuri n tai bwa n ningai ao ia. (Ioa. 6:44; 1Kor. 3:6-8) Tera ngkanne mwiokoara? E kaekaaki anne n te Baibara ni kangai: “Ko na kamae am uaa n ununiki n te ingabong, ao tai motika rawani baim n te tairiki.” (TeMin. 11:4-6, BG) Eng, ngkana e a roko ni korakorana te mwakuri n tai ao tai motika rawani baim!
5. E aera ngkai ti riai n teimatoa n uarongorongo ma te ingaingannano e ngae ngkana e taraa n aki karikiuaa ara aono?
5 Teimatoa n Tai: E ngae ngkana e okioki karaoan ara aono ao e teimatoa te aki muti, ma bon iai bukina ae ti na mwakuri iai ma te ingaingannano ao te nano n umaki. (2Tim. 4:2) E karika bitakin aroaroia aomata ao kaatuuan iangoan taai aika a na roko irouia, te bitaki ae korakora n te aonnaba. Ngkana a a tabe n ikawai riki rooro n rikirake, a namakinna bwa a kainnanoa te mweraoi ni koaua ao raun aia iango. Tao a kona ni buokaki aomata n ara kakorakora ae teimatoa. Eng, tao te koraki ake aki kan ongora ngkoa a na manga kan ongora rimwi riki. A bon riai n anganaki te kauring te koraki ake a bon rawa ni butimwaea ara rongorongo.—Etek. 2:4, 5; 3:19.
6. Tera ae na buokira ni kateimatoa ingaingara, ngkana e kangaanga te mwakuri n uarongorongo n ara aono?
6 Tera ae na buokira ni kateimatoa ingaingara, ngkana e kangaanga te mwakuri n uarongorongo n ara aono? Tao ti kona ni karababaa nako riki ara mwakuri n uarongorongo man te auti teuana ma teuana ni kakaaei riki aanga tabeua ibukin ara mwakuri ni minita, n aron te uarongorongo n taabo ni bitineti ke n te tareboon. Ke ti kona ni bitii ara moan taeka ni kabooui. Ti kona ni bitii ara babaire ao n ira te mwakuri ni minita n te bwakantaai ke n taai tabeua ake a memena riki iai aomata n aia auti. Tao ti kona ni kataa reiakinan te taetae ae boou bwa ti aonga n taekina te rongorongo ae raoiroi nakoia aika bati riki. Ti kona ni karababaa riki ara mwakuri ni minita n te mwakuri n regular bwaiania. Ke ti kona ni mwaing nakon taabo ake a karako iai taani karaoa te mwakuri n tai. Ngkana ti bwaina te iango ae riai ni kaineti ma te mwakuri n tai, ti na kakorakoraira naba n uataboa karaoan te mwakuri ae kakawaki aei.
7. Ti riai n teimatoa ni karaoa te mwakuri ae ikoikotakia aomata ni karokoa n ningai?
7 E uarereke aia tai taan ununiki n ikotii uaa, mangaia are a aki kona n aoaoriia ke ni kawaeremweia ni karokoa tokin te mwakuri. Ai bon titeboo naba ma te nano n umaki ibukin te mwakuri n tai ni kaineti ma te onimaki. Ti riai n teimatoa ni karaoa te mwakuri ae ikoikotakia aomata ni karokoa n ningai? Rinanon “tain tokin te waaki ae ngkai” ao ni karokoa “te toki.” (Mat. 24:14; 28:20) Ti katotonga ana Minita Iehova ae te kabanea ni kakannato irouna n arora ni kani katiaa te mwakuri ae ti anganaki. (Ioa. 4:34; 17:4) Mangaia are ti bia teimatoa ni karaoa te mwakuri ni minita ma te ingaingannano, te kimwareirei, ao te iango ae riai ni karokoa te toki. (Mat. 24:13) E tuai n roko tokin te tai!
[Kabwarabwaraan n iteraniba 2]
Bon te mwakuri ni kakorakora te mwakuri n tai, mai moana ni karokoa tokina