E Kanga Ni Kamaiura Iesu?

“E Kamaiura Iesu!” “Bon ara tia Kamaiu Iesu!” N aaba aika bati aika a katobibia te aonnaba aei, a kona n noraki taeka aikai n tekebabaa i tinanikun taian auti ao taabo tabeua riki ake e bati iai te botannaomata. Mirion ma mirion mwaitiia aomata ake a kakoauaa bwa Iesu bon aia tia Kamaiu. Ngkana ko titirakinia ni kangai, “E a kanga naba ni kamaiura Iesu?” a na boni bae ni kaeka ni kangai, “E mate Iesu ibukira,” ke “E mate Iesu ibukin ara bure.” E koaua bwa maten Iesu ae karekea te kamaiuaki nakoira. Ma e a kanga ni kabooaki mwin aia bure aomata aika bati ni maten te aomata ae tii temanna? Ngkana ko a titirakinaki naba ni kangai, “Ti na kanga ni kamaiuaki ni maten Iesu?” tera ae ko na taekinna?

TE REKE ae e anga te Baibara nakon te titiraki aei e rangi ni bebete taekana, ma e mataata nanona ao e rangi n nano naba. Ma ibukin ataakin bonganana, ti riai moa n ota bwa maiun ao maten Iesu, boni ngaia kanakoraoan te kangaanga teuana ae kakaiaki arona. Ataakin manenan maten Iesu ae moan te kakawaki iroura, e a boto i aon reken otara iai.

Ngke e baireia te Atua bwa e na anga maiuna Iesu, e kaotia iai bwa e tabeakina te kangaanga are moan riki ngke e bure Atam. Ai kananokawaki ra karaoan te bure anne! Te moan mwaane ma buna ae Nei Ewa, a boni kororaoi ngkoa. Te oo-n-aroka ae tamaroa ae Eten boni mwengaia. E anganiia te Atua tabeia ae rangi ni kakawaki ae tararuan te oo-n-aroka are mwengaia arei. Manin aonteaba a na boni mena naba i aan aia tararua ae bati n tatangira. Ao ngkana e a bati aia kariki aomata bwa e a nakon ae mirion ma mirion n aekaia nako, a na boni karababaa nako ngkanne tian te baretaiti nako tabon aonnaba. (Karikani Bwaai 1:28) Ai kamimi ra ao ai kakukurei ra te mwakuri are a anganaki! Irarikin anne, bon iai naba te itangitangiri n aia reitaki i marenaia. (Karikani Bwaai 2:18) A reke bwaai ni kabane irouia ake a kainnanoi, ao te maiu ae kakukurei n aki toki, e a boni mena imwaia.

E rangi ni kangaanga iangoan ae e na kona ni bure Atam ke Nei Ewa. Ma e ngae n anne, e boni karitei naba te moan taanga aei nakon teuare karikiia, ae Iehova ae te Atua. E kabongana te naeta, te anera ae buakaka ae Tatan te Riaboro bwa e na mwamwana iai Nei Ewa bwa e na aki ongeaba nakon Iehova, ao e a manga iria nako naba Atam.​—Karikani Bwaai 3:1-6.

Akea te nanououa n te bwai are e na karaoia te tia Karikiriki nakon Atam ma Nei Ewa. E a kaman kaotinakoa uaan aia aki-ongeaba ngke e kangai: “Ko kona n amarake mani kaai nako i nanon te nne n aroka, ma ko na aki kana uan te kai are e anga atakin te raoiroi ma te buakaka, ba ngkana ko kanna, ao ko na boni mate.” (Karikani Bwaai 2:16, 17, BK) Ni kaineti ma aei e a reke te titiraki ae moan te kakawaki ae riai ni kaekaki.

E a Reke te Kangaanga ae Kakaiaki Iroun te Botannaomata

E a karekea te kangaanga ae rangi ni kakaiaki te moani bure arei, nakoia te botannaomata. E moana maiuna Atam man te kororaoi. Ngaia are a riai naba n nora kakukurein te maiu n aki toki ae kororaoi natina. Ma e boni bure Atam imwain ae e karikiia natina. E tuai n riki te botannaomata mairouna ngke e a kabureaki ni kangai: “E na maono moam i bukini karekeani kanam, ni karokoa okim nakon te tano are ko anaaki mai iai. Ba te tano ngkoe ao ko na okira te tano.” (Karikani Bwaai 3:19, BK) Ngaia are ngke e a bure Atam ao e nang moana matena n aron are e taku te Atua, a a iria nako naba ni mate aomata ni kabane.

E riai ngkanne are e koreia te abotoro Bauro rimwi riki ae kangai: “Aron rokon te bure i aon te aba iroun te aomata ae ti temanna [Atam], ma rokon te mate n te bure; ao e ituia aomata ni kabaneia te mate n te aro aei, ba a bane ni bure.” (I-Rom 5:12) Ibukin te bure are n te moan tai, naati ake a bon riai ni bungiaki ni kororaoi ma maiuia ae aki toki ae mena imwaia, a a karikaki ngkai ma te aoraki, te kara, ao te mate are a boni kaantaningaia.

Tao e kona ni kangai temanna, “E aki riai anne, ibukina bwa tiaki ngaira ae ti bure nakon te Atua. Bon Atam ae e bure. Bukin tera bwa ti aki riai ni karekea te kaantaninga ibukin te maiu are aki toki ao te kimwareirei?” Ti ataia bwa ngkana e kaboowiaki te nati-te-mwaane bwa e na kabureaki ibukina bwa e kimoaa te kaa tamana, e na boni bae n tangitang te nati aei ni kangai: “E aki riai anne! Bwa I aki bure.”​—Te Tua-Kaua 24:16.

Ngke e anaa nanon te moani mwaane ma te moan aine Tatan nakon te bure, e taku iai bwa tao e na kona ni kamangaongaoa ana waaki te Atua ae eti. E a kamani moantaai ni kamwaneia moan aomata te Riaboro imwain rikin natiia. N te tai are e bure iai Atam, ao e a wai naba te titiraki teuana ae kangai taekana: Tera ae e na karaoia Iehova nakoia natin Atam ma Nei Ewa ake a na riki?

Iehova ae te Atua, e karaoa ae eti ao ae riai. “E aki kona ni ioawa te Atua, e aki kona ni babakanikawai,” e taekina anne te aomata ae raoiroi ae Eriu. (Iobi 34:10, BK) Ao ni kaineti ngkanne ma Iehova, e korea ae kangai te burabeti ae Mote: “Te Bwa, moan te raoiroi ana mwakuri; ba bon te kaeti-taeka ae riai ana aro ni kabane: Bon te Atua ae kakaonimaki ae akea ana buakaka, E raoiroi ao E eti Ngaia.” (Te Tua-Kaua 32:4) Te babaire ae e katauraoia te Atua ni koaua ibukin kanakoraoan te kangaanga are e karikia Atam, e aki uota nako kakabwaiara ibukin karekean te maiu are aki toki i aon te aonnaba ae te baretaiti.

Ana Babaire te Atua ae Kororaoi Ibukin Kanakoraoan te Kangaanga

Iangoa ana babaire te Atua ibukin kanakoraoan te kangaanga are e kaotia n ana taeka are e kabwakaa nakon Tatan te Riaboro. E taku Iehova nakon Tatan: “N na karekea te kairiribai i marenam ma te aine [ae ana botaki te Atua i karawa], ao i marenan am kariki [ae te botannaomata ae mena i aan mwaakan Tatan] ma ana kariki [ae Iesu Kristo]. E na kamanatua atum [atun Tatan] ana kariki, ao ko na tena bukini waena [ae taekan maten Iesu].” (Karikani Bwaai 3:15, BK) N te moan taetae ni burabeti n te Baibara aei e kaota ana kaantaninga Iehova, ae e na roko Natina are te taamnei i karawa ngkoa ni maeka i aonteaba bwa te aomata ae kororaoi ae Iesu, ao imwina e na manga mate are e nanonaki n ae e na kaikoakaki bukini waena, e ngae ngke akea ana bure.

Bukin tera bwa e tuatua te Atua bwa e na mate te aomata ae kororaoi? Tera ngkoa ana katuuaa Iehova ae te Atua ibukin ana bure Atam? Tiaki te mate? (Karikani Bwaai 2:16, 17) “Boon te bure te mate,” e korea anne te abotoro Bauro. (I-Rom 6:23) E boni kabwakaa boon ana bure Atam ni matena. E anganaki te maiu, ma ngaia e bon rineia bwa e na bure, ngaia are e a mate bwa tuaana ibukin ana bure. (Karikani Bwaai 3:19) Ma tera aroia te koraki ake a a bane ni kabureaki n te bure ibukin ana kairua? E kainnanoaki te mate bwa kabooan mwin aia bure. Ao ai antai ngkanne matena ae e na kona n rabuna nako aia bure te botannaomata?

Ana tua te Atua nakoia te botannaomata are Iteraera, e kaetieti ni kangai, “te maiu boona te maiu.” (Te Otinako 21:23) Ni kaineti ma te kaetitaeka ae riai aei, te mate are e na rabuna nako aia bure te botannaomata, e riai n titeboo kakawakina ma te maiu are e kabuaa Atam. Tii maten te aomata ae e kororaoi naba ae e kona ni kabooa mwin te bure arei. Bon Iesu te aomata ae kororaoi. N te koaua ni koaua, Iesu bon “booni kamaiuaia” natin Atam ake a kona ni kamaiuaki. ​—1 Timoteo 2:6, BK; I-Rom 5:16, 17.

E Rangi ni Kakawaki Maten Iesu

Akea kakawakin maten Atam; e bon tau ni mate ibukin ana bure. Ma e bon rangi ni kakawaki maten Iesu, kioina ngkai e mate n akea ana bure. E kona ni butimwaea kakawakin maiun Iesu ae kororaoi, Iehova ae te Atua, bwa te kaboomwi ibukia kanoan te tia bure are Atam, aika a ongeaba. Ana karea ni kaboomwi Iesu aei e aki tii manena ibukin kabooan mwin ara bure ake ti a tia ni karaoi. Bwa ngkana e toki manenana iai, ao e nang akea ngkanne maiura nakon te tai ae na roko. Karikara i nanon te bure, e kairira bwa ti na boni manga bure riki imwina. (Taian Areru 51:5) Ai kukurei ra ngaira ngkai ti a kona ni manga karekea te kororaoi mani maten Iesu, are e kaantaningaia Iehova ibukia natin Atam ma Nei Ewa!

E kona ni kabotauaki Atam ma te karo ae mate, ao e kitanira ma te taarau ae rangi ni bati (te bure) ae ti bon aki kona ni kabwaraa. N te itera are teuana ngkanne, Iesu kaanga ai aron te karo ae raoiroi ae e mate ao e katikuira ma kaubwaira ae e aki tii kainaaomataira man te taarau are e karawawataira iai Atam, ma e bati n tau naba ibukin maiura n aki toki. Maten Iesu tiaki tii kamaunan ara bure n taai aika nako, ma bon te babaire naba ae moanibaan te raoiroi ibukin maiura n taai aika a na roko.

E kamaiura Iesu ibukina bwa e mate ibukira. Ai kakawaki ra te babaire ibukin matena! Ngke ti noria bwa e irekereke naba ma ana babaire te Atua ibukin kaetan te kangaanga ae kakaiaki ae riki man ana bure Atam, ao ai aron ae e kakorakoraa nakoira onimakinan Iehova ao arona ni kaeti bwaai ni kabane. Eng, maten Iesu bon te waaki ni kakamaiu man te bure, te aoraki, te kara, ao ai te mate, nakoia te koraki ake a “onimakinna.” (Ioane 3:16) Ko kakaitau nakon te Atua ngkai e bairea te waaki ni kakamaiu aei?

[Taamnei n iteraniba 5]

E karekea te bure ao te mate Atam nakon te botannaomata

[Taamnei n iteraniba 6]

E bairea te waaki ae kororaoi Iehova ibukin kanakoraoan te kangaanga