Ko Tangiraki Naba Iroun Te Atua?

“Ane iai i rouna au tua nako, ane tauu, ao boni ngaia ane tangirai: ao ane tangirai ao e na tangiraki iroun Tamau.”​—IOANE 14:21.

1, 2. (a) E kanga ni kaota ana tangira Iehova nakoia te botannaomata? (b) Tera te botaki ae boou are e moana karaoana Iesu n tairikin Nitian 14, n 33 C.E.?

E TANGIRIIA aomata ake e karikiia Iehova. Ni koauana, e rangi n tangiriia kaain te aonnaba “n te aro are E anga Natina ae te rikitemanna iai, ba e aonga n aki mate ane onimakinna, ma e na reke i rouna te maiu are aki toki.” (Ioane 3:16) Ngkana e a uakaan te tai are e nang Kauringaki iai maten Kristo, Kristian ni koaua a riai riki n ururinga aron Iehova n “tangirira, ao E kanakomaia Natina ba te kareanraoi ni kabara ara bure.”​—1 Ioane 4:10.

² N tairikin Nitian 14 n 33 C.E., Iesu ma ana abotoro ake 12, a botaki n te ruu teuana i eta i Ierutarem bwa a na bukamarua te toa ae te Riao, ni kauringa kaotinakoaia ngkoa Iteraera mai Aikubita. (Mataio 26:17-20) Imwin bukamaruan aia botaki I-Iutaia aei, e kanakoa Iuta Itekariota Iesu, ao e a moana naba karaoan te botaki ae e na kakauringaki irouia Kristian, ae Kauringan maten Kristo.a Iesu e kabongana iai te kariki ae aki-karikaki ma te wain ae uraura aika bannan rabwatana ao raraana, ao a uaia n amwarake ma ni moi iai abotoro ake 11 ake a tiku i rarikina. Kabwarabwaran arona ni waakinna, a kuneaki n Euangkerio aika kuri n titeboo rongorongoia ake a koreaki iroun Mataio, Mareko ao Ruka, ao iroun naba te abotoro Bauro are e arana te botaki anne bwa “ana toa te Uea.”​—1 I-Korinto 11:20; Mataio 26:26-28; Mareko 14:22-25; Ruka 22:19, 20.

3. Tera te kaokoro n ana rongorongo te abotoro Ioane ma aia rongorongo tabeman, ni kaineti ma ana kabanea n tai Iesu ma taan rimwina n te ru are i eta?

³ E kakaongora bwa te abotoro Ioane, e aki taekina kabutan te kariki ma te wain, ibukina bwa ngke e korea ana Euangkerio (tao n 98 C.E.), ao te waaki anne a a tia n taneiai ni kakaraoia Kristian. (1 I-Korinto 11:23-26) Ma e ngae n anne, i aan kairakin Ioane iroun te Atua, tii ngaia ae e kaongoira taekan bwaai tabeua aika kakawaki ni kaineti ma bwaai ake e taekin ao ake e karaoi Iesu, imwain ao imwin are E moana karaoan Kauringan Matena. E abwabwaki te rongorongo ae kaunga aei bwa e kaona nimaua mwakoron ana Euangkerio Ioane. Rongorongo aikai a kaotia raoi bwa antai aomata ake a tangiraki iroun te Atua. Ti na nenera Ioane mwakoro 13 nakon 17.

Reireiniko man Ana Tangira Iesu ae Moanibaan te Raoiroi

4. (a) E kanga Ioane ni katuruturua te boto n reirei are e taekinna Iesu n ana botaki ma ana reirei ngke e moana karaoan te Kauring? (b) Tera bukin tangirakin Iesu iroun Iehova teuana ae kakawaki?

⁴ N ana reirei Iesu nakoia taan rimwina imwain nakona, ao e a kaatuuaki ni mwakoro aikai taekan te tangira. Ni koauana, taeka nako aika a kakaokoro ibukin te taeka ae “tangira,” a oti 31 te tai. Mwakoron Ioane aikai a rangi ni katereterea aron korakoran ana tangira Iesu nakon Tamana ae Iehova. Ana tangira Iesu ibukin Iehova e kona ni kakoauaki raoi man rongorongon maiuna i nanon taian Euangkerio ni kabane, ma bon tii Ioane ae koreia bwa e kamatataa ni kangai Iesu: “I tangira te Tama.” (Ioane 14:31) E taekinna naba Iesu bwa e tangiraki iroun Iehova ao e kabwarabwaraa bwa bukin tera. E taku: “I tangiringkami n ai aron Tamau ngkae E tangirai: kam na maeka n tangirau. Ngkana kam kawakin au tua, ao kam maeka n tangirau; n ai arou ngkai I kawakin ana tua Tamau, ao I maeka n tangirana.” (Ioane 15:9, 10) Eng, Iehova e bon tangira Natina ibukin ongeabana ae kororaoi. Ai raoiroi ra te reirei anne nakoia taan rimwin Iesu Kristo ni kabane!

5. E kanga ni kaota aron ana tangira Iesu ibukia taan rimwina?

⁵ Ana tangira Iesu ae nano nakoia taan rimwina, e kamatataaki ni moani mwakoron ana rongorongo Ioane, ni kaineti ma ana kabanea ni botaki Iesu ma ana abotoro. E taku Ioane: “Ao ngke e tuai roko te toa are te riao, ao Iesu, ngke E ataia ba e a roko ana aua n nako mai aon te aba nakon te Tama, ngke E a kaman tangiriia raona ake a mena i aon te aba, ao E tangiriia naba ni karokoa te toki.” (Ioane 13:1) N te tairiki ane kakawaki anne, e angania te reirei ae a na aki riai ni mwaninga taekana, ae te toro irouia tabeman ma te tangira. Ikanne are e a teboki waeia iai, are te mwakuri are a riai ni bane ni kukurei ni karaoia nakon Iesu ao nakoia naba tariia, ma a rawa iai. E karaoa te mwakuri ae rangi ni mangori aei Iesu, ao imwina e tuangia ana reirei ni kangai: “Ngkai I teboki waemi Ngai ae ami Uea ao ami tia Reirei, ao e riai ba kam na i teboteboki naba waemi. Ba I anganingkami te bwai ni kakairi, ba kam na katotonga ae I karaoia nako imi.” (Ioane 13:14, 15) Kristian ni koaua a na rangi ni kariaia ma ni kukurei n toro irouia tariia.​—Mataio 20:26, 27, Ioane 13:17.

Kakairi n te Tua ae Boou

6, 7. (a) Tera te rongorongo ae kakawaki ae e taekinna Ioane ni kaineti ma moani karaoan te Kauring? (b) Tera te tua are boou, are e angania taan rimwina Iesu, ao tera te bwai ae boou iai?

⁶ Ana rongorongo Ioane n te bwai are e riki n te ruu are i eta n tairikin Nitian 14, bon tii ngaia ae e taekina otinakon Iuta Itekariota. (Ioane 13:21-30) Ngkana a kabotauaki taian Euangkerio, ao e teretere iai bwa e a tibwa moana karaoan Kauringani matena Iesu imwin otinakon te tia kamwanea. Imwin anne ao e a kaabwabwaka ana maroro ma ana abotoro ake a kakaonimaki akekei, ma n angania taian reirei n ibuobuoki imwain nakona. Mangaia are ngkana ti tabe ni katauraoi imwain te Kauring, ti riai n rangi ni kan ataia bwa tera ae e taekinna Iesu n te tai arei, ma ai moara ra riki ibukina bwa ti kan tangiraki naba iroun te Atua.

⁷ Te moan reirei are e anga Iesu nakoia taan rimwina imwin karaoan Kauringan matena bon te reirei ae boou. E taku: “I anganingkami te tua nabangkai, ba kam na i tangitangiri; n ai arou ngke I tangiringkami, ba kam na i tangitangiri naba. Ane a na ataingkami aomata ni kabaneia ba au reirei ngkami n aei, ngkana kam i tangitangiri.” (Ioane 13:34, 35) Tera ae boou n te tua aei? Imwina riki n te tairiki naba anne, e kamatatai bwaai Iesu ni kangai: “Aio au tua, ba kam na i tangitangiri, n ai arou ngkai I tangiringkami. Akea te tangira iroun te aomata, ae korakora riki nakon ae te anga maiuna i bukiia raona.” (Ioane 15:12, 13) Ana Tua Mote e reireinia tibun Iteraera bwa a na ‘tangiriia raoia n ai aron tangiraia i bon irouia.’ (Nakoaia Ibonga 19:18) Ma ana tua Iesu e a rababa riki nakon anne. A riai n i tangitangiri Kristian n aron Kristo ae e tangiriia, ao a na kukurei naba n anga maiuia ibukia tariia.

8. (a) Tera ae irekereke ma te tangira are ko anga boni ngkoe iai? (b) Tera aroia Ana Tia Kakoaua Iehova ni kaotiota te tangira ae a anga boni ngaiia iai ni boong aikai?

⁸ Te Kauring bon te tai ae angaraoi ibukin tuoan arora, n tatabemanira nako ao ai te ekaretia ae bwanin, n noria bwa iai iroura te aroaro ae tamaroa ae kanikinaean te Kristian ni koaua ae te tangira are aekan ana tangira Kristo. Te aeka n tangira anne ae te kukurei n anga boni ngkoe, e nanonaki naba iai bwa n taai tabetai, te Kristian e na kukurei riki n anga maiuna, nakon ae e na kamwaneia tarina. Ma n angiin te tai, e irekereke ma kukurein nanora ni kareani bwaai aika ti tatangiri bwa ti aonga ni buokia tarira ao aomata riki tabemwaang, ni beku irouia. E rangi n tikiraoi ana katoto te abotoro Bauro n te waaki aei. (2 I-Korinto 12:15; I-Biribi 2:17) A kinaaki Ana Tia Kakoaua Iehova ni katobibia te aonnaba ibukin aia anganano ni buokia tariia ao kaain rarikiia, ao ni kabonganaia naba ni mamaroroakina ana koaua te Baibara nakoia raoraoia.b​—I-Karatia 6:10.

Te Reitaki ae Riai ni Kateimatoaki

9. Tera ae ti na kukurei ni karaoia bwa ti aonga ni kateimatoa ara reitaki ae kakawaki ma te Atua ao Natina?

⁹ Akea te bwai ae kakawaki riki iroura nakon te tangiraki iroun Iehova, ao iroun Natina ae Kristo Iesu. Ma ngkana ti kan tangiraki ke n namakina te tangira aei, iai te bwai ae ti riai ni karaoia. N te tairiki are ana kabanea ni bong ma taan rimwina, e taekina ae kangai Iesu: “Ane iai i rouna au tua nako, ane tauu, ao boni ngaia ane tangirai: ao ane tangirai ao e na tangiraki iroun Tamau, ao Ngai N na tangiria, ao N na kaotai nako ina.” (Ioane 14:21) Kioina ngkai ti kani kateimatoaa ara reitaki ma te Atua ao Natina, ti rangi ni kukurei n ongeaba n aia tua. E reitaki naba ma te tua are boou are kaotan te tangira are te kukurei n anga boni ngkoe ao ai ana motintaeka Kristo are e anga imwin utina “ba ti na reireiia aomata, ao ti na kaotiotia,” ni kabanea ara konaa “ni kakiritiania” te koraki ake a butimwaea te rongorongo ae raoiroi.​—Mwakuri 10:42; Mataio 28:19, 20.

10. Baikara reitaki aika a kakawaki ake a kaukaki nakoia ake a kabiraki ao nakoia “tiibu tabemang”?

¹⁰ Imwina riki n te tairiki naba anne, e kaeka ana titiraki te abotoro ae kakaonimaki ae Iuta (Tataio) Iesu ni kangai: “Ngkana e tangirai te aomata, ao e taua au taeka: ao E na tangiria Tamau, ao Ti na nako ina, ao Ti na maeka i rouna.” (Ioane 14:22, 23) E ngae ngke a mena i aon te aba Kristian aika kabiraki ake a a tia ni weteaki bwa a na tautaeka ma Kristo i karawa, ma bon iai aia reitaki ma Iehova ao Natina ae rangi ni kaan. (Ioane 15:15; 16:27; 17:22; Ebera 3:1; 1 Ioane 3:2, 24) Ao ngkana a kakaonimaki n ongeaba raoia aika “tiibu tabemang” ake a kaantaninga te maiu n aki toki i aon te aba, iai naba aia reitaki ae kakawaki ma aia ‘tia kawakin tiibu ae tii temanna’ ae Iesu Kristo, ao Atuaia ae Iehova.​—Ioane 10:16; Taian Areru 15:1-5; 25:14.

“Tiaki Ana Bwai te Aba Ngkami”

11. Tera ana kauring Iesu ni kaineti ma te rawawata are e na riki nakoia taan rimwina?

¹¹ I nanon ana kabanea ni botaki Iesu ma ana reirei imwain matena, e a reireinia taekan te rawawata ae na riki nakoia: Ngkana e tangiraki te aomata iroun te Atua, e na bon ribaaki iroun te aba. E taku: “Ngkana tao e ribaingkami te aba, ao kam na ataia ba e ribaai ngke e tuai n ribaingkami. Ngkana tao ana bwai te aba ngkami, ao e bon tangiriia ana bwai: ma e ribaingkami te aba ba tiaki ana bwai te aba ngkami, ma I rineingkami mai buakon te aba. Kam na uringa te taeka are I atongnga nako imi, E aki kakanato riki te toro nakon ana toka. Ngke a bainikirinai, ao a na boni bainikiriningkami naba; ngke a kawakina au taeka, ao a na boni kawakina naba ami taeka.”​—Ioane 15:18-20.

12. (a) Bukin tera ngkai e kauringia taan rimwina Iesu bwa a na ribaaki iroun te aba? (b) Tera ae ti riai ni bane ni kaiangoraoira iai ngkai e a uakaan te Kauring?

¹² E a kaman anga te kauring anne Iesu ibukina bwa e aki tangiria bwa a na bwara nanoia ana abotoro ake 11 ao ai Kristian ni koaua ni kabane ake imwiia riki, ngkana a ribaaki iroun te aba. E taku: “I taekini baikanne nakoimi, ba kam aonga n aki baka. Kam na kakioaki nako man taian tinakoka; ao e na roko te tai ae a na taku iai aomata ba a taromauria te Atua ngkana a kamateingkami. A na karaoa anne ba a aki ata te Tama, ao a aki ataai naba.” (Ioane 16:1-3, BK) Te rikitinare teuana ibukin te Baibara e kabwarabwaraa bwa te weabe ae rairaki ikai bwa “baka,” e nanonaki bwa “kairan te aomata n te aro ae e a moanna n aki onimaki ao e a kakeaa naba te aomata are e riai n onimakinna ma n ongeaba irouna; karika bwakana.” Ngkana e a kaan tain te Kauring, e riai bwa ti na bane n iangoi taekaia te koraki ake a kakaonimaki ngkoa ao ngkai, ao ni kakairi n aia kakaonimaki i aan te kataaki. Tai kariaia kaitaraam ke te bwainikirinaki bwa e na kairiko bwa ko na kakeaa Iehova ao Iesu, ma motika nanom bwa ko na onimakinia ma n ongeaba irouia.

13. Tera ana bubutii Iesu ibukia taan rimwina n ana tataro nakon Tamana?

¹³ N ana tataro ni kainin Iesu imwain kitanan te ruu are i eta i Ierutarem, e taku nakon Tamana: “I a tia n angania am taeka; ao e ribaiia te aba, ba tiaki ana bwai te aba ngaiia; n ai arou ngkai tiaki ana bwai te aba Ngai. I aki tataro ba Ko na uotiia nako mai aon te aba, ma I tataro ba Ko na kawakinia mairoun teuare buakaka. Tiaki ana bwai te aba ngaiia, n ai arou ngkai tiaki ana bwai te aba Ngai.” (Ioane 17:14-16) Ti kona ni koaua raoi bwa Iehova e tarataraia te koraki ake e tangiriia, ma ni kakorakoraiia ngkai a a tabe ni kaokoroia ma te aonnaba.​—Itaia 40:29-31.

Teimatoa i Nanon Ana Tangira te Tama ao Ana Tangira te Nati

14, 15. (a) E kabotaua arona ma tera Iesu, ni kaitaraa te ‘aroka ae te kurebe ae buakaka’? (b) Antai ‘mwaangan te kai ae te kurebe ni koaua’?

¹⁴ I nanon aia tai ni maroro ae onoti Iesu ma taan rimwina aika kakaonimaki n tairikin Nitian 14, e taekinna iai bwa boni ngaia “te kai ae te kurebe ni koaua,” ni kaaitaraia I-Iteraera ake a aki kakaonimaki, ae te ‘kai ni kurebe ae buakaka.’ E taku: “Ngai te kai ae te kurebe ni koaua, ao Tamau te tia ribana.” (Ioane 15:1) Tabeua te tienture imwaina, ao e koroi ana taeka Iehova aikai te burabeti ae Ieremia ake a taekinaki nakoia Ana aomata aika aki-kakaonimaki: “I bon unikiko ba te kurebe ae raoiroi . . . ao ko aera ngkai ko onikaki ba te aroka ae buakaka ae te kurebe ianena ba arokau?” (Ieremia 2:21) Ao e korea ae kangai te burabeti ae Otea: “Iteraera bon te kurebe ae e a rikirake buakakana. E kariki uaana. . . . A mwamwana te aba nanoia.”​—Otea 10:1, 2, NW.

¹⁵ A kaantaningaki Iteraera bwa a na kariki uaa aika a nako man te taromauri ni koaua, ma a aki bwa a kabwaoua te koaua ao a kariki uaaia iai. Tenibong imwain ana kabanea ni botaki Iesu ma taan rimwina aika kakaonimaki, ao e taetae nakoia mataniwia I-Iutaia ake a mwamwana te aba ni kangai: “I taku nako imi, E na anaki mai roumi uean te Atua, ao e na anganaki te botanaomata ae kariki uaana.” (Mataio 21:43) Te botannaomata ane boou anne bon “ana Iteraera te Atua,” ae kaainaki irouia Kristian aika kabiraki aika 144,000 mwaitiia, aika a kabotauaki ma ‘mwangan’ “te kai ae te kurebe ni koaua,” ae Kristo Iesu.​—I-Karatia 6:16; Ioane 15:5; Te Kaotioti 14:1, 3.

16. Tera are e kaumakia Iesu nakoia ana abotoro aika kakaonimaki ake 11 bwa a na karaoia, ao tera ae kona n taekinaki ibukia nikira aika kakaonimaki n tain te toki aei?

¹⁶ E tuangia abotoro ake 11 Iesu ake a mena ma ngaia n te ruu are i eta ni kangai: “Te mwanga ae i nanou ae aki uaa, ao E uotia nako: ao te mwanga ae uaa, ao E kaitiakia, ba e na kamaiti riki uaa. Kam na maeka i nanou, ao Ngai i nanomi. E aki kona ni kariki uaa te mwanga i bon i rouna, ngkana e aki mena ni kaina; ao ai aromi naba, kam aki kona, ngkana kam aki maeka i nanou.” (Ioane 15:2, 4) Rongorongoia ana aomata Iehova n taai aika tibwa nako, a kaotia bwa nikiraia Kristian aika kabiraki aika kakaonimaki, a teimatoa n reitaki ma aia Mataniwi ae Kristo Iesu. (I-Ebeto 5:23) A kariaia kaitiakaia ma katamaroaaia. (Maraki 3:2, 3) A bati uaan aia mwakuri ibukin te Tautaeka n Uea ni moa man 1919. A ikotaki moa Kristian aika kabiraki tabemwaang, ao man 1935 a ikotaki ngkanne raoraoia ae “te koraki ae uanao” ae e a tabe ngkai n rikirake mwaitiia.​—Te Kaotioti 7:9; Itaia 60:4, 8-11.

17, 18. (a) Baikara ana taeka Iesu aika a buokia taani kabiraki ao tiibu tabemwaang bwa a na teimatoa n tangiraki iroun Iehova? (b) Tera buokara man irakin te Kauring?

¹⁷ E kangai ana taeka Iesu nakoia Kristian aika kabiraki ni kabane ma raoraoia: “E neboaki Tamau n aei, ngkana kam kariki uaa aika bati; ao bon au reirei ngkami iai. I tangiringkami n ai aron Tamau ngkae E tangirai: kam na maeka n tangirau. Ngkana kam kawakin au tua, ao kam maeka n tangirau; n ai arou ngkai I kawakin ana tua Tamau, ao I maeka n tangirana.”​—Ioane 15:8-10.

¹⁸ Ti bane ni kan teimatoa n tangiraki iroun te Atua, ao aei e kairira bwa ti na riki bwa Kristian aika a kariki uaa. Ti karaoa aei ngkana ti kabonganaira ni kakarekea ara tai n tataekina “euangkerion uean te Atua.” (Mataio 24:14) Ti kabanea naba ara konaa ni kaotiota “uaan te Tamnei” i nanon maiura. (I-Karatia 5:22, 23) Kaean te Kauring ibukin maten Kristo e na kakorakoraira ni karaoan aei, bwa ti na kauringaki iai tangirara ae moan te bati iroun te Atua ao iroun Kristo.​—2 I-Korinto 5:14, 15.

19. Tera riki te ibuobuoki are e na maroroakinaki n te kaongora are imwin aei?

¹⁹ Ngke e a tia ni moana karaoan te Kauring, e berita Iesu bwa e na karokoaki mairoun Tamana ‘te tia ibuobuoki ae te taamnei ae raoiroi’ nakoia taan rimwina aika kakaonimaki. (Ioane 14:26) Aron te taamnei aei ni buokia taani kabiraki ma tiibu tabemwaang bwa a na teimatoa n tangiraki iroun Iehova, e na kabwarabwaraki n te kaongora are imwin aei.

[Kabwarabwara ae nano]

Titiraki ni Kauring

• Tera te reirei ae manena ae reke man te mwakuri n tangira are e karaoia Iesu nakoia taan rimwina?

• Tera te tutuo ae ti riai ni karaoia i nanora n tain te Kauring?

• Bukin tera bwa ti aki riai ni bwaka ibukin te ribaaki ao te bwainikirinaki iroun te aba, n aron are e a tia ni kauringira Iesu?

• Antai “te kai ae te kurebe ni koaua”? Antai ‘taiani mwaanga,’ ao tera ae kaantaningaki mairouia?

[Taamnei n iteraniba 9]

E angania ana abotoro Iesu te reirei ae a na aki kona ni mwaninga, ae taekan te beku ae boto i aon te tangira

[Taamnei n iteraniba 10]

A ongeaba ana reirei Kristo irouna ni kaotiotan te tangira are a anga boni ngaiia