Aron Te Nanomwaaka N Te ‘Bwai Ni Kateketeke N Irikora’

“E a tau au akoi i roum.”​—2 I-KORINTO 12:9.

1, 2. (a) Bukin tera bwa ti aki riai ni mimi ngkai ti kataaki ao ti kaaitaraki ni kangaanga tabeua? (b) Bukin tera bwa a aki bwara nanora ngkana ti kaaitara ma taiani kataaki?

“AI AROIA naba aomata ni bane aika a kani maiu n tangiran te Atua i nanoni Iesu Kristo: a na bainikirinaki.” (2 Timoteo 3:12, BK) Bukin tera? Ibukina bwa e taku Tatan bwa aomata a beku iroun te Atua tii ibukin iangoan karekean bwaai aika a tangiri, ao e rangi ni kataia ni kamaiua ana itera anne. E reireinia ana abotoro aika kakaonimaki Iesu ni kangai: “E a tia ni kariaiaki ana bubuti Tatan ba e na ioingkami n ai aroni ioani uan te uita.” (Ruka 22:31, BK) E ataia Iesu bwa te Atua e kariaia kataakira iroun Tatan ni kangaanga aika kammaraki. Tiaki nanon anne bwa kangaanga ni kabane ake ti kaaitara ma ngaai a bon riki mairoun Tatan ao ana taimonio. (Te Minita 9:11) Ma e ingainga nanon Tatan ni kabonganai aanga nako ibukin kabwakan ara onimaki.

² Te Baibara e tuangira bwa ti aki riai ni mimi ni kataaki aika roko iroura, ma ti riai ni kakaantaningai. (1 Betero 4:12) Ni koauana, ‘a kumeaki ni kakoroaki maraki aika titeboo ma marakira i nanoia tarira aika mena i aon te aba.’ (1 Betero 5:9) Ni boong aikai, e korakora kataakia ana toro te Atua n tatabemania nako iroun Tatan. E kukurei te Riaboro ngkana ti kammarakaki ni kangaanga aika mwaiti, aika ai aroni bwaai ni kateketeke. N aron anne, e kabonganai bwain te maiu aei ibukin kakorakoran riki te maraki ae reke mani bwaai aika kaanga, ‘bwaai ni kateketeke n irikora.’ (2 I-Korinto 12:7) Ma tiaki nanona bwa ti na bwaka ngkana ti niniaki iroun Tatan. Iehova e na katauraoa ‘kawaira ni biri nako’ bwa ti aonga n aki bwaka n te kaririaki, ao e na buokira naba ngkana ti kaaitara ma kangaanga aika ai aroni bwaai ni kateketeke n irikora.​—1 I-Korinto 10:13.

Te Nanomwaaka ma te Bwai ni Kateketeke

3. Tera ana kaeka Iehova ngke e butiaki iroun Bauro bwa e na anaa te bwai ni kateketeke are n irikona?

³ E ononia te Atua te abotoro Bauro bwa e na anaaki te bwai ni kateketeke are n irikona. “I katenua au butiia te Uea i bukin te baei ba e na nako mai rou.” Ao tera ana kaeka Iehova nakon ana bubutii Bauro? “E a tau au akoi i roum: ba e kakoroaki raoi mwakau n te mamara. Ma ngaia ae moan te kukurei ngai ni kamoamoaai ni mamarau.” (2 I-Korinto 12:8, 9) Ti na nenera raoi te kaeka aei ma n noria bwa e na kanga ni buokira n nanomwaaka i aoni kangaanga aika kammaraki aika ai aron bwaai ni kateketeke n irikora.

4. Baikara aaro ake e a tia ni kakabwaiaki iai Bauro n ana akoi Iehova?

⁴ Taraia bwa te Atua e kaungaa nanon Bauro bwa e na iangoa akoana ae e a tia n reke irouna rinanon Kristo, ma ni kakaitau iai. A mwaiti kakabwaia ake a a tia n reke iroun Bauro. Iehova e tatangira ngke e rinea Bauro bwa te tia rimwin Kristo, e ngae ngke e korakora bwainikirinaia ana reirei Iesu irouna rimoa. (Mwakuri 7:58; 8:3; 9:1-4) Imwina, e akoa Bauro Iehova ngke e mwiokoia ni mwakuri ao beku aika kamaiu aika mwaiti. E teretere ngkanne reireiara mai iai, bwa e ngae ngkana ti rangi n rawawata, ma bon iai naba kakabwaia aika mwaiti ake ti anganaki ake ti riai ni kakaitau iai. Ti aki riai ni kariaia taiani kataaki bwa a na kairirira nakon mwanuokinan raoiroin Iehova.​—Taian Areru 31:19.

5, 6. (a) E a kanga Iehova n reireina Bauro ae mwaakan te Atua e ‘kakoroaki raoi n te mamaara’? (b) E a kanga ana katoto Bauro ni kaotia bwa e boni kewe Tatan?

⁵ E tau naba ana akoi Iehova n te itera teuana. E bati n tau mwaakan te Atua ni buokira n ara kangaanga. (I-Ebeto 3:20) Iehova e reireina Bauro bwa mwaakana e ‘kakoroaki raoi n te mamaara.’ N te aro raa? E kaota ana tangira ngke e angan Bauro te korakora are e kainnanoia bwa e aonga n nanomwaaka n ana kangaanga. Ao nanomwaakan Bauro ao onimakinan Iehova irouna e kaotia nakoia aomata ni kabane bwa e totokanikai mwaakan te Atua ni buoka te tia bure ae mamaara aei. Iangoa naba aron rotakin te Riaboro iai, are ngaia are e taku bwa aomata a tii beku iroun te Atua ngkana a nakoraoi maiuia ao a mweeraoi. Ana kakaonimaki Bauro e a riki bwa kaanga orean taban te tia uarao arei!

⁶ Bauro e airi ngkoa ma Tatan ni buakana te Atua ao ni bwainikirinia Kristian. Boni ngaia te Baritaio ae ingainga nanona n ana Aro, ao e mwengaraoi ibukina bwa e bubura nakoana. E a riki Bauro bwa te aomata ae e “mangori . . . i buakoia taan tuatua” ngke e beku iroun Iehova ao Kristo. (1 I-Korinto 15:9) E nanorinano n aantaeka iroun te rabwata n tautaeka i aoia Kristian ake n te moan tienture. Ao e kakaonimaki n nanomwaaka e ngae ngke e rotaki n te bwai ni kateketeke n irikona. E aki rauaki Tatan ngke e noria bwa kangaanga ake a roko iroun Bauro, a aki kabuaa ingaingan nanona ni mwamwakuri. E bon aki toki Bauro ni kaatuua iangoan te kaantaninga ae mena imwaina ae e na ababa n ana Tautaeka n Uea Kristo i karawa. (2 Timoteo 2:12; 4:18) Akea te bwai ni kateketeke ae e kona n urua aron ingaingan nanona, e ngae ngkana e rangi ni kammaraki. E bia teimatoa ni korakora naba ingaingan nanora! Iehova e kakorakoraira bwa ti na nanomwaaka ni kataaki aika roko iroura. E akoira iai n te aro are e anganira ara tai ni buoka aron katereterean ana kewe Tatan.​—Taeka N Rabakau 27:11.

Moan te Kakawaki Bwaai n Ibuobuoki Mairoun Iehova

7, 8. (a) E a kanga Iehova ni kakorakoraia ana toro ni boong aikai? (b) Bukin tera bwa moan te kakawaki te katoa bong ni wareware ao n reirei n te Baibara ibukin buokara bwa ti na nanomwaaka ni bwaai ni kateketeke n irikora?

⁷ Ni boong aikai, Iehova e kakorakoraia Kristian aika kakaonimaki rinanon te taamnei ae raoiroi, ana Taeka, ao ai te botaki n itaritari ni Kristian. N ai aron te abotoro Bauro, ti kona ni kaki rawawatara i aon Iehova rinanon te tataro. (Taian Areru 55:22) E ngae ngkai te Atua e na aki kamaunai ara kangaanga moa, ma e kona n anganira te wanawana ae ti kainnanoia ibukin nanomwaakara iai, e ngae ngkana a rangi ni kangaanga. E kona naba Iehova n anganira te nanomatoa ao te “mwaka ae moan te korakora” bwa ti aonga n nanomwaaka iai.​—2 I-Korinto 4:7.

⁸ Ti a kanga ni karekea te ibuobuoki anne? Ti riai ni kaumakira n reirei n ana Taeka te Atua, bwa ngaia te tabo are a mena iai ana taeka ni karaunano. (Taian Areru 94:19) A ringaki nanora ngkai ti wareka naba iai aia taeka n onon ana toro te Atua, aika a tangira buokaia mairouna. A riai n iaiangoaki raoi ana kaeka Iehova, ake a raonaki naba n taeka ni karaunano. Te ukeuke n reirei n te Baibara e na kakorakoraira “ba e aonga n ataki te mwaka ae moan te korakora ba mwakan te Atua, ao tiaki mwakara.” N aron ae ti riai n amwamwarake ni katoa bong bwa ti aonga ni marurung ma ni korakora n te itera n rabwata, ao ti riai naba ni karina ana taeka te Atua ni katoa tai. Ti kakaraoa aei? Ngkana ti kakaraoia, ao ti na noria bwa reken te “mwaka ae moan te korakora” iroura e na buokira n nanomwaaka ngkana ti ituaki ni bwaai ni kateketeke.

9. A na kanga unimwaane ni kona ni buokia aomata aika a tabe ni kaaitara ma kangaanga tabeua?

⁹ Unimwaane ni Kristian aika mamaaka te Atua a kona n riki bwa kaanga “ne ni katantan man te ang, ma ni kamanomano man te karau,” are a kamanoaki iai aomata man taiani kangaanga ao rawawata. Unimwaane aika tangiria n riki n aron anne, a nanorinano ni butiia Iehova ma nanoia ni koaua, anganakiia “neweia akana reireiaki,” bwa a aonga n rabakau ni kabebetei nanoia akana rawawata, n taeka aika riai. Aia taeka unimwaane a kona n riki n aron te karau ae matimtim ae kamwaitoroa ma ni kabebetei nanoia aomata ni kangaanga aika a rotiia. Ngkana a “kabebeteia akana a kai toki nanoia,” unimwaane a rangi ni buokia taria ma mwaaneia n te onimaki aika tao a moanna ni kua ke ni bwara nanoia ni bwaai ni kateketeke n irikoia.​—Itaia 32:2; 50:4; 1 I-Tetaronike 5:14.

10, 11. A na kanga ana toro te Atua ni kaungai nanoia aomata aika e korakora kataakiia?

¹⁰ Ana toro Iehova ni kabane boni kaain ana utu ni Kristian ae katiteuanaki raoi. Eng, “ti reitaki iai i boni iroura ba bwain te rabata ae ti teuana,” ao “e riai naba ba ti na i tangitangiri.” (I-Rom 12:5, BK; 1 Ioane 4:11) Ti kanga ni kakoroa nanon tabera aei? N aron ae e kaotaki n 1 Betero 3:8, ti karaoa anne n arora ni kaotiota te ‘atataiaomata, n tangiriia taari, ao n nanoangaia’ tarira ni kabane n te onimaki. Ti kona naba ni mwamwannanoia raoi te koraki aika ituaki n te bwai ni kateketeke ae kammaraki, aika a kara ke aika a ataei riki. N te aro raa?

¹¹ Ti riai ni bwaina te atataiaomata ni kaineti ma te maraki ae e ituiia. A kona n rawawata riki iai ngkana ti kaakeai bongaia ke ti aki bwerengaki iai. Ataakin aia kangaanga e riai ni kairira bwa ti na iangoi raoi bwa baikara bwaai ake ti na taekinna nakoia, arora n taetae nakoia, ao aroarora nakoia. Ngkana ti bwaina te aroaro ae kamaiu ma ni kaungaunga, ao ti kona iai ni kauarerekea te maraki ae a namakinna man te bwai ni kateketeke ae e ituiia. Ti a riki iai bwa taan ibuobuoki nakoia.​—I-Korote 4:11.

Aroia Tabeman n tia n Tokanikai Iai

12-14. (a) Tera are e karaoia te Kristian temanna bwa e aonga n nanomwaaka n aorakina ae te kaentia? (b) Tera aroia tarina ao mwaanena ni Kristian ni buokia ma ni kaunga nanona?

¹² A kauekeaki taiani “maraki” ni katoa bong, ngkai ti tabe ni kaania riki tokin kabaneani boong aikai. (Mataio 24:8) Ngaia are a bae ni kataaki kaain te aonnaba ni kabane, ao a moamoa riki ana toro Iehova ake a tabe ni kakaraoa nanona. N aron anne, iangoa te Kristian temanna ae e kabwanina ana tai n te mwakuri ni minita. E a reke aorakin neiei ae te kaentia, ao e rinanon te korokoro ae e anaaki iai bwain rabwatana aika te salivary ao te lymphatic gland. A waekoa ni kaania Iehova n te tataro ae ananau ngke neiei ma buna a ataia ae e ituaki n te aoraki aei. E taku neiei bwa a namakina te rau ae korakora imwin anne. E ngae n anne, e kona ni marurung n tabetai ao n rawawata n taai ake tabeua, ao e moamoa riki ngkana e rotaki ni mwiin ana bwainnaoraki.

¹³ Ibukin nanomwaakana n ana kangaanga aei, te tari-te-aine aei e kataia ni kabatiaa ana atatai i aon te kaentia. E maroro ma ana taokita. E kunei rongorongoia tabeman ake a ituaki n te aoraki aei ake a kabwarabwaraa aron nanomwaakaia iai, ake a boretiaki n Te Taua-n-Tantani, te Awake!, ao ara boki tabeua riki. E wareka naba mwakoron te Baibara aika kaota mwaakan Iehova ni buokia ana aomata aika rawawata, ao rongorongo riki tabeua n ibuobuoki.

¹⁴ E taekin taeka aika raraoi aikai te kaongora teuana ae kabwarabwaraa aron kabebetean nanon te aomata are e bwara nanona: “E irira oin nanona te aomata ae e maeka n ti ngaia.” (Taeka N Rabakau 18:1, BK) E taekina te reirei aei te kaongora anne: “Rarawa ni kaokoroko ma aomata.”a E kangai te tari-te-aine arei: “A mwaiti aomata ake a tuangai ae a bubutii taekau n aia tataro; tabeman riki a tarebon nakoiu. Unimwaane aika uoman a kakawarai n norai bwa I uara. A kanakoaki nakoiu taian uee ao reeta aika mwaiti. Tabeman naba a katauraoi karara. Ao a mwaiti aika a anga nanoia bwa a na kairai nakon te oo-n-aoraki ibukin bwainnaorakiau iai.”

15-17. (a) E a kanga aron te Kristian temanna n nanomwaaka i aoni kangaanga aika a riki mai mwiin te kabuanibwai? (b) Tera te ibuobuoki ae a karaoia kaain te ekaretia?

¹⁵ Uoua ana tai n ikoaki temanna ae e maan ni beku iroun Iehova ngke a kurati kaa, i New Mexico, U.S.A. A ikoaki iai roroana ao angana, ao e kakorakoraki riki iai marakin rabwatana are ituaki n te boori i nanon 25 te ririki. E karakina ae kangai: “E rangi ni kangaanga irou ae N na tabeka atu ke n uota te bwai teuana ae tinebu riki nakon nimaua te rawawata. Ma I rangi ni buokaki n te kakorakora n tatataro nakon Iehova. I a buokaki naba ni kaongora aika n Te Taua-n-Tantani ake ti reiakin. Teuana mai buakoia e kabwarabwaraa taekan Mika 6:8, ao e kaotia bwa te nakonako ma te Atua e nanona ataakin tian am konabwai. I a buokaki iai bwa N ataia ae e aki riai ni bwara nanou n aorakiu, e ngae ngkai e uarereke riki au tai ni karaoa te mwakuri ni minita, nakon are I tangiria. E kakawaki riki ae ti beku irouna ma te nano ni koaua.”

¹⁶ E kangai naba: “Unimwaane a aki toki ni kamoamoa au kekeiaki ni kaakaei botaki ao n ira te mwakuri ni minita. A bubutimwaeai ataei ma te irabati. A rangi n akoai taiani bwaiania ao a bita aia babaire bwa a aonga ni buokai ngkana I mamaara. Ngkana e buaka te bong, ao a akoai ni kairai nakoia aomata ake a okiokiria ke a reirei n te Baibara ma ngaiia. Ao ibukina bwa I aki kona n uouota te baeki, taan uarongorongo tabeman a kakarina au boki n aia baeki ngkana I airi ma ngaiia n tataekina te rongorongo.”

¹⁷ Taraa aroia unimwaanen te ekaretia ao raao n onimaki ni buokia taari-aine aika uoman aikai bwa a na nanomwaaka n aorakiia. A anga te ibuobuoki ae manena ma n akoi ae buoka kainnanoia n te itera n rabwata, te itera n taamnei ao e kabebetei naba nanoia. E aki unga nanom iai bwa ko na buokia naba taari-mwaane ao taari-aine aika a rotaki n te aoraki? Ngkami ataei, kam kona naba ni buokia kaain ami ekaretia ake a kaaitara ma te bwai ni kateketeke n irikoia.​—Taeka N Rabakau 20:29.

18. Tera te kaungaunga ae ti kona ni karekea man rongorongoni maiuia aomata tabemwaang ake a boretiaki n Te Taua-n-Tantani ao te Awake!?

¹⁸ Maekatin aika Te Taua-n-Tantani ao te Awake! a a tia ni boretii rongorongon maiuia taani Kakoaua ake a a tia n tokanikai i aoni kangaangan te maiu aei ke a tabe naba ni kaaitara ma ngaai. Ngkana ko wawareki rongorongo aikai, ko na noria bwa a mwaiti tarim n taamnei ni katobibia te aonnaba aika a a tia n nanomwaaka i aoni kangaanga aika irekereke ma aki-taun te mwane, mateia aomata ake a tangiraki irouia n taiani kabuanibwai, ao buaka aika karuanikai. Tabeman riki a nanomwaaka n aorakia ae karika te aki-konamaki irouia. A mwaiti riki aika a aki kona ni karaoi mwakuri aika a bebete karaoaia irouia aomata aika a marurung raoi. A rangi ni kataaki n aorakiia aikai, ao e moamoa riki ngkana a aki kona ni karaoi mwakuri ni Kristian n te mwaiti ae a tangiria. Ai kakaitau ra ngaiia n te ibuobuoki ae karaoaki irouia taria ao mwaaneia n te onimaki aika ikawai ao aika ataei!

E Karekea te Kukurei te Nanomwaaka

19. Bukin tera bwa e kimwareirei Bauro e ngae ngke e rotaki ni kataaki ao mamaara tabeua aika ai aroni bwaai ni kateketeke?

¹⁹ E kimwareirei Bauro ngke e kakorakoraki iroun te Atua. E kangai: “Ma ngaia ae moan te kukurei ngai ni kamoamoaai ni mamarau, ba e aonga ni memena mwakani Kristo i aou. Ma ngaia ae I kukurei n taiani mamara, ma taian taetaebuakaki, ma taiani kai n nano, ma taiani bainikirinaki, ma taiani maraki, i bukini Kristo: ba ngkana I mamara, ao I a korakora iai.” (2 I-Korinto 12:9, 10) Ibukin bwaai aika riiriki nakoina, e aki nanououa Bauro ni kangai: “I aki taekina anne ba aongkoa I kainnano. I a tia ni kataneiaai ba N na nanoraoi n tai nako n tibangau ae e reke. I rabakau te maiu ni kainnano ao te maiu ni kaubai. I a tia n reireiai arou n nuai ke ni baki n tai nako ao n tabo nako, ao te maiu i nanon te kaubai ke i nanon te kainnano. I konai bai ni kabane iroun Teuare e anganai te korakora.”​—I-Biribi 4:11-​13, BK.

20, 21. (a) Bukin tera bwa ti na kimwareirei ngkana ti iaiangoi “baika aki nonoraki”? (b) Tera “baika aki nonoraki” tabeua ake ko kaantaningaia bwa ko na nori n te Baretaiti i aon te aonnaba?

²⁰ Rinanon te nanomwaaka ni bwaai ni kateketeke ake a ituira, ti na kunea te kukurei ae bati ae reke man kaotiotan ae e kakoroaki raoi mwaakan Iehova ni mamaarara. E korea aio Bauro: “Ma ngaia ae a aki bara nanora . . . e boni kume ni kara aomatara ae i ao, ma e kakorakoraki naba aomatara ae i nano, n te bong ae koraki. Ba rawawatara ae bebete, ae kai toki, e kume ni karika i bukira ni karaka rake, te mimitong ae ababaki ae aki totoki; ngkai . . . ti taratarai baika aki nonoraki: ba . . . a aki totoki.”​—2 I-Korinto 4:16-​18.

²¹ Angiia ana aomata Iehova ni boong aikai a kaantaninga te maiu n te Baretaiti n te aonnaba are a na kukurei iai ni kakabwaia ake a beritanaki irouna. Kakabwaia aikai a kona n taekinaki bwa a “aki nonoraki” iroura ni boong aikai. Ma e na waekoa n roko te tai are ti na bon nori kakabwaia aikai, ma ni kukurei iai n aki totoki. Te kabwaia teuana mai buakon aikai bon te inaaomata mani kangaanga aika ai aroni bwaai ni kateketeke! Natin te Atua e na “uru ana makuri nako te riaboro” ma ni “kataea ana kai teuare iai i rouna maakan te mate.”​—1 Ioane 3:8; Ebera 2:14.

22. Tera ae ti riai n onimakinna raoi n akea te nanououa?

²² Mangaia are ti bia nanomwaaka ma te bwai ni kateketeke ae tabe ni kammaraka rabwatara ngkai. E konamaki Bauro iroun Iehova, ao are e na manga bon akoira naba ngkai ni kakorakoraira. Ti na karaoiroa Iehova ae Atuara ni katoa bong, ibukin mwakuri aika kamimi ake e karaoi ibukira, ngkana ti maeka n te Baretaiti i aon te aba.​—Taian Areru 103:2.

[Kabwarabwara ae nano]

Tera Am Kaeka?

• Bukin tera te Riaboro ngke e kataia n urua aia onimaki Kristian ni koaua, ao tera ana aanga ni kakaraoa anne?

• E a kanga mwaakan Iehova ni ‘kakoroaki raoi n te mamaara’?

• A na kanga unimwaane ao tabemwaang riki ni kona ni kaungai nanoia aomata aika kammarakaki n aia kangaanga?

[Taamnei n iteraniba 22]

Tenua ana tai Bauro ni butiia te Atua bwa e na kanakoa te bwai ni kateketeke are n irikona