Titiraki Mairouia Taani Wareware

E rotaki rikin Iesu n aki kororaoin te kibono ae Nei Maria?

Ni kaineti ma “bungiakini Iesu,” e taekinaki n te rongorongo ae kairaki koreana iroun te Atua: “E kainrouaki Maria, are tinana, ma Ioteba; ao ngke a tuai ni botaki, ao e bikoukou Maria ni makan te Tamnei ae e Raoiroi.” (Mataio 1:18, BK) Ni koauana, te taamnei ae raoiroi mairoun te Atua e karaoa te mwakuri ae rangi ni kakawaki ni kaineti ma bikoukoun Nei Maria.

E boni ngae n anne, ma tera aron Nei Maria? Iai irekereken ana mannikariki ma bikoukouna? N aron ana berita te Atua are e karaoia nakoia Aberaam, Itaaka, Iakoba, Iuta, ao te Uea ae Tawita ake ana bakatibu Nei Maria, e riai bwa te ataei are e na bungiaki boni kanoaia ni koaua. (Karikani Bwaai 22:18; 26:24; 28:10-14; 49:10; 2 Tamuera 7:16) Bwa ngkana e aki, ao e na kanga ngkanne te ataei are e bungiaki iroun Nei Maria n riki bwa te tia ababa ni koaua ni kaineti ma ana berita te Atua aikai? E bon riai n riki Iesu bwa natin Nei Maria ni koaua.​—Ruka 3:23-34.

E a bon tia ni kaoti ana anera Iehova nakon te kibono ae Nei Maria, n taekina ae kangai: “Tai maku, Maria, ba ko akoaki iroun te Atua. Ane ko na bikoukou, ao ko na bungia natim ae te mane, ao ko na aranna ba Iesu.” (Ruka 1:30, 31, BK) Ngkana e na riki te aomata, te mannikariki mairoun te mwaane e riai ni kaitiboo ma ana mannikariki te aine. Ma Iehova ae te Atua e karaoa te mannikariki teuana i nanon ana kai ni kariki Nei Maria bwa e na kona ni kakariki, ngke e kamwainga maiun Natina are ana riki temanna mai karawa nako aon te aba.​—I-Karatia 4:4.

E kona ni kororaoi te ataei ae riki mairoun te aine ae aki kororaoi, man aki naba ituaki rabwatana n ana bure tinana? E kanga ngkanne aron te tua n te kariki n te itera aei ngkana e a ikotaki te kororaoi ma te aki kororaoi? Uringnga bwa te taamnei ae raoiroi are e kabonganaki bwa e na kamwainga maiun Natin te Atua ae kororaoi, ma ni karika te bikoukou aei. Te waaki aei e tokanikai i aon

te aki kororaoi are i nanon ana mannikariki Nei Maria, ao e a riki mai iai te maiu ae kororaoi.

N aki ongea aroni kakarikin ana mannikariki Nei Maria, ma ti kona ni koaua raoi bwa ana mwakuri te taamnei ae raoiroi mairoun te Atua n te tai arei, e buoka tokanikain ana kaantaninga te Atua. E a tia ni kabwarabwaraa ae kangai te anera are Kabiriera nakon Nei Maria: “E na ruoniko te Tamnei ae e Raoiroi, ao e na rabuniko makan Teuare Moan te Rietata. Ai ngaia ae e na aranaki ba Natin te Atua te tei ae e tabu ae e na bungiaki.” (Ruka 1:35, BK) Eng, te taamnei ae raoiroi mairoun te Atua e a riki bwa kaanga te oo are e totokoa te aki kororaoi, ke bwaai tabeua aika buakaka, bwa a na aki kabarekaa rikiraken te ataei ma ngke e moan riki.

E teretere raoi bwa e reke maiun Iesu ae kororaoi mairoun Tamana are i karawa, ao tiaki mairoun te mwaane temanna. Iehova e ‘katauraoa te rabata’ ibukin Iesu, mangaia are mani moan rikina, bon ‘akea baarekana ao e kaokoroaki ma taani bure.’​—Ebera 7:26, BK; 10:5.

[Picture on page]

“Ane ko na bikoukou, ao ko na bungia natim ae te mane”