Tei Ao Nora Kamaiuan Te Aba Mairoun Iehova!

“Tei rake, ao tei, ao nora kamaiuan te aba mairoun Iehova.”​—2 RONGORONGO 20:17.

1, 2. Bukin tera ngkai e na korakora riki mwin te buaka ae e a kaan roko ae ana buaka “Koka, are n te aba are Makoka,” nakon mwin mwakuri n iowawa aika kakamaaku ni katobibia te aonnaba?

E A TIA ni kabwarabwaraki te mwakuri n iowawa ae tiritiri irouia tabeman bwa buakanakia kaain te aonnaba ni kabanea. E mataata iai bwa e riai ni kaatuuaki iaiangoan te aro ni kakamaaku aei. Ma n te itera teuana, iai naba te buaka ae mena imwaira ae na korakora riki ana urubwai, ao aei are a aki bati ni kaatuua iangoana aomata. Tera te bwai aei?

² Bon ana buaka “Koka, are n te aba are Makoka,” are e taekinaki n Etekiera mwakoro 38. Bon te rongorongo ae karakaki are e na korakora riki mwin te buaka aei, nakon mwin mwakuri n iowawa aika kakamaaku ni katobibia te aonnaba? Bon tiaki, bwa e na bon raka nako riki ana buaka Koka nakon are tii buakanakiia tautaeka n aomata. E na buakana naba ana tautaeka n uea te Atua i karawa! Ma bon tiaki aroia aomata ae iai tian aia konabwai te tia Karikiriki, bwa e boni kona ni kaaitara ma ana mwakuri aika iowawa riki Koka.

Buakanakin Ana Tautaeka te Atua

3. Tera are a a tia n tuangaki taan tautaeka i aon te aba bwa a na karaoia ni moa man te ririki 1914, ao tera aroia ni kaineti ma anne?

³ E a tia ni waaki te itabarara i marenan te Uea ae tautaeka ngkai mairoun te Atua ao ana waaki Tatan ae buakaka i aon te aonnaba, man moan tein ana Tautaeka n Uea te Atua i karawa n te ririki te 1914. A tuangaki n te tai anne taan tautaeka i aoia aomata bwa a na aantaeka nakon te tia Tautaeka ae e a tia n rineia te Atua. Ma a rawa n ongo n aron are e a kaman taetae ni burabetinaki ni kangai: “A tei rake n un uean aonaba, ao a botaki ni kabowi taan tau-taeka, n eka nako Iehova ma ana Mesia, ao a kangai, ti na motiki aia bwai ni kabaebae, ao ti na tetewe nako aia mwaea mai roura.” (Taian Areru 2:1-3) A nang roko n tokiia aomata aika kaitaraa ana kairiri te Tautaeka n Uea n ana tai ni buaka Koka are mai Makoka.

4, 5. A na kanga aomata ni kona ni buakana ana tautaeka te Atua i karawa ae akea rabwatana?

⁴ Tao ti kona ni mimi bwa a na kanga aomata ni buakana te tautaeka mai karawa ae akea rabwatana. E taekinaki n te Baibara bwa te tautaeka aei e kaainaki irouia aomata aika “tebubua ma abwi ma aua tenga, ake a kabooaki mai aon te aba,” ao n ikotaki naba ma “te Tiibutetei,” ae Kristo Iesu. (Te Kaotioti 14:1, 3; Ioane 1:29) E aranaki te tautaeka ae boou aei bwa “karawa nabangkai,” kioina ngkai e mena i karawa, ao a aranaki kaaina aika mena i aon te aba bwa “aonaba nabangkai.” (Itaia 65:17; 2 Betero 3:13) A kaman tia ni kaotiota te aro ni kakaonimaki ni menaia i aon te aba angiia te koraki ake a na uaia n tautaeka ma Kristo ake 144,000 mwaitiia. A a tia naba ni kaota kakoauan tauraoiia ni butimwaea mwiokoaia ae boou i karawa.

⁵ Bon iai naba ngkai nikiraia te koraki ake te 144,000 ae karako mwaitiia i aon te aba. E raka i aon 15,000,000 mwaitiia aomata ake a kaea kauringan Ana Katairiki te Uea n te ririki 2002 ao tii 8,760 mai buakoia aika kaota te kaantaninga ae iai mwiokoaia i karawa are a a tia n rineaki nako iai. Ngkana iai ane ninikoria ni buakania nikiraia kaain te Tautaeka n Uea aei, ao titeboo ma e buakana iai ana Tautaeka n Uea te Atua.​—Te Kaotioti 12:17.

E na Tokanikai te Uea

6. Tera ana iango Iehova ao Kristo ni kaineti ma te karitei nakoia ana aomata te Atua?

⁶ E a kaman taetae ni burabetinaki te bwai are e na karaoia Iehova nakoia ake a karitei nakon ana Tautaeka n Uea, ni kangai: “E na ngarengare Teuare tekateka i karawa: E na kaenaenaia te Uea. Ao E na taetae n unna nako ia iai, ao E na karawawataia n unna ae korakora: Ao Ngai I katokaa au uea i aon au maunga are tabu are Tion.” (Taian Areru 2:4-6) E a roko te tai are “e na bon tokanikai” iai Kristo i aan ana kairiri Iehova. (Te Kaotioti 6:2) Tera ana iango Iehova ibukiia aomata aika karitei nakon te kaitira ni buaka aei? E ataia Iehova bwa e kaineti te karitei aei nakoina ao te Uea are e a tautaeka ngkai. E taekina ae kangai Iehova: ‘Ane riingngkami ao e riinga naba ataeini matau.’ (Tekaria 2:8) Ao e taetae n te bwana ae korakora Iesu bwa bwaai ni kabane aika a karaoaki ke a aika aki karaoaki nakoia tarina aika kabiraki, ai bon titeboo naba ngke a karaoaki ke aki karaoaki nakoina.​—Mataio 25:40, 45.

7. Bukin tera ngkai a na namakina unin Koka te “koraki ae uanao,” ae taekinaki n Te Kaotioti 7:9?

⁷ Te koaua bwa a na namakina naba unin Koka aomata ake a kakaonimaki ni boutokaia taani kabiraki aika nikira. Aomata aika kaantaningaki bwa kaain ana “aonaba nabangkai” te Atua bon “te koraki ae uanao” aika weteaki “mai buakoia botanaomata ni kabaneia, ma baronga ma natanaomata ma taian taetae ni bane.” (Te Kaotioti 7:9) A taekinaki bwa “a tei i nanoaan te kaintokanuea, ao i matan te Tiibutetei, ao a kunnikaiia n ninira aika mainaina.” A a tia ni karekea akoaia i matan te Atua ao Kristo Iesu. A uoti “baani baam i nanoni baiia,” a karinea Iehova bwa boni ngaia te tia Tautaeka i aon bwaai ni kabane, are e kaotaki ana kairiri rinanon ana tautaeka te Uea ae Iesu Kristo, ae “ana Tiibutetei te Atua.”​—Ioane 1:29, 36.

8. Tera ae e na karaoia Kristo ibukin ana buaka Koka, ao tera mwina?

⁸ Ana buaka Koka, e na kaira te Uea are e a tia n rineia te Atua bwa e na buaka ao ni waakina iai te buaka are Aremaketon. (Te Kaotioti 16:14, 16) A na bane ni kamaunaki aomata aika rawa ni kariaia riain Iehova n tautaeka. N te itera are teuana, e nang akea tokin kabebeteaia man te rawawata aomata ake a a tia n nanomwaaka i aan te bwainikirinaki ibukin aia kakaonimaki n aantaeka nakon ana Tautaeka n Uea te Atua. Ni kaineti ma aei, e korea ae kangai te abotoro Bauro: “Bon te kanikina baei, ae kakoauan ana moti te Atua ae te moti ae raoiroi, ba kam aonga n atongaki ba kam riai n anganaki uean te Atua, are kam bainikirinaki i bukina: ngkana tao e riai iroun te Atua te mangaangania ake a karawawataingkami te rawawata, ao te anganingkami ngkami akana kam karawawataki te motirawa ma ngaira, ngkana E kaotaki mai karawa te Uea are Iesu ma anerani mwakana n te ai ae ura mwaka, ni kareke kaiia ake a aki ata te Atua, ma ake a aki ira nanon euangkerion are Uea are Iesu Kristo.”​—2 I-Tetaronike 1:5-8.

9, 10. (a) E kanga Iehova n angan Iuta te tokanikai i aoia kairiribai aika korakora? (b) Tera ae a riai n teimatoa ni kaakaraoia Kristian ni boong aikai?

⁹ E nang kamaunaa te buakaka ni kabane Kristo n tain te rawawata ae korakora ae a kaan roko ngkai n Aremaketon. Ma bon akea kainnanoaia taan rimwina bwa a na buaka, n ai aroia naba baronga aika uoua man te tautaeka n Iutaia i nanon ngaa ma ngaa te ririki n nako. Bon ana buaka Iehova te buaka aei, ao e anga te tokanikai iai. E taekinaki rongorongona ni kangai: “E kateiia taani karan Iehova ba a na ekiia nako tibun Ammon, ma Moaba, ma kaain te maunga are Teira, ake a roko n ekiia nako I-Iuta; ao a oreaki. Ba a tei rake tibun Ammon ma Moaba n ekiia nako kaain te maunga are Teira, ba a na kamateia ma ni kamaunaia: ao ngke a a tia ni kamaunaia kaain te maunga are Teira, ao a bane n i buobuoki ni kamateia i bon i rouia. Ao ngke a roko I-Iuta n te ne ni kariaria are n te rereua, ao a tara te koraki are bati; ao noria, boni banna aika bwaka i aontano, ao akea ae rawea maiuna.”​—2 Rongorongo 20:22-​24.

¹⁰ E riki n aron are e a kaman tia n taetae ni burabetinna Iehova: “E aki riai ba kam na taon n te bo ni buaka.” (2 Rongorongo 20:17) E a tei te bwai ni kakairi man aei ibukia Kristian bwa a na tou mwanekan Iesu Kristo ngkana e a roko bwa “e na bon tokanikai.” Ma e ngae n anne, ao a bon teimatoa ni buakana te buakaka tiaki n oin korakoraia, ma ni bwaai n taamnei. A kaotia iai bwa a “kataea ana kai te buakaka n te raoiroi.”​—I-Rom 6:13; 12:17-​21; 13:12; 2 I-Korinto 10:3-5.

Antai ae na Kaira Ana Buaka Koka?

11. (a) Antai aomata ake e na kabonganaia Koka ni waakina iai ana buaka? (b) Tera ae irekereke ma te marurung n te itera n taamnei?

¹¹ E ataaki Koka are mai Makoka bwa boni ngaia Tatan te Riaboro, man ana mwakuri aika bubuaka, ni moa man te ririki te 1914. E aki kona ni waakina ana buaka kioina ngkai bon te taamnei ngaia, mangaia are e na kabonganaia aomata bwa a na karaoi ana mwakuri. Antai ngkanne aomata aikai? E aki anganira te rongorongo ae bwanin te Baibara i aon aei, ma e anganira kanikinaa ake a na buokira ni kinaia iai. Ngkai e a tabe ni kakoroaki nanon taetae ni burabeti ake n te Baibara ni bwaai aika riiriki ngkai n te aonnaba, ao e nang rikirake ngkanne iai otara teutana imwin teutana. A aki tabe ma te katautau ana aomata Iehova ma a teimatoa ni marurung n te itera n taamnei, a atai raoi aia waaki nako botaki n tautaeka ma Aaro, ake a kakoroi bukin taetae ni burabeti i nanon te Baibara.

12, 13. E kanga te burabeti ae Taniera n taetae ni burabetina te kaitira ni buaka are e kainetiia ana aomata te Atua?

¹² E a manga kaotaa nako riki rongorongon te kaitira ni buaka are e na karaoaki nakoia ana aomata te Atua te burabeti are Taniera, ngke e korea ae kangai: “E na otinako [te uea mai meang] ma te tiritiri ae korakora n tiringia aomata aika bati ma ni kamaunaia. Ao e na uniki kain rooan uman nako ana bareti i marenan taari ma te maunga are tamaroa are tabu.”​—Taniera 11:44, 45.

¹³ N taai ake e koreaki iai te Baibara, “taari” bon Marawa ae Abwabwaki, ke te Med­i­ter­ra­nean, ao te ‘maunga are tabu’ bon Tion, are e taekinna Iehova ni kangai: “Ao Ngai I katokaa au uea i aon au maunga are tabu are Tion.” (Taian Areru 2:6; Iotua 1:4) Mangaia are n te aro n taamnei, te aba are ‘i marenan taari ma te maunga are tamaroa are tabu’ e tei n onea mwin te aba n taamnei ibukiia Kristian aika kabiraki. A aikoa manga atongaki bwa te botannaomata ae ianena mairoun te Atua, ma a ingainga nanoia ni kaantaningaa te tai are a nang tautaeka iai ma Iesu Kristo n te Tautaeka n Uea i karawa. E teretere raoi bwa a na moanimataaki ana toro te Atua aika kabiraki n ikotaki ma raoia aika kakaonimaki ae te koraki ae uanao, iroun uean meang ngkana e moana ana buaka ae tiritiri ni kakoroan bukin are e taetae ni burabetinna Taniera.​—Itaia 57:20; Ebera 12:22; Te Kaotioti 14:1.

Tera Aroia Ana Toro te Atua Iai?

14. Baikara bwaai aika tenua aika a na karaoi ana aomata te Atua n tain buakanakiia?

¹⁴ Tera ae kaantaningaki bwa a na karaoia ana toro te Atua ngkana e roko buakanakia? A a tia ni katea te bwai ni kakairi ae kamimi ibukin aei ana botannaomata te Atua ake n ana bong ngkoa Ieotiabata. Noria bwa a tuangaki ngkoa kaaina bwa a na karaoi bwaai aika tenua aikai: (1) a na tei n aia tabo, (2) a na tei n aki kakammwakuri, ao (3) a na nora kamaiuan te aba mairoun Iehova. A na kanga ana aomata te Atua ni boong aikai ni karaoa ae boraoi ma taeka aikai?​—2 Rongorongo 20:17.

15. Tera nanon tuangakia ana aomata Iehova bwa a na tei n aia tabo?

¹⁵ Tei n aia tabo: A na teimatoa ana aomata te Atua ni boutokaa ana Tautaeka n Uea te Atua n akea te nanokokoraki. A na teimatoa ni kawakina aroia ni Kristian ae te tei i nuka. A na ‘teimatoa ao a na nene’ ni kakaonimaki n aia mwakuri ibukin Iehova ao a na teimatoa ni karaoiroa Iehova ibukin ana atataiaomata i mataia aomata. (1 I-Korinto 15:58; Taian Areru 118:28, 29) Bon akea te karawawataki n taai aikai ke n taai aika a na roko, aika a na kona ni kaingingaki iai man mwiokoaia iroun te Atua.

16. N te aro raa are a na tei iai ana toro Iehova?

¹⁶ Tei n aki kakammwakuri: A na bon aki kataia ana toro Iehova ni kamaiuiia i bon irouia, ma a na onimakina Iehova iai. Bon tii ngaia ae kona ni kamaiuiia ana toro mai buakon mangaongaon te aonnaba ao e a bon tia ni berita bwa e na karaoia. (Itaia 43:10, 11; 54:15; Baebaeti 3:26) Onimakinan Iehova, e nanonaki iai onimakinan te rabwata ae e a tia ni kakamanena i nanon ririki aika mwaiti ibukin kakoroan bukin ana kaantaninga. N aron ae tuai n noraki mai imwaina, a riai Kristian ni koaua n onimakinia raoia n onimaki aika a a tia n rineaki bwa a na kairiri iroun Iehova ao te Uea are e a tautaeka ngkai. A na kairaki ana aomata te Atua irouia mwaane aika kakaonimaki aikai. A kona n reke n te kabuanibwai ngkana a aki tabeakina aia kairiri mwaane aikai.​—Mataio 24:45-​47; Ebera 13:7, 17.

17. Bukin tera ngkai a na nora aron Iehova ni kamaiua te botannaomata, ana toro aika kakaonimaki?

¹⁷ Nora kamaiuan te aba mairoun Iehova: Te kakamaiu aei, boni kaniwangaia aomata ni kabane aika kateimatoai aroaroia ni Kristian ae te kakaonimaki, ao a mwiokoa Iehova ibukin kamaiuaia. A na teimatoa ni katanoataa rokon ana bong ni motikitaeka Iehova ma ngkai ni karokoa te kaitira n aoa n aron are a kona. A riai n ataia ana karikibwai ni kabane bwa Iehova bon te Atua ae koaua ao iai naba ana toro aika kakaonimaki i aon te aba. E na aki manga riki te kauntaeka ae teimaan ibukin riain Iehova n tautaeka.​—Etekiera 33:33; 36:23.

18, 19. (a) E kanga te anene n tokanikai are n Te Otinako mwakoro 15 ni kaotiota aron te namakin are e na reke irouia aomata aika a na kamaiuaki man ana buaka Koka? (b) Tera ae a riai ni karaoia ngkai ana aomata te Atua?

¹⁸ A na rin n te aonnaba ae boou ana aomata te Atua ma te korakora ae bati ao a na ingainga ni kan anenea te kuna n tokanikai are a aneneia naba tibun Iteraera rimoa imwin kamaiuakia man Taari are Uraura. A na kaitaua Iehova n aki toki ibukin kamanoaia, ao a na booti nanoia n tatabemania nako n taekina are e taekinaki rimoa ni kangai: “N na anene nakon Iehova, ba E tokanikai ni bati n neboaki. . . . Bon te tia buaka Iehova: Bon Iehova arana. . . . Iehova, e boi ketaia aiara ataim. Ao Ko kabwakaia ake a tei rake n ekiko nako ni kabatiani mimitongim: Ko kaotinakoa unim, e kamaunaia ba kanga maange. . . . Ko kairiia am aomata n te atataiaomata, ake Ko kamaiuia ni kaboia: Ko kairiia nakon nem ni maeka ae tabu ni makam. . . . Ane Ko na karinia, ma n unikiia n te maunga are Ko abanna, are te tabo are Ko karaoia, Iehova, ba Ko na maeka iai. Are te maneaba are tabu, are a kateimatoa baim, Iehova. E na uea Iehova n aki totoki.”​—Te Otinako 15:1-​19.

¹⁹ Kioina ngkai e a rikirake riki otara nakon are mai imwaina i aon te kaantaninga ibukin te maiu ae aki toki, ao ai raoiroi ra ngkanne te tai aei ibukia ana toro te Atua bwa a na kaotiota iai tangiran Iehova ao ni manga kabooui nanoia ni kan toro irouna ngkai boni ngaia aia Uea n aki totoki!​—1 Rongorongo 29:11-​13.

Ko Kona ni Kabwarabwaraa?

• Bukin tera bwa a moanimataaki te koraki ake a kabiraki ao tiibu tabemwaang n ana buaka Koka?

• A na kanga n tei n aia tabo ana aomata Iehova?

• Tera ae nanonaki n te tei n aki kakammwakuri?

• A na kanga ana aomata te Atua n nora kamaiuan te aba mairoun Iehova?

[Taamnei n iteraniba 28]

E angania Ieotiabata ma ana aomata te tokanikai Iehova, ao akea kainnanoaia bwa a na buaka

[Taamnei n iteraniba 30]

A uaia ni boutokaa riain Iehova n tautaeka te koraki ake a kabiraki ao tiibu tabemwaang

[Taamnei n iteraniba 32]

E a kaan te tai are a nang anenea iai te anene n tokanikai ana aomata te Atua n aroia kaain Iteraera ngkoa