Raawa Nakon Nanon Aon Te Aba Ae Bibitaki Aei

“Ti aki anganaki nanon aon te aba, ma ti anganaki te Tamnei are mairoun te Atua.”​—1 I-KORINTO 2:12.

1. N te aro raa are e mwamwanaki iai Nei Ewa?

“E MAMANAAI te naeta.” (Karikani Bwaai 3:13) Aikai taeka tabeua ake e kataia te moan aine ae Nei Ewa ni kabwarabwaraa iai bukin kariteina nakon Iehova ae te Atua. A koaua baike e taku ma a bon aki katanna man ana kairua. E kairaki n te taamnei te abotoro Bauro bwa e na korea ae kangai rimwi riki: “E mamanaki [Ewa].” (1 Timoteo 2:14) E mwamwanaki bwa e na kakoauaa bwa te mwakuri n aki ongeaba, are kanakin te uanikai are tabuaki, e na boni karekea kakabwaiana, bwa e na karikia bwa kaanga ai aron te Atua. E mwamwanaki naba ni kaineti ma aki-ataakin raoi te aomata are e mwamwanaia. E bon aki ataia neiei ae te naeta e taetae mairoun Tatan te Riaboro.​—Karikani Bwaai 3:1-6.

2. (a) E kanga Tatan ni mwamwanaia aomata ni boong aikai? (b) Tera “nanon aon te aba,” ao baikara titiraki aika ti na iangoi ngkai?

² E reita nako arona Tatan ni mwamwanaia aomata man aia tai Atam ma Nei Ewa. Ni koauana e boni “mamanaiia kaain aonaba ni kabane.” (Te Kaotioti 12:9) A bon aki bibitaki ana mwakuri n nanowanawana. E ngae naba ngke e a aki kabongana te naeta ni koaua, ma e bon teimatoa ni kamaabubua ataakina ni koaua. E mwamwanaia naba aomata Tatan ni kabonganai waaki nako ni kakibotu, taiani kaongora n te rerio, te beba ni kaongora, ao bwaai riki tabeua n te aro are a na kakoauaa bwa a aki kainnanoa ana kairiri te Atua ke a aki kabwaia mai iai. Ana kakorakora te Riaboro ni mwamwanaia aomata e a kataabangaka iai te nano ni karitei nakon ana kaetieti te Baibara ao ana tua. E arana aei te Baibara bwa “nanon aon te aba.” (1 I-Korinto 2:12) E rangi ni korakora rotakin aia koaua, aroaroia ao anuaia te koraki ake a aki ataa te Atua, n te nano aei. E kanga ni kaotiotaki te aeka n nano anne ao ti na kanga n rarawa nako iai? Ti na noria.

Kerikakin te Aroaro ni Maiu ae Riai

3. Bukin tera ngkai e a rikirake kaotiotan “nanon aon te aba” n taai aikai?

³ N taai aikai ao e a korakora riki kaotiotan “nanon aon te aba.” (2 Timoteo 3:1-5) Tao ko na bon namakinna naba bwa e a rangi n rikirake ni karako te aroaro ni maiu ae riai. E kabwarabwaraa te Baibara bwa bukin tera ngkai e riki aio. Imwin tein ana Tautaeka n Uea te Atua n te ririki 1914, ao e a wakinaki iai te buaka i karawa. A konaaki Tatan ma ana anera aika taimonio ao a karenakoaki nako rarikin te aonnaba. Ibukin unin Tatan n anne ao e a kakorakoraa ni mwamwanaia aomata ni katobibia te aonnaba. (Te Kaotioti 12:1-9, 12, 17) N aaro nako ake e kona ni karaoi, e kakorakoraa “n te aro ae a na mane naba iai akana a rineaki, ngke arona ba a kona ni mane.” (Mataio 24:24, BK) Kioina ngkai ana aomata te Atua ngaira, e bon rangi ni kainetira riki. E kakorakoraa bwa e na urui marurungira n te itera n taamnei bwa ti aonga ni kabuaa akoara mairoun Iehova ao n aki karekea naba iroura te maiu are akea tokina.

4. Tera aia iango ana toro Iehova ni kaineti ma te Baibara, ao tera aia iango kaain te aonnaba iai?

⁴ E kataia Tatan ni kamangora te Baibara, ae te boki ae e reiakinira taekan ara tia Karikiriki ae tatangira. Ma a tangira te Baibara ana toro Iehova ao e kakawaki irouia. Ti ataia bwa bon ana Taeka te Atua ae kairaki koreana iroun te taamnei ao tiaki aia taeka aomata. (1 I-Tetaronike 2:13; 2 Timoteo 3:16) Mangaia are a kaantaningaia kaain ana aonnaba Tatan bwa e na kaokoro ara iango ni kaineti ma te boki aei. N aron anne e taekinaki ae kangai n te rongorongo are i moan te boki teuana ae kaitaraa te Baibara: “Akea ‘tabun’ te Baibara, ao tiaki ‘ana taeka te Atua.’ E aki koreaki irouia tianto aika rineaki iroun te Atua ma e koreaki irouia ibonga aika ukoukora te kani mwaaka.” Te koraki ake a kakoauai rongorongo aikai a na kai mwane riki n te kaantaninga are a burebureaki iai, are aongkoa a inaaomata ni bairea are a bon taku ni kaineti ma aroia n taromauri nakon te Atua ke a kona naba n aki taromauria.​—Taeka N Rabakau 14:12.

5. (a) Tera ana taeka te tia koro-rongorongo temanna ni kaineti ma Aaro aika aongkoa a boutokoa te Baibara? (b) Baikara iango tabeua aika bwainaki n te aonnaba aei ngkana a kabotauaki ma ana taeka te Baibara? (Taekini naba kanoan te bwaoki n te iteraniba are imwina.)

⁵ Tiriburean te Baibara n itera aika kakaokoro, n ikotaki ma aia babakanikawai aomata ake a tei ibukin te Baibara, e a tia ni kauekea aki-tangiran taian Aro, ao Aaro aika aongkoa a boutoka te Baibara. A niniaki Aaro irouia botaki ni kanakorongorongo ao irouia bwakuaku. E korea ae kangai temanna te tia koro-rongorongo: “Angiia aomata ngkai a iangoa te Aro n Iutaia ao te Aro ni Kristian bwa a aki rangi n raoiroi. A tarai Aaro bwa botaki aika a bane taia, ao botaki nikawai aika tuka aron rikiraken te atatai ao rabakau aika boou. N taai aika tibwa nako, e a moanna n rikirake kakanikoakiia ao riribakia Aaro.” Te kairiribai aei e a reitaki ma te koraki ake a kakeaa te Atua ao a “nanobaba n aia taeka i nanoia.”​—I-Rom 1:20-​22.

6. Tera aia iango kaain te aonnaba ni kaineti ma aaro ni wene ni bure ake a kabuakakaki iroun te Atua?

⁶ Mangaia are bon akea te bwai ae ti na kubanako iai ngkai a a betinako aomata man ana kaetieti te Atua ibukin te aroaro ni maiu. N te katoto, e kabwarabwaraki n te Baibara bwa te wene ni bure irouia aomata aika titeboo aroia aika mwaane ma mwaane ke aine ma aine bon “te kamaira ni kamaamaa.” (I-Rom 1:26, 27) E taekinaki naba bwa te koraki ake a kaakaraoi mwakuri ni wene ni bure ao ni wene ni kimoa a na bon aki karekea Uean te Atua. (1 I-Korinto 6:9) Ma a aki tii kariaiakaki karaoan mwakuri ni wene ni bure n aaba aika bati, ma a iangoaki naba bwa mwakuri aika kakukurei ake a kamoamoaki n taiani boki, maekatin, kuuna ao birim ma kamataku n te TV. A riribaaki te koraki ake a taetae n ribai aeka ni waaki aikai ao a aranaki bwa e reme aia iango, ao e biri-tinaniku are a kaantaningaia ma te iango n taai aikai. A aki taraa ana kaetieti te Atua kaain te aonnaba aei bwa te mwakuri n tangira, ma a taraia bwa kaanga tukan inaaomataia ma kakororaoan nanoia.​—Taeka N Rabakau 17:15; Iuta 4.

7. Baikara titiraki aika ti riai n titirakinira iai?

⁷ Kioina ngkai ti mena ibuakoia kaain te aonnaba ae e a moanna ni korakora irouia kaitaraan te Atua, ti wanawana ngkanne ngkana ti tirobaei raoi arora ma bwaai aika a kakawaki iroura. Ti riai naba n tatataro ni katoa tai ma n tuoi raoi arora bwa ti na aki reke n te waaki are te beibeti nako man ana kaantaninga Iehova ao ana kaetieti. Tao ti kona n titirakinira ni kangai: ‘I kaki botuu ngkai ni mataku ke n ongora nakon bwaai aika I bon rawa iai tabeua te ririki n nako? I bubutimwaei aroaro ake e riribai te Atua? Te koaua bwa I a moanna riki ni mamaara ni bwaai n taamnei ni kabotauaki ma arou n taai aika nako? I kaotiotia n anuani maiu bwa I moanibwaia Uean te Atua?’ (Mataio 6:33) A na buokira aeka n aroaro aikai bwa ti na rawa nakon nanon aon te aba.

“Ti Kawa ni Beti Rio Maiai”

8. E na kanga temanna ni kona ni betinako mairoun Iehova?

⁸ E korea ae kangai te abotoro Bauro nakoia raona ni Kristian: “E riai ba ti na kakorakoraira riki ni kaki i nanora baika ti a tia n ongo, ba ti kawa ni beti rio maiai.” (Ebera 2:1) Te kaibuke ae betinako e a aki roko n te tabo are e na nako iai. Ngkana e aki rangi n tabe te kaaben ma te ang ao kawain te aira, e na boni kai betinako ngkanne ana kaibuke man te uaabu are e na mano iai ao e kona ni koro i aon te rakai. Ai arora naba bwa ngkana ti aki tabe ma kakawakin te koaua are e mena n ana Taeka te Atua, ti na kai betinako ngkanne mairoun Iehova ao n nora karawawatan uruakin ara onimaki n aron te kaibuke ngkana e uruaki. Ma tiaki nanona bwa ti na kitana te koaua iai. Ni koauana e aki kona n reke ae e na ribaaki Iehova irouia aomata aika bati n te tai ae tawe ao n te tai ae a a kaman baireia. Ma ae bon riiriki a kona ni moanna teutana imwin teutana, n irekereke moa ma te bwai teuana ae e na anai nanoia bwa a na aki tabeakina ana Taeka te Atua. Ao n te aro ae aki namakinaki, a kona ni beibetinako ni karokoa ae a a karaoa te bure. N aron te kaaben ae e matu nako, a kona naba aomata aikai n tatabemania nako ni matu nako ni karokoa ae e a rangi n oimwi.

9. Aaro raa ake e kakabwaiaki iai Toromon iroun Iehova?

⁹ Iangoa anuan maiun Toromon. E mwiokoaki iroun Iehova bwa e na uea i aon Iteraera. E kariaia naba te Atua bwa e na katea te tembora Toromon ao e tuangnga bwa e na korei mwakoron te Baibara tabeua. E taetae naba ma Iehova uoua te tai ao e anganaki te kaubwai, te kakannato, ao te rau n ana tai n tautaeka. Ma ae moamoa riki, e kakabwaiaa Toromon Iehova n anganna wanawanana ae moan te bati. E taku te Baibara: “Te Atua E angan Toromon te rabakau ma te ataibwai ae maiti kurikuri, ma te iango ae rababa, kanga ai aron te tano are i aoni biken taari. Ao e maiti riki rabakaun Toromon nakon rabakauia kaaini mainiku ni kabaneia, ao nakon rabakaun Aikubita ni kabanea.” (1 Uea 4:21, 29, 30; 11:9) Ni koauana, e kona n iangoia temanna bwa ngkana iai ae e teimatoa ni kakaonimaki nakon te Atua ao bon Toromon. Ma e ngae n anne, ao e boni betinako naba Toromon bwa e kabwaoua te koaua. E kanga n riki anne?

10. Tera te kaetieti are e kabwaka n ongeaba nako iai Toromon, ao tera mwina?

¹⁰ E ataa raoi ana Tua te Atua Toromon ao e mataata iai. Akea te nanououa bwa e bae n anaaki riki nanona ni kaetieti ake a koreaki ibukia uean i Iteraera. E kangai teuana mai buakon kaetieti akanne: “E na aki kabatiaia naba buna, [te uea] ba e na aki rairaki nako nanona.” (Te Tua-Kaua 17:14, 17) E ngae ngke e teretere raoi te kaetieti anne nakon Toromon, ma e boni karekeia naba buuna aika itibubua, ao tenibubua ana kinano. A bati i buakoia aine aikai aika a taromauri atua ianena. Ti aki ataia bwa bukin tera ngkai e kabatiaia buuna Toromon, ao ti aki ataia naba bwa tera aron iangoan anne irouna. Ma ae ti ataia, e kabwaka n ongeaba n ana kairiri te Atua ae teretere raoi. Te bwai ae riki nakoina imwin karaoan anne, bon te bwai are e a tia ni kauring i aona Iehova. Ti wareka ae kangai: “A anaa nanona [Toromon] buuna . . . nakoia anti tabeman.” (1 Uea 11:3, 4) E kerikaki wanawanana i aon aron nako te Atua teutana imwin teutana ni karokoa ae ai bon akea ao e a betinako. N te tai arei ao e a bitaki nanon Toromon are e kan ongeaba ma ni kakukureia te Atua bwa e a kakukureiia riki buuna ake beekan. E kananokawaki bwa bon Toromon are korei ngkoa taeka aika kangai: “Natiu, ko na wanawana, ao kakukureia nanou, ba I aonga ni kaeka ane kakanikoai”!​—Taeka N Rabakau 27:11.

E Korakora Mwaakan Nanon aon te Aba

11. E kanga n rotaki ara iango ni baike ti iaiangoi?

¹¹ E reke reireiara man ana katoto Toromon bwa e karuanikai iangoan are ngkana ti ataa te koaua ao e na uarereke kai rotakin ara iango ni bwaikorakin nako te aonnaba. N aron rotakin rabwatara n te amwarake ae ti kanna, ao ai aron naba te bwai are ti karinna n ara iango, titeboo ma te amwarake ae rotaki naba iai ara iango. Te bwai are ti karinna n ara iango e rota ara iango ma aroarora. Ataakin ae bon te koaua aei, a aki toki ngkanne kambwana n iokinibwai ni kabanea te mwaiti ni mwane ae birion ma birion te taaraa ni katoa ririki ibukin aia katanoata n anainano ibukin aia kaako. Katanoata aika a materaoi, a kakarinaki iai taeka ma taamnei aika anainano bwa e aonga n atikaki iai nanoia aomata nako. A ataia naba taani katanoata bwa noran aia katanoata irouia aomata n tii te taina ke uatai, e aki kona n anaaki iai nanoia bwa a na ingainga ni kani kabooi aia bwai. Ma e tangiraki bwa e na okioki te katanoata bwa a aonga ni kona aomata n atai kakawakin baikai ao n nano iai. E kanakoraoa te bitineti te katanoata n anainano bwa rimwi ao akea ae e na kabooi aia kaako. E korakora rotakin aia iango ao aroaroia aomata iai.

12. (a) E kanga Tatan ni kairaraangi aia iango aomata? (b) Tera ae kaotia bwa a boni kona naba n iraraang Kristian?

¹² E kaakatamaroai naba ana iango Tatan n aron te tia katanoata ao a taraa ni kakukurei, kioina ngkai e ataia bwa n te taina ao e na bon anaaki nanoia aomata n ana karekeiango aikai. Rinanon te kakibotu ao waaki riki tabeua, e mwamwanaia aomata Tatan bwa a na kakoauaa bwa e buakaka te bwai ae raoiroi, ao e raoiroi te bwai ae buakaka. (Itaia 5:20) A a tia naba ni mwane Kristian ni koaua bwa konan Tatan ni kaineti ma ana mwakuri ni kakorakora ibukin kataabangakan rongorongo aika kewe. E kauring ni kangai te Baibara: “E taku te Tamnei n aki kamwaninga te aba teutana, ba ane a nang kitana te onimaki tabemang ni boong aika kaitira, ngkai a iri nanoia tamnei aika bureburea te aba ma aia reirei taimonio, n aia mamana-te-aba taani kewe, aika a mamate mataniwin nanoia ba kaanga a kataneaki ni mwin te biti ae kabuebue.”​—1 Timoteo 4:1, 2; Ieremia 6:15.

13. Baikara iraorao aika bubuaka, ao ti kanga n rotaki n ara iraorao?

¹³ Akea i buakora ae e na aki kona n rotaki n nanon aon te aba. E rangi ni korakora ana waaki Tatan ni kona n rotira. E kaungaira ni kangai te Baibara: “Kam na tai burebureaki: A uru aaro aika riai taian i-raorao aika bubuaka.” (1 I-Korinto 15:33) Iraorao aika bubuaka a kona n irekereke iai bwaai ke aomata nako n ikotaki naba ma ake i nanon te ekaretia, ngkana e kaotiotaki nanon aon te aba. Ngkana ti iangoia bwa ti aki kona n rotaki buaka n taian iraorao aika bubuaka, ao ngkanne ti na kona naba n iangoia bwa e aki kona naba ni buokira te iraorao ma aomata aika raoiroi. Ai bure ra te iango anne! E katereterea raoi te bwai ae riki te Baibara ngke e kangai: “Ko na nakonako ma aomata aika rabakau, ao ko na rabakau iai: Ma e na maraki te aomata ngkana e raonia akana nanobaba.”​—Taeka N Rabakau 13:20.

14. N aro raa are ti na kona n rarawa iai nakon nanon aon te aba?

¹⁴ Ngkana ti na rawa nakon nanon aon te aba, ti riai ni bobotaki ma aomata aika wanawana, ae te koraki ae a toro iroun Iehova. Ti riai naba ni kaon ara iango ni bwaai aika karikirakea ara onimaki. E korea ae kangai te abotoro Bauro: “Ngkana iai bwaai aika koaua, bwaai aika riai, bwaai aika eti, bwaai aika itiaki, bwaai aika tangiraki ngkai a raraoi, bwaai aika riai ni kamoamoaki, ngkana iai te raoiroi teuana, ao ngkana iai te bwai ae e kamoamoaki te aba iai, ao kam na ururingi baikai n iangoi.” (I-Biribi 4:8) Kioina ngkai aomata aika ti inaaomata ngaira, ti kona ngkanne n rinei bwaai aika ti kan iangoi. Ti bia teimatoa n rinei bwaai aika ti na kaaniaki iai ma Iehova.

E Mwaaka Riki Taamnein te Atua

15. A kanga ni kaokoro Kristian ake a mena i Korinto rimoa ma kaain te kaawa ake tabeman?

¹⁵ A aki katotongia te koraki ake a kairaki n nanon aon te aba Kristian ni koaua, ma a kairaki iroun taamnein te Atua. E korea ae kangai Bauro nakoia kaain te ekaretia i Korinto: “Ti aki anganaki nanon aon te aba, ma ti anganaki te Tamnei are mairoun te Atua; ba ti na atai ana bwai n tituaraoi te Atua nako ira.” (1 I-Korinto 2:12) E otabwaniniaki te kaawa ae Korinto rimoa n nanon aon te aba. E korakora kaakaraoan mwakuri aika bubuaka irouia angiia kaaina mangaia are te taeka ae “katotonga aroia I-Korinto” e nanonaki iai “karaoan te wene ni bure.” E a tia ni kamataki nanoia aomata Tatan. Ao n tokina ai bon akea aia atatai aomata i aon taekan te Atua ae koaua, ke e a rangi n uarereke ataakina irouia. (2 I-Korinto 4:4) Ma e ngae n anne, e a tia ni kaurei mataia tabeman kaaini Korinto Iehova rinanon taamneina, bwa a aonga ni kona ni karekea irouia ataakin te koaua. E kairiia iroun taamneina bwa a na karaoi bitaki aika korakora ni maiuia bwa a aonga n tatangiraki iroun te Atua ao ni kakabwaiaki naba. (1 I-Korinto 6:9-​11) E ngae ngke e korakora nanon aon te aba, ma e boni korakora riki taamnein Iehova.

16. Ti na kanga ni kona ni karekea ao ni kateimatoaa taamnein te Atua iroura?

¹⁶ Ai bon tii te arona naba ni boong aikai, bwa taamnein Iehova bon te kabanea ni korakora n te iuniweeti aei, ao e kakaianga n akea boona nakoia te koraki ake a bubutii ma te onimaki bwa e na reke irouia. (Ruka 11:13) Ngkana ti kani karekea iroura taamnein te Atua, a mwaiti riki bwaai aika ti riai ni karaoi i rarikin are ti na rarawa nakon nanon aon te aba. Ti riai ni katoatai n reiakina ana Taeka te Atua ao ni maiuakinna bwa e aonga ni boraoi nanora ma ana iango. Ngkana ti karaoa anne ao e na boni kakorakoraira Iehova, bwa ti na tokanikai i aon ana bwai n nanowanawana Tatan are e na kabongana ibukin uruakan arora n te itera n taamnei.

17. E kona ni karau nanora rongorongon Rota n te aro raa?

¹⁷ E ngae ngke tiaki ana bwai te aba Kristian ma a boni mena i aon te aba. (Ioane 17:11, 16) Akea i buakora ae kona n totokoa nanon aon te aba, bwa ti boni bae ni mwakuri ke ni maeka ma te koraki ake a aki tangira te Atua ke ana kawai nako. Te koaua bwa ti namakina naba are e riki ngkoa nakon Rota ngke e “karawawataki nanona,” ao e kammarakaki n aia mwakuri kaain Totom ake e maeka i buakoia, kioina ngkai a urui tuua? (2 Betero 2:7, 8) Ngkana ngaia anne, ti na kona ngkanne ni karekea kabebetean nanora. E kakawakina Rota Iehova ao e kamaiua, mangaia are e kona naba ni karaoa aekan aei nakoira. E nori ao e atai aroarora nako Tamara ae tatangira, ao e kona n anganira buokara ma korakorara ake ti kainnanoi bwa ti aonga ni kateimatoaa marurungira n te itera n taamnei. (Taian Areru 33:18, 19) Ngkana ti mwiokoia, ti onimakinna, ao ni weteia, e na boni buokira bwa ti na rarawa nakon nanon aon te aba, n aki ongei kangaanga aika ti rinanoi.​—Itaia 41:10.

18. Bukin tera ngkai e riai ni kakawaki iroura reitakira ma Iehova?

¹⁸ Ti kakabwaiaki ngaira aika ana aomata Iehova n anganaki ataakin te koaua, e ngae ngke ti mena n te aonnaba ae ianena mairoun te Atua ao ni mwamwanaki iroun Tatan. Mangaia are ti rinanon te kimwareirei ao te rau are akea irouia kaain te aonnaba. (Itaia 57:20, 21; I-Karatia 5:22) E kakawaki iroura te kaantaninga ae tamaroa ibukin te maiu are akea tokina n te Baretaiti, are e nang akea iai nanon aon te aba, ae i aoni kawaina ni mauna nako aei. E bia teimatoa ni kakawaki iroura reitakira ma te Atua ao n taratara raoi bwa ti na kaeti aroarora ake a na kabetinakoira n te itera n taamnei. Ti bia kaanira riki ma Iehova, ao e na buokira bwa ti na rarawa nakon nanon aon te aba.​—Iakobo 4:7, 8.

Ko Kona ni Kabwarabwaraa?

• N te aro raa are e mwamwanaia iai aomata Tatan ao ni kairarangia?

• Ti na kanga n totokoa betinakora mairoun Iehova?

• Tera ae kaotia bwa e korakora mwaakan nanon aon te aba?

• Ti na kanga ni kona ni karekea te taamnei are mairoun te Atua ao ni kateimatoaa iroura?

[Taibora n iteraniba 23]

WANAWANAN AON TE ABA NI KAITARAAWANAWANAN TE ATUA

E aki tabwanin raoi te koaua, bwa bon aomata aika a otea oin aia koaua.

‘Bon te koaua ana taeka te Atua.’​—Ioane 17:17.

Ngkana ko baireia bwa e ngaa ae e eti ao ae e bure, onimakina are ko namakinna.

“Moan te mamamana riki te aba te nano nakoni bwai ni kabane, ao e kakaiaki aorakina.”​—Ieremia 17:9.

Karaoa ae ko kani karaoia.

“Tiaki ana bwai te aomata ae nakonako te kaeti eueutakina.”​—Ieremia 10:23.

Te kaubwai boni kiingin te kakukurei.

“Wakaani baika bubuaka ni kabane tangiran te mane.”​—1 Timoteo 6:10.

[Taamnei n iteraniba 22]

E betinako Toromon man te taromauri ae koaua ao e rairaki nakoia atua aika kewe

[Taamnei n iteraniba 24]

E katotonga aron te tia katanoata Tatan ni karikirakea nanon aon te aba. Ko rarawa nako iai?