Karekea Te Taamnei Mairoun Te Atua Ma Tiaki Nanon Aon Te Aba

“Ti aki karekea nanon aon te aba, ma ti karekea te taamnei mairoun te Atua, bwa ti aonga n atai bwaai ake ti akoaki n anganaki iroun te Atua.”​—1 I-KORINTO 2:12.

1, 2. (a) N te aro raa ae a buaka iai Kristian ni koaua? (b) Baikara titiraki aika ti na rinanoi?

ABUAKA Kristian ni koaua! E rangi ni korakora ara kairiribai, e kamwamwane ao e buaka ma te ninikoria. Iai ana bwai ni buaka ae rangi ni anainano ae e kona ni kabongana, ao a bati aomata ake a iraraang iai. Ma ti riai n aki iangoia bwa akea korakorara ke akea kantaningaan ae ti na tokanikai. (Itaia 41:10) Iai otangara ae tauraoi ae kakorakoraira n tei ni kaaitaraia aiara.

² Tiaki te buaka n rabwata ma bon te buaka n taamnei. Iai ara kairiribai ae Tatan te Riaboro, ao ana bwai ni buaka ae kamwamwane riki iai bon “nanon aon te aba.” (1 I-Korinto 2:12) Bon taamnein te Atua otangara ae rangi ni kakawaki ni kaaitarai ana kariri Tatan. Ngkana ti na tokanikai n te buaka aei ao ni kateimatoa ara iraorao ae kaan ma Iehova, ti riai ni bubutii taamnein te Atua ao ni kaotiota uaan taamneina ni maiura. (I-Karatia 5:22, 23) Tera ngkanne nanon aon te aba, ao e kanga n rangi n anainano? Ti na kanga n ataia bwa ti kaririaki n nanon aon te aba? Ao tera reireiara mairoun Iesu ibukini karekean taamnein te Atua ao n rarawa nakon nanon aon te aba?

Nanon Aon te Aba​—E Aera Ngkai E a Rangi n Taabangaki?

3. Tera nanon aon te aba?

³ E moan riki nanon aon te aba mairoun Tatan ae “te tia tautaekania kaain te aonnaba,” ao e boni kaitaraa te taamnei ae raoiroi mairoun te Atua. (Ioane 12:31; 14:30; 1 Ioane 5:19) Aio nanon aon te aba ae moan te korakora ao e kairiia aomata nakoni karaoan aei. A kairaki botannaomata n te mwaaka ae korakora aei bwa a na kauntabaa nanon te Atua ao ana kantaninga.

4, 5. E kanga n rangi n taabangaki te nano are e karikirakea Tatan?

⁴ E kanga n rangi n taabangaki te nano are e karikirakea Tatan? Te moan, e kariria Ewa n te onnaroka are Eten. E anaa nanona bwa e na nakoraoi riki maiuna ngkana e inaomata mairoun te Atua. (Karikani Bwaai 3:13) E kaotia Tatan bwa te tia kewe ngaia! (Ioane 8:44) Imwina, e mwamwanaa Ewa bwa e na kariria Atam n te aro are e na aki ongeaba nakon Iehova. Ao ibukin ana rinerine Atam, e a tuuraki te botannaomata n te bure, ao n tokina a kairaki aomata bwa a na ira nanon Tatan ae te aki ongeaba.​—Wareka I-Ebeto 2:1-3.

⁵ A bati naba anera ake a iraraang iroun Tatan aika a riki ngkai bwa taimonio. (Te Kaotioti 12:3, 4) E riki te aki kakaonimaki anne nakon te Atua tabeua te tai imwain rokon te Ieka n ana bong Noa. A kakoauaa anera akanne bwa a na nakoraoi riki aroia ngkana a kitani mwiokoaia i karawa, ao ni kariaia maiuakinan aroaro ake a aki taneiai ni maiuakin i aon te aba. (Iuta 6) A buoka Tatan ni “burebureiia kaain te aonnaba ni kabutaa,” anera ake a aki kona ni manga okiri rabwataia n aomata. (Te Kaotioti 12:9) E kananokawaki bwa a teimatoa ni kamatakiaki angiia aomata ni kaineti ma aia kariri taimonio.​—2 I-Korinto 4:4.

Ko Kaririaki n Nanon Aon te Aba?

6. Tera te anga ae tii teuana ae ti kona n rotaki iai n nanon aon te aba?

⁶ A bati aika a kamatakiaki nakon ana kariri Tatan, ma bon akea riaia Kristian ni koaua bwa a na aki atai ana waaki ni kamwane Tatan. (2 I-Korinto 2:11) Ni koauana, ti aki kona ni kaririaki n nanon aon te aba, ma tii ngkana ti kariaia bwa e na karaoaki nakoira. Ti na neneri titiraki aika aua aika a na buokira ni kaotia bwa tao ti kairaki n taamnein te Atua ke n nanon aon te aba.

7. Tera te anga teuana are e kataia iai Tatan ni karikiira n ianena mairoun Iehova?

⁷ Tera aroarou ae kaotaki n au kaakibotu ae I rineia? (Wareka Iakobo 3:14-18.) E kataia Tatan ni karikiira n ianena mairoun te Atua ni kauekean tangiran te iowawa. E ataia te Riaboro bwa Iehova e ribaa te aomata ae tangira te tiritiri. (Taian Areru 11:5) Ai ngaia are e kataia Tatan ni kabonganai booki ao maekatin, birimin te viteo, katangitang ao te takaakaro n te kaombiuta tabeua aika a kauekea tangirani mwakuri aika kammaira ao te iowawa aika a anai nanora nakoni kaibwabwarun te rabwata. E ngae ngkana ti kani karaoa ae raoiroi ma e boni kukurei naba Tatan ngkana ti karaoa te bure are e karikirakea.​—Taian Areru 97:10.

8, 9. Baikara titiraki ibukin te kaakibotu aika ti riai n titirakinira iai?

⁸ N te itera teuana, a kairaki n taamnein te Atua te koraki aika anganaki te taamnei anne bwa a na itiaki, a na raoi ma aomata ao a na kabatiaa te nanoanga. Ti riai n titirakinira ni kangai, ‘E koaua bwa I kaungaaki nakon aroaro aika raraoi n au kaakibotu ae I rineia?’ E aki “mwamwanaa te aba” te rabakau are ma i eta. A a aki reiakinia kaain rarikia taekan te itiaki ao te rau, ao imwina a a manga matakuakina te buaka ae tiritiri ao aroaro aika bure ngkana tii ngaia ni mwengaia, te koraki ake a kairaki n taamnein te Atua.

⁹ E kantaningaira Iehova bwa ti na tangiria ma nanora ni koaua. Ma e ngae n anne, e kukurei Tatan ngkana e taromauriaki n tii teuana te tai n aron naba are e tangiria mairoun Iesu. (Ruka 4:7, 8) Ti kona n titirakinira ni kangai: ‘E koaua bwa te kaakibotu ae I rineia, e kaotia bwa I tangira te Atua ma nanou ni koaua? E koaua bwa man au rinerine, e kangaanga ke e bebete iai bwa N na rarawa nakon nanon aon te aba? I riai ni bita arou n rinean arou ni kaakibotu n taai aika a na roko?’

10, 11. (a) Tera te aroaro ae wantongaia nanon aon te aba ni kaineti ma te mataai ni kani bwaibwai? (b) Tera te aroaro ae kaungaaki n Ana Taeka te Atua ae e kaira koreana n taamneina?

¹⁰ Tera aroarou nakoni bwaikorakin te maiu aei? (Wareka Ruka 18:24-30.) E karikirakei “baika tangiri maata” nanon aon te aba ni kaungaan te nanonrang ao te mataai ni kanibwaibwai. (1 Ioane 2:16) E a tia ni wantongaa te nano ni kani kaubwai irouia aomata aika bati. (1 Timoteo 6:9, 10) E kairira nanon aon te aba ni kakoauaa bwa e na karekea te mweraoi ae teimaan bwaikorakin te maiu aei aika bati. (Taeka N Rabakau 18:11) Ma ngkana ti kariaia tangiran te mwane bwa e na korakora riki nakon tangiran te Atua, e a tokanikai ngkanne Tatan. Ti riai n titirakinira ni kangai, ‘E koaua ae I kaatuua ni maiu ukoukorani baika N na rauaki ao ni kukurei iai?’

¹¹ Ni kaitaraan anne, ti kaungaaki n Ana Taeka te Atua ae e kaira koreana n taamneina, bwa ti riai ni bwaina te iango ae riai n tangiran te mwane ao ni mwakuri korakora ibukini karekeani baika ti kainnanoi ma ara utu. (1 Timoteo 5:8) A buokaki bwa a na kakairi n aroaron Iehova ae e tituaraoi, te koraki ake e reke irouia taamnein te Atua. A kakawaki riki aomata irouia nakoni bwaai ao a kukurei n tibwai aia bwai ngkana a kona. (Taeka N Rabakau 3:27, 28) E aki kakawaki riki irouia tangiran te mwane nakon aia beku ibukin te Atua.

12, 13. Ti na kanga ni kakabwaiaaki iroun taamnein te Atua ngkana tii kaitaraaki n nanon aon te aba?

¹² Tera ae I kaotiotia n arou nanon te Atua ke nanon aon te aba? (Wareka I-Korote 3:8-10, 13.) E moanibwaiaki ana mwakuri nako te rabwata n nanon aon te aba. (I-Karatia 5:19-21) Kataakira ni koaua bwa ti kairaki n nanon aon te aba ke n nanon te taamnei, tiaki man nakoraoin aroaro ma ngkana a nakobuaka n aron ae a kakeaa bongara, a kaunira ke a bure nakoira tarira ke mwaanera n te onimaki. Irarikin anne, e na teretere raoi ngkana tii ngaira ni mwengara bwa tao ti kariaia kairakira iroun te taamnei ae raoiroi ke n nanon aon te aba. Tao e riai tutuoan raoi nanora teutana. Titirakiniko ni kangai, ‘I a rikirake riki ni katotonga aroaroni Kristo ke I a manga okiri arou n taetaenikawai ma kateiu aika bubuaka i nanon onoua te namwakaina n nako?’

¹³ E kona ni buokira taamnein te Atua bwa ti na “buuta te aroaro nikawai ma ana mwakuri nako,” ao ni karina “te aroaro ae boou.” Ti na buokaki iai bwa ti na karikirakea riki te tangira ao te akoi. Ti na kairaki bwa ti na tauraoi n ikabwarabure, e ngae ngkana iai bukin te ngurengure ae riai. Ti aikoa manga kaaitarai mwakuri n ribuaka ao n iowawa n “te riribai ae korakora ma te marakinnano ma te un ma te takakaa ma te tinaraa.” N oneani mwin anne, ti riai ni kakorakoraira ni karikirakea te “atataiaomata.”​—I-Ebeto 4: 31, 32.

14. Tera aia iango aomata aika bati n te aonnaba ni kaineti ma Ana Taeka te Atua?

¹⁴ I karinei ao n tangiri ana kaetieti te Baibara ibukin te aroaro ni maiu ae riai? (Wareka Taeka N Rabakau 3:5, 6.) E kaotiotaki n nanon aon te aba te karitei nakon Ana Taeka te Atua. A kakeaa bongani kanoan te Baibara tabeua te koraki aika kakairi n te nano aei ake a iangoia bwa e kangaanga maiuakinana, ao e bane riki nanoia nakon aia katei aomata ma aia karioiango. (2 Timoteo 4:3, 4) Ma tabeman, a kakeaa bongan Ana Taeka te Atua ni kabane. A nanououa te koraki aikai ni kaineti ma kakawakin ao koauan te Baibara ao a a bakanrabakau iai. A kamangora kakawakin ana kaetieti te Baibara ni kaineti ma te wene ni kimoa, te wene n taanga i marenan te mwaane ma te mwaane ao te aine ma te aine ao te buuraure. A angareirei ao a arana “te buakaka ba te raoiroi, ao te raoiroi ba te buakaka.” (Itaia 5:20, BG) Ti a tia n rotakibuaka n te nano aei? Ti onimakina wanawanaia aomata n ikotaki ma oin ara iango ngkana ti kaaitara ma kangaanga? Ke ti kakorakoraira n tou mwin taeka n reirei aika n te Baibara?

15. Tera ae ti riai ni karaoia n oneani mwin are ti na onimakina oini wanawanara?

¹⁵ E karina i nanora karinean te Baibara taamnein te Atua. N aron te tia areru, ti iangoi ana taeka te Atua bwa boni bwaeni waera ao kaotaani kawaira. (Taian Areru 119:105) N onean mwin are ti na onimakina oini wanawanara, ti onimakin raoi Ana Taeka te Atua aika koreaki bwa e na buokira n ataa te kaokoro i marenan te raoiroi ao te buakaka. Ti reiakinna bwa ti na aki tii karinea te Baibara ma ti na tangiri naba ana tua te Atua.​—Taian Areru 119:97.

Reireiara Man Ana Katoto Iesu

16. Tera ae irekereke ma reken “ana iango Kristo” iroura?

¹⁶ Ti riai ni karikirakea “ana iango Kristo” bwa ti aonga ni karekea taamnein te Atua. (1 I-Korinto 2:16) Ngkai iai iroura “te iango ae tii te arona ma ana iango Kristo Iesu,” e a kainnanoaki iai ataakin aron Iesu n iango ao ana mwakuri ao imwina ti kakairi irouna. (I-Rom 15:5; 1 Betero 2:21) Iangoi aanga tabeua aika ti kona ni karaoa iai anne.

17, 18. (a) Tera ae ti reiakinna mairoun Iesu ibukin te tataro? (b) E aera ngkai ti riai n “teimatoa ni bubutii”?

¹⁷ Tataro ibukin taamnein te Atua. Imwaini kataakin Iesu, ao e tataro ibukin taamnein te Atua bwa e na buokia. (Ruka 22:40, 41) Ti bon riai naba ni butiia te Atua ibukin taamneina ae raoiroi. E tituaraoi Iehova n anga taamneina n akea boona nakoia te koraki ni kabane aika a butiia ma te onimaki. (Ruka 11:13) E taku Iesu: “Teimatoa ni bubutii ao kam na anganaki. Teimatoa n ukeuke ao kam na kunea. Teimatoa ni karebwerebwe ao e na kaukaki nakoimi. Bwa ane bubutii e na anganaki, ao ane ukeuke e na kunea, ao ane karebwerebwe e na kaukaki nakoina.”​—Mataio 7:7, 8.

¹⁸ Tai waekoa ni katoka am bubutii ngkana ko ukoukora taamnein Iehova ao ana ibuobuoki. Ti riai n okioki ao n aki ienikuri n tataro nakon Iehova. N tabetai, e kariaia Iehova ake a bubutiia bwa a na kaotiota raoi korakoran nanoia ma aia onimaki ni koaua imwaini kaekaan aia tataro.a

19. Tera are e aki toki ni karaoia Iesu, ao e aera ngkai ti riai ni kakairi irouna?

¹⁹ Ongeaba ma nanom ni kabane iroun Iehova. E aki toki Iesu ni karaoi baike e na kukurei iai Tamana. N te taina, e kaokoro ana namakin Iesu ma nanon Tamana n arona ni kaitaraa te bwai are e riki nakoina. Ma e ngae n anne, e taetae nakon Tamana ma te aki nanokokoraki ni kangai: “Tiaki nanou ae na iraki, ma nanom.” (Ruka 22:42) Titirakiniko ni kangai: ‘E koaua bwa I ongeaba iroun te Atua, e ngae ngkana e aki bebete karaoana?’ E kakawaki te ongeaba nakon te Atua ibukin te maiu. Ti riai ni kaotiota te ongeaba ae kororaoi nakoina ngkai boni ngaia te tia Karaoira, Nibwani maiura, ao te tia Kateimatoa. (Taian Areru 95:6, 7) Akea te bwai ae raoiroi riki nakon te ongeaba, bwa ti aki kona ni karekea akoara mairoun te Atua n akean te ongeaba.

20. E irekereke ma tera maiun Iesu, ao ti na kanga ni kakairi irouna?

²⁰ Ataa raoi te Baibara. E mwanewea te Baibara Iesu ngke e rarawa nakoni kataakin ana onimaki iroun Tatan. (Ruka 4:1-13) Ma e mwaaka Iesu ibukina bwa e kabongana Ana Taeka te Atua ni kaaitaraia iai taani kairiribai man Aaro. (Mataio 15:3-6) E irekereke maiun Iesu ni kabane ma ukoukoran ataakin ao kakoroan nanon ana tua te Atua. (Mataio 5:17) Ti teimatoa naba ni karina Ana Taeka te Atua n ara iango ibukini kakorakoraan ara onimaki. (I-Biribi 4:8, 9) E kona n riki bwa te kangaanga nakoia tabeman mai buakora bairean aia tai n ukeuke n reirei i bon irouia ao te reirei n te utu. N oneani mwin are ti na karekei ara tai, ti riai ni kamwaawai ara te tai ibukin te ukeuke n reirei i boni iroura ao te reirei n te utu.​—I-Ebeto 5:15-17.

21. Tera te babaire ae ti kona ni kabongana ibukini buokara n ataakin raoi Ana Taeka te Atua ao ni maiuakinna?

²¹ E a tia ni buokira te “toro ae kakaonimaki ma ni wanawana” bwa e na reke oin ara tai ibukin ara ukeuke n reirei i bon iroura ao n te utu, rinanoni bairean te tai ibukin te Taromauri n Utu n te tairiki teuana ni katoa wiki. (Mataio 24:45) Ko kabongana raoi te babaire aei? Ibukini buokam ni karekea ana iango Kristo, e koaua bwa ko kona ni karini n am tai n ukeuke n reirei baike ko iaiangoi aika ko rinei mani baike e reiakin Iesu? Ko kona ni kabongana te Watch Tower Publications Index ake a reke iai rongorongo ibukin reirei aika ko kukurei n reiakini. N te katoto, man 2008-E nakon 2010-E, iai te Maekatin Ibukia Aomata Nako ae a karinaki iai kaongora aika 12 mwaitiia ae a atunaki n te boto n iango ae “What We Learn From Jesus.” Ko na bae ni kani kabonganai kaongora aikai bwa aan am ukeuke n reirei. N te Awake! ae bwain 2006, e moani karinaki iai ae kangai: “How Would You Answer?” E karaoaki te kauring aei bwa e na ibuobuoki ni karababaa ao ni kananoa am atatai n Ana Taeka te Atua. E aera ko aki karini baikai n am kaetieti ibukin te Taromauri n Utu n te tai teuana ma teuana?

Ti Kona n Tokanikai i Aoia Kaain te Aonnaba

22, 23. Tera ae ti riai ni karaoia bwa ti aonga n tokanikai i aoia kaain te aonnaba?

²² Ti riai n rarawa nakon nanon aon te aba ngkana ti na kairaki n taamnein te Atua. E kangaanga iroura bwa ti na rarawa nakon aei. E kona n rangi ni kabokorakora iai temanna. (Iuta 3) Ma ti boni kona n tokanikai! E taku Iesu nakoia taan rimwina: “Kam rawawata ngkai i buakoia kaain te aonnaba, ma kaninikoriaingkami! I a tia n tokanikai i aoia kaain te aonnaba.”​—Ioane 16:33.

²³ Ti kona naba n tokanikai i aoia kaain te aonnaba, ngkana ti rarawa nakon nanon aon te aba ao ni karaoa ara kabanea ni kona ibukini karekean taamnein te Atua. Ni koauana, “ngkana e tei ibukira te Atua, ao ai antai ae kona ni kaaitaraira?” (I-Rom 8:31) Ngkana ti karekea taamnein te Atua ao ngkana ti tou mwini kairiri ake a kabwarabwaraaki n te Baibara, ti na boni karekea te raunnano, te rau, te kukurei ao kakoauaan te maiu ae akea tokina n te aonnaba ae boou ae e a kaan rokona.

[Kabwarabwara ae nano]

Ko Uringnga?

• E aera ngkai e a rangi n taabangaki nanon aon te aba?

• Baikara titiraki aika aua aika ti riai n titirakinira iai?

• Baikara baika tenua aika ti reiakin mairoun Iesu ibukini karekean taamnein te Atua?

[Taamnei n iteraniba 15]

A kanga n riki bwa taimonio anera tabeman?

[Taamnei n iteraniba 16]

E kabongana nanon aon te aba Tatan n kairaraangia aomata, ma ti kona ni kainaomataaki mai iai