Nakonako N Te Taamnei Ao E Na Buokingkami Ni Kakororaoi Ami Katabu
“Teimatoa n nakonako ni kairakimi n te taamnei, ao kam na aki ira iai nanoni kaibwabwarun te rabwata.”—I-KARATIA 5:16.
1. Baikara bwabetito ake a karaoaki ni bongini Bentekota?
A TAETAE taan rimwin Iesu n taetae aika kakaokoro imwini bwabetitoaia n te taamnei ae raoiroi ni bongini Bentekota 33 C.E. A kaotiota iai te bwaintangira ae reke n te kakai rinanon te taamnei ae raoiroi. (1 I-Korinto 12:4-10) Tera uaan te bwaintangira aei ao ana kabwarabwara te abotoro Betero nakoia aomata? A bati ake “a rangi n nanokawaki.” Mangaia are a a raraoma ao n rairi nanoia ao ni bwabetitoaki ni kaumakaia irouni Betero. E oti ae kangai n te Baibara: “A bwabetitoaki te koraki ake a butimwaei ana taeka ma nanoia, ao n te bong arei ao a a ikotaki riki i buakoia tao teninga aomata.” (Mwakuri 2:22, 36-41) N aron are e tua Iesu, a riai n tia ni bwabetitoaki n te ran n aran te Tama, te Nati ao te taamnei ae raoiroi.—Mataio 28:19.
2, 3. (a) Kabwarabwaraa kaokoron te bwabetito n te taamnei ae raoiroi ma te bwabetito n aran te taamnei ae raoiroi. (b) E aera bwa e riai ni karaoaki te bwabetito n te ran irouia aomata nako ake a a riki bwa Kristian ni koaua ni boong aikai?
2 Ma iai te kaokoro i marenan te bwabetito n te taamnei ae raoiroi ao te bwabetito n aran te taamnei ae raoiroi? Iai. Aomata ake a bwabetitoaki n te taamnei ae raoiroi a a manga bungiaki ao n riki bwa natin te Atua aika taamnei. (Ioane 3:3) A kabiraki bwa a na uea n taai aika imwaia ao ni mwakuri bwa ibonga i aan ana kairiri te Ibonga ae Rietata n Ana Tautaeka n Uea te Atua i karawa ao a kaaina naba rabwatani Kristo n taamnei. (1 I-Korinto 12:13; I-Karatia 3:27; Te Kaotioti 20:6) Ngaia are te bwabetito aei, ae te bwabetito n te taamnei ae raoiroi are e karaoia Iehova ni bongini Bentekota ao imwina, e a rineia iai aomata ake a na uaia n ababa ma Kristo. (I-Rom 8:15-17) Ma tera ae nanonaki n te bwabetito n te ran n aran te taamnei ae raoiroi, ae kakaraoaki n aia runga ao aia bwabwaro ana aomata Iehova ni boong aikai?
3 Te bwabetito n te ran bon te mwaneka ae a kakaraoia Kristian ni koaua bwa kaotan aia katabu ae nako mai nanoia nakon Iehova ae te Atua. Aio naba ae karaoaki nakoia ake a rineaki n nako karawa. Ma te bwabetito n te ran bon te mwaneka ae riai ni karaoaki irouia mirion ma mirion mwaane ao aine ni boong aikai aika kantaningaa te maiu n aki toki i aon te aba. N aki ongeia bwa te kantaninga raa ae reke iroun temanna, ma te bwabetito n te ran n aran te Tama, ao te Nati, ao te taamnei ae raoiroi bon te mwaneka ae riai ni karaoia temanna ibukini karekean akoana iroun te Atua. A kantaningaaki Kristian ni kabane ake a bwabetitoaki bwa a na ‘teimatoa n nakonako ni kairakia n te taamnei.’ (Wareka I-Karatia 5:16.) Ko nakonako ngkai ni kairakim n te taamnei ao ni kakororaoa am katabu?
Nanon te “Nakonako ni Kairakimi n te Taamnei”
4. Tera ae nanonaki raoi n te “nakonako ni kairakimi n te taamnei”?
4 E irekereke “kairakimi n te taamnei” ma butimwaeani mwamwakurin te taamnei ae raoiroi i aomi ni kariaia kairakimi irouna. N taekinana teuana, e nanonaki iai tautaekanakimi rinanon te taamnei ae raoiroi ni bwaai nako aika kam karaoi ni katoa bong. E kamatataaki n I-Karatia mwakoro 5 kaokoroni kairakimi n te taamnei ae raoiroi ke ni kaibwabwarun te rabwata.—Wareka I-Karatia 5:17, 18.
5. Baikara mwakuri aika kam na rarawa nako iai ae irekereke ma kairakimi n te taamnei ae raoiroi?
5 Ngkana kam kairiraki n te taamnei ae raoiroi, kam a rarawa iai nakon ana mwakuri nako te rabwata. A irekereke naba iai te “wene ni bure, te kamwara, te aroaro ae kammaira, taromauriani boua, te tabunea, taiani kairiribai, te kiriwe, te bakantang, taian un, te ikakaiwi, te iraraure, te iraraure n te Aro, te nanonibwi, te koro ni manging, te bukamaru n akea te taubaang.” (I-Karatia 5:19-21) N aron anne, kam a “kamatei ana mwakuri nako te rabwata n te taamnei.” (I-Rom 8:5, 13) E na buokingkami ni kaatuui ami iango i aoni baika irekereke ma te taamnei ao n aantaeka i aan ana kairiri, ao n aki kariaia kairakimi ni kaibwabwarun te rabwata.
6. Kamataataa te bwai ae riai ni karaoaki bwa e aonga ni kaotiotaki uaan te taamnei.
6 Kioina ngkai e mwamwakuri te taamnei ae raoiroi i aomi, kam a kaotiotii iai aroaro aika e kukurei iai te Atua aika “uaan te taamnei.” (I-Karatia 5:22, 23) Kam ataia bwa e kainnanoaki iai ami kakorakora. E kangai kabwarabwaraana: E ribanaa te aba teuana te tia ununiki. Ni koauana, e kainnanoaki otan taai ao te ran, bwa n akeani baikai ao bon akea te bwai ae kona ni kariaa. Ti kona ni kabotaua te taamnei ae raoiroi bwa ai aron otan taai. Ti kainnanoa te taamnei ae raoiroi ibukini kaotiotan uaan te taamnei. Ma tera ae na rikirake ngkana e aki mwakuri korakora te tia ununiki? (Taeka N Rabakau 10:4) Eng, kaokoron nakoraoin ao mwaitin uaan te taamnei ae raoiroi iroumi, e boto n aromi n ribanaa tanon nanomi. Ngaia are titirakiningkami ni kangai: ‘I kariaia te taamnei ae raoiroi bwa e na karikirakea uaana n arou ni mwakuri ma ngaia?’
7. E aera ngkai e rangi ni kakawaki te ukeuke n reirei ma iaiangoaia ngkana ko kani karikirakea uaan te taamnei ae raoiroi?
7 A riai taan ununiki n teteboki arokaia ngkana a kan taia ae bati. Ibukini karikirakean uaan te taamnei iroumi, kam kainnanoa ranin te koaua ae n te Baibara ao ae kona n reke rinanon te ekaretia ni Kristian ni boong aikai. (Itaia 55:1) Kam a bae n tia ni kaotia nakoia aika bati bwa e reke te Koroboki ae Tabu rinanon te taamnei ae raoiroi. (2 Timoteo 3:16) Irarikin anne, e katauraoa naba te atatai ae kainnanoaki man ranin te koaua ae itiaki ae n te Baibara te toro ae kakaonimaki ae wanawana. (Mataio 24:45-47) E mataata te bae nanonaki iai. Ngkana ti kani kairiraki n te taamnei ae raoiroi, ti riai ni wareka Ana Taeka te Atua ma n iaiangoi raoi. Ngkana kam karaoa anne, kam a kakairi iai n aia katoto aika raoiroi burabeti ake a ‘botumwaaka n neneri ao n ukoukori raoi’ rongorongo ake a katauraoaki. E rangi ni kakawaki ataakin ae anera naba a kan atai naba koaua man te Baibara ake a kaineti ma te kariki ae beritanaki ao kaain te ekaretia ni Kristian aika kabiraki.—Wareka 1 Betero 1:10-12.
Kairiraki n te Taamnei—N te Aro Raa?
8. Bukin tera bwa e rangi ni kakawaki butiian Iehova taamneina?
8 E aki nanonaki bwa kam na tii ukeuke n reirei n te Baibara ao n iaiangoi. Ko riai n teimatoa ni butiia Iehova ana ibuobuoki ma ana kairiri. E kona ni “karaoa ae rangi ni bati riki te Atua nakon are ti bubutii ke are ti iangoia.” (I-Ebeto 3:20; Ruka 11:13) Kam na kanga ni kaeka ngkana e titiraki temanna: “Bukin tera bwa I riai n teimatoa ni butiia te Atua ngkana ngaia bwa e a kaman atai ‘baika I kainnanoi imwain ae I butiia’?” (Mataio 6:8) Teuana bukina, bwa tataroan te taamnei ae raoiroi, kam a kaotia iai bwa kam onimakina Iehova. N te katoto, ngkana e roko temanna ni kani buokaki iroum, ko na boni karaoa am kabanea ni kona ni buokia, bukina teuana bwa n rokona anne e butiiko kani buokana ae e kaota iai onimakinam. (Kabotaua ma Taeka N Rabakau 3:27) N aron anne, e kukurei Iehova ngkana kam butiia taamneina ao e na bon anganingkami.—Taeka N Rabakau 15:8.
9. E kanga kaakaeani bobotaki ni Kristian ni buokingkami ni kairiraki n taamnein te Atua?
9 Kam kona n ota raoi n ataakin ae kairakira iroun taamnein te Atua bon te anga naba teuana ae irekereke iai kaakaeani bobotaki, bwabwaro ao ruunga. E rangi ni kakawaki ara kakorakora ni kaakaei bobotaki ao n ongora raoi nakon reirei ake iai. Karaoan aei, e buokira n ota n “ana bwai naba te Atua aika nano.” (1 I-Korinto 2:10) Iai naba kakabwaia man te katoatai ni kaekaeka. Kaoki ami ururing nakoni bobotaki ake kam kaei ngkoa i nanon aua te wiki n nako. Mwaitira ami tai ni kakatei baimi, n anga kaeka, ni kaotiotii ami onimaki? Iai te bwai ae kam noria ae kam kainnanoa katamaroaana n te itera aei? Ngkana iai, ao katamaroaa riki ni wiki aika imwaimi. E na nori ingaingan nanomi Iehova ni kan anga ami kaeka ao e na anganingkami taamneina ae raoiroi, bwa e na buokingkami ni kabatiai riki kakabwaiami mani bobotaki ake kam kaakaei.
10. Tera te kakao are a anganaki aomata, ae irekereke ma te nakonako ni kairaki n te taamnei?
10 E irekereke naba te nakonako ni kairaki n te taamnei ma butimwaean te kakao ae n Te Kaotioti 22:17 ae kangai: “E teimatoa ni kangai te taamnei ao te tia mare te aine: “Nakomai!” Ao ke e kangai ane ongo: “Nakomai!” Ao ke e nakomai ane taka, ao ane kan anaa te ran ni kamaiu ao ke e anaia n akea boona.” E mwamwakuri te taamnei rinanoia taani kabiraki ake a a riki bwa buuna, ni kabutaanako te kakao aei ibukin te ran ni kamaiu. Ngkana kam a a tia ni butimwaea te wewete are kangai, “nakomai!” kam nanomatoa ni manga taekina “Nakomai!”? Ai boni kakawakira te kona n uataboa te mwakuri ni kakamaiu aei!
11, 12. E kanga n irekereke te taamnei ae raoiroi ma te mwakuri n uarongorongo?
11 E a tia ni kakororaoaki te mwakuri ae rangi ni kakawaki aei i aan ana kairiri te taamnei ae raoiroi. Ti wareka aron irekereken te taamnei ae raoiroi n te moan tienture ni kaineti ma kaukan te mwakuri ni mitinare n aaba aika boou. A “katabuakaki n tataekina te rongorongo rinanon te taamnei ae raoiroi n te aono n Atia” te abotoro Bauro ma raona ao a katabuakaki naba n nako Bitunia. Ti aki raoi ataia bwa e kanga te taamnei n tuka nakoia nakon taabo akanne, ma e teretere raoi bwa e kairaki Bauro rinanon te taamnei nakon aonon Eurobe ae bubura. E nora te miitara ibukin te mwaane temanna mai Maketonia ae bubutii buokana.—Mwakuri 16:6-10.
12 N aron anne, e kaira aron te mwakuri n uarongorongo ni kabutaa te aonnaba ni boong aikai taamnein Iehova. Ai akea manga miitara aika kamimi ake a na kamanenaaki n te kairiri, ma n oneani mwin anne, e a kairiia taani kabiraki Iehova rinanon te taamnei ae raoiroi. Ao te taamnei e a kairi nanoia taari mwaane ma aine bwa a na karaoa ae a kona n uarongorongoia ao n angareirei. Akea te nanououa bwa ko a tia n uataboa te mwakuri ae rangi ni kakawaki aei. Kam kona ni karikirakea kimwareireimi n te mwakuri ae kakukurei aei?
13. Ko na kanga n aantaeka i aan ana kairiri te taamnei ae raoiroi? Kabwarabwaraa.
13 Kam kona n aantaeka i aan ana kairiri te taamnei ae raoiroi ni maiuakin reirei ake a katauraoaki ibukia ana aomata te Atua. Iangoa te roro n rikirake ae Mihoko ae mena i Tiaban. Ibukina bwa e a tibwa bwaiania neiei, e a namakinna bwa e tuai n rabakau ni manga okiriia aomata; e taku bwa e babanga n anai nanoia kaain te auti. N taai akanne, ao e a katauraoaki te reirei ae manena ao e kimototo n Ara Mwakuri ni Minita, ibukini manga okiraia aomata. Imwina, e a boreetiaki te boroutia ae A Satisfying Life—How to Attain It. E kakoauaaki te boroutia aei bwa e rangi ni manena n te mwakuri ni minita i Tiaban. E a karaoa aron te reirei Mihoko are katauraoaki ibukini kamanenaan te boroutia ao i aoni manga okiraia aomata n te aro ae kimototo. E aki maan imwin anne ao e a moani reirei man te Baibara ma te koraki ake a rawa ngkoa n reirei. E taku: “A rangi ni bati au reirei n te Baibara aika I riai ni kawariia bwa 12 mwaitiia, ao ibukin anne I a riai n tuangia tabeman bwa a na tataninga ni karokoa te tai are I a kona ni moana iai au reirei ma ngaiia.” Ni koauana, kam na bon taia ae bati riki ngkana kam nakonako ni kairakimi n te taamnei ao ni maiuakin ana kaetieti Iehova ake e anganga rinanoia ana toro.
Onimakina Taamnein te Atua
14, 15. (a) N te aro raa ae a kona iai aomata aika a aki kororaoi ni kakororaoi aia katabu? (b) Kam na kanga ni karekeia raoraomi aika raoiroi?
14 Ngkai minita ngkami aika kam a katauaki, bon iai te mwakuri ni minita ae kam riai ni karaoia. (I-Rom 10:14) Kam na bae n aki rangi n taubobonga raoi n aonnangai mwiokoami. Ma bon te Atua ae baireia bwa kam a tau n aron naba are e karaoia ibukia taani kabiraki. (Wareka 2 I-Korinto 3:5.) Kam kona ni kakororaoi ami katabu ni karaoan ami kabanea ni kona ao n onimakinan taamnein te Atua.
15 E koaua ae e boni kangaanga iroura, ngaira aika ti aki kororaoi, bwa ti na kakororaoi ara katabu nakon te Atua ae Iehova ae kororaoi. Teuana te kangaanga, iai tabeman ake kam iririia rimoa ake a na mimi ni maiumi aika boou ao a na bae n “taetae ni kabuakakaingkami.” (1 Betero 4:4) Ma e ngae n anne, tai tarariaoa te koaua are kam a a tia ni karikirakei ami iraorao aika boou, ma e rangi ni kakawaki riki bon ami iraorao ma Iehova ao Iesu Kristo. (Wareka Iakobo 2:21-23.) E rangi ni kakawaki kinaakia taari mwaane ao aine n ami ekaretia, bwa bon iteran naba ‘tangiraia taari nako i nanon te onimaki’ ni katobibia te aonnaba. (1 Betero 2:17; Taeka N Rabakau 17:17, BG) E na buokiko Iehova rinanon taamneina ni karekeia raoraom aika a na teimatoa ni kaiririko nakon ae raoiroi.
16. Bukin tera bwa kam kona ni katotonga Bauro ni “kukurei n taiani mamaara”?
16 E ngae ngke tao iai raoraomi n te ekaretia aika rangi n ibuobuoki nakoimi ma e boni bae naba n rawawata iroumi kaitaraan ami kangaanga ni katoabong. Ma tao n tabetai, iai baika kam riai ni buakani aika a kabwarai nanomi n te aro ae kaanga kam a mena i buakoni kangaanga aika a rangi ni bati aika kam aki kona n nori tokia. Anne raoi ami tai n tang nakon Iehova ao ni butiia taamneina ae raoiroi. E korea ae kangai te abotoro Bauro: “Ngkana I mamaara, ao ngkanne I a korakora.” (Wareka 2 I-Korinto 4:7-10; 12:10.) E ataia Bauro bwa e kona taamnein te Atua ni kakorakoraia aomata mani mamaaraia n aki ongei baika a taonaki iai. Ngaia are e kona mwaakan te Atua ae mwamwakuri ni kakorakoraingkami n taai ake kam namakina iai te mamaara ao ni kainnanoa te ibuobuoki. E koreia Bauro bwa e kona ni “kukurei n taiani mamaara,” ibukina bwa ngkana e mamaara ao e namakina mwamwakurin te taamnei i aona. Kam kona naba n namakina ae aron anne!—I-Rom 15:13.
17. E na kanga te taamnei ae raoiroi ni buokingkami ngkai kam tabe ni kaea te tabo are kam na nako iai?
17 Ti kainnanoa taamnein te Atua bwa ti aonga ni waakina katabuani maiura nakoina. Iangoia bwa aongkoa te kaaben ngkoe n te booti n ieie tewaana. Tiam bwa ko na beku iroun Iehova n aki toki. Te taamnei ae raoiroi ai aron te ang are ko kainnanoia bwa ko aonga n roko n am tabo ma te rau ao n aki ikoaki. Ko aki kan uouotaki n naon ana waaki Tatan aika n te aonnaba. (1 I-Korinto 2:12) Ko riai n ukera raoi unin te ang ao n iria nako. Te bwai anne bon te taamnei ae raoiroi. E na kairiko te taamnei ae raoiroi nakon te kawai ae eti rinanon Ana Taeka te Atua ao ana botaki ae kairia n taamneina.
18. Tera ami motinnano ngkai, ao bukin tera?
18 Ngkai kam a a tabe n reirei ma Ana Tia Kakoaua Iehova, kam kukurei ni bobotaki n itamwaomwao ma ngaiia ma kam tuai n toua te mwaneka ae rangi ni kakawaki ae te katabu ao te bwabetito, titirakiningkami ni kangai: ‘E aera ngkai ti tabwarabwara?’ Ngkana kam ataa ana mwakuri te taamnei ae raoiroi ni kakororaoan ana kantaninga Iehova ni boong aikai ao n ataa kakawakin ana mwakuri, ngkanne tou mwaneka ake kam a tia n reiakinna ibukini kaetakimi. E na kabatiaa kakabwaiami Iehova. E na tauraoi n anganingkami taamneina. Ngkana kam a tia ni bwabetitoaki i nanon tabeua ke tatabebwi te ririki n nako, akea te nanououa bwa kam a tia n nora ana kairiri te taamnei. Kam a tia n nora ao n namakina aron te Atua ni kakorakoraingkami rinanon taamneina. Eng, e na kona n teimatoa n riki anne ni karokoa taai aika a na roko aika akea tokia. Ngaia are motinnanoia bwa kam na teimatoa n nakonako ni kairakimi n te taamnei ae raoiroi.
Ko Uringnga?
• Tera ae nanonaki n te “nakonako ni kairakimi n te taamnei”?
• Tera ae kona ni buokingkami bwa kam aonga n “teimatoa n nakonako ni kairakimi n te taamnei”?
• Kam na kanga ni kakororaoa ami katabu?
[Taamnei n iteraniba 19]
E kainnanoa te kakorakora ribanaakin tanon nanomi
[Taamnei n iteraniba 21]
Kam kairiraki n taamnein te Atua?