A Kairiraki N Taamnein Te Atua N Te Moan Tienture Ao Ni Boong Aikai
“A bane mwakuri aikai ni karaoaki n te taamnei ae tii te arona ae tii teuana.”—1 I-Korinto 12:11.
1. Baikara reirei aika kakawaki aika ti na rinanoi n te kaongora aei?
BENTEKOTA. Ai kamimira baike a riki aika a uringaki man te taeka anne! (Mwakuri 2:1-4) E kanikinaeaki kakawakini bitakin aron te Atua nakoia ana toro ni kabwaroan te taamnei ae raoiroi n te tai anne, n te moan tienture. N te kaongora are mai mwaina, ti rinanoi iai aanga tabeua ake a buokaki iai te koraki ake a kakaonimaki ngkoa ni waakini mwiokoaia aika kangaanga n taamnein te Atua. Ma tera te kaokoro i marenani mwamwakurin taamnein te Atua imwain aia tai Kristian ao n te moan tienture? Ao tera aroia Kristian ni kakabwaiaaki man ana mwakuri te taamnei ae raoiroi mairoun te Atua ni boong aikai? Ti na noria.
“Noria! Ngai Ana Toro Iehova, ae te Aine!”
2. E kanga Maria n nora mwin ana mwakuri te taamnei ae raoiroi?
2 E mena naba Maria n te ruu are i eta ngke e kabwaroaki te taamnei ae raoiroi are e beritanaki i Ierutarem. (Mwakuri 1:13,14) Ma tenibwi tabun te ririki imwain anne, e a bon tia n nori mwin ana mwakuri taamnein Iehova n aanga aika kamimi. E a tia Iehova ni kamwainga maiun Natina mai karawa nako aon te aba ike e a bikoukouaki iroun te teinnaine ae Maria. E riki te baere i nanona “rinanon te taamnei ae raoiroi.”—Mataio 1:20.
3, 4. Tera aroaroni Maria are e kaotiotia, ao ti na kanga ni kakairi iai?
3 Bukin tera Iehova ngke e rinea Maria? Imwini kabwarabwaraan ana kantaninga Iehova ibukin Maria iroun te anera, e taku neiei: “Noria! ngai ana toro Iehova, ae te aine! E na karaoaki nakoiu n ai aron am taeka.” (Ruka 1:38) E a kaman ataa nanon Maria te Atua n ana taeka akanne. E katereaki ni waekoana ni kaeka, bwa e tauraoi ni butimwaea ana kantaninga te Atua ni kaineti ma anne. E aki titiraki ibukin aia iango aomata n ana tabo ibukini bikoukouna ke ibukin rotakin ana iraorao ma ana kainrou. E kaotaki n ana taeka Maria ae te toro ngaia ae moan te mangori, bwa e onimakina raoi Iehova bwa ana Toka.
4 Ko a tia n namakinna n tabetai bwa ko karawawataaki ni kangaanga ke ni mwiokoam n am beku ibukin te Atua? Ti riai n titirakinira ni kangai: ‘I onimakina raoi Iehova bwa e na kanakoraoi bwaai n aron ae boraoi ma ana kantaninga? I kaotiota raoi te nano ni kani beku?’ Ti riai ni kakoauaa raoi bwa e na anga taamneina te Atua nakoia akana a onimakinna raoi, ao n ataa ana kantaninga te tia tautaeka.—Mwakuri 5:32.
E Buokaki Betero n te Taamnei ae Raoiroi
5. N aaro raa are e a nora iai mwamwakurin te taamnei ae raoiroi Betero imwaini Bentekota 33 C.E.?
5 N aroni Maria, e rinanon naba korakorani mwamwakurin te taamnei ae raoiroi mairoun te Atua te abotoro Betero imwaini Bentekota 33 C.E. E mwiokoaki ma abotoro riki tabeman iroun Iesu bwa a na kanakoia taimonio. (Mareko 3:14-16) E ngae ngke e aki rangi n taekinaki anne n te Baibara ma e katautauaki bwa e kamanena mwiokoana Betero. E kaotaki naba mwaakan te Atua ngke e tuangaki Betero iroun Iesu bwa e na kawaria n rianna i aon te ran n Namani Kariraia, ao e boni karaoia. (Wareka Mataio 14:25-29.) Ni koauana, e onimakina te taamnei ae raoiroi Betero bwa e na buokia ni karaoi mwakuri aika kamimi. E aki maan imwin anne, e a mwamwakuri te taamnei ae raoiroi anne irouni Betero ao taan rimwini Kristo n aanga aika boou.
6. Tera are e karaoia Betero ni Bentekota 33 C.E. ao imwina, n ana ibuobuoki taamnein te Atua?
6 A anganaki Betero ma tabeman riki te kona n taetae n te aro ni kakai nakoia iruwa ake a roko i Ierutarem ni bongin te Toa ae Bentekota 33 C.E. Imwin anne, e teirake Betero ao e taetae nakoia aomata aika bati. (Mwakuri 2:14-36) Eng, e a tia ngkoa te mwaane aei ni karaoi bwaai n aki iango ke ni maaku n tabetai, ma e kakorakoraaki bwa e na ninikoria n uarongorongo n aki ongei kangaanga ao te bwainikirinaki. (Mwakuri 4:18-20, 31) E anganaki te atatai ae okoro n taamnein te Atua. (Mwakuri 5:8, 9) Ao e anganaki naba te mwaaka bwa e na kauta te mate.—Mwakuri 9:40.
7. Baikara ana reirei Iesu ake e a tibwa ota iai Betero imwini kabirakina?
7 Imwaini Bentekota ao iai otani Betero ni koaua aika bati ni baike e reiakin Iesu. (Mataio 16:16, 17; Ioane 6:68) Ma bon iai naba ana reirei Iesu ake a teimatoa n aki ota irouna imwini Bentekota. N te katoto, e aki ataia Betero are e na kautaki Iesu nakon te rabwata n taamnei n ana katenibong ao e aki ataia naba ae e mena te Tautaeka n Uea i karawa. (Ioane 20:6-10; Mwakuri 1:6) E aki ota naba Betero are a na riki aomata bwa taamnei, ao n tautaeka n te Tautaeka n Uea i karawa. E a tibwa kona n atai nanon ana reirei Iesu i aoni baikanne imwini bwabetitoana n te taamnei ae raoiroi ao n anganakina kantaningaan te nako karawa.
8. Tera aia atatai taani kabiraki ao “tiibu tabemwaang” are a karekea?
8 Imwin ruonakia taan rimwin Iesu n te taamnei ae raoiroi, ao a a tibwa reke otaia n reirei ake a aki ota ngkoa iai. A kabwarabwarai ibukira koaua aika kamimi ibukin ana kantaninga Iehova taani korea te Koroboki ae Tabu n te Taetae ni Kuriiti, ake a kairaki rinanon te taamnei ae raoiroi. (I-Ebeto 3:8-11, 18) Ni boong aikai, a kaai ni kakorakoraaki aia onimaki taani kabiraki ao “tiibu tabemwaang” ma n reiakini koaua aikai. (Ioane 10:16) E kakawaki iroum te atatai ao otam n Ana Taeka te Atua are e anganiko te taamnei ae raoiroi?
E “on n te Taamnei ae Raoiroi” Bauro
9. Tera ae kakororaoia Bauro n ana ibuobuoki te taamnei ae raoiroi?
9 Tao teuana te ririki imwini Bentekota, ao e a manga anganaki temanna ana bwaintituaraoi te taamnei ae raoiroi. Bon Tauro teuanne are e kinaaki bwa Bauro. E mwamwakuri te taamnei ae raoiroi i aona n aanga aika ti na buokaki iai ngkai. E kairaki te abotoro Bauro rinanon te taamnei ae raoiroi bwa e na korei bokin te Baibara aika 14. N aron are e riki nakoni Betero, e anganaki naba Bauro taamnein te Atua bwa e na ota ao ni korea taekan te kantaninga ibukin te aki mamate, ao te aki mka i karawa n te aro ae mataata. E katoki aoraki Bauro, e kanakoia taimonio, ao e kautiia naba maate rinanon te taamnei ae raoiroi! Ma iai te kantaninga ae kakawaki riki n te mwaaka ae reke rinanon te taamnei, ae te bwai ae a bane ni karekea ana toro te Atua ni boong aikai ma tiaki n te kakai.
10. E kanga te taamnei ae raoiroi ni kanakoraoa ana konabwai Bauro n taetaenikawai?
10 E ninikoria n taetae Bauro nakon te tia tabunea ibukina bwa e “on n te taamnei ae raoiroi.” Ai korakorara rotakin te mataniwi i Kubero n ongorana n te maroro ni kabane! E butimwaea te koaua te kowana anne “bwa e kubanako ni baike e reiakin ibukin Iehova.” (Mwakuri 13:8-12) E teretere bwa Bauro e ataa raoi kakawakin te taamnei ae raoiroi mairoun te Atua ngke e na taekina te koaua. (Mataio 10:20) Imwina riki, e tuangia kaain te ekaretia i Ebeto bwa a na tataro ibukina bwa e aonga n anganaki “te konabwai n taetaenikawai.”—I-Ebeto 6:18-20.
11. E kanga ni kairiraki Bauro n taamnein te Atua?
11 E aki tii anganakii Bauro te kona n taetaenikawai n te taamnei ae raoiroi ma n tabetai e katabuakaki n tataekina te rongorongo n taabo tabeua. E kairiraki naba Bauro n taamnein te Atua ni moanakini mwanangana ni mitinare. (Mwakuri 13:2; wareka Mwakuri 16:6-10.) E teimatoa taamnein Iehova ni kaira te mwakuri n uarongorongo. N aroni Bauro, a bane naba ana toro Iehova aika ongeaba ni kakorakoraia n tataekina te koaua ma te ninikoria ao te ingaingannano. E ngae ngke e aki rangi n otara ni boong aikai ana kairiri te Atua n aron are n ana tai Bauro, ma ti kona ni kakoauaa bwa e kabongana taamneina ae raoiroi Iehova n taraia raoi, bwa a na kaongoaki te koaua aomata aika raraoi nanoia.—Ioane 6:44.
A “Kakaokoro Nako Mwakuri”
12-14. E mwamwakuri n tii te arona taamnein te Atua i aoia ana toro ni kabane? Kabwarabwaraa.
12 A kaungaaki ana toro te Atua aika katabui maiuia n ara bong aikai, man rongorongon ana kakabwaia Iehova nakon aia ekaretia taani kabiraki n te moan tienture? Bon akea te nanououa n anne! Ti riai n ururinga ana taeka Bauro ake a kairaki koreaia rinanon te taamnei ae raoiroi nakon te ekaretia i Korinto, ibukin ana bwaintituaraoi aika kamimi te taamnei n ana tai ae kangai: “A kakaokoro nako bwaai n tituaraoi, ma tii teuana te taamnei, ao a kakaokoro nako taian nakoa, ma tii temanna te Uea. A kakaokoro nako mwakuri ma tii temanna te Atua ae karaoi mwakuri nako i nanoia aomata ni kabaneia.” (1 I-Korinto 12:4-6, 11) Eng, e kona ni mwamwakuri te taamnei ae raoiroi n aanga aika kakaokoro ibukin te kantaninga i aoia ana toro te Atua aika kakaokoro. Ni koauana, a kona ni karekea te taamnei ae raoiroi “te nanai ae uarereke” ao “tiibu tabemwaang.” (Ruka 12:32; Ioane 10:16) Ma e aki mwamwakuri n taai nako n tii te arona i aoia kaain te ekaretia n tatabemania nako.
13 N te katoto, a rineaki unimwaane n te ekaretia rinanon te taamnei ae raoiroi. (Mwakuri 20:28) Ma aki bane n riki taani kabiraki bwa mataniwi n te ekaretia. Tera ae ti kona n iangoia man anne? E nanonaki iai bwa e mwamwakuri taamnein te Atua n aaro aika kakaokoro i aoia kaain te ekaretia.
14 Bon titeboo te taamnei are a kairaki iai taani kabiraki bwa a na kakoauaa ae a natinaki iroun te Atua, ma are e kamanena Iehova ni kauta iai Iesu nako karawa. (Wareka I-Rom 8: 11, 15.) Bon te taamnei naba anne are e karikii iai bwaai ni kabane Iehova. (Karikani Bwaai 1:1-3) Anne naba te taamnei are e katauaki iai Betarera nakon te mwakuri ae okoro n te umwanrianna ae tabu, are e kakorakoraa Tamton ibukini karaoani mwakuri ake e kainnanoaki iai te korakora ae rianako, ao e angan naba Betero te kona n rianna i aon te ran. Mangaia are e kaokoro kairakin temanna n taamnein te Atua ma kabirakina n te taamnei. E boto kabirakin temanna n te taamnei man ana rinerine te Atua.
15. E na teimatoa te bwabetito n te taamnei ae raoiroi n aki toki? Kabwarabwaraa.
15 E mwamwakuri taamnein te Atua i aoia ana toro aika kakaonimaki n aanga aika kakaokoro, n te tai ae maanna nga ma nga te ririki imwaini moanakini kabirakia n te taamnei. E moanaki te mwakuri ae boou anne ni Bentekota 33 C.E., ma e na aki waakinako n aki toki. E na toki te bwabetito n te taamnei, ma e na teimatoa ni mwamwakuri te taamnei ae raoiroi i aoia ana aomata te Atua, bwa a aonga ni karaoa nanona n aki toki.
16. Tera ae a karaoia ngkai ana toro te Atua man ana ibuobuoki taamneina?
16 Tera ae riki ngkai n te aonnaba rinanon ana ibuobuoki te taamnei ae raoiroi mairoun Iehova? E kaekaaki anne n Te Kaotioti 22:17 ni kangai: “E teimatoa ni kangai te taamnei ao te tia mare te aine: ‘Nakomai!’ Ao ke e kangai ane ongo: ‘Nakomai!’ Ao ke e nakomai ane taka, ao ane kan anaa te ran ni kamaiu ao ke e anaia n akea boona.” A kairaki Kristian ni boong aikai rinanon te taamnei ae raoiroi bwa a na tibwaa nako ana kakao Iehova ibukin te kakamaiu nakon “ane kan” butimwaea te ran ni kamaiu. A kairiri iai Kristian aika kabiraki. Ma a raonia n tibwaa nako te kakao anne tiibu tabemwaang. A kaai n inanoi koraki aikai ni kakororaoa te mwakuri aei n te taamnei ae raoiroi anne. A kaai ni katabui naba maiuia nakon Iehova ni bwabetitoaia “n aran te Tama, ao te Nati, ao te taamnei ae raoiroi.” (Mataio 28:19) Ao a nanoraoi ni kabane n ana mwakuri taamnein te Atua ni maiuia, ao ni kariaia karikirakean uaana i irouia. (I-Karatia 5:22, 23) N aroia taani kabiraki, a kariaia naba taamnein te Atua tiibu tabemwaang bwa e na buokiia. Ma n ana ibuobuoki te taamnei anne, a a kabanei korakoraia ni maiuakina ae boraoi ma ae e tangiria Iehova ni kororaoi n te itiaki.—2 I-Korinto 7:1; Te Kaotioti 7:9, 14.
Teimatoa ni Bubutii te Taamnei ae Raoiroi
17. Tao ti na kanga ni kakoauaa bwa iai iroura taamnein te Atua?
17 Ngkana tao ko kantaninga te nako karawa ke te maiu i aon te aba, e kona Iehova n anganiko “te korakora ae riaoni korakoraia aomata” bwa ko na kateimatoa kakaonimakim ma te nano ae eti, ao ni karekea kaniwangam. (2 I-Korinto 4:7) Ko na bae ni kakanikoaki ngkana ko teimatoa n tataekina te rongorongo ae raoiroi ibukin te Tautaeka n Uea. Ma uringnga are “ngkana kam kabuakakaaki ibukin arani Kristo, ao kam a kukurei, ibukina bwa e a mena i aomi taamnein te mimitong ae taamnein te Atua.”—1 Betero 4:14.
18, 19. E na kanga Iehova ni buokiko n taamneina ae raoiroi, ao tera ae ko motinnanoia ni kaineti ma aei?
18 Bon te bwaintituaraoi ae akea tiana te taamnei ae raoiroi mairoun te Atua nakoia te koraki ake a ukoukoria ma nanoia ni koaua. E kona ni karikirakea tiaki tii am konabwai, ma nanom naba ni kani karaoa am kabanea n tamaroa ni beku ibukina. “Bon te Atua ae mwamwakuri i nanomi ibukini kukurein nanona, bwa kam aonga ni karekei nanomi ma ni mwakuri.” E na kariaira te bwaintituaraoi are taamnei ae raoiroi ae kakawaki, n ikotaki ma ara kakorakora n “taua raoi taekan te maiu,” bwa ti na “teimatoa ni mwamwakuria [kamaiuara] ma te maaku ao te rurubenebene.”—I-Biribi 2:12, 13, 16.
19 Onimakina raoi taamnein te Atua ao ko na karaoa am kabanea n tamaroa ni mwiokoam nako, karikirakea rabakaum n te baere ko mwiokoaki iai, ao onimakina Iehova bwa e na buokiko. (Iakobo 1:5) E na anganiko te bwai ae ko kainnanoia ibukin ataakin ana Taeka, arom ni kaaitarai kangaanga ni maium, ao ibukin tataekinan te rongorongo ae raoiroi. “Teimatoa ni bubutii ao kam na anganaki, teimatoa n ukeuke ao kam na kunea, teimatoa ni karebwerebwe ao e na kaukaki nakoimi,” ae e nanonaki naba iai karekean te taamnei ae raoiroi. (Ruka 11:9, 13) Teimatoa n onnonia Iehova bwa ko aonga n riki n aroia aomata aika kakaonimaki rimoa ao ngkai, ake a kairiraki rinanon te taamnei ae raoiroi mairoun te Atua.
Ko Kona ni Kabwarabwaraa?
• Tera te aroaro ae ti kona ni kaotiotia are ti na kakabwaiaaki iai, n aroni Maria?
• N te aro raa ae e kairiraki iai Bauro rinanon te taamnei ae raoiroi?
• A kanga ana toro te Atua ni kairiraki rinanon taamnein te Atua ni boong aikai?
[Taamnei n iteraniba 26]
E buokaki Bauro n taamnein te Atua bwa e na tokanikai i aon aia mwakuri taamnei aika buakaka
[Taamnei n iteraniba 28]
Bon te bwai n ibuobuoki te taamnei ae raoiroi nakoia Kristian n aki ongeia bwa tera aia kantaninga n taai aikai