Tera Te Taamnei Ae Raoiroi?

E TUANGIA taan rimwina Iesu n te taina ni kangai: “Antai iroumi ae e na angan natina te naeta ngkana e bubuti te ika? Ke tao e na anganna te tikaobian ngkana e bubuti te bunnimoa? (Ruka 11:11, 12, BK) A rangi ni kukukurei ataei ni Kariraia ni kaakang bunnimoa ma iika ao a bon ataa te bwai ae a tangiria.

E taku Iesu bwa ti riai n teimatoa ni botumwaaka ni bubutii te taamnei ae raoiroi ao n riki n aron te ataei ae bora ni baki ae bubutii te amwarake. (Ruka 11:9, 13) Te ota raoi n aron te taamnei ae raoiroi e na kona ni buokira n ataa raoi kakawakin tabena ni maiura. Ti na nenera ngkai reireiara man te Baibara ibukin te taamnei ae raoiroi.

“Mwakan Teuare Moan te Rietata”

E katereterea te Baibara bwa te taamnei ae raoiroi boni mwaakan te Atua are e kabongana ni kakororaoan nanona. Ngke e kaotia te anera ae Kaberiera nakoni Maria bwa e na reke natina te mwaane e ngae ngke bon te teinnaine ae tuai n iein, ao e tuangnga ni kangai: “Ane E na roko i aom te Tamnei are Raoiroi, ao ane e na rabuniko mwakan Teuare Moan te Rietata: ma ngaia ae, are E na bungiaki E na atongaki ba Raoiroi, ae Natin te Atua.” (Ruka 1:35) Ni kaineti ma ana taeka Kaberiera, iai irekereken te taamnei ae raoiroi ma “mwakan Teuare Moan te Rietata.”

E oti naba te aeka n iango anne n te kibu teuana n te Baibara. E taku te burabeti are Mika: “I bon on n te mwaka are Tamnein Iehova.” (Mika 3:8) E berita nakoia taan rimwina Iesu ni kangai: “Kam na anganaki te mwaka, ngkana E roko te Tamnei are Raoiroi i aomi.” (Mwakuri 1:8) Ao te abotoro Bauro e taekina naba taekan “mwakan te Tamnei are Raoiroi.”​—I-Rom 15:13, 19.

Tera ae ti kona ni motinnanoia mani baika a a tibwa taekinaki aikai? E rangi n irekereke te taamnei ae raoiroi ma korakoran te Atua. E kaotinakoa korakorana Iehova rinanon te taamnei ae raoiroi. Ni kauarerekeana, taamnein te Atua boni korakorana ae kakabongana, ke mwaakana ae kakammwakuri. Ai boni kamimira te mwaaka aei! Ti aki kona n ota raoi n te korakora ae kainnanoaki ni karikan te iuniweeti ni kabane. E kauringira Iehova rinanon te burabeti ae Itaia bwa ti na iangoi baikai ngke e kangai: “Kam na kaeka matami nako karawa, ao tara Ae karaoi baikai, Ae kairiia nako aia taanga ni warekiia: E kabaneia ni weteiia n araia; ngkae e bati mwakana, ngkae E korakora, ao e aki bua temanna mai buakoia.”​—Itaia 40:28.

E kaotaraeaki man te Baibara bwa e riki te iuniweeti aei ma baireana raoi ao a mwakuri raoi bwaina ni kabane mani ‘mwaakan’ ke korakoran te Atua ae Moan te Mwaaka. E mataata ngkanne bwa mwaakan te Atua ae mwamwakuri, e bon rangi ni korakora ao mwamwakurina e kateimatoai maiura.​—Nora te bwaoki ae “Mwamwakurin te Taamnei ae Raoiroi.”

E bae Iehova ni kabongana mwaakana n aaro aika a rangi ni kamimi, n aroni karikan te iuniweeti. Ma e boni kona naba ni kabongana ibukia aomata. A bati katoto n te Baibara ake a kaotaki iai aroni mwaakan te Atua ae mwamwakuri n angania ana toro te korakora.

“E Mena Tamnein Iehova i Aou”

E reke otara ae kakannongora man ana mwakuri ni minita Iesu, n aron te taamnei ae raoiroi are mairoun te Atua ni kona ni kakorakoraia ana toro. E tuangia aomata i Natareta Iesu ni kangai: “E mena Tamnein Iehova i aou.” (Ruka 4:18) Tera are e kakororaoia Iesu rinanoni “mwakan te Tamnei”? (Ruka 4:14) E katoki aekan aoraki nako, e katoka buakan naoni marawa, e kaamwarakeia nga ma nga aomata n tii tabeua bwerena ma iika ao e kautiia naba maate. E kabwarabwaraa Iesu te abotoro Betero bwa “te aomata ae kakoauaki iroun te Atua i buakomi n taiani kakai, ma kamimi, ma kanikina, ake E karaoi te Atua i Rouna.”​—Mwakuri 2:22.

E a aki karaoi aeka ni kakai akanne ngkai te taamnei ae raoiroi. Ma e ngae n anne, e kona ni karaoi baika a rangi ni kamimi ibukira. E kukurei Iehova n anga taamneina ae raoiroi nakoia taan taromauria n aron naba Iesu are e karaui nanoia iai taan rimwina. (Ruka 11:13) Ao ibukin anne, e a kona n taekina ae kangai te abotoro Bauro: “I boni konai bwaai ni kabane ni karaoi iroun Teuare kakorakoraai.” (I-Biribi 4:13) E kona ni karaoa ae aron anne te taamnei ae raoiroi ni maium? E na kaekaaki te titiraki anne n te kaongora ae imwina.

[Te Bwaoki/​Taamnei n iteraniba 5]

Bukina Ngkai Tiaki Te Aomata Te Taamnei Ae Raoiroi

E kabotauaki te taamnei ae raoiroi n te Baibara ma te ran. E taku te Atua ngke e beritani kakabwaiaaia ana aomata nakon taai aika imwaia: “N na nurakina te ran i aon ane kanimoi, ao karanga i aontano ae mauteretere: N na nurakina Tamneiu i aoia am kariki, ao kakabaian te aba i Rou i aoia tibum.”​—Itaia 44:3.

Ngke e nurakina taamneina te Atua i aoia ana toro ao a “on n te Tamnei are Raoiroi,” ke a “kaonaki n te Tamnei are Raoiroi.” A kabwarabwaraaki Iesu, Ioane te tia Bwabetito, Betero, Bauro, Barenaba ao ai taan rimwin Iesu ake a botaki ni bongini Bentekota 33 C.E. bwa a on ke a kaonaki n te taamnei ae raoiroi.​—Ruka 1:15; 4:1; Mwakuri 4:8; 9:17; 11:22, 24; 13:9.

Iangoa aei: E kona te aomata n ‘nurakinaki’ i aoia aomata aika bati aika kakaokoro? Ko kona n taekinna bwa a ‘kaonaki’ te kurubu n aomata iroun temanna te aomata? E aki kona n eti anne. A taekinaki aomata n te Baibara bwa a kaonaki n te wanawana, te ataibwai, ao ai te atatai ae eti, ma e bon tuai mani kabwarabwaraaki temanna bwa e a manga kaonaki iroun te aomata temanna.​—Te Otinako 28:3; 1 Uea 7:14; Ruka 2:40; I-Korote 1:9.

E rairaki te taeka n te taetae ni Kuriiti ae pneuʹma bwa te “taamnei,” ae kaota naba iai taekan te mwaaka ae e aki noraki. Ni kaineti ma te Vine’s Expository Dictionary of New Testament Words, e taekinaki iai bwa te taeka ae pneuʹma “e boni moan nanonaki iai te ang . . . ao te ikeike naba; ao rimwi riki te taamnei ae ai aron te ang, ae aki noraki, ae akea rabwatana ma e rangi ni mwaaka.”

E teretere ngkanne bwa bon tiaki te aomata te taamnei ae raoiroi.a

[Kabwarabwara ae nano]

[Te Kabwarabwaraan te Taamnei]

Photodisc/SuperStock