E Kanga ni Mwamwakuri Taamnein te Atua ni Boong Aikai?

E MWAUKU teuaei ma ngke e bungiaki iroun tinana. E katoa bong n tekateka ni mataroan te tembora ae aranaki bwa Tamaroa, bwa e aonga ni bubutii bwaintangira n nanoanga mairouia aomata aika a rinnako n te tembora. Ma n te taina, te tia bubutii ibukin maiuna ae mwauku aei e a anganaki te bwaintangira ae rangi ni kakawaki riki nakon te mwane ae tii teutana. E a boni kamaiuaki!​—Mwakuri 3:2-8.

E ngae ngke bon abotoro aika Betero ma Ioane ake a “kateirakea” n te aro ae e “a riki naba ni korakora raurauni waena,” ma a aki kamoamoa iai bwa aongkoa boni ngaiia ake a karaoia. Bukin tera? E kabwarabwara ni kangai Betero: “Mwaane aika Iteraera, kam aera ngkai kam mimi n aei? Ao kam aera ngkai kam tarataraira ba aongkoa ti kanakonakoa teuaei ni mwakara ma ara raoiroi?” Betero ma Ioane a uaia n ataia bwa bon tiaki oini mwaakaia te bwai arei, ma e konaaki te aeka ni mwakuri arei n te taamnei ae raoiroi mairoun te Atua.​—Mwakuri 3:7-16; 4:29-31.

N te tai arei, a karaoaki “kakai” n aron akanne, ibukin kakoauan ae te Atua e boutokoa te ekaretia ni Kristian are e a tibwa tei arei. (Ebera 2:4) E taku te abotoro Bauro bwa ngkana e a tia ni kakoroaki bukin anne ni kakai aikai, ao “a na kamaunaki.”a (1 I-Korinto 13:8) Mangaia are ti aki kona n nora kamaiuan te aoraki n te kakai, te taetae ni burabeti, ke kanakoaia taimonio, aika mwakuri aika a katauaki iroun te Atua ngkoa n te ekaretia ni Kristian ni koaua, ngkai.

Ma e nanonaki n aei bwa e a bon aki mwamwakuri ngkai te taamnei ae raoiroi mairoun te Atua? Tiaki ngaia anne! Ti na iangoi aaro tabeua ngke e mwamwakuri ngkoa taamnein te Atua n te moan tienture, ao aaro tabeua aika a kaotia bwa e bon teimatoa ni mwamwakuri naba n taai aikai.

“Tamnein te Koaua”

Ana mwakuri teuana te taamnei ae raoiroi mairoun te Atua, bon te kaongora, te kaoota, ao kaotiotan taiani koaua. Teutana te tai imwain maten Iesu, ao e tuangia taan rimwina ni kangai: “A bati riki au bwai aika I kan atongi nako imi, ma kam aki kona n atai ngkai. Ma ngkana E roko Teuare Tamnein te koaua, ao E na kairingkami nakon te koaua ni kabanea.”​—Ioane 16:12, 13.

E kabwaroaki “tamnein te koaua” ni Bentekota n 33 C.E. ngke a botaki n te ru are ieta i Ierutarem tao 120 mwaitiia taan reirei ake a bane ni babetitoaki n te taamnei ae raoiroi. (Mwakuri 2:1-4) Te abotoro Betero e mena naba ibuakon te koraki arei are a kaea te toa ae e kakaraoaki ni katoa ririki. E kaonaki n te taamnei ae raoiroi Betero ao e “tei rake” ni kabwarabwara ke ni katereterei riki koaua tabeua ibukin Iesu. N aron anne, e a manga taekina aron “Iesu are te I-Natareta” n “neboaki n atain te Atua.” (Mwakuri 2:14, 22, 33) Taamnein te Atua e kaira naba Betero bwa e na ninikoria n taekina ae kangai nakoia I-Iutaia ake a ongora irouna: “Ke a bane ana utu Iteraera n ata Iesu naba arei, are kam kamatea ... ba e boni koaua ba E karaoia te Atua ba te Uea ao te Mesia.” (Mwakuri 2:36) Imwin ana rongorongo Betero are e kairaki iroun te taamnei, tao tenua tenga mwaitiia aomata ake a “kaki i nanoia ana taeka” ao a babetitoaki. N te aro aei, te taamnei ae raoiroi mairoun te Atua e buokiia ma ni kairiia nakon te koaua.​—Mwakuri 2:37-41.

Te taamnei ae raoiroi mairoun te Atua e a riki naba bwa te tia anga reirei ao te tia kauringia aomata. E kangai Iesu: “Ao te tia Buobuoki, are te Tamnei are Raoiroi, are E na kanakomaia te Tama n arau, E na reireingkami bwaai ni kabane, ao E na kaururing i nanomi bwaai ni kabane ake I atongi nako imi.”​—Ioane 14:26.

E a kanga te taamnei ae raoiroi ni mwamwakuri n aron te tia anga reirei? Taamnein te Atua e kauka aia iango taan rimwin Kristo nakon bwaai ake a a tia n ongora mairoun Iesu rimoa, ma a aki ota raoi iai. N aron anne, a ataia abotoro bwa ngke e tei n te kaboowi, Iesu e tuanga te kowana i Iutaia ae te I-Rom, are Bontio Birato bwa: “Tiaki mai aon te aba ueau.” Ma e ngae n anne, n tain waeraken Iesu nako karawa 40 te bong imwin anne, a boni kairua naba abotoro n taku bwa te Tautaeka n Uea e na manga kateaki i aon te aonnaba aei. (Ioane 18:36; Mwakuri 1:6) E teretere bwa abotoro a aki ota raoi n nanon ana taeka Iesu, ni karokoa te tai are e a kabwaroaki te taamnei ae raoiroi mairoun te Atua i aoia, are ni Bentekota n 33 C.E.

Taamnein te Atua e a riki bwa te tia kauringiia, n te aro ae e manga kaoka nakon aia iango, reirei tabeua ake a taekinaki iroun Iesu. N aron anne, taetae ni burabeti ibukin maten Kristo ao manga utina, a oota riki n te ibuobuoki ae roko rinanon te taamnei ae raoiroi. (Mataio 16:21; Ioane 12:16) Ururingan ana reirei Iesu e buokiia abotoro bwa a na ninikoria ni kaota bukin aia onimaki imataia uea, taani moti, ao mataniwi n Aro.​—Mareko 13:9-11; Mwakuri 4:5-20.

Irarikin anne, te taamnei ae raoiroi mairoun te Atua e buoka aron kairakia moan Kristian nakon taabo ike e na nako raoi iai aia mwakuri ni minita. (Mwakuri 16:6-10) Taamnein te Atua e kairiia Kristian naba bwa a na buoka aron korean ana Taeka te Atua ae te Baibara, bwa a aonga ni buokaki iai te botannaomata. (2 Timoteo 3:16) E teretere ngkanne bwa te taamnei ae raoiroi e mwamwakuri n aaro aika mwaiti n te moan tienture. E aki anganaki tii ibukin karaoan kakai.

Te Taamnei ae Raoiroi n Ara Bong Aikai

Te taamnei ae raoiroi e a tabe ni mwamwakuri naba n ara bong aikai, ibukin buokaia Kristian ni koaua. E a kateretereaki anne nakon te koraki ae uarereke mwaitiia, ake taan reirei n te Baibara ake a mena i Allegheny Pennsylvania, U.S.A., ni kauoua n iteran te ka 19 n tienture. Taan reirei n te Baibara aika a raraoi nanoia aikai, a ingainga ni kan ataa “te koaua.”​—Ioane 8:32; 16:13.

Kaain te koraki aei temanna ae arana Charles Taze Russell, e taekina ae kangai ibukin kakaean te koaua man te Baibara irouna: “I tataro. . . bwa I aonga ni kona ni kamaunai mai nanou ao man au iango, bwaai ni kabane ake tao a na kona n tutuuki, ao I aonga ni kairaki iroun taamneina nakon te ota ae riai.” E kakabwaia te tataro ma te nanorinano aei te Atua.

Ngke e kakaonimaki n nenera te Baibara Russell ma raoraona, iai bwaai tabeua aika a riki ni mataata nakoia. “Ti kunea bwa inanon tienture aika mwaiti,” e kabwarabwara Russell, “katei n Aro ao koraki tabeua a tibwatibwai imarenaia boto n reirei man te Baibara, ao a irengarengan reirei aikai, ma te iango n aomata ao taiani kairua tabeua, ke a boni bati.” E a riki mai iai te kangaanga are e atongnga bwa “kabuan te koaua.” E koaua bwa koaua man te Baibara a bon taonaki n reirei ni beekan ake a a tia n rin nako nanon Krititentom inanon tienture aika mwaiti. Ma e matoatoa nanon Russell ni kan ataa ma ni kaotiota te koaua.

Rinanon baan te Zion’s Watch Tower and Herald of Christ’s Presence, Russell ma raoraona a ninikoria ni kabuakakai reirei n Aro aika kewe, ake a kabuakaka te Atua. A noria bwa e boni mamate te soul ao ngkana ti mate ti bon nakon te rua ni mate, ao Iehova bon tii ngaia te Atua ni koaua ao tiaki ngaia kanoan te Temanna-n-teniman—ake koaua aika a rangi ni kaokoro ma ake a bwainaki irouia angiia aomata.

Ma n aron ae ko kona n ataia, kaotan kairuan reirei aika kewe aikai, e boni kaunia mataniwi n Aro ni Krititentom. Ibukin nanoia ni kan taua ma te matoa nakoaia aika kakannato, a mwaiti mataniwi n te Aro ni Katorika ao te Aro ni Borotetanti aika a bairei waaki tabeua aika a uaiakina kabuakakan Russell iai. Ma e aki bwara nanon teuaei ma raoraona. A aki nanououa n onimakina kairakia n taamnein te Atua. “E kangai ana taeka ni karaunano ara Uea,” e taku Russell, “bwa . . . te taamnei ae raoiroi mairoun te Tama, ae kanakoaki imwin ana bubutii ao bon ibukin Iesu ae ara tia Kamaiu, te tia Raoi ao te Atu, e na riki bwa te tia reireinira.” Ao e bon reireinira! Taan Reirei n te Baibara ake a raraoi nanoia akekei, a kakarina ranin te koaua ae itiaki man te Baibara, ao a kaotiotii ni kabutaa te aonnaba.​—Te Kaotioti 22:17.

Ana botaki Ana Tia Kakoaua Iehova ae ngkai e teimatoa ni bubutimwaea kairirana iroun te taamnei ae raoiroi mairoun te Atua, inanon tebubua tabun te ririki ngkai. Taamnein Iehova e kaootaia riki taani Kakoaua ngkai i aon bwaai n taamnei teutana imwin teutana, a boni kukurei naba ni karaoi bitaki aika riai bwa a aonga ni kaboraoa maiuiia ma ota aika boou.​—Taeka N Rabakau 4:18.

“Kam na Riki ba Taani Kaotioti i Bukiu”

Iesu e taekina riki te aro teuana are e kaotaki iai te taamnei ae raoiroi mairoun te Atua, ngke e tuangia taan rimwina ae kangai: “Ma ane kam na anganaki te mwaka, ngkana E roko te Tamnei are Raoiroi i aomi: ao ane kam na riki ba taani kaotioti i bukiu . . . ni karokoa tabon aonaba.” (Mwakuri 1:8) E tuai man toki ngkai korakoran ana berita Iesu are e na kamwaakaia taan rimwina n “te mwaka” ao te “Tamnei are Raoiroi” bwa a aonga ni kona ni karaoa te mwakuri are a mwiokoaki iai iroun te Atua.

Te koraki ae Ana Tia Kakoaua Iehova a rangi ni kinaaki ibukin aia waaki n tataekina te rongorongo. (Nora te bwaoki.) Ana Tia Kakoaua Iehova a tataekina rongorongon te koaua, n aaba ao abamwakoro aika a raka riki mwaitiia nakon 230. I aan kangaanga nako aika a kona n riki ngkai a ninikoria n tabekarake bwanaia ni boutokoa ana Tautaeka n Uea te Atua, ao n taai tabetai a kukurei ni kaburea maiuia ni karaoa te mwakuri aei n taabo aika iai te buaka iai. Ingaingan nanoia n te mwakuri ni minita ni Kristian e kakoaua raoi aron mwamwakurin te taamnei ae raoiroi n taai aikai. Ao e teretere bwa Iehova ae te Atua e tabe ni kakabwaia aia mwakuri.

N aron anne, n te ririki are nako, e a raka riki nakon teuana te birion te aoa ae e kabaneaki ibukin tataekinan euangkerion ana Tautaeka n Uea te Atua. Tera uaan te mwakuri anne? Aomata aika 323,439 mwaitiia a kaotia bwa a a tia ni katabui maiuiia nakon te Atua n te aro ae a babetitoaki n te ran. Irarikin anne, a kairaki reirei n te Baibara ni mweengaia aomata aika a kan ongora, n te mwaiti ae 4,433,884 ni katoa wiki. Mwaitini booki aika 24,607,741, maekatin aika 631,162,309, ao boroutia ma booki aika uarereke aika 63,495,728, a kabutaki nakoia aomata. Ai korakora ra te kaotioti anne ibukin mwamwakurin taamnein te Atua!

Taamnein te Atua ao Ngkoe

Ngkana te aomata e butimwaea te euangkerio ma ni kaboraoa maiuna ma ana kaetieti te Atua, ao e kaota aron onimakinan te karea ni kaboomwi, e a kaukaki iai aron reken taraakina ae itiaki imatan te Atua. E taekina ae kangai te abotoro Bauro nakoia aomata aikai: “Te Atua . . . are anganingkami Tamneina are Raoiroi.”—1 I-Tetaronike 4:7, 8; 1 I-Korinto 6:9-11.

Reken taamnein te Atua iroun te aomata e kariki taiani kakabwaia. Aekakira kakabwaia? E taekina ana Taeka te Atua ae e kairaki koreana bwa teuana bon: “Uaan te Tamnei te tangira, te kimareirei, te rau, te taotaonaki n nano, te atataiaomata, te raoiroi, te kakaonimaki, te nimamanei, [ao] te tau-baang.” (I-Karatia 5:22, 23) Mangaia are te taamnei ae raoiroi mairoun te Atua bon te mwaaka ae korakora ibukin waakinan ae raoiroi, ae e kaira te aomata bwa e na kona ni kaotiotii aroaro aika a kaotaki naba iroun te Atua.

Irarikin anne, ngkana ko wareka te Baibara ao ko kamanenai bwaai ake ko reiakin iai, taamnein te Atua e kona ni buokiko ni karikirakea riki wanawanam, am atatai, te ota, rabakaum ni bairei bwaai, ao rabakaum n iaiango. Te Uea are Toromon e anganaki te “rabakau ma te ataibwai ae maiti kurikuri, ma te iango ae rababa,” ibukina bwa e tangiria ni kakukureia riki nanon te Atua nakon nanoia aomata. (1 Uea 4:29) Kioina ngke Iehova e angan Toromon te taamnei ae raoiroi, e bon aki kona n taua te taamnei ae raoiroi mairouia aomata aika a tangiria ni kakukureia nanona ni boong aikai.

Te taamnei ae raoiroi mairoun te Atua e buokia Kristian naba bwa a na buakana Tatan ma ana taimonio, te waaki ae buakaka ae ngkai, ao tatangiran ae bure irouia ibukin kaibwabwarun rabwataia aika a aki kororaoi. E a kanga ni kona ni waakinaki anne? E kaeka te abotoro Bauro: “I boni konai bwaai ni kabane ni karaoi iroun Teuare kakorakoraai.” (I-Biribi 4:13) Tao te taamnei ae raoiroi e na aki uotii nako taiani kataaki ke kariri mairoura; ma e kona ni buokira bwa ti na nanomwaaka iai n aki bwaka. Ngkana ti mwiokoa taamnein te Atua, ti kona n anganaki te “mwaka ae moan te korakora” ae na buokira ni kaitara ma kangaanga ke rawawata ni kabane.​—2 I-Korinto 4:7; 1 I-Korinto 10:13.

Ngkana ko iangoi koaua ni kabane, e teretere bwa akea te nanououa bwa e a tabe ni mwamwakuri te taamnei ae raoiroi mairoun te Atua ni boong aikai. Taamnein Iehova e kamwaakaia ana toro bwa a na kaotioti ibukin ana kaantaninga aika kamimi. E teimatoa ni kaotii taian ota ibukin bwaai n taamnei, ao e kakorakora riki ara onimaki, ma ni buokira bwa ti na kakaonimaki iroun ara tia Karikiriki. Ai kukurei ra ngaira ngkai e kakaonimaki nakon ana berita te Atua, ae e na angania ana toro aika kakaonimaki ni boong aikai, te taamnei ae raoiroi!

[Kabwarabwara ae nano]

[Te Bwaoki n iteraniba 10]

Aia Taeka Aomata Tabemwaang Ibukia Ana Tia Kakoaua Iehova

“E ngae ngkai Aaro tabeua a kaboia aomata aika rabakau bwa a na anaa nanoia aomata bwa a na kaea aia taromauri, ke ni buokiia ni kaitara ma kauntaeka aika riki n taai aikai n aron taekan te wene ni bure imarenan te mwaane ma te mwaane ao te aine ma te aine, ke taekan kabwakaaia ataei aika a tuai ni bungiaki, ma taani Kakoaua a bon aki kariaia kamaraurauan aia koaua bwa e aonga ni butimwaeaki n te aonnaba ae tabe ni bibitaki.A bon teimatoa ni kaotiota te euangkerio ni kabuta te Aonnaba.”​—The Orange County Register man Orange County, California, U.S.A.

“Ni kaineti ma kabutan te onimaki, a karako mwaitiia Aaro aika a ingainga nanoia kaaina ni kani karaoia . . . n ai aroia Ana Tia Kakoaua Iehova.”—The Republic of Columbus, Indiana, U.S.A.

“Boni tii ngaia aika a nakonako man te auti teuana nakon te auti teuana ni kabuta “te euangkerio,” ma ni kamanenai ana reirei te Baibara.”—Zycie Literackie, Poland.

“Te mwakuri n tataekina te rongorongo ae te kabanea ni bubura ae e a tia ni waakinaki n te aonnaba, e a waakinaki ngkai irouia Ana Tia Kakoaua Iehova aika a kabuta te aonnaba n ana rongorongo Iehova.”​—News-Observer, Tamaqua, Pennsylvania, U.S.A.

[Taamnei n iteraniba 9]

Te taamnei ae raoiroi mairoun te Atua e kaootaira n te aro n taamnei,

. . . e karikirakei aroaro ni Kristian aika raraoi,

. . . e boutokoira n tataekinan te rongorongo ni kabuta te aonnaba