“Kamarurungingkami N Tantani”—e A Roko Te Aua Ni Motikitaeka!
E anaaki te rongorongo ae n te reirei aei man te boroutia ae Kamarurungingkami n Tantani! are e otinako n taiani bwabwaro ake a karaoaki ni katobibia te aonnaba n 2004/05.
“Kamarurungingkami n tantani: ba kam aki ata te bong ane E na nako mai iai ami Uea.”—MATAIO 24:42.
1, 2. Tera ana kabotau Iesu ae tonuraoi ma rokona?
TERA ae ko na karaoia ngkana ko a ataia bwa iai te tia iraa ae e aiwaa n taratarai bwaai aika e na kimoai man auti aika mena i rarikim? Ibukin nanom ni kani kamanoia aomata aika a tangiraki iroum ma am bwai aika kakawaki, ko na boni bae n taratara raoi ao ni kamarurungko n tantani. Ko na taratara raoi, bwa e aki kona ni katanoataa rokona te tia iraa. E na boni bae ni waerikiriki n roko n te tai ae e aki kaantaningaki.
2 E kaokioka taekinan aron te tia iraa Iesu n te aro ni kaikonaki. (Ruka 10:30; Ioane 10:10) Ni kaineti ma bwaai ake a na riki n tain te toki ao ake a na kanikinaea rokona ni motikitaeka, e kauring Iesu ni kangai: “Ma ngaia ae kam na kamarurungingkami n tantani: ba kam aki ata te bong ane E na nako mai iai ami Uea. Ma kam ata te tia taua taekan te auti, ba ngke e a kaman ata ana tai te tia ira n roko, ao e kamarurungnga n tantani n tuka uruan ana auti.” (Mataio 24:42, 43) Mangaia are e kabotaua rokona Iesu ma rokon te tia iraa are e na roko n te tai ae e aki kaantaningaki.
3, 4. (a) Tera ae irekereke ma mutiakinan ana kauring Iesu ibukin rokona? (b) Baikara titiraki ake a rio mai iai?
3 E rangi n tonu te kaikonaki aei ibukina bwa akea ae kona n ataa te aua ke te bong are e na roko iai Iesu. Imwain aei, n te taetae ni burabeti naba anne, ao e taekina ae kangai Iesu: “Akea ae ata rokon te bong arei ma te aua arei, ao a aki ataia naba anerani karawa, ao E aki ataia te Nati, ma bon ti te Tama ae ataia.” (Mataio 24:36) Mangaia are e kaumakiia aomata ake a ongora irouna Iesu, ni kangai: “Katae nangimi.” (Mataio 24:44) A na katae nangia te koraki ake a mutiakin ana kauring Iesu ni kaakaraoi aroaro aika riai, n aki ongeia bwa te tai raa, are e na roko iai Iesu ni karaoa ana motikitaeka Iehova.
4 A a rio titiraki tabeua aika kakawaki ibukin aei: Te koaua bwa a kaineti ana kauring Iesu tii nakoia kaain te aonnaba, ke a riai naba Kristian ni ‘kamarurungia n tantani’? E aera ngkai ti kaumakaki bwa ti na ‘kamarurungira n tantani,’ ao ti na kanga ni karaoa anne?
Te Kauring Ibukin Antai?
5. Ti na kanga n ataia bwa e kaineti te kauring ibukin te ‘kamarurung n tantani’ nakoia Kristian ni koaua?
5 Ni koauana, e na roko te Uea n ai aron te tia iraa nakoia kaain te aonnaba, ake a kabonoi taningaia nakon te kauring ibukin te kabuanibwai ae e a kaan roko. (2 Betero 3:3-7) E na tera aron rokona nakoia Kristian ni koaua? E korea ae kangai te abotoro Bauro nakoia raona n onimaki: “Kam bon ata ana bong te Uea, ba e na roko n ai aron te tia ira ni bong.” (1 I-Tetaronike 5:2) Ti aki nanououa bwa ‘e na roko ana bong te Uea ae Iehova.’ Ma te koaua bwa e na kerikaki iai marurungira n tantani? Noria bwa e taku Iesu nakoia taan rimwina: “E na roko Natin te Aomata n te aua ane kam taku i nanomi ba E aki roko iai.” (Mataio 24:44) Imwain anne, ngke e kaumakiia taan rimwina bwa a na teimatoa n ukoukora te Tautaeka n Uea, e kauringiia Iesu ni kangai: “Kam na tauraoi naba, ba e na roko Natin te Aomata n te tai are kam aki kantaningaia iai.” (Ruka 12:31, 40, BK) E aki ngkanne teretere iai ae e tabeakinia taan rimwina Iesu ngke e kauringiia ni kangai: “Kamarurungingkami n tantani”?
6. Bukin tera bwa ti riai ni ‘kamarurungira n tantani’?
6 Bukin tera bwa ti riai ni ‘kamarurungira n tantani’ ao n “tauraoi”? E kabwarabwaraa Iesu ni kangai: “Ane a na mena uoman te mwane n te tawana; e na uotaki nako temanna, ao e na katukaki temanna: ane a na tabe uoman te aine n ii baraua n te atibu; e na uotaki nako temanna, ao e na katukaki temanna.” (Mataio 24:40, 41) A na “uotaki nako” ke ni kamaiuaki te koraki ake a kaota tauraoia n te tai are a a kamaunaki iai aomata aika buakaka. A na “katukaki” nakon te kamaunanakoaki ake tabeman ibukina bwa a a tia n iririi oin nanoia n te bwai are a tangiria. A ikotaki naba i buakoia te koraki aei, aomata ake a a tia ngkoa n ataa ae riai ma a aki kamarurungia n tantani.
7. Ibukin aki-ataakin te tai are e na roko iai te toki, tera ngkanne ae ti kona ni karaoia?
7 Kioina ngkai ti aki ataa raoi te tai are e na roko iai tokin te waaki ae buakaka ae ngkai, e a reke ngkanne ara tai aei ibukin kaotan nanora ni kan toro iroun te Atua ma nanora ae itiaki. E aera bwa ti kona n taekina aei? Ibukina bwa e kona n taraa n rangi ni kiriaria rokon te toki. Ma e kananokawaki, bwa a a tia tabeman Kristian ake e reke irouia te iango aei, ni kariaia bwa e na mauna nako ingaingannanoia ni kani beku iroun Iehova. Ma ibukina bwa ti a tia ni katabui maiura, ti a aikoa manga nanokokoraki iai bwa ti a tia n anga nanora bwa ti na beku iroun Iehova. A ataia te koraki ake a kinaa raoi Iehova bwa e na bon aki kukurei, ngkana ti a tibwa kaota ingaingannanora n te kabanea ni miniti. E tarataraa te nano.—1 Tamuera 16:7.
8. E na kanga ni kairira tangiran Iehova bwa ti na kamarurungira n tantani?
8 Ibukina bwa e korakora tangiran Iehova iroura, ti rangi ni kimwareirei ngkanne ni karaoa nanona. (Taian Areru 40:8, BK; Mataio 26:39, BK) Ao ti kan toro iroun Iehova n aki toki. Tiaki nanona bwa e na kerikaki kakawakin te kaantaninga anne, tii ibukin ae ti na riai n tataninga tabeua te tai nakon are tao ti kaantaningaia. Ma ae kakawaki riki, ti na kamarurungira n tantani kioina ngkai a ingainga nanora ni kaantaningaa kakoroan bukin Ana kaantaninga Iehova ae irekereke ma rokon Ana bong. Ibukin ingaingannanora ni kani kakukureia te Atua, ti a kairaki ngkanne bwa ti na maiuakini ana kairiri aika n ana Taeka ao ni moanibwaia ana Tautaeka n Uea ni maiura. (Mataio 6:33; 1 Ioane 5:3) Ngkai ti na iangoia bwa tera aron rotakin raoi ara motinnano ao maiura ni katoa bong ae riai n oti, ngkai ti kamarurungira n tantani.
Tera ae Ko Uaiakinna ni Maium?
9. Bukin tera ngkai a tangiraki kaain te aonnaba bwa a na waekoa n ataa kakawakin ara tai aikai?
9 A ataia aomata aika mwaiti ni boong aikai bwa a aki toki n riki kangaanga aika kakaiaki ao mwakuri aika kakamaaku, ao tao a aki kukurei n aron waakin maiuiia. Ma a bon ataia bwa tera raoi ae nanonaki n aaro aika buakaka i aon te aonnaba? A ataia ae ti a mena ngkai n tain “tokin te waaki i aon te aba”? (Mataio 24:3, NW) A ataia ae taabangakin te babakaine, te tiritiri, ao mwakuri aika a aki boraoi ma nanon te Atua, boni kanikinaean ae “boong aika kaitira” taai aikai? (2 Timoteo 3:1-5) A tangiraki n te tai ae waekoa bwa a na ataa ae nanonaki ni baika riiriki aikai, ao n iangoia bwa tera aron waakin maiuiia.
10. Tera ae ti riai ni karaoia bwa ti aonga ni koaua raoi bwa ti boni kamarurungira n tantani?
10 Ao ngaira tera arora iai? Ti kaaitara ni katoa bong ma motinnano aika irekereke ma ara mwakuri, marurungira, ara utu, ao ara taromauri. Ti ataa ae taekinaki n te Baibara, ao ti kakorakoraira ni maiuakinna. Mangaia are ti riai n titirakinira ni kangai: ‘I a tia ni kariaia raraomaeakinan bwaikorakin te maiu aei, bwa e na tukai man uaiakinan tiau ni kaineti ma te onimaki? I kataua rabakaun ao te iango n aonnaba, bwa e na bairei au motinnano aika I karaoi?’ (Ruka 21:34-36; I-Korote 2:8) Ti riai n teimatoa ni kaotiota kakoauaan Iehova ma nanora ni kabane ao n aki onimakin oin rabakaura. (Taeka N Rabakau 3:5) Ao n te aro anne, ti na teimatoa iai n “taua te maiu ni koaua,” are te maiu n aki toki n ana aonnaba te Atua ae raoiroi.—1 Timoteo 6:12, 19.
11-13. Tera reireiara ae kona n reke man katoton baike a a tia n riki (a) n ana bong Noa? (b) n ana bong Rota?
11 A mwaiti kauring i nanon te Baibara aika kona ni buokira bwa ti na kamarurungira n tantani. Iangoa are e riki n ana bong Noa. Imwain karokoan te leka iroun te Atua ao e a kaman baireia raoi bwa e na anganako moa te kauring. Ma akea mai buakoia aomata ake irarikin Noa ma ana utu, ae mutiakina te kauring. (2 Betero 2:5) E taku Iesu ni kaineti ma aei: “Ai aron ana bongi Noa rokon Natin te Aomata. Ba aron te aba ni boong ake i mwain te ieka ngke a amamarake ma ni momoi, ma n iein, ma n anganga te aba nakon te iein ni karokoa te bong are e rin iai Noa i nanon te ake, ao a aki ata te ieka ngke e tuai n roko n uotiia nako aomata ni kabaneia; ao ai aron naba rokon Natin te Aomata.” (Mataio 24:37-39) Tera reireiara man aei? Ngkana iai i buakora ae e kataua bwaikorakin te aonnaba, ke mwakuri ake ti taneiai ni kakaraoi, bwa a na kamwaawai mwakuri aika reitaki ma te onimaki ake e kaumakira te Atua bwa ti na moanibwai, ti riai ngkanne n iangoi raoi arora ni kamanenai maiura.—I-Rom 14:17.
12 Iangoa naba ana bong Rota. E rangi ni kaubwai te kaawa are e maeka iai Rota ma ana utu, ma e rangi ni buakaka te aroaro ni maiu iai. E kanakoia ana anera Iehova bwa a na urua te kaawa anne. A kaumakaki Rota ma ana utu irouia anera aikai bwa a na kitana Totom ao n aki manga tanrikaki. A kitana te kaawa ibukina bwa a kaungaki irouia anera. Ma buun Rota, e kaotia n aroarona bwa e aki kona ni mwaninga tangiran mwengana are i Totom. Ibukin aki-ongeabana, e tanrikaki ao e a bua maiuna iai. (Karikani Bwaai 19:15-26) E kauringira Iesu ibukin taai aika a na roko ni kangai: “Kam na uringa bun Rota.” Ti kakaraoa nanon te kauring anne?—Ruka 17:32.
13 A kamaiuaki te koraki ake a ira nanon ana kauring te Atua. Aei te bwai are e riki naba nakon Noa ma ana utu ao Rota ma natina ake aine. (2 Betero 2:9) Kioina ngkai ti mutiakini katoto aika riki bwa bwaai ni kauring aikai, ti a kaungaki naba n te rongorongo ni kamaiu ae kaotaki iai ibukiia taan tangira te raoiroi. A kaonaki nanora n te kaantaninga ae onimakinaki ae kakoroan bukin Ana berita te Atua n rokon “karawa nabangkai ma aonaba nabangkai” ike e “mena iai te raoiroi.”—2 Betero 3:13.
‘E a Roko te Aua ni Motikitaeka’!
14, 15. (a) Tera irian te “aua” ni motikitaeka? (b) Tera ae irekereke ma ‘maakan te Atua ao anganakina neboakina’?
14 Tera ae ti kona ni kaantaningaia ngkai ti kamarurungira n tantani? E kabwarabwaraki n te boki ae Te Kaotioti aron kakoroan nanon Ana kaantaninga te Atua teutana imwin teutana. E kakawaki karaoan nanon ae taekinaki iai ngkana ti kani kakoauaa raoi bwa ti a tauraoi. E kamatataaki raoi n te taetae ni burabeti anne taekan bwaai ake a na riki n “ana bong te Uea,” are e moanaki man kauean Kristo i karawa n 1914. (Te Kaotioti 1:10) E kaira ara iango Te Kaotioti nakon te anera are e a tia n anganaki mwiokon “te euangkerio ae aki totoki ba e na taekinna.” E taekinna n te bwanaa ae korakora ni kangai: “Maka te Atua, ao kam na anganna te neboaki; ba e a roko ana aua ni motiki-taeka.” (Te Kaotioti 14:6, 7) Bon te tai ae kimototo te “aua” ni motiki-taeka anne; ao a karinaki iai katanoatan taian motikitaeka ake a taekinaki iai ao karaoan nanoia. Ti a mena ngkai i nanon te tai anne.
15 N te tai aei moa, imwain tokin te aua ni motiki-taeka, ti a kaumakaki iai: “Maka te Atua, ao kam na anganna te neboaki.” Tera ae e irekereke ma aei? Ti na bon tannako man karaoan ae buakaka ngkana ti maaka te Atua ma nanora ni koaua. (Taeka N Rabakau 8:13) Ngkana ti karinea te Atua, ti kakauongo raoi nakoina ma te nano ni karinerine. Ti na aki rangi ni katabetabeira ni mwakuri tabeua n te aro are ti a kakeaa iai bonganan te katoatai ni wareware man ana Taeka ae te Baibara. Ti na aki iangoa ana reirei ibukin kaakaean bobotaki ni Kristian bwa te bwai ae e aki kakawaki. (Ebera 10:24, 25) Ti na kawakina raoi te mwioko ae kakawaki ibukin tataekinan rongorongon Ana Tautaeka n Uea te Atua iroun te Mesia, ao ni karaoia ma te ingaingannano. Ti na onimakina Iehova ma nanora ni kabane n taai nako. (Taian Areru 62:8) Ibukina bwa ti ataia ae Iehova bon te tia Tautaeka i aon Bwaai ni Kabane, ti a kukurei ngkanne n aantaeka nakon ana kairiri ibukin maiura. Ko maaka te Atua ma nanom ni koaua ao ko anganna neboana n aaro nako?
16. E aera ngkai ti kona n taekinna bwa e a kaman tia ni koro bukin motikan taekan Baburon ae Kakannato, are e taekinaki n Te Kaotioti 14:8?
16 E reitaki nako kabwarabwaran bwaai riki tabeua, ake a na riki n te aua ni motikitaeka, n Te Kaotioti mwakoro 14. E moan taekinaki iai Baburon ae Kakannato, ae te botaki n Aro ae kewe ae katobibia te aonnaba: “E ri mwina te anera temanna, ae te kauoman, ao e kangai, E a bwaka, e a bwaka Baburon are te kawa are kakanato.” (Te Kaotioti 14:8) Eng, e a kamani bwaka Baburon ae Kakannato n Ana taratara te Atua. A kainaaomataki ana toro Iehova ake a kabiraki n 1919 man tautoronakia n aia reirei kaain Baburon, ma aia mwakuri ake a a tia n tauu taekaia aomata ma natannaomata i nanon ngaa ma ngaa te ririki. (Te Kaotioti 17:1, 15) Man te tai arei a kona ngkanne ni kakorakoraia ni karikirakea te taromauri ae koaua. E moa man te tai anne, tataekinan euangkerion Ana Tautaeka n Uea te Atua ni katobibia aonnaba.—Mataio 24:14.
17. Tera ae ti riai ni karaoia bwa ti aonga n otinako man Baburon ae Kakannato?
17 Iai riki ana motikitaeka te Atua ibukin Baburon ae Kakannato. E na waekoa n roko kaitiran kamaunanakoana. (Te Kaotioti 18:21) Mangaia are bon iai bukina ae riai, ngkai e kaumakiia aomata n taabo nako te Baibara ni kangai: “Oti nako mai nanona [Baburon ae Kakannato], ba kam na aki buokanibwai ma ngaia n ana bure.” (Te Kaotioti 18:4, 5) Ti na kanga n otinako man Baburon ae Kakannato? E bati riki ae nanonaki nakon tii katokan ara iraorao ma Aaro aika kewe. E a taabangaki touan mwin aroia kaain Baburon rimoa ni karaoan boong ni bukamaru ao katei tabeua ni boong aikai, ni kariaiakan te wene ni bure irouia kaain te aonnaba, ao ni karikirakean takaakaro ao aaro ni kakukurei aika irekereke ma te tabunea, ao a a mwaiti riki. Ngkana ti na kamarurungira n tantani, e kakawaki kaotiotan ae ti a kaokoroira raoi ma Baburon ae Kakannato n ara mwakuri ao ni baika ti tangiri.
18. N iangoan are e kabwarabwaraki n Te Kaotioti 14:9, 10, tera are a tarataraia mai iai Kristian ake a teimatoa n tantani bwa a na kararoaia mai iai?
18 N Te Kaotioti 14:9, 10, ti a manga reiakina riki iai te bwai teuana ibukin te “aua ni motiki-taeka.” E taku te anera are temanna riki: “Ngkana e taromauria te man arei te aomata temanna ma bouana, ao ngkana e kanikinaeaki i aon ramwana, ke i aoni baina, ao e na moi naba ni wain n unin te Atua.” Bukin tera? “Te man . . . ma bouana,” a tei ibukin aia tautaeka aomata, ake a aki kariaia riain Iehova n tautaeka i aoni bwaai ni kabane. A tarataraiia raoi Kristian ake a teimatoa n tantani, bwa a na aki kairarangaki ke ni kanikinaeaki tao n aroaroia ke n aia mwakuri, n te aro are a a tautaekanaki irouia te koraki ake a aki kariaia riain te Atua ni koaua ae Iehova, n tautaeka i aoni bwaai ni kabane. A ataia Kristian bwa e a kaman kateaki i karawa Ana Tautaeka n Uea te Atua, are e na urui aia tautaeka aomata ni kabane, ao e na teimatoa n aki toki.—Taniera 2:44.
Tai Kabuaa Nanom n Umaki!
19, 20. (a) Tera ae ti kona ni kakoauaa raoi bwa e na karaoia Tatan ngkai ti a tabe ni kaan riki ma tain te toki? (b) Tera ae ti riai ni kananomatoaira ni karaoia?
19 A na rikirake n rawawata riki kangaanga ao kataaki ngkai ti a roroko riki n raabanen boong aika kaitira. Ibukina bwa ti a mena ngkai i nanon kabanean te waaki ae ngkai ao ni karawawataki man aki-kororaoira, ti a rotaki buaka ngkanne n te mamaara, te kara, buan raora aika tangiraki, te marakinnano, te bwarannano ngkana ti kaaitara ma aomata aika a aki kan ongora ngkana ti kakorakoraira n tataekina Ana Taeka te Atua, ao a a bati riki. Tai mwaninga are e rangi ni kukurei Tatan bwa e na kakorakorai riki kataaki ake ti kaaitara ma ngai bwa e aonga ni bwara nanora man irakin nanon Ana kaetieti te Atua. (I-Ebeto 6:11-13) Bon tiaki aei te tai ae ti riai ni kabuai iai nanora n umaki!
20 E ataia Iesu bwa ti na rangi ni karawawataki riki ngkana ti kabwarai nanora, ngaia are e kauringira ni kangai: “Kam na kamarurungingkami . . . ba kam aki ata te bong ane E na nako mai iai ami Uea.” (Mataio 24:42) Ti bia teimatoa ni kamarurungira i nanon taai aika ti mena iai ngkai. Ti bia kawakinira man ana bwai ni kamwane Tatan ake a kona ni kawaeremweira ke ni kairira bwa ti na katoka ara mwakuri. Ti bia kananomatoaira bwa ti na tataekina euangkerion Ana Tautaeka n Uea ma te ingaingannano ae korakora riki. Ni koauana, ti bia kateimatoaa nanora n umaki ngkai ti mutiakina ana kauring Iesu ae kangai: “Kamarurungingkami n tantani.” Ni karaoan aei, ti a karekea iai neboakin Iehova ao kaantaningan kakabwaia aika akea tokiia.
Tera Am Kaeka?
• Ti kanga n ataia bwa e kaineti ana kauring Iesu ibukin te ‘kamarurung n tantani’ nakoia Kristian ni koaua?
• Baikara katoto ni kauring i nanon te Baibara, aika a kona ni buokira bwa ti na ‘kamarurungira n tantani’?
• Tera te aua ni motikitaeka, ao tera ae ti kaumakaki bwa ti na karaoia imwain tokina?
[Taamnei n iteraniba 25]
E katitebooa rokona Iesu ma rokon te tia ira
[Taamnei n iteraniba 26]
E a kaan te tai are e nang kamaunaki iai Baburon ae Kakannato
[Taamnei n iteraniba 27]
Ti bia kananomwaakaira n uarongorongo ma te ingaingannano ae korakora riki ao ni kananomatoaira iai