“Kamarurungingkami N Tantani”
“Kam na kamarurungingkami n tantani: ba kam aki ata te bong ane E na nako mai iai ami Uea.”—MATAIO 24:42.
1. Tera aia kaantaninga aomata aika a a tia ni beku iroun Iehova inanon ririki aika mwaiti, ibukin aia beku ma nanoia ni koaua? Taekina te katoto teuana.
A MWAITI aomata aika a maan n toro iroun Iehova ake a reiakinaki taekan te koaua ngke a rorobuaka ke ngke a ateiaine. N ai aron te tia boobwai ae kunea te moomi ae rangi ni kakawaki ao e kaboo nakoi ana bwai ni kabane bwa e aonga ni kabooa te moomi arei, taan reirei n te Baibara akekei a kaakeai bongaia ma ni katabui maiuia nakon Iehova. (Mataio 13:45, 46; Mareko 8:34) Tera aia iango ngkai a a tia n tataninga kakoroan bukin ana kaantaninga te Atua ibukin te aonnaba, tao n te maan ae raka riki nakon ae a kaantaningaia? A bon aki nanokawaki teutana iai! A boraoi nanoia ma nanon Brother A. H. Macmillan, are e taekina ae kangai ngke e a tia ni beku iroun te Atua inanon ririki aika a kaani koro 60: “E a matoatoa riki nanou ngkai bwa N na nanomwaaka n au onimaki. E a karika maiuu bwa e manena. E a tabe naba ni buokai bwa N na kaantaningai taai aika imwaiu n akea te maaku iai.”
2. (a) Tera te reirei ae aitau are e angania taan rimwina Iesu? (b) Baikara titiraki aika ti na rinanoi n te kaongora aei?
2 Tera arom iai? N aki ongea bwa iraua am ririki ni maiu ngkai, iangoi ana taeka Iesu aikai: “Ma ngaia ae kam na kamarurungingkami n tantani: ba kam aki ata te bong ane E na nako mai iai ami Uea.” (Mataio 24:42) Iai te koaua ae rangi n nano ae kaotaki n taeka aika uarereke aikai. Ti aki ataa te bong are e na nako mai te Uea ni karokoa te motikitaeka i aon te waaki ae buakaka ae ngkai, ao ti aki kainnanoa ataakin anne. Ma ti riai ni maeka n te aro ae ti na aki nanokawaki n te bong are e a bon roko iai. N te itera aei, baikara katoto aika ti kunei n te Baibara aika a na buokira bwa ti na kamarurungira n tantani? E a kanga Iesu ni kaota aron kainnanoakin anne? Ao baikara koaua aika ti nori ni boong aikai, aika a kakoaua bwa ti a mena ngkai inanon kabanea ni bongin te aonnaba ae buakaka aei?
Te Reirei ae Reke man te Katoto Teuana
3. A kanga aomata aika mwaiti n taai aikai ni katotonga aroia aomata ake a maiu n ana bong Noa?
3 N itera aika mwaiti, aomata n taai aikai a katotonga aroia mwaane ao aine ake a maiu n ana bong Noa. N te tai arei, e onrake te aonnaba n te tiritiri, ao nanoia aomata a tii tatangira “te buakaka nako naba.” (Karikani Bwaai 6:5) Angiia aomata a tii tabeakina maiuiia ni katoa bong. Ma imwain ae e karokoa te Ieka ae abwabwaki, Iehova e angania aomata aia tai n rairi nanoia. E mwiokoa Noa bwa e na tataekina te rongorongo, ao e ongeaba iai Noa—e beku inanon 40 ke 50 te ririki, ke a bati riki, n “taekina te raoiroi.” (2 Betero 2:5) Ma a aki mutiakina ana rongorongo Noa aomata. A aki tabe n tantani. Mangaia are n tokina, bon tii Noa ma ana utu ake a kamaiuaki ngke e karokoaki ana motikitaeka Iehova.—Mataio 24:37-39.
4. N te aro ra ae ti kona n taekinna bwa e nakoraoi ana mwakuri ni minita Noa, ao e a kanga naba n taekinaki anne ibukin am mwakuri n tataekina te rongorongo?
4 E nako raoi ana mwakuri ni minita Noa? Tai bairea taekan anne ni kaineti ma uarereken mwaitiia aomata ake a butimwaia. N te koaua ni koaua, e kakoroaki raoi bukin bairean tataekinan te rongorongo iroun Noa, e ngae ngke a butimwaia aomata ke a aki. Bukin tera? Ibukina bwa e angania aomata aia tai ae tau ibukin rinean ae a na beku iroun Iehova ke a na aki. Tera aron am tabo ae ko tataekina te rongorongo iai? E ngae ngkana tii teutana te kan ongora irouia aomata iai, ma e rangi n nako raoi am mwakuri. Bukin tera? Ibukina bwa ngkana ko tataekina te rongorongo, ko katanoatai taekan bwaai aika e na karaoi te Atua, ao ko a kakororaoa te mwiokoaki are e angania taan rimwina Iesu.—Mataio 24:14; 28:19, 20.
Aki Mutiakinaia Ana Burabeti te Atua
5. (a) Baikara bwaai aika a riiriki i Iuta n ana bong Abakuka, ao tera aron butimwaean ana rongorongo ni burabeti irouia aomata? (b) Tera aroia kaain Iuta ni kairiribai nakoia ana burabeti Iehova?
5 Tienture tabeua imwin te Ieka, ao te tautaeka n uea ae Iuta e kaitara ma te kangaanga ae korakora. E taabangaki iai taromauriani bouannanti, te ribuaka, karawawataia aomata, ao ai te tiritiri. Iehova e kateirakea te burabeti are Abakuka bwa e na tuangia aomata taekan te kabuanibwai ae e na bwakariia mairouia I-Kareria ke I-Baburon, ngkana a aki rairi nanoia. (Abakuka 1:5-7) Ma a rawa aomata n ongo iai. Tao a iango ni kangai, ‘Bwa tebubua tabun te ririki n nako ao te burabeti are Itaia e taekina naba anne, ma akea te bwai ae e a tia n riki ngkai!’ (Itaia 39:6, 7) A mwaiti bwakuaku n I-Iutaia ake a aki tii mutiakina te rongorongo anne, ma a kairiribai naba nakoia taan ua rongorongo. N te taina, a kataia ni kamatea te burabeti are Ieremia, ao e na koro bukin aia iango anne ngke arona bwa e aki totokoiia Aikam. E manga un n te taeka ni burabeti teuana riki te Uea ae Ieoiakim, ao e tua kamatean te burabeti are Uria.—Ieremia 26:21-24.
6. E a kanga ni kakorakora riki Abakuka Iehova?
6 E bon matoatoa naba ana rongorongo Abakuka n aron anne, ao e ribaaki naba n ai aron ribaakin ana rongorongo Ieremia, are e kairaki iroun te Atua bwa e na taetae ni burabetina kamaroaean Iuta inanon 70 te ririki. (Ieremia 25:8-11) Mangaia are ti ota n aron rawawatan nanon Abakuka ngke e tangitang ni kangai: “Iehova, ai ti maan ra tangu, ao Ko aki kan ongo? I tang nako Im n taekina te tiritiri, ao ane Ko aki kani kamaiua te aba?” (Abakuka 1:2) E akoi Iehova ngke e kaeka Abakuka n taeka aika kakorakora te onimaki aikai: “E boni ngae te Mi-ni-burabeti n tataninga te tai are e na motikaki bukina, ao e boni kekeiaki nakoni kakoroana, ao e na aki matebuaka: e boni ngae ni waeremwe, ao tataningaia naba, ba e na bon tai roko, ao e na aki baenikai.” (Abakuka 2:3) Mangaia are iai ana “tai are e [a] motikaki bukina,” are Iehova e na katoka iai te ribuaka ao karawawatakiia aomata. Ngkana e tara n iremwe, ao e na aki bwara nanon Abakuka iai, ao e na aki karauraua naba. Ma e riai n “tataningaia naba,” ni kaumakiia ni katoa bong. E na bon aki iremwe ana bong Iehova!
7. Bukin tera bwa iai riki te kamaunanakoaki teuana ae katautauaki ibukin Ierutarem n te moan tienture C.E.?
7 Tao 20 te ririki imwin are e taetae Iehova nakon Abakuka, e kamaunaki kautun kaawan Iuta ae Ierutarem. E manga kateaki rimwi riki, ao a mwaiti bwaai aika a kairua ake e tang nanon Abakuka iai aika a manga kaetaki. Ma e a manga katauaki riki te kaawa arei ibukin te kamaunanakoaki, n te moan tienture C.E., ibukina bwa a aki kakaonimaki kaaina. E nanoanga Iehova ao e baireia bwa a na kamaiuaki aomata aika raraoi. Ma n te tai aei e kabongana te burabeti ae kakannato are Iesu Kristo, bwa e na karokoa te rongorongo. E tuangia ana reirei ni kangai Iesu n 33 C.E.: “Ao ngkana kam nora Ierutarem ba e otabaniniaki irouia taanga ni buaka, ao kam na ataia iai ba e a kaan uruana. Ao akana mena i Iutaia ao ke a biri nako ni maunga.”—Ruka 21:20, 21.
8. (a) Tao tera are e a riki nakoia Kristian tabeman ngke e bwaka nako te tai imwin maten Iesu? (b) A kanga ni kakoroaki bukin ana taeka ni burabeti Iesu ibukin Ierutarem?
8 Imwin tabeua te ririki, tao Kristian tabeman ake a mena i Ierutarem a kona n iangoia bwa e na koro n ningai bukin ana taetae ni burabeti Iesu. Bwa iangoi bwaai tabeua ake tabemwaang mai buakoia a taona nanoia nako iai. Tao a taona nanoia nakon waaki ni bitineti aika a korakora te kareke mwane mai iai ibukin nanoia ni kan teimatoa n tantani. A bwara nanoia imwin bwakanakon taai tabeua? A taku bwa a kabane buaka aia tai, ma n iangoia bwa ana taeka Iesu e kaineti nakon te roro teuana n taai aika a na roko, ao tiaki aia roro anne? E moanna ni kakoroaki bukin ana taeka ni burabeti Iesu n 66 C.E., ngke a otabwaninia Ierutarem ana taanga ni buaka Rom. Akana a teimatoa n tantani a nora te kanikina anne, a birinako man te kaawa, ao a kamaiuaki ngke e kamaroaeaki Ierutarem.
Kaotan Aron Riain te Kamarurung n Tantani
9, 10. (a) Ko na kanga ngkoe ni kabwarabwara taekan ana kaikonaki Iesu ibukia tooro ake a kariariaa okin aia uea imwin ana mare? (b) Tao bukin tera bwa e kangaanga kaantaningan rokon aia uea, irouia tooro? (c) Bukin tera ngke a kakabwaiaki tooro ngke a taotaon nanoia?
9 E kamataata riain te kamarurung n tantani Iesu ngke e kabotauiia taan rimwina ma tooro ake a kariariaa okin aia uea imwin ana mare. A ataia bwa e na oki n te tairiki teuana—ma a aki ataa te aoa? Inanon te moan tei n te bong? Te kauoua? Te katenua? A aki ataia. E kangai Iesu: “Ngkana e roko [aia uea] n te kauoua n tei ke n te katenua n tei, n noriia ba ai aroia anne [are a tantani], ao a a kabaia tooro akekei iai”! (Ruka 12:35-38) Iangoa aron ingaingan nanoia tooro akekei ni kariariaa te uea. Taiani karongoaa ake a ongoraei ao nuuia aomata aika a rurubenebene aika a nori, a na kakorakora ingaingan nanoia iai ni kangai: ‘Tao ara uea aei ae roko ngkai?’
10 Tera ngke e a roko te uea inanon te kauoua n tei n te bong are e a nako man te aoa ruaiua n te tairiki ni karokoa te nukanibong? A na bane tooro, n ikotaki naba ma akana a kamarurungia ni mwakuri ma ngke e karangaina, n tauraoi ni butimwaia, ke a na matu tabemwaang? Tera ngke e oki te uea n te katenua n tei n te bong—are man te nukanibong ni karokoa te aoa tenua n te karangaina? A na bwara nanoia tooro tabemwaang ngkai, ma n un naba ngkai e tara n iremwe te uea?a Bon tii aika a kuneaki n tantani n rokon te uea ake a na kakabwaiaki iai. A boni kaineti nakoia taeka aika a koreaki n Taeka N Rabakau Taeka N Rabakau 13:12: “E toki te nano ngkana e a maan kaantaningan ae tangiraki: Ma ngkana e roko ae tangiraki, ao bon te kai ni kamaiu.”
11. E a kanga aron te tataro ni buokira bwa ti na kamarurungira n tantani?
11 Inanon te tai are e na tara n iremwe iai, tera ae na buokia taan rimwin Iesu bwa a na teimatoa n tantani iai? Ngke a mena n te oo-n-aroka ae Ketetemane tii teutana te tai imwain tauakina, Iesu e tuangia ana abotoro ake teniman ae kangai: “Kamarurungingkami ao tataro, ba kam na aki rin n te kaririaki.” (Mataio 26:41) Tabeua te ririki imwin anne, Betero, are e mena irarikin Iesu n te tai arei e manga taekina te reirei ae ai aron anne nakoia raona ni Kristian. E korea ae kangai: “Ma e a kaan tokini bwaai ni bane: ma ngaia ae kam na wanawana, ao kamarurungingkami n tauu baangimi ba kam na tataro.” (1 Betero 4:7) E mataata bwa te kakorakora n tataro e riai n riki bwa anuani maiura ni Kristian. Te koaua bwa ti riai n teimatoa ni butiia Iehova bwa e na buokibra wa ti na marurung n tantani.—I-Rom 12:12; 1 I-Tetaronike 5:17.
12. Tera te kaokoro imarenan katautauan te tai ao te kamarurung n tantani?
12 Taraia bwa e kangai naba Betero: “E a kaan tokini bwaai ni bane.” Ma ai maan ra ni karokoa te tai anne? Akea aia anga aomata ae a kona iai n ataa te bong ke te aoa. (Mataio 24:36) Ma iai te kaokoro imarenan katautauan rokon te tai arei ma ae e aki taekinaki riaina n te Baibara, ao kariariaan rokon te toki are e bon kaungaki karaoana n te Baibara. (Kabotaua ma 2 Timoteo 4:3, 4; Tito 3:9.) Tera te anga teuana ae ti kona iai ni kariariaa rokon te toki? Ngkana ti mutiakin raoi bwaai ni kakoaua aika a kaotia bwa e a kaan te toki ngkai. Mangaia are ti na manga maroroakin bwaai ni kakoaua aika onoua aika a kakoaua bwa ti a mena ngkai inanon kabanea ni bongin te aonnaba ae buakaka aei.
Bwaai ni Kakoaua Aika Onoua
13. E a kanga ana taeka ni burabeti Bauro are e koreaki n 2 Timoteo mwakorona 3, ni kakoaua nakoim bwa ti a mena ngkai inanon “boong aika kaitira”?
13 Te moan, ti bon nora raoi aron kakoroan bukin ana taetae ni burabeti te abotoro Bauro ibukin “boong aika kaitira.” E korea ae kangai Bauro: “Ane a na roko tai aika kamamate ni boong aika kaitira. Ba ane a na riki aomata ba taan tangiriia i bon i rouia, n taani kani manemane, taani kamoamoaia, taani kainikatonga, taan taetaebuaka te Atua, taan aki iri nanoia aia karo, taani bangaomata, taan aki itiaki, taani babakaine, taani kainamatoa, taani winanti, taan aki tauu baangia, taan tiritiri, taan riba te raoiroi, taani kamwanea te aba, taan tautau aroia, taan nanorietata, taan tangira riki te maie nakon te Atua; taani bakan tangira te Atua, ma a kaakea mwaakan tangirana; ko na tan nako mairouia aikai. Ma ane a na riki ni buakaka riki aomata aika buakaka ma taani mamana-te-aba, ni bureburea te aba ma ni burebureaki.” (2 Timoteo 3:1-5, 13) Ti nora aron kakoroan bukin te taetae ni burabeti aei n ara tai aei? Tii aomata aika a kaakeai bongan koaua aika a oti, aika a kona ni kakewea anne!b
14. A kanga n tabe ni kakoroaki bukin ana taeka Te Kaotioti 12:9 ibukin te Riaboro, n taai aikai, ao tera ae e nang riki nakoina?
14 Te kauoua ni bwai, ti nora mwiin karenakoan Tatan ma ana taimonio mai karawa, ae kakoroan bukin ae taekinaki n Te Kaotioti 12:9. Ti wareka ae kangai iai: “Ao e teweaki rio te rakon are korakora, are te naeta nikawai, are arana te Riaboro ao Tatan, are e mamanaiia kaain aonaba ni kabane: e teweaki rio nako aon te aba, ao a teweaki rio naba ana anera ma ngaia.” Karaoan anne e karika te kangaanga ae korakora ibukin te aonnaba. Te koaua bwa a bati aia kangaanga aomata, ao e moamoa riki man 1914 ni karokoa ngkai. Ma te taetae ni burabeti are n Te Kaotioti, e taekinna naba bwa ngke e teweaki rio te Riaboro nako aon te aba, ao e ataia bwa “a kani bane ana bong.” (Te Kaotioti 12:12) Inanon te tai arei, Tatan e buakania taan rimwin Kristo aika kabiraki. (Te Kaotioti 12:17) Ti a tia n nora mwiin ana buaka anne n ara tai aei.c Ma e aki maan, ao e na kainaki Tatan n te kinono, bwa e aonga n “aki mamanaiia riki botanaomata.”—Te Kaotioti 20:1-3.
15. E a kanga Te Kaotioti 17:9-11 ni kakoaua bwa ti a mena ngkai inanon tain te toki?
15 Te katenua ni bwai, ti a mena ngkai inanon tain te kawaniman, ae te kabanea n “uea” ae taekinaki n te taetae ni burabeti ae mena n Te Kaotioti 17:9-11, “NW.” Te abotoro Ioane e taekin uea ake itiman ikai, aika a tei ibukin tautaeka aika mwaaka riki n te aonnaba—aika Aikubita, Aturia, Baburon, Miria ma Botia, Kuriti, Rom, ao te tautaeka ae uoua mwaangana ae Amerika ma Engiran. E noria naba ‘te kawaniman n uea’ ae “nako man ake itiman.” Te kawaniman n uea aei—ae te kabanea are e noraki iroun Ioane—e tei ngkai ibukin te Botaki ni Botannaomata. E taku Ioane bwa te kawaniman n uea aei e “nako n te mate,” ao akea riki ueea i aon te aonnaba ake a taekinaki imwina.d
16. A kanga bwaai ni kakoaua ni kaineti ma kakoroan bukin te boua ae noraki ni miin Nebukaneta, ni kaotia bwa ti a mena ngkai inanon boong aika kaitira?
16 Te kaaua ni bwai, ti a maiu ngkai inanon te tai ae kaikonakaki ni waen te boua are e noraki n ana miitara Nebukaneta. Te burabeti are Taniera e kabwarabwara taekan te mii ae aki ataaki nanona aei are e noraki iai te boua ae abwabwaki ae kaanga ai aron te aomata. (Taniera 2:36-43) Bwain te boua aei aika aua aika a karaoaki man aeka ni biiti tabeua, a tei ibukin tautaeka aika mwaaka riki i aon te aonnaba, ni moa man atuna (ae te Embwaea ni Baburon), ao ni karokoa waena ao taboniwaena (aika tautaeka aika a waaki ngkai). Tautaeka aika mwaaka riki n te aonnaba ni kabane aika a kaikonakaki n te boua arei a a tia ni kaoti ngkai. Ti a maiu ngkai inanon te tai ae kaikonakaki ni waen te boua arei. Akea riki tautaeka tabeua aika a taekinaki bwa a na roko rimwi.e
17. E a kanga tataekinan rongorongon te Tautaeka n Uea iroura, ni kakoaua riki bwa ti a mena ngkai inanon tain te toki?
17 Te kanimaua ni bwai, ti noria ngkai karaoan te mwakuri ae tataekinan te rongorongo ni katobibia te aonnaba, are e taku Iesu bwa e na waakinaki ai tii teutana te tai imwain tokin te waaki i aon te aonnaba ae ngkai. E kangai Iesu: “Ao ane e na tataekinaki euangkerion uean te Atua aei i aonaba ni bane ba te bwai ni kaotioti nakoia botanaomata ni kabaneia; ao ngkanne e na roko naba iai te toki.” (Mataio 24:14) Ni boong aikai, e tabe ni kakoroaki bukin te taetae ni burabeti aei n te aro ae tuai man noraki arona rimoa. Te koaua bwa iai taabo tabeua ake e tuai n tataekinaki te rongorongo iai, ao tao n te tai are e baireia Iehova, e kona n uki iai te mataroa ae abwabwaki ae nakon te mwakuri ae korakora. (1 I-Korinto 16:9) Ma e ngae n anne, te Baibara e aki taekinna bwa Iehova e na tataninga ni karokoa ae aomata n tatabemania nako a a tia n ongora te rongorongo. Ma e na tataekinaki te euangkerio n te mwaiti ae boraoi ma nanon Iehova. Ao ngkanne, e na roko iai te toki.—Kabotaua ma Mataio 10:23.
18. Tera ae na riki ni kaineti ma taani kabiraki tabeman ngkana e moan waakinaki te rawawata are korakora, ao e a kanga ni kakoauaki anne?
18 Te kaonoua ni bwai, e a tabe ni koerikaki ngkai mwaitiia taan rimwin Kristo aika taani kabiraki ni koaua, ao e teretere bwa tabeman a na teimatoa ni maiu i aon te aonnaba ngke e moanaki te rawawata are korakora. Angiia kaain te nikira a boni kara, ao inanon ririki ake a a tia n nako, e a tabe ni koerikaki mwaitiia taani kabiraki ni koaua. Ma e ngae n anne, e kangai Iesu ni kaineti ma te rawawata are korakora: “Ngkana a aki kakimototoaki boong akekei, ao a aki kamaiuaki aomata: ma a boni kakimototoaki boong akekei i bukiia ake a rineaki.” (Mataio 24:21, 22) E teretere ngkanne, bwa tabeman mai buakoia taan “rineaki” iroun Kristo, a na teimatoa ni maiu i aon te aonnaba ngkana e moan waakinaki te rawawata are korakora.f
Tera ae Mena Imwaira?
19, 20. Bukin tera bwa e kakawaki riki n te tai aei, bwa ti na kamarurungira n tantani?
19 Tera ae mena imwaira ngkai? Bon iai taai aika kakamaiu aika a na roko. E reirei Bauro bwa “ana bong te Uea . . . e na roko n ai aron te tia ira ni bong.” E taekinia aomata aika aongkoa a rabakau ni bwain te aonnaba aei ngke e kangai: “Ngkana a kangai, E rau te aba ao e maiu, ao ane e na roko i rouia te mate ae e aki ataki rokona.” Mangaia are Bauro e kaungai nanoia taani wareware irouna ni kangai: “Ma ngaia ae ti na tai matu n ai aroia tabemang; ma ti na kamarurungira, ao ti na tauu baangira.” (1 I-Tetaronike 5:2, 3, 6) Te koaua bwa aomata aika a onimakina aia botaki aomata ibukin karekean te rau ao te mweeraoi, a kaakea te koaua. Aomata aikai a a tia ni mwaninga nako ni matu!
20 E na karina n roko kamaunan te waaki ae ngkai. Mangaia are teimatoa ni kariariaa rokon ana bong Iehova. Te Atua e tuanga Abakuka ni kangai: “E na aki baenikai”! Te koaua bwa moan te kakawaki riki ngkai bwa ti na kamarurungira n tantani.
[Kabwarabwara ae nano]
a Akea ana boo n taeka te uea ma ana toro. Mangaia are e aki riai ni kabwarabwara taekan otinakona ao manga rokona nakoia ake a toro irouna, ao e aki riai naba ni kabwarabwara bwa bukin tera ngkai e taraa n iremwe rokona, nakoia.
b Ibukin te kabwarabwara ae tabwanin raoi i aon te taetae ni burabeti aei, ao nora te mwakoro 11 n te boki ae te Knowledge That Leads to Everlasting Life, are e boreetiaki iroun te Watchtower Bible and Tract Society of New York, Inc.
c Ibukin te rongorongo ae tabwanin riki, nori iteraniba 180-6 n te boki ae Revelation—Its Grand Climax At Hand!, are e boreetiaki iroun te Watchtower Bible and Tract Society of New York, Inc.
d Nora te boki ae Revelation—Its Grand Climax At Hand!, iteraniba 251-4.
e Nora te mwakoro 4 n te boki ae Pay Attention to Daniel’s Prophecy!, are e boreetiaki iroun te Watchtower Bible and Tract Society of New York, Inc.
f N te taetae ni kaikonaki ae taekaia tiibu ma kooti, e a roko Natin te Aomata ma mimitongina n tain te rawawata are korakora, ao e tekateka ni motiki taekaia aomata. E motika taekaia aomata ni baireia bwa a buokia tarin Kristo aika kabiraki, ke a aki. Kaanga akea nanon te kaetieti ibukin te motiki taeka aei ngkana a kaman tia ni kitana te aonnaba tarin Kristo ni kabane, n tain te motikitaeka.—Mataio 25:31-46.
Ko Uringnga?
• Baikara katoto man te Baibara aika a kona ni buokira bwa ti na kamarurungira n tantani?
• E a kanga Iesu ni kaotiota aron riain te kamarurung n tantani?
• Baikara bwaai ni kakoaua aika onoua aika a kaotia bwa ti a mena ngkai inanon boong aika kaitira?
[Taamnei n iteraniba 17]
E a kaani koro onobwi ana ririki A. H. Macmillan ni kakaonimaki ni beku iroun Iehova
[Taamnei n iteraniba 18]
Iesu e kabotauia taan rimwina, ma tooro ake a kamarurungiia n tantani