Titiraki Mairouia Taani Wareware
Tera ae e nanonna Iesu ngke e kangai nakon Nikotemo: “Akea te aomata ae rierake nako karawa, ma bon ti Teuae ruo mai karawa, ae Natin te aomata”?—Ioane 3:13.
E tuai n rierake ke n okira karawa Iesu, bwa e boni mena n te aonnaba. Ma rongorongon Iesu ake ti atai ao baika a riki ngke e taekina anne, a na buokira n ota n ana reirei aei.
Ma e “ruo mai karawa” Iesu n te aro are e a kamani mena i rarikin tamana bwa te taamnei. Ma n te tai ae baireaki ibukina, e a kamwaingaki maiun te Nati aei nakon biroton Nei Maria, ike e a bungiaki iai bwa te aomata. (Ruka 1:30-35; I-Karatia 4:4; Ebera 2:9, 14, 17) E na kautaki Iesu nakon te rabwata n taamnei imwin matena, ike e na manga oki ni maiu i rarikin Iehova. Ibukin anne, e tataro ni kangai Iesu teutana te tai imwain kamateana: “Ko na neboai ngkai, Tamau, ma Ngkoe n te neboaki are neboakiu ma Ngkoe ngke akea aonaba.”—Ioane 17:5; I-Rom 6:4, 9; Ebera 9:24; 1 Betero 3:18.
E tuai n okira karawa Iesu ngke e taetae ma te Baritaio ao te tia reireia I-Iteraera ae Nikotemo. Ao akea te aomata temanna ae e a tia ni mate ma ni kautaki bwa te taamnei nako karawa. E taekina Ioane te tia Bwabetito Iesu bwa ai aron te burabeti iroun te Atua ae akea n ai arona, ‘ma ake a moani mangori n uean te Atua, a kakannato riki nakoina.’ (Mataio 11:11) E kabwarabwaraa te abotoro Betero bwa e mena i nanon ruanimatena Tawita are te Uea; e bon aki nako karawa e ngae ngke e kakaonimaki. (Mwakuri 2:29, 34) Bon iai bukin aki-nakoia nako karawa te koraki ake a mate imwain Iesu n aron Tawita, Ioane te tia Bwabetito, ao aomata tabemwaang aika kakaonimaki. A mate imwain Iesu are ngaia are e na kauka te kawai ike a na kona ni kautaki iai aomata nakon te maiu i karawa. E korea ae kangai te abotoro Bauro, Iesu ai aron te tia rimoaia “ni kauka . . . te kawai ae e bou ae e maiu,” nako karawa.—Ebera 6:19, 20; 9:24; 10:19, 20, BK.
Kioina ngke e tuai ni mate ma ni kautaki Iesu, tera ae e nanonna ngke e kangai nakon Nikotemo: “Akea te aomata ae rierake nako karawa, ma bon ti Teuae ruo mai karawa, ae Natin te aomata”? (Ioane 3:13) Iangoa te rongorongo are a maroroakinna Iesu ma Nikotemo.
Ngke e roko te I-Iutaia are te mataniwi iroun Iesu e bong, ao e taku Iesu nakoina: “E boni koaua ae I a tuangko ba ngkana e aki manga bungiaki te aomata, ao e aki kona n nora uean te Atua.” (Ioane 3:3) E kaeka n taku Nikotemo, ‘E na kanga n riki anne? E na kanga ni manga bungiaki kaua te aomata?’ E aki ota n te reirei mairoun te Atua ae taekan rinia aomata n ana Tautaeka n Uea te Atua. Iai ana anga are e kona ni karekea kamatataana iai ke akea? Akea temanna ae kona ni kamataataa rongorongon te rin n te Tautaeka n Uea, ibukina bwa akea ae e a tia n roko i karawa, ma bon tii Iesu ae kona. E kona n reiakina Nikotemo ao tabemwaang riki, kioina ngkai e ruo mai karawa ao tii ngaia ae kona ni kamataataia aomata taekan baikai.
E kaotaki kakawakin te ukeuke n reirei n Ana Taeka te Atua, n te titiraki ae ueke man te kibu aei. E aki riai bwa ti na nanokokoraki n te kibu teuana, ibukina bwa e kangaanga te ota iai. Te bwai are e taekinna te Baibara n te kibu teuana, e riai ni manga iangoaki n ikotaki ma kibuna riki tabeua aika a irekereke ma ngaia, ao e riai ni boraoi nanona ma te rongorongo ae tabwanin iai. Irarikin anne, ataakin baika riki ke baika a tabe ni maroroakinaki iai, e kona ni buokira bwa ti na mataata i aon te kibu teuana ae aki kai ota.