“Akea te Aomata ae e a Tia n taetae n Aron Teuaei”

E bon tiku naba Iesu i Ierutarem ibukin te Toa ae Umwanrianna. E kukurei bwa “a boni bati naba aomata mai buakon te koraki, ake a a onimakinna.” Ma a aki kukurei iai mataniwin te Aro. A kanakoia bureitimanin te tembora ake a riki bwa bureitiman n te Aro bwa a na katikia. (Ioane 7:31, 32) Ma e bon aki karabaa Iesu mairouia.

Ma e teimatoa n angareirei i mataia aomata i Ierutarem ao e taku: “N na tiku riki i rarikimi teutana, imwain ae I nakon Teuare kanakomaiai. Ane kam na ukoukorai, ma N na aki reke iroumi, ao ike I mena iai, kam aki kona n roko iai.” (Ioane 7:33, 34) A aki ota I-Iutaia ngaia are a taetae i bon irouia ni kangai: “E na nakea te aomata aei, ngkai e nang aki kona n reke iroura? Tiaki e na nako ni kawariia I-Iutaia ake a kamaenakoaki ngkoa i buakoia I-Kuriiti, ma n reireinia kaaini Kuriiti? Tera ae e nanonna ngke e kangai, ‘Ane kam na ukoukorai, ma N na aki reke iroumi, ao ike I mena iai, kam aki kona n roko iai’?” (Ioane 7:35, 36) Ma e taekina matena ao mangautina Iesu nako karawa, ao a aki kona taani kairiribai nakoina n iria nako iai.

E a roko ngkai te kaitiua ni bong ni bongin te toa. Ni katoa ingabongin te toa, ao te ibonga e kabwaroa te ran are e itia man te Nei ae Tiroam, bwa e aonga ni bwaro nako oini baonikarean te tembora. E bae Iesu ni kaira aia iango aomata n te bwai ae kakaraoaki aei ngaia are e a takarua ni kangai: “Ane e taka ao ke e nakoiu bwa e na moi. Ao ane e onimakinai ao n aron are e taku te koroboki ae tabu: ‘A na raanganako karaanga n ran ni kamaiu mai nanona.’ ”​—Ioane 7:37, 38.

E taetae Iesu ibukini baika a na riki ngkana a kabiraki n te taamnei ae raoiroi taan rimwina ao n rineaki nakon te maiu i karawa. A kabiraki te koraki aikai imwini maten Iesu. N te ririki are imwina ni moani bongini Bentekota, ao e a raanganako karaangan te ran ni kamaiu ngke a a tibwaanako te koaua nakoia aomata taan rimwina aika kabiraki.

Ni kaekaan ana reirei Iesu, a taku tabeman: “Bon te koaua bwa te Burabeti teuaei are e a kaman taekinaki.” A taku tabemwaang: “Bon te Kristo teuaei.” Ma a kauntaeka ake tabeman riki ni kangai: “E kona naba ni kaoti te Kristo mai Kariraia? Tiaki e taku te koroboki ae tabu bwa e na nako te Kristo man te kanoa are Tawita, ao mai Betereem are te kaawa are e mena iai ngkoa Tawita?”​—Ioane 7:40-​42.

Mangaia are e a bwenaua te koraki. E ngae ngke a tangiria tabeman bwa e na katikaki Iesu, ma akea ae e katokaa baina i aona. N okia bureitimanin te tembora nakoia mataniwi n te Aro n akea Iesu, a a titiraki mataniwi n ibonga ma Baritaio ni kangai: “E aera ngkai kam aki katikiamai?” A kaeka ni kangai: “Akea te aomata ae e a tia n taetae n aron teuaei.” A rangi n un mataniwin te Aro ao a kabuakaka ma ni kakaniko ni kangai: “Ngkami naba kam a burebureaki irouna? Tiaki te koaua bwa bon akea temanna ae onimakinna i buakoia taani kairiri ma Baritaio? Ma a a boni maraia te koraki aei aika aki ataa te Tua.”​—Ioane 7:45-​49.

N te tai aei e a ninikoria n taetae ibukin Iesu Nikotemo ae te Baritaio ao kaain te Tanirim. Uoua ma te iterana tabun te ririki n nako, ao Nikotemo e kawara Iesu n te bong ao ni kaotiota onimakinana. E a taku ngkai Nikotemo: “Tiaki te koaua bwa e aki kariaiakaki n ara Tua bwa e na motikaki taekan te aomata, ni karokoa ae e a tia n ongora te aba irouna ao n ataaki te bwai ae e karaoia?” Tera aia kaeka ni kamanoia? A kaeka ni kangai: “Ngkoe naba te I-Kariraia? Ukeuke ao ko na noria bwa bon akea te burabeti ae e na kaoti mai Kariraia.”​—Ioane 7:51, 52.

E aki taekinaki raoi n te Baibara bwa e na roko te burabeti mai Kariraia. Ma e taekinaki n ana Taeka te Atua ibukin te Kristo bwa e na kaoti mai ikanne; e taekinaki bwa e na noraki “te oota ae abwabwaki” i “Kariraia are abaia ianena.” (Itaia 9:1, 2; Mataio 4:13-​17) Irarikin anne, ao n aron are e a kaman taekinaki, e bungiaki Iesu i Betereem ao boni kanoan Tawita. E ngae ngke a ataa aei Baritaio, ma tao boni ngaiia aika kabutaanako te kewe ae bati nakoia aomata ibukin Iesu.