Maaka Iehova Ao Kakukureiko!

“E a kabaia te aomata ae maaka Iehova.”​—TAIAN ARERU 112:1.

1, 2. Tera ae ti kona ni karekea ni maakan Iehova?

E AKI bebete karekean te kukurei. E boto te kukurei ni koaua i aoni karaoan motinnano aika eti, karaoan ae riai ao kararoaan aaro aika bure. E a tia ara tia Karikiriki ae Iehova n anganira ana Taeka ae te Baibara, ibukin reireiara ao ibukin naba karekean te maiu ae te kabanea n tamaroa. Man ukoukoran ao touan mwin ana kairiri Iehova ti a kona iai ni kaotiota maakana, ao namakinan te raunnano ni koaua ao te kukurei.​—Taian Areru 23:1; Taeka N Rabakau 14:26.

² Ti na maroroakini katoto man te Baibara ao katoto ni boong aikai n te kaongora aei, aika e kaotaki iai aron maakan te Atua ni kakorakoraia aomata n totokoi kataakia ake a kairiia nakoni karaoan te bure, ao n ninikoria naba ni karaoan ae eti. Ti na noria naba bwa e kona ni karekea kukureira maakan te Atua rinanon kairakira ni kaetii aroarora aika bure, n aron are e karaoia te Uea are Tawita. Ti noria bwa maakan Iehova bon rikiara ae kakawaki are a konaa kaaro n angania natiia. E karau nanora Ana Taeka te Atua ni kangai: “E a kabaia te aomata ae maaka Iehova.”​—Taian Areru 112:1.

Karekean te Kakukurei Are E Bua

3. Tera are e buoka Tawita bwa e na manga oki marurungina man ana bure?

³ E taekinaki n te kaongora are i mwain aei, bwa tentai ana tai Tawita aika tanoata ike e a kabwaka iai ni kaota maakan te Atua, ao e a karaoa ae bure iai. Ma e kaotaki man arona ni butimwaea boaakina iroun Iehova bwa e boni mamaakua. E kairaki man karinean te Atua bwa e na kaotia ae bon te tia bure ngaia, e a kaeta aroaroni maiuna ao e a manga moana ana iraorao ae raoiroi ma Iehova. E ngae ngke a taonaki tabeman ao ngaia naba n te karawawataki are e riki imwin ana bure, ma raraomana ni koaua, e a reke iai akoana iroun Iehova ao e a manga teimatoa ni boutokaia ao ni kakabwaiaa. Ni koauana, a kona ni kaungaaki Kristian ni boong aikai ake a a tia ni karaoa te bure ae kakaiaki, n ana katoto Tawita.

4. E kanga maakan te Atua ni buoka te aomata bwa e na manga oki kukureira?

⁴ Iangoa rongorongon Sonja.a E ngae ngke te tia uarongorongo ae kabwanina ana tai neiei, ma e a manga irekereke ma aomata aika kaakaraoi mwakuri aika bubuaka, ao e a karaoa ae aki riai ni kaineti ma te aroaro ni Kristian ike e a kabaneaki iai man te ekaretia. Ngke e a oki ana iango Sonja, e a karaoi bwaai ni kabane aika riai ibukin kaetan ana iraorao ma Iehova. Imwin tabeua te tai, e a manga kaokaki neiei nakon te ekaretia. Ibukin rikin aei nakon neiei, e a aki manga kona ni katoka ingaingan nanona ni beku ibukin Iehova. Rimwi riki, e a manga karaoa te mwakuri ni bwaiania ike e a kabwanina ana tai iai. Imwina, e a mare ma te aomata ae moan te tamaroa aroarona ae te unimwaane n te ekaretia, ike a a uaia ni mwakuri ma te kukurei n te ekaretia. E ngae ngke e uringaaba Sonja ibukin betinakona man kawaia Kristian n te tai ae kimototo, ma e a kukurei bwa e a tia ni manga oki ana iango ibukini maakan te Atua.

Kariaia Karawawatam Nakon ae Ko na Bure

5, 6. Kabwarabwaraa bwa e kanga ao bukin tera ngke e kauouaa kamaiuan Tauro Tawita.

⁵ E raoiroi riki buokan temanna ni kararoaa te bure n te moan tai ibukin maakan te Atua. E noraki koauan aei ni maiun Tawita. N te taina, ao e kaaea Tawita Tauro ma ana taanga aika teninga, ike e a rin iai Tauro n te banganimatang are a a kaman karabaia iai Tawita ma ana aomata. A kaumaka Tawita ana aomata bwa e na tiringa Tauro, bwa n aia iango ao e a anganaki ngkai Tawita ana kairiribai iroun Iehova. E waerikiriki Tawita ni kawakawa nakon Tauro ao e korea buruburun ninirana. E ngae ngke e aki kammaraki te mwakuri are e karaoia Tawita, ma ibukina bwa e mamaaka te Atua, e bon rawawata mataniwin nanona iai. E kamaenakoia ana aomata ake a kiriwe nanoia Tawita ao e taku: “E na tukai Iehova ba N na aki karaoa te baei nakon au uea, ae ana kabiraki Iehova.”b​—1 Tamuera 24:​1-7.

⁶ N te taina rimwi riki, ao a katei umwaia ni buaka Tauro ma ana aomata, kioina ngke e a bong ao a “a bane ni matu; ba kioina ngke e bwakariia te kiro mairoun Iehova.” Ao a nako nukan te tabo arei Tawita ma ai natina te mwaane ae Abitiai ae ninikoria, ao a tei i aon Tauro are e matu. E kan tiringa Tauro n te tai naba arei Abitiai, ma e tukia Tawita man karaoan aei ao e titirakinna: “Antai ae kona n arora baina n eka nako ana kabiraki Iehova n aki bure iai?”​—1 Tamuera 26:9, 12.

7. Tera are e tuuka Tawita man karaoan te bure?

⁷ Bukin tera ngke e aki orea Tauro Tawita n taai ake uoua ake a angaraoi nakoina? Ibukina bwa e korakora riki maakan Iehova irouna nakoni maakan Tauro. Ibukin korakoran maakan te Atua iroun Tawita, e kukurei riki ni bwainikirinaki n ae riai nakon are e na bure iai. (Ebera 11:25) E onimakina raoi ana kakawakin Iehova nakoia Ana aomata ao nakoina naba. E ataia Tawita bwa a na reke kukureina ao kakabwaiana aika bati man te ongeaba ao onimakinan te Atua, ma ngkana e kakeaa bongan te Atua ao e na kabuaa iai akoana. (Taian Areru 65:4) E ataia naba bwa e na boni kakoroi bukin Ana berita te Atua are e na boni kaueaa ao e na kamwawaa Tauro n Ana tai are e a tia ni baireia ao n aron are e tangiria.​—1 Tamuera 26:10.

E Karekea te Kakukurei Maakan te Atua

8. E na kanga n riki bwa te katoto aroaron Tawita ni kaaitarai kangaanga?

⁸ Ngkai Kristian ngaira, ti ataia bwa ti na boni kakanikoaki, bwainikirinaki, ao ni kaaitarai kataaki riki tabeua. (Mataio 24:9; 2 Betero 3:3) N taai tabetai, ti kona naba ni kaaitara ma kangaanga mairouia raora n taromauri. Ma e ngae n anne, ti ataia bwa e nori bwaai ni kabane Iehova, e ongoraei ara tataro, ao n te tai ae riai e na kaetii aaro nako ni kaineti ma nanona. (I-Rom 12:17-​21; Ebera 4:16) Mangaia are, n onean mwin are ti na maakuia taani kaaitaraira, ti karinea te Atua ao ti kaantaningaa kamaiuara mairouna. N aron Tawita, ti na aki irantangaira ao ti na aki naba kakeai bongan booto-n-reirei aika raoiroi tii ibukin rawara ni karawawataki. Ao n tokina, ti na boni kukurei. Ao n te aro raa?

9. Anga te katoto bwa e na kanga maakan te Atua ni karekea te kukurei i buakon te bwainikirinaki.

⁹ E taku temanna te mwaane ae e a tia ni mitinare i nanon te tai ae maan i Aberika: “I tabe n iangoa temanna te tina ma natina ae te roro-n-rikirake ae te ataeinnaine ake a rawa ni kabooi aia beeba ae kaota onimakinan te botaki n tautaeka teuana ibukin aroia Kristian n tei i nuka. A batiboaki naakai n te aro n iowawa irouia te koraki ni mwaane ao imwina a a tuangaki bwa a na okiri mwengaia. I aoni kawaia n oki, ao e a kataia te tina aei ni kabebetea nanon natina, are e rangi ni mimi n rikin aei nakoia. A aki kukurei n te tai anne, ma a itiaki mataniwin nanoia. Imwina, a a rangi ni kukurei ibukina bwa a a tia n ongeaba iroun te Atua. Ngke arona bwa a kabooi aia beeba, a na rangi ni kimwareirei te koraki arei. Tao a na bae mwaane akekei n angania nimaia aika karewerewe ao ni mwamwaie ni katomimia ni karokoa rokoia ni mwengaia. Ma e ataia te ataeinnaine ao te tina arei bwa ngke arona bwa a kakeaa aia koaua ma ni kabooi aia beeba, ao a a tia n riki ngkai bwa aomata aika kabanea n aki-kukurei n te aonnaba.” A kamanoaki man te karawawataki ibukin maakan te Atua.

10, 11. Baikara uaa aika raoiroi ake a reke ibukin maakan te Atua iroun temanna te aine?

¹⁰ E karekea naba te kakukurei kaotiotan maakan te Atua, n taai ake ti kaaitara iai ma te kataaki ae irekereke ma karinean tabun te maiu. Ngke e a bikoukoua ana kateniman nati Mary, ao e a kaumakia te taokita bwa e na kabwakaa natina. E taku: “E a ruanikai marurungim, ao e kona n rikirake ni kakaiaki aorakim n te tai teuana ao ko kona ni mate i nanon 24 te aoa ma ngkai. Imwina e na boni mate naba natim. E ngae ngke tera ae kataaki ni karaoaki, ma akea koauana bwa e na maiuraoi natim anne.” E a bon tia Mary n reirei n te Baibara ma Ana Tia Kakoaua Iehova ma e tuai n bwabetitoaki. “Ma e ngae n anne,” ao e taku Mary, “I a tia ni motinnanoia bwa N na toro iroun Iehova, ao I kananomatoai bwa N na teimatoa n ongeaba irouna, n aki ongeia bwa tao tera ae e na riki nakoiu.”​—Te Otinako 21:22, 23.

¹¹ E teimatoa ni katabetabea n reiakinan te Baibara ao ni kawakinan ana utu Mary, i nanon ana tai ni bikoukou. N taina ae riai, ao e a bungiaki te merimeri. E taku Mary: “E a kangaanga riki bungiu aei nakon ake uoua ake mai imwaina, ma akea te kangaanga ae kakaiaki imwini bungiu.” E buokaki neiei bwa e na kateimatoaa itiakin mataniwin nanona ni maakan te Atua ao e a bwabetitoaki n te tai ae waekoa. Ngke e a ikawai rake te ataei aei, e reiakina naba maakan Iehova, ao ngkai e a mwakuri ni mwaangan te aobiti n tararua ibukia Ana Tia Kakoaua Iehova.

‘Kakorakorako Iroun Iehova’

12. E kanga ni kakorakoraki Tawita ni maakan te Atua?

¹² A bati riki baika riki nakon Tawita ibukin maakan Iehova irouna, nakon ae tii kararoana man te bure. E kakorakoraaki bwa e na karaoa ae riai ao ni wanawana n iango i aan aaro aika kangaanga. E nako naba ni kamanoa ma ana aomata mairoun Tauro i Tikeraka i abaia I-Biritia, i nanon teuana te ririki ao aua namwakaina. (1 Tamuera 27:5-7) N te taina, ngke a kitana aia tabo mwaane aikai, ao a roko tibun Amareka ni kabueka te kaawa anne ao a uotiia nako buia mwaane ni kabane, natiia ao aia nanai. A tang Tawita ma ana aomata n okiia ibukin te baere e riki. N te tai ae waekoa, ao e a tii bitaki naba te nanokawaki nakon te un, bwa a a kani karebana Tawita ana aomata. E ngae ngke e rawawata iai Tawita, ma e bon aki roko naba n te bwara nanona. (Taeka N Rabakau 24:10) Ibukini maakan te Atua irouna, e a kairaki bwa e na butiia buokana, ike e “kakorakora Tawita iroun Iehova.” Man ana ibuobuoki te Atua, ao a tokanikai Tawita ma ana aomata i aoia tibun Amareka ao a a manga kaoki aia bwai ni kabane.​—1 Tamuera 30:1-​20.

13, 14. E kanga maakan te Atua ni buoka temanna te Kristian bwa e na karaoi ana motinnano aika eti?

¹³ A kaaitara naba ana toro te Atua ni boong aikai ma aaro aika kainnanoa onimakinan Iehova ao te ninikoria ni karaoan ae riai. Iangoa te katoto ae taekan Nei Kristina. Ngke te roro-n-rikirake neiei, ao e reirei n te Baibara ma Ana Tia Kakoaua Iehova. Ma e kan riki neiei bwa te tia katangi piano n te kaotioti, ao e korakora rikirakena ni karokoa e a rangi ni mwaatai iai. Irarikin anne, e raraoma neiei ibukin iran te uarongorongo ao e a maakui mwioko ake a irekereke ma te bwabetito. I nanon waakinakon ana reirei Kristina, e a moanna n namakina mwaakan Ana Taeka te Atua. E a reiakina maakan Iehova, ike e a ataia iai ae e kaantaningaiia ana toro Iehova bwa a na tangiria ma nanoia ni kabane, aia iango, taamneia ao korakoraia. (Mareko 12:30) E a anaaki nanona man aei bwa e nang katabua maiuna nakon Iehova ao ni bwabetitoaki naba.

¹⁴ E butiia Iehova Kristina bwa e na buokia ni karikirakea ana onimaki. E taku Kristina: “I ataia bwa te maiu ae te tia katangi piano n te kaotioti, e irekereke ma te mwamwananga n taai nako ao te kabaeaki n iri kaotioti aika e raka nakon 400 mwaitiia i nanon teuana te ririki. Mangaia are, n onean mwin aei, I a motinnanoia bwa N na mwakuri bwa te tia reirei, ibukin buokan baika I kainnanoi ibukin maiu ao n riki naba bwa te tia tataekina te rongorongo ae I kabwanina au tai iai.” N te tai anne, ao e a kaman tia ni karaoaki te kaetieti ibukin Kristina bwa e na anga ana moani kamataku i matan te botannaomata n te mwaneaba ni kaotioti ae rangi n tanoata taekana i abana. E taku neiei: “E riki au moan tai ni kamataku bwa au moan ao au kaitira ni kamataku.” E a tia ngkai ni mare Kristina ma te unimwaane n te ekaretia, ao a a uaia ngkai ni beku ni mwaangan te aobiti n tararua ibukia Ana Tia Kakoaua Iehova. E kukurei neiei bwa e a tia Iehova, n anganna te korakora ni karaoi ana motinnano aika eti, n te aro are e a kona ngkai ni kabongana ana tai ao korakorana ni beku ibukina.

Rikiara ae Moan te Kakawaki

15. Tera are e kan angania natina Tawita, ao tera arona ni karaoia?

¹⁵ E korea ae kangai Tawita: “Nakomai, ngkami natiu, ongora irou. N na reireingkami maakakini Iawe.” (Taian Areru 34:11, BK) Ngkai te karo Tawita, e korakora nanona ni kan angania natina rikiaia ae moan te kakawaki, are maakan Iehova ma nanoia ni koaua ao n te aro ae riai. N ana mwakuri ao n ana taeka Tawita, e kaotia iai bwa Iehova bon tiaki te Atua ae tuamatoa ma ni kakamaaku ae ingainga ni kani katuuaeia taani bure aika urua ana tua teutana. Ma e kaotiota Iehova bwa teuare tatangira, e mwamwannano ao te Tama ae tauraoi ni kabwarai aia bure natina ake i aon te aba. E tabeka te titiraki Tawita ae kaota onimakinan ae e aki neneri ara bure n taai nako Iehova: “Antai ae kona n tauu mwin buure?” ao e manga reitia ni kangai: “Ko na kaitiakai man buure aika raba.” Ni kaitaraan aei, e kakoauaa raoi Tawita bwa a na butimwaeaki ana taeka ao ana iango iroun Iehova, ngkana e kakorakoraa ni karaoa ana kabanea n raoiroi.​—Taian Areru 19:12, 14, Byington.

16, 17. A na kanga kaaro ni kona n reireinia natiia maakan Iehova?

¹⁶ E riki Tawita bwa te katoto ibukia kaaro ni boong aikai. E taku Ralph ae uaia ni mwakuri ma tarina ni mwaangan te aobiti n tararua ibukia Ana Tia Kakoaua Iehova: “I kaikawaki ma tariu irouia ara karo n te aro are ti a rangi ni kukurei i nanon te koaua. Ngke ti uarereke, a kairira n aia maroro ibukin aia mwakuri n te ekaretia, ike e a rikirake iai ingaingannanora ibukin te koaua, n ai aroia naba. A kaikawaira n te aro are ti a kakoauaa iai bwa ti kona ni karaoi mwakuri aika ti na kakabwaiaki iai n te beku ibukin Iehova. Ti maeka ma ara utu n te aba ae korakora iai kainnanoaia taan uarongorongoa te Tautaeka n Uea i nanon ririki tabeua, ao ti ibuobuoki naba ni katean ekaretia aika boou.

¹⁷ “Te bwai ae kateimatoaira ni kaakaraoa te raoiroi, bon tiaki tuua aika aki kona ni bitaki aika mwaiti, ma bon te koaua ae i nanoia ara karo, are bon te aomata ni koaua Iehova ae rangi n akoi ao n raoiroi. A ukoukora karakaan riki aia atatai ibukin Iehova ao ni kakukureia naba, ao e reke reireiara man aroia ni maaka te Atua ao n tangiria. E ngae naba ngkana ti karaoa ae bure, ma a aki anganira te namakin ae e a aikoa tangirira Iehova; a aki naba tuukira man aaro tabeua. N angiin te tai, a tekateka ma ngaira ao a tii kataetaeira ibukin ara bure. N tabetai, e kataetaeira Maama ma matana aika ranran ibukin nanona ae kakorakora ni kan riing nanora. E uaana aroia aei. Ti ataia rinanon aia taeka ao aia mwakuri ara karo, bwa maakan Iehova bon te aroaro ae moani baan te tamaroa, ao te riki bwa Ana Tia Kakoaua e karekea te kimwareirei ao te kakatonga n akea karawawatara.”​—1 Ioane 5:3.

18. Tera ae na reke iroura ngkana ti maaka te Atua ni koaua?

¹⁸ Ti wareka ae kangai mai buakon “ana kabanea n taeka Tawita”: “Ngkana iai ae e kairiia aomata ma te eti ba e maka te Atua, ao e katotonga otan otin taai.” (2 Tamuera 23:1, 3, 4, BK) E oti bwa e ataa kakawakin aei Natin Tawita ae Toromon are te tia ruamwina, n ana bubutii nakon Iehova bwa e na anganna “te nano ae ataibwai” ao te konabwai n “ata ae raoiroi ma ae buakaka.” (1 Uea 3:9) E ataia naba Toromon bwa e karekea te wanawana ao te kukurei maakan Iehova. Imwina, e kakimototoa kabwarabwaran te boki ae Te Minita ma taeka aikai: “Aio kabaneani baikai; e a tia n ongo te aba baikai ni kabane: maka te Atua, ao tou mwin ana tua; ba bon anne kabanean te aro ae riai irouia aomata. Ba E na uoti makuri ni kabane te Atua nako nanon te kaeti-taeka, ma bwaai aika raba ni kabane, ba tao a raraoi ke tao a bubuaka.” (Te Minita 12:13, 14) Ngkana ti mutiakina te reirei anne, ti na kona ni kunea iai ae “boon te nanorinano ma makan Iehova” bon tiaki tii te wanawana ao te kukurei, ma bon te “kaubwai, ma te karineaki, ma te maiu.”​—Taeka N Rabakau 22:4.

19. Tera ae e kona ni kaotaira ibukini “makan Iehova”?

¹⁹ Ti noria man katoto aika n te Baibara ao katoto ibukin baika riiriki ni boong aikai, bwa e rangi ni kakawaki maakan te Atua ibukini kanakoraoan maiuia ana toro Iehova. E aki tii kararoaira te maaku anne man karaoan ae aki-kukurei iai Tamara i karawa, ma e kaninikoriaira ni kaaitaraia ara kairiribai ao ni kakorakoraira naba bwa ti na nanomwaaka i aani kataaki ao kangaanga aika ti kaaitara ma ngaai. Mangaia are, ti bia reiakina Ana Taeka te Atua ma nanora ni koaua ngaira aika ataei ao kaara, ni kananoi ara iango iai, ao ni kaanira riki ma Iehova rinanon ara tataro ma nanora ni koaua n taai nako. Ngkana ti kaakaraoa aei, ti na aki tii kunea iai “atakin te Atua” ma ti na ataa naba “makan Iehova.”​—Taeka N Rabakau 2:1-5.

[Kabwarabwara ae nano]

Ko Kona ni Kabwarabwaraa?

E na kanga maakan te Atua ni kona

• ni buoka te aomata n tokanikai man ana bure ae kakaiaki?

• ni karekea te kakukurei i aan kataaki ao te bwainikirinaki?

• ni kakorakoraira ni karaoa nanon te Atua?

• n riki bwa rikiara ae kakawaki ibukia natira?

[Taamnei n iteraniba 29]

Maakan te Atua bon rikiaia naati ae a riai n anganaki irouia aia karo