“Reireiai Ni Ira Nanom”

“Reireiai ni ira nanom, ba Atuau Ngkoe.”​—⁠TAIAN ARERU 143:​10, BK.

BAIKA KAKAWAKI AIKA RIAI N URURINGAKI

Tera ae karaoia Tawita ni kaotia iai bwa e iangoi baika a riki nakoina n aron iangoaia iroun Iehova?

Tera ae buoka Tawita bwa e na ataa nanon te Atua?

Tera ae na buokira ni kateimatoa akoara iroun Iehova?

1, 2. Ti na kanga ni kakabwaiaaki n iaiangoan nanon te Atua, ao tera reireiara mairoun te Uea are Tawita ni kaineti ma aei?

KO KAKAMANENA te mwabe n te kaombiuta are ko kona n nora iai te tabo are ko uaiakinna n am tai ni mwananga? Ko kona ni buokaki iai bwa ko na ataa te kawai ae rangi n nakoraoi are ko na toua. N aron naba anne, ti kona ni buokaki ni karaoi motinnano aika kakawaki. N taraani bwaai n aron ana taratara ae rietata te tia Karikiriki ae Iehova, ti a buokaki iai n ‘nakonako i nanon te kawai’ ae e na kukurei iai.​—⁠Itaia 30:​21, BG.

² E katea te banna ni katoto ae rianako ae kakaraoan nanon te Atua, Uean I-Iteraera ngkoa are Tawita n angiini maiuna. Ti na rinanoi bwaai tabeua ake a riki ni maiun Tawita, ao n iangoi reireiara man aroarona are e noraki bwa a eti nanona ni kabane nakon Iehova ae te Atua.​—⁠1 Uea 11:⁠4.

E KARINEA ARAN IEHOVA TAWITA

3, 4. (a) Tera are e kaira Tawita bwa e na kaitaraa Koria? (b) Tera aron Tawita n iaiangoa aran te Atua?

³ Iangoa te tai are e kaaitara iai Tawita ma te toa mai Biritia are Koria. Tera are e kaira te ataeinimwaane ae Tawita bwa e na kaitaraa te aintoa ae tao 2.9 te mita abwakina are e uabwai ni buaka? (1 Tamuera 17:⁠4) E kairaki n ninikoriana ke n onimakinan te Atua? A rangi ni kakawaki aroaro aika uoua aikai ni karaoan anne irouna. Ma e ngae n anne, e boni kairaki Tawita bwa e na tei ni kaitaraa te aintoa ae rangi n abwabwaki aei ibukini karinean Iehova ao arana ae kakannato. E un Tawita ao e titiraki ni kangai: “Antai te I-Biritia ae aki korotobibiaki aei, ngkae e kakaewenakoia ana taanga nako te Atua ae maiu?”​—⁠1 Tamuera 17:​26, BG.

⁴ E taekina ae kangai te ataeinimwaane ae Tawita ngke e kaitaraa Koria: “Ko nako iu ma te kabaang, ma te raanti, ma te koro: ma I nako im n aran Iehova Tabaota, ae Atuaia aia taanga nako Iteraera, aika ko a tia ni kaewenakoia.” (1 Tamuera 17:​45, BG) Ibukina bwa e onimakina te Atua ae koaua Tawita, e a tokanikai i aon te toa mai I-Biritia ngke e banaia n te atibu ae tii teuana. E aki onimakina Iehova Tawita ao ni karinea arana tii n te tai anne, ma bon i nanoni maiuna ni kabane. Ni koauana, e kaumakiia raona ake tibun Iteraera bwa ‘a na kamoamoaia ibukin aran Iehova are tabu.’​—⁠Wareka 1 Rongorongo 16:​8-10, BG.

5. Tera aroia aomata ni boong aikai ni kaotiota aki karinean Iehova n aroni Koria?

⁵ Ko kamoamoa ngkai Atuam Iehova? (Ieremia 9:24) Tera arom ngkana a tinaraea Iehova kaain rarikim, raom ni mwakuri, raom n reirei ke am koraki ao ni bwainingareia naba taani Kakoaua ibukina? Ko tei ibukin aran Iehova ngkana e kabuakakaaki, ao n onimakinna bwa e na boutokaiko? Ni koauana, bon iai “te tai ni kainababu” ma ti aki riai ni maamaa ngkai taani Kakoaua ibukin Iehova ngaira ao taan rimwin Iesu. (Te Minita 3:​1, 7, BG; Mareko 8:38) E ngae ngke ti riai n akoiia ao ni karineia aomata aika a rawa ni butimwaea ana taeka te Atua, ma ti bia aki riki n aroia I-Iteraera ake “a bara nanoia, ao a bati ni maku” ngke a ongo ana taeka ni kakaewenako Koria. (1 Tamuera 17:​11, BG) N oneani mwin anne, ti bia karaoa ae riai ni katabua aran te Atua ae Iehova. Ti kani buokiia aomata bwa a na ataia raoi bwa te aeka n Atua raa Iehova. Ni karaoan aei, ti kamanena ana Taeka ae te Baibara ni kakorakoraira iai ni buokiia aomata bwa a na ataa kakawakini kaanian te Atua.​—⁠Iakobo 4:⁠8.

6. Tera are e kani kakororaoia Tawita ni kaitaraani Koria, ao tera ae ti riai ni moanibwaia?

⁶ Iai reireiara teuana riki ae rangi ni kakawaki n ana aitara ni boo Tawita ao Koria. E titiraki Tawita ngke e aerake nakoia taani buaka ni kangai: “Tera ae na karaoaki nakon te aomata ae kamatea te I-Biritia anne, ma n uoti nako taekani kakaewenakoaia Iteraera mai rouia?” A kaeka aomata n aron are a kaeka naba iai mai mwaina ni kangai: “Te aomata ae na kamatea [Koria], e na bati ni kakaubwaia te uea, ao e na anganna natina te aine.” (1 Tamuera 17:​25-27, BG) Ma e bon aki kakawaki te kaniwanga anne iroun Tawita. Bon iai riki te bwai ae kakawaki irouna. E tangiria Tawita n neboa te Atua ae koaua. (Wareka 1 Tamuera 17:​46, 47.) Ao ngaira tera arora? E kakawaki iroura kamoamoaara n arora ni karikirakea te kaubwai ao te kani kakannato n te aonnaba? Ni koauana, ti kan riki n aron Tawita are e anene ni kangai: “Kam na buokai n neboa Iehova, ao ti na bane ni karietata arana.” (Taian Areru 34:​3, BG) Mangaia are ti bia onimakina te Atua ao ni moanibwaia arana nakon arara.​—⁠Mataio 6:⁠9.

7. Ti na kanga ni karikirakea te onimaki ae korakora are ti kainnanoia ni kaitiboora ma aomata ake tao a rawa n ongora?

⁷ E kainnanoa kakoauaan Iehova ma nanona ni kabane Tawita ibukin ninikoriana ni kaitaraa Koria. E korakora ana onimaki te ataeinimwaane ae Tawita. Te anga teuana are e karikirakea ana onimaki Tawita bon rinanon onimakinan te Atua n ana mwakuri ngke te tia kawakintiibu ngaia. (1 Tamuera 17:​34-37) Ti kainnanoa naba te onimaki ae korakora bwa ti aonga n teimatoa ni karaoa ara mwakuri ni minita, ai moarara riki ngkana ti kaaitara ma aomata aika rawa n ongora. Ti kona ni karikirakea te aeka n onimaki anne rinanon onimakinan te Atua n ara mwakuri ni katoabong. N te katoto, ti kona ni moana ara maroro i aoni koaua man te Baibara ma aomata ake a tekateka i rarikira i aoni baao ni mwamwananga ibukia botannaomata. Ti riai naba n taetae nakoia aomata ake ti kaitiboo ma ngaiia n te kawai ni karaoan te mwakuri ni minita man te auti teuana ma teuana.​—⁠Mwakuri 20:​20, 21.

E KANTANINGAA IEHOVA TAWITA

8, 9. E kanga Tawita ni kaotia bwa e teimatoa n ururinga nanon Iehova n te baere e karaoia nakon te Uea are Tauro?

⁸ E irekereke ma Tauro are te moan uea i aon I-Iteraera te katoto teuana riki ibukin ingaingan Tawita n onimakina Iehova. Bon tenua ana tai Tauro are e bakantang ni kataia ni kanimwa Tawita ma oon te ruu, ma e rawea maiuna Tawita ni katoai taai akanne ao n rawa ni kabooa mwini kaina. N tokina, e bon rawea maiuna mairoun Tauro. (1 Tamuera 18:​7-11; 19:10) Imwin anne, e kairiia mwaane aika 3,000 mwaitiia Tauro ake e rineiia mai buakoia I-Iteraera ni kabane bwa a na ukoukora Tawita n te rereua. (1 Tamuera 24:⁠2) N te taina, e a rin Tauro n te bwanganimatang are a mena iai Tawita ma ana aomata, n akea ataakina. E a kona ni kamanena te tai aei Tawita n tiringa iai te uea are e karuanikaia maiuna. Ni koauana, bon nanon te Atua bwa e na oneaki mwin Tauro are uean I-Iteraera iroun Tawita. (1 Tamuera 16:​1, 13) Akea te nanououa bwa ngke arona bwa e ira nanon aia taeka n reirei ana aomata Tawita, e a bae n tia ni mate te uea. Ma e taku Tawita: “E na tukai Iehova ba N na aki karaoa te baei nakon au uea, ae ana kabiraki Iehova.” (Wareka 1 Tamuera 24:​4-7, BG.) E bon teimatoa naba Tauro n riki bwa te uea ae kabiraki iroun te Atua. E bon aki kan anaa uean Tauro Tawita, ngkai e tuai anaaki ueana iroun Iehova. E kaotia Tawita bwa akea ana iango ni kani kaikoaka Tauro ngke e tii korea buruburun ninirana.​—⁠1 Tamuera 24:⁠11.

⁹ E a manga kaota naba karinean ana kabiraki te Atua Tawita ni kabanean noran te uea irouna. N te tai anne, e roko Tawita ma Abitiai n te tabo are e kaembwa iai Tauro ao a a noria ni matu. E ngae ngke e iangoia Abitiai bwa e a tia te Atua ni kaburea te tia kairiribai ae Tauro nako nanoni bain Tawita, ao n tuangnga bwa e na oreia n te raanti ni kanimmwa ma aontano, ma e bon aki kariaia Tawita. (1 Tamuera 26:​8-11) E bon aki kerikaaki Tawita man ana motinnano are e na karaoa nanon Iehova, n aki ongei baike e taekin Abitiai, ibukina bwa e teimatoa n ukoukora ana kairiri te Atua.

10. Tera te kangaanga are ti kona n aitara ma ngaia, ao tera ae na buokira n tei n nene?

¹⁰ Ti kona naba n aitara ma te kangaanga ike a a kona iai raoraora ni karirira bwa ti na karaoa are a iangoia bwa e tamaroa, n oneani mwin are a na boutokaira ni karaoa nanon Iehova. N aron Abitiai, a kona naba tabeman ni kaungaira bwa ti na karaoi ara motinnano imwain iaiangoan nanon te Atua iai. Ngkana ti kan tei n nene, ti riai n ota raoi n ana iango Iehova i aon te bwai teuana ao ni motinnanoia bwa ti na nimti kawaina.

11. Tera reireiam ae reke mairoun Tawita ibukin teimatoam ni moanibwaia iaiangoan nanon te Atua?

¹¹ E tataro Tawita nakon Iehova ae te Atua ni kangai: “Reireiai ni ira nanom.” (Wareka Taian Areru 143:​5, 8, 10, BK.) N oneani mwin are e na onimakini oin ana iango Tawita ke ni karaoa are a iangoia tabeman, e ingainga nakon reiakinana iroun te Atua. E ‘uringi ana mwakuri nako Iehova ao e iangoi baike e a tia ni karaoi.’ Ti kona n ataa nanon te Atua rinanon te ukeuke n reirei n te Baibara ao kananoan ara iango i aon aron Iehova ni kairiia aomata rimoa.

E ATAI ARONI KAMANENAANI BOOTO N REIREI AKE AANAKI N TE TUA TAWITA

12, 13. Bukin tera ngke e nurakina te ran nako aontano Tawita are a uotia ana aomata nakoina?

¹² Bon te banna ni katoto ae tau ibukira aron Tawita n ataa raoi kamanenaani booto n reirei ake a kaotiotaki n te Tua ao nanona ni kani maiuakini. Iangoa te baere e riki nakon Tawita ngke e kaota nanona are e bati ‘ni kani moi n te ran mai nanoni mwanibwani Betereem.’ Teniman mai buakoia ana aomata Tawita ake a karuanikaia maiuia n rinnako n te kaawa ae tauaki taekana irouia I-Biritia ao n uota rikaaki te ran. Ma e ngae n anne, “e rawa n nimma Tawita, ao e nurakinna nakon Iehova.” Bukin tera? E kabwarabwaraa ni kangai Tawita: “E na tukai Atuau mani karaoan te baei: N na nima raraia aomata aika kuri ni kabua maiuia? Ba a uotia mai ni kuri ni kabua maiuia.”​—⁠1 Rongorongo 11:​15-19, BG.

¹³ E ataia Tawita man te Tua bwa e riai n nurakinaki te raraa nakon Iehova ao n aki kanaki. E ota raoi naba bwa e aera ngkai e riai karaoan aei. E ataia Tawita ae “boni maiun te rabata te rara.” Ma e ngae n anne, bon te ran aei ao tiaki te raraa. Bukin tera bwa e rawa n nimma Tawita? E ota raoi n te boto n reirei are n te tua ibukin te raraa. E rangi ni kakawaki te ran aei iroun Tawita n aroni kakawakin naba raraaia mwaane ake teniman akekei. Ai ngaia anne are e a kangaanga irouna bwa e na nima te ran aei. N oneani mwin are e na nimma, e boni motikia bwa e riai n nurakinna nako aontano.​—⁠Nakoaia Ibonga 17:​11, BK; Te Tua-Kaua 12:​23, 24.

14. Tera are e buoka Tawita bwa e na iangoi bwaai n aron iangoaia iroun Iehova?

¹⁴ E kataia Tawita ni kaatuua ana iango ni kabane n ana tua te Atua. E anene ni kangai: “I kukurei ni karaoa ae Ko tangiria, Atuau; Eng, e mena naba am tua i nanou.” (Taian Areru 40:​8, BG) E ukeuke n reirei Tawita i aon ana tua te Atua ao e kananoa ana iango iai. E kakoauaa raoi bwa e na kakabwaiaaki ngkana e kakairi n ana tua Iehova. Ibukin anne, e kani kakairi Tawita tiaki tii n tuua ake n te Tua Rinanoni Mote ma boni booto n reirei naba. Ngkana ti ukeuke n reirei n te Baibara, ti wanawana ngkana ti iaiangoi baika ti wareki ao ni kawakin n te aro are ti a kona iai n neneri baika a kakukureia Iehova ni maiura ni katoabong.

15. N te aro raa are e kabwaka iai Toromon ni kaota karinean Ana Tua te Atua?

¹⁵ E rangi ni kakabwaiaaki natin Tawita are Toromon iroun Iehova ae te Atua. Ma imwin tabeua te tai, e a kabwaka Toromon ni kaota karinean Ana Tua te Atua. E aki mutiakina ana tua Iehova are e riai uean I-Iteraera n “aki kabatiaia naba buna.” (Te Tua-Kaua 17:​17, BG) Ni koauana, e mare Toromon ma aine ianena aika bati. Ngke e a rikirake ni kara ao a “a raira nanona buna nakoia anti tabeman.” N aki ongeia bwa tera bukin aki ongeabana, e boni “karaoa ae buakaka i matan Iehova Toromon, ao e aki kabanea nanona n ira Iehova, n ai aron Tawita are tamana.” (1 Uea11:​1-6, BG) Ai kakawakira ongeabara nakon tuua ao booto n reirei aika n Ana Taeka te Atua! N te katoto, e rangi ni kakawaki aei n iangoan te mare.

16. Tera reireiara man ana tua Iehova ae te mare “tii i nanon te Uea”?

¹⁶ E oti n ara kaeka nakoia aomata ake a karaoi mwakuri ni kaitaataan nakoira aika tiaki kaain te onimaki bwa e boraoi ara iango ma Tawita ke Toromon? A tuangaki taan taromauri ni koaua bwa a na mare “tii i nanon te Uea.” (1 I-Korinto 7:39) Ngkana e motinnanoia te Kristian bwa e na mare, e riai teuanne ke neienne ni mare ma raona n onimaki. Ngkana ti a ataa raoi te tua man te Baibara ni kaineti ma aei, ti na bon aki tii rawa ni mare ma ae tiaki kaain te onimaki ma ti na rawa naba nakon aeka ni kaitaataan mairouia aomata.

17. Tera are e kona ni buokira n rarawa nakon te bwai ni kamwane ae te bwaitingako?

¹⁷ Iangoa naba ana katoto Tawita n arona ni kakorakoraa n ukoukora ana kairiri te Atua, are e kona ni buokira bwa ti na rarawa ni kaririaki ni matakuakina te bwaitingako. Wareki kiibu aikai, iaiangoi booto n reirei ake iai ao kakorakorako bwa ko na ataa raoi nanon Iehova n aei. (Wareka Taian Areru 119:37; Mataio 5:​28, 29; I-Korote 3:⁠5.) Iaiangoan ana kaetieti aika kakawaki, ti a kataubobongaaki iai bwa ti na rarawa nakon te bwai ni kamwane ae te bwaitingako.

URURINGI ANA IANGO TE ATUA N TAAI NAKO

18, 19. (a) Tera are e buoka Tawita ni kateimatoa akoana iroun te Atua, e ngae ngke e aki kororaoi? (b) Tera ae ko motinnanoia bwa ko na karaoia?

¹⁸ E ngae ngke te banna ni katoto ae raoiroi Tawita n aaro aika bati, ma e boni karaoi naba buure tabeua aika kakaiaki. (2 Tamuera 11:​2-4, 14, 15, 22-27; 1 Rongorongo 21:​1, 7) Ma e noraki Tawita bwa e raraoma ni koaua n taai nako imwini karaoan ae bure. E nakonako i matan te Atua Tawita “ma itiakin [nanona].” (1 Uea 9:​4, BG) Bukin tera bwa ti kona n taekina anne? Ibukina bwa e kataia Tawita ni kaboraoa ana mwakuri ma nanon Iehova.

¹⁹ Ti kona ni kateimatoa akoara iroun Iehova n aki ongea aki kororaoira. N iaiangoan anne, ti bia taningamarau n ukeuke n reirei n Ana Taeka te Atua, ni kananoi ara iango i aoni baike ti reiakin ao ni waekoa ni maiuakin. Ni karaoan anne, ti na riki n aron te tia areru are e nanorinano ni butiia Iehova ni kangai: “Reireiai ni ira nanom.”

[Taamnei n iteraniba 10]

Tera ae kaira Tawita bwa e na aki tiringa Tauro ngke e a angaraoi irouna?

[Taamnei n iteraniba  11]

Tera reireiara mairoun Tawita ngke e rawa n nima te ran are a uotia nakoina ana aomata?