Aroni Kawaran Te Tia “Ongo Tataro”

“Ngkoe ae Ko ongo tataro, a na bane ni kawariko aomata.”​—TAIAN ARERU 65:2.

1. Tera kaokoroia aomata ma baika maiu n te aonnaba ao tera ae a kona ni karaoia?

TII AOMATA mai buakoni bwaai aika maiu ni kabaneia n te aonnaba ake iai irouia te konabwai n taromauria te tia Karikiriki. Bon tii aomata aika ataa kainnanoakin te onimaki ao n namakina karauan nanoia iai. E a karekea angara n iraorao ae tamaroa ma Tamara are i karawa te aro aei.

2. Tera aron rotakin ana iraorao te aomata ma te tia Karikiriki imwin burena?

² E karikaki te aomata bwa e na kona n itoman ma te tia Karikia. A karikaki n aki bure Atam ma Nei Ewa. Ai ngaia are a inaaomata n reitaki ma te Atua n aron te ataei ae reitaki ma tamana. Ma a a manga kabuaa te kakabwaia anne Atam ma Nei Ewa ngke a bure. A aki ongeaba, ao ibukin anne a kabuaa aia iraorao ae kaan ma Atua. (Karikani Bwaai 3:8-13, 17-24) E nanonaki ngkanne bwa a aki kona n itoman ma te Atua ana kariki Atam ibukin aki-kororaoia? Tiaki ngaia anne, bwa e bon teimatoa naba ngkai Iehova ni butimwaia, ma tii ngkana a kaboraoi maiuia ma kaetieti tabeua. Baikara kaetieti aikai?

Baikara Kaetieti Ibukini Kawaran te Atua?

3. A na kanga aomata aika aki-kororaoi ni kawara te Atua ao te katoto ra ae kakoaua anne?

³ Iai irekereken natin Atam mwaane ake uoman n te bwai ae riki, are ti a buokaki iai n ataa te bwai ae tangiria te Atua mairouia aomata aika aki-kororaoi ake a kani kawaria. A kataia ni kawara te Atua Kain ao Abera rinanon aia angakarea. Ma e butimwaeaki ana karea Abera, ao Kain, e aki. (Karikani Bwaai 4:3-5) Tera te kakaokoro i marenaia? E taku Ebera 11:4: “Bon n te onimaki are e angakarea Abera nakon te Atua ae raoiroi riki nakon ana karea Kain, ao e riki arei ba te kaotioti i bukina bwa e raoiroi.” Mangaia are e teretere raoi ngkanne, bwa e kainnanoaki te onimaki ibukin reitakira ma te Atua. E noraki te bwai ae kakawaki riki teuana n ana taeka Iehova nakoni Kain, ngke e kangai: “Ngkana tao ko karaoa ae raoiroi, ao tiaki ko na mutiakinaki?” Ngkana arona bwa e rairaki nakoni karaoan ae raoiroi Kain, ao e na butimwaeaki iroun te Atua. Ma e ngae n anne e aki butimwaea reireiana Kain mairoun te Atua ao n tokina e a katinanikuaki bwa e tiringa Abera. (Karikani Bwaai 4:7-12) Mangaia are e kateretereaki ni moan rongorongoia aomata rimoa kakawakin kawaran te Atua n te onimaki ae e irianaki ni mwakuri aika raraoi.

4. Tera ae ti riai n ataia ni kaineti ma kawaran te Atua iroura?

⁴ E kakawaki ataan arora ae te aki-kororaoi ngkana ti kan kawara te Atua. A bane n aki-kororaoi aomata, ao te bure bon te bwai n tutuki ibukini kawaran te Atua. E korea ae kangai te burabeti ae Ieremia ni kaineti ma Iteraera: “Ti bure ma n rarawa . . . Ko rabuniko n te nang, ba e na aki ri buakona ara tataro.” (Baebaeti 3:42, 44) E ngae n anne e kaotaki n rongorongon rimoa, bwa e bon tauraoi te Atua ni butimwai aia tataro te koraki ake a onimakinna ma nanoia ae itiaki ma n aantaeka n ana tua. (Taian Areru 119:145) Antai tabeman mai buakoia ao tera ae ti kona n reiakinna man aia tataro?

5, 6. Tera ae ti kona n reiakinna mairoun Aberaam ibukin kawaran te Atua?

⁵ Temanna mai buakoia naakai bon Aberaam. A butimwaeaki ana tataro Aberaam iroun te Atua, ao ibukin anne e a aranna te Atua bwa ‘raona.’ (Itaia 41:7) Tera ae ti kona n reiakinna man ana tataro Aberaam? E titiraki te baatua ae kakaonimaki aei nakon te Atua bwa antai ae na bwaibwai imwina: “Tera ae Ko na anganai, ngkai I nakonako n akea natiu?” (Karikani Bwaai 15:2, 3; 17:18) N te tai teuana, ao Aberaam e tabeaianga bwa antai ake a na kamaiuaki ngkana e karokoa ana motikitaeka te Atua i aoia aika buakaka i Totom ma Komora. (Karikani Bwaai 18:23-33) E tataro ni bubutii Aberaam ibukia tabeman. (Karikani Bwaai 20:7, 17) N taai tabetai ngke e kawara te Atua Aberaam e angakarea naba, n aron are e karaoia Abera.​—Karikani Bwaai 22:9-14.

⁶ E namakinna Aberaam bwa e inaaomata n taetae ma Iehova n taai nako. Ma e ngae n anne, e raonaki inaaomatana ma te nanorinano ni kaineti ma ana tia Karikiriki. Nora ana taeka ni karinerine ane e mwaneweaki ni Karikani Bwaai 18:27: “Norai ngkai, I karekea nanou ba N na taetae nakon te Uea [Iehova], ngai ae boni bubun te tano ma te mannang.” Ai raoiroira katotongan te aroaro ae raoiroi aei!

7. Baikara bwaai tabeua ake a mwanewei baatua rimoa n aia tataro nakon Iehova?

⁷ A tataro taiani baatua ibukini baika kakaokoro nako, ao a butimwaeaki iroun Iehova. N te taina ao e tataro Iakoba n taetae ni bau iai. Imwin butiian te Atua ana ibuobuoki ao e berita ni kangai: “N anganganna kabuiani baai ni kabane aika e na karekei nakoiu.” (Karikani Bwaai 28:20-22, BK) Imwina riki, ngke e nang kaitiboo Iakoba ma tarina ao e butiia Iehova kamanoana ni kangai: “I butiko ba Ko na kamaiuai mai nanoni bain tariu, mai nanoni bain Etau: ba I makua.” (Karikani Bwaai 32:9-12) E angakarea nakon Iehova te baatua are Iobi ibukia ana utu. E tataro Iobi ibukia raona ake teniman ake a bure n aia taetae-ni-kawai “ao E mutiakina Iobi Iehova.” (Iobi 1:5; 42:7-9) A buokira rongorongo aikai bwa ti na atai baika ti na taekin n ara tataro nakon Iehova. Ti ataia naba iai ae Iehova e tauraoi ni butimwaai aia tataro te koraki ake a tataro n te aro ae riai nakoina.

I Aan te Berita n Tua

8. Tera aron tataroakinan baika kakawaki ni kaineti ma te botannaomata nakon Iehova i aan te Berita n Tua?

⁸ E angania tibun Iteraera te Berita n Tua Iehova, imwini kainaaomataia mai Aikubita. E baireaki n te Tua aia mwakuri ibonga ni kaineti ma kawaran te Atua. A mwiokoaki tibun Rewi tabeman bwa aia ibonga aomata. Ngkana a riki bwaai aika kakawaki ni kaineti ma te natannaomata, te tia tei ibukin te natannaomata ae tao te uea ke te burabeti e tataro ni bubutii nakon te Atua ibukia aomata. (1 Tamuera 8:21, 22; 14:36-41; Ieremia 42:1-3) N te katoto, ni katabuan te tembora ao e tataro ni bubutii ma nanona te Uea ae Toromon nakon Iehova. E kaota butimwaean ana tataro Toromon Iehova ngke e kaona te tembora ni mimitongina, ao e taku: “A na kakauongo taningau, nakon te tataro ae tataroaki n te tabo aei.”​—2 Rongorongo 6:12–​7:3, 15.

9. Tera ae kainnanoaki ibukini kawaran Iehova n te aro ae riai n te tembora?

⁹ E karina naba te kaetieti ibukin kawarana n te tembora Iehova, n te Tua nakoia Iteraera. Tera te bwai anne? Irarikin angakarea aika maan aika kareanaki ni katoa ingabong ao tairiki, e riai naba te ibonga ae rietata ni kabueki karea aika boiarara nakon Iehova. Imwina riki e a riki naba bwa tabeia ibonga aika mwakuri i aan te Ibonga ae Rietata. Ma a aki karaoa anne n te Bong ni Kabwara Buure. Ma ngkana a aki kaota te karinerine ibonga n te aro aei, ao e na aki kukurei Iehova n aia beku.​—Te Otinako 30:7, 8; 2 Rongorongo 13:11.

10, 11. Tera ae kakoauaa bwa Iehova e kona naba ni butimwaai aia tataro aomata n tatabemania nako?

¹⁰ N aia tai Iteraera rimoa, te koaua bwa tii aomata aika mwiokoaki aika kona n tataro ibukin te botannaomata? E aki, bwa e kaotia te Baibara bwa e kukurei Iehova ni butimwaai aia tataro aomata n tatabemania nako. N ana tataro Toromon ni katabuan te tembora ao e butiia Iehova ni kangai: “Ngkana tao e tataroaki te tataro teuana ma te bubuti teuana iroun te aomata temanna, ke irouia am aomata aika Iteraera ni kabaneia, . . . ma n arori baia nakon te maneaba aei: ao Ko na ongo mai karawa.” (2 Rongorongo 6:29, 30) N ana rongorongo Ruka, e tuangira iai bwa ngke e anga karea aika boiarara man tabu Takaria are taman Ioane te tia Bwabetito, ao a mwaiti kurikuri taan taromauria Iehova aika tiaki ibonga ake a “tataro i ao.” E teretere, bwa e a riki bwa kateia aomata ae a na botaki itinanikun te tembora n tataro iai n te tai are e a uotaki iai te karea nako aon te baonikarea ae koora nakon Iehova.​—Ruka 1:8-10.

¹¹ Mangaia are ngkana e kawaraki n te aro ae riai Iehova, ao e kukurei ni butimwaei aia bubutii taan tei ibukin te botannaomata ae tabwanin ao mairouia naba aomata n tatabemania nako ake a kan tataro nakoina. Ti a aki kabaeaki i aan te Berita n Tua ngkai. Ma e ngae n anne, ti kona ni karekei reireiara aika kakawaki n aroia tibun Iteraera ngkoa n tataro nakon Iehova.

Babaire Ibukia Kristian

12. Tera aroni kawaran Iehova ae e a tia ni baireaki ibukia Kristian?

¹² Ti a mena ngkai i aani babaire ni Kristian aika a kateaki irouni Kristo. Ai akea ngkai te tembora n rabwata are a tei iai ibonga ibukia ana aomata te Atua ni kabane, ke te tabo are ti kona n taraia ngkana ti tataro. Ma iai naba ana babaire Iehova ngkai ibukin kawarana. Tera te babaire aei? Ngke e a kabiraki Kristo n 29 C.E. ao n rineaki bwa te Ibonga ae Rietata, e a moanaki iai waakin te tembora n taamnei.a Te tembora n taamnei aio bon te babaire ae boou ibukin kawaran Iehova n te taromauri, ae aanaki n ana karea ni kaboomwi Iesu Kristo.​—Ebera 9:11, 12.

13. Ni kaineti ma te tataro, tera te bwai ae mena n te tembora i Ierutarem are bannan naba te tembora n taamnei?

¹³ A bati tein te tembora are i Ierutarem rimoa aika bannan baika katauraoaki n te tembora n taamnei, n ikotaki naba ma ake a irekereke ma te tataro. (Ebera 9:1-10) N te katoto, tera are tei ibukin te angakarea are e boiarara ae katokaki i aon te baonikarea are mena n te Ruu ae Tabu n te tembora? Ni kaineti ma te boki ae Te Kaotioti e nanoni, “baika boiarara ake aia tataro ake a itiaki.” (Te Kaotioti 5:8; 8:3, 4) E kairaki Tawita bwa e na korea ae kangai: “E na kamenaki au tataro i matam ba kaanga te karea ae boiarara.” (Taian Areru 141:2) Mangaia are n te babaire ni Kristian, a tei baika a boiarara ibukin aia tataro aika raraoi ao neboan Iehova.​—1 I-Tetaronike 3:10.

14, 15. Tera ae kona n taekinaki ibukin kawaran Iehova irouia (a) Kristian aika kabiraki? (b) “tiibu tabemang”?

¹⁴ Antai aika kona ni kawara te Atua n te tembora n taamnei aei? A kariaiakaki ibonga ao tibun Rewi bwa a na mwakuri i nanon oon te tembora are rimoa, ma tii ibonga aika a riai n rin n te Ruu are e Tabu. E reke irouia Kristian aika kabiraki ake a kaantaningaa te maiu n taamnei i karawa te aeka n iraorao ae kaikonakaki n oon te tembora ao n te Ruu ae Tabu, are a kona n tataro ma n neboa te Atua iai.

¹⁵ Tera aroia te koraki ake a kaantaningaa te maiu n te aonnaba aika “tiibu tabemang”? (Ioane 10:16) E kaotia te burabeti are Itaia bwa a na roko botannaomata aika mwaiti n taromauria Iehova “ni boong aika kaitira.” (Itaia 2:2, 3) E korea naba ae kangai, bwa a na reitiia “ianena” ma Iehova. E taku te Atua ni kaota tauraoina ni butimwaai aia tataro: “N na . . . kakukureia i nanoni maneabau n tataro.” (Itaia 56:6, 7) E kabwarabwaraki n Te Kaotioti 7:9-15 taekan “te koraki ae uanao” ma ibuakoia ‘botannaomata ni kabanea’ ae a botaki n taromauria te Atua “ni ngaina ao ni bong” n oon te tembora n taamnei are i tinaniku. Ai karaunanora iangoan ae a inaaomata ana toro te Atua ni boong aikai ni kawaria ngkai e ongo irouia!

Tataro Raa Aika A Butimwaeaki?

16. Tera ae ti kona n reiakinna man aia tataro Kristian rimoa?

¹⁶ Kristian rimoa bon aomata aika a tatataro. Baikara bwaai ake a tataroi? A bubutii kairaia unimwaanen te ekaretia ibukin rineaia mwaane aika tau ni mwiokoaki n ana botaki te Atua. (Mwakuri 1:24, 25; 6:5, 6) E tataro Ebabera ibukia raona n onimaki. (I-Korote 4:12) A tataro kaain te ekaretia are Ierutarem ibukin Betero ngke e kabureaki. (Mwakuri 12:5) A butiia te Atua te ninikoria Kristian rimoa ngke a kaaitara ma te bwainikirinaki ni kangai: “[Iehova], Ko na tarai aia taeka ni kamaku ngkai: ao Ko na angania am toro te taekina am taeka n aki maku teutana.” (Mwakuri 4:23-30) E kaumakia Kristian te abotoro Iakobo bwa a na tataro ni bubutiia te Atua te wanawana ngkana a kaaitara ma kataaki. (Iakobo 1:5) Ko tatataroi baikai n am tataro ni bubutii nakon Iehova?

17. E butimwaai aia tataro antai Iehova?

¹⁷ E aki ongo tataro ni kabane te Atua. Ti na kanga ngkanne ni kakoauaa raoi bwa e na boni butimwaai ara tataro? Te koraki aika kakaonimaki ake a butimwaeaki aia tataro iroun te Atua rimoa, a tataro ma nanoia aika koaua ma n raoiroi. A kaota te onimaki n aroia ni karaoi mwakuri aika raraoi. Ti kona ni kakoauaa bwa e na bon ongo aia tataro Iehova te koraki ake a kawaria n te aro naba anne.

18. Tera te kaetieti ae riai n iraki irouia Kristian ngkana a tangiria bwa e na ongoraeaki aia tataro?

¹⁸ Iai riki te kaetieti teuana. E kabwarabwaraa te abotoro Bauro ni kangai: ‘Rinanona, ti kona ni kawara te Tama n te taamnei teuana.’ E kaineti nakon antai ana taeka Bauro ae ‘i nanona’? Bon Iesu Kristo. (I-Ebeto 2:13, 18, NW) Eng, ti inaaomata ni kawara Tamara are i karawa tii i nanon Iesu.​—Ioane 14:6; 15:16; 16:23, 24.

19. (a) A na kanga n riki ni boiraa aia angakarea ni kabuokaki Iteraera nakon Iehova? (b) Ti na kanga ni kakoauaa raoi bwa ara tataro a riki n ai aron karea aika boiarara nakon Iehova?

¹⁹ N aron ae e a tia n taekinaki, karea aika boiarara ake a anga tibun Iteraera aika ibonga, a tei ibukin aia tataro aika raraoi ana toro te Atua aika kakaonimaki. Ma n tabetai, karea aika boiarara ake a anga tibun Iteraera nakon Iehova, a manga bati n ribaaki. E riki aio ngke a kabuoki karea aika boiarara n te tembora ao a taromaurii bouannanti n te tai naba anne. (Etekiera 8:10, 11) N aron naba anne ao ni boong aikai, a a riki aia tataro te koraki ake aongkoa a toro iroun Iehova ma a boni kaakaraoi naba mwakuri aika kauntabai ana tua, bwa te boi ae bati n ribaaki irouna. (Taeka N Rabakau 15:8) Ti bia kateimatoaa itiakira n aroarora ni kabane bwa a aonga n riki ara tataro n ai aron karea ni kabuokaki aika boiarara nakon te Atua. E kukurei Iehova n aia tataro te koraki ake a tou mwin kawaina aika raoiroi. (Ioane 9:31) Iai riki titiraki tabeua aika ti tuai n rinanoi. Tera arora ae riai ngkana ti tataro? Tera ae ti konaa n tataroia? Ao e na kanga te Atua ni kaekai ara tataro? A na maroroakinaki titiraki aikai ma ake tabeua riki n te kaongora ae imwina.

[Kabwarabwara ae nano]

Ko Kona ni Kabwarabwaraa?

• A na kanga aomata aika aki-kororaoi ni kawara te Atua n te aro ae riai?

• Ti na kanga ni katotongia baatua n ara tataro?

• Tera reireiara ae reke man aia tataro Kristian rimoa?

• A na kanga ara tataro n riki n ai aron karea aika boiarara nakon te Atua?

[Taamnei n iteraniba 24]

Am tataro ai aron te boiarara ae kabuekaki nakon Iehova?