Tera ae Nanonaki ni “Boong Aika Kaitira”?

KO KAN ataia bwa tera kanoan taai aika a na roko ibukim, am utu ao raoraom aika tangiraki iroum? A mwaiti aomata aika kakauongo nakoni waaki ni kanako-rongorongo ma n nori bwaai aika ririki n te aonnaba bwa tao tera rotakin maiuia iai. Ma e karekea te atatai ni koaua te kakauongo nakon ana taeka te Atua ae kairaki koreana. E riki aio ibukina bwa e a kaman taetae ni burabetinaki n te Baibara tiaki tii aron te iwawaki ngkai i aon te aba, ma baika a na riki naba nakon taai aika imwaira.

N te katoto, ngke e mena i aon te aba Iesu Kristo ao e tataekina rongorongon te Tautaeka n Uea ni karababa nako. (Ruka 4:43) A ongo aomata taekana ao a kan ataia bwa n ningai te tai ae e na roko iai te Tautaeka ane kamimi anne. Tenibong imwain te tai are e nang kamateaki iai ao a titirakina Iesu ana abotoro ni kangai: “Tera kanikinaean menam ma aomata [ma te mwaaka n Tautaeka] ao tokin te waaki i aon te aonnaba ae ngkai”? (Mataio 24:3, NW) Ma e tuangia Iesu bwa tii Iehova ae te Atua ae ataa raoi te tai are e nang roko iai ni korakorana tauan taekan te aonnaba n te Tautaeka n Uea. (Mataio 24:36; Mareko 13:32) Ma a a kaman taekin baika a na riki i aon te aba Iesu ma tabeman, ake kakoauaan ae e a tia ni moana mwaakana Kristo n Tautaeka.

Imwain neneran bwaai ni kakoaua aika noraki ibukin menara i nanoni “boong aika kaitira” n te waaki i aon te aba ae ngkai, ti bia iangoa te bwai ae kakawaki are e a tia n riki i karawa. (2 Timoteo 3:1) E riki bwa te Uea i karawa Iesu Kristo n te ririki 1914.a (Taniera 7:13, 14) N te tai naba anne imwin reken mwaakan Iesu n Tautaeka ao e a waakina naba ana mwakuri. E tuangira te Baibara ni kangai: “E riki te buaka i karawa: Mikaera ma ana anera a buakana te rakon; ao e buaka te rakon ma ana anera.” (Te Kaotioti 12:7) “Mikaera are mataniwiia anera,” bon taekan Iesu n nakoana i karawa.b (Iuta 9; 1 I-Tetaronike 4:​16) Ao te rakon bon Tatan te Riaboro. Tera aron Tatan ma raona n anera aika buakaka aika aranaki bwa taimonio, n te boo ni buaka aei? A boni konaaki ao a “teweaki rio” nako rarikin te aonnaba. (Te Kaotioti 12:9) Ai ngaia are a kimwareirei “taiani karawa, ao [akana] maeka iai,” aika natin te Atua aika kakaonimaki. Ma a tuai n namakina te kimwareirei anne aomata. “E na reke kain te aba,” e a kaman taekina aio te Baibara, “ba e ruo te riaboro nako imi, ao e bati n unun, ngkae e ataia ba a kani bane ana bong.”​—Te Kaotioti 12:12.

E korakora unin Tatan ngaia are e a karekea te rawawata ao te kangaanga nakoia aomata i aon te aonnaba. Ma e uarereke tain te rawawata bwa e a “kani bane ana bong.” E taekina te tai aio te Baibara bwa “boong aika kaitira.” Ma ti na kukurei bwa n te tai ae e aki maan ao e nang kamaunaki mwaakan te Riaboro ma i aon te aba ni kabutaa. Ma tera te kakoaua bwa ti a mena ngkai i nanoni boong aika kaitira?

[Kabwarabwara ae nano]