E Kimwareirei n Ana Tua Iehova

E A ROKO n tokini maiuna i aon te aba Albert D. Schroeder ae kaain te Rabwata n Tautaeka Ibukia Ana Tia Kakoaua Iehova n te Katenibong, Maati 8 2006. Ai 94 ana ririki ni maiu, ao e a raka i aon 73 ana ririki ni kabwanina ana tai n te mwakuri ni minita.

E bungiaki Brother Schroeder i Saginaw ae kaawan Michigan, n te U.S.A. n 1911.a Ngke e uarereke, e bati reireiana mairoun tibuna te aine are e karina naba i nanona tangiran te wareware n ana Taeka Iehova. E reirei i aon te taetae n Ratine, Tiaman, ao te rabakau ae irekereke ma te iti n te kuura ae rietata i Michigan. Ma ngke e a rikirake tangiran te Baibara irouna, ao e a katoka ana reirei n te kuura ae rietata, ao e a kabwanina ana tai n uarongorongoa te Tautaeka n Uea. N 1932 e a kaaina te utu ni Betaera i Brooklyn i New York.

N te ririki 1937 ngke ai 26 ana ririki Brother Schroeder, ao e a mwiokoaki n tararuan aia mwakuri Ana Tia Kakoaua Iehova i aon Buritan. Ingaingan nanona n te mwakuri n uarongorongo e kaungaia aomata aika mwaiti bwa a na kani kabwanina aia tai n te mwakuri ni minita. Ni menana n te Betaera are i Ranran, ao e iraorao ma te roronga temanna ae arana John E. Barr. Rimwi riki a kaai ni beku i nanon ririki aika bati bwa kaain te Rabwata n Tautaeka.

E ataaki ana mwakuri Brother Schroeder ibukia Ana Tia Kakoaua Iehova ake e karaoi i nanon ririki ake e boo iai te buaka. N Aokati 1942, ao e a kanakoaki man te aba ae Buritan, ao imwin mwanangana ae karuanikai ibukin te boo ni buaka rinanon te marawa ae te Atlantic, ao e a roko raoi i Brooklyn n Tebetembwa.

Ana toro Iehova ake a maiu n te tai anne a kakaantaningaa te mwakuri ae abwabwaki ae riai ni karaoaki imwin tian te Kauoua ni Buaka are Kabuta te Aonnaba. E mimi Brother Schroeder ao e kukurei ni mwiokoana are imwina ae anganaki, are boni katauraoan te reirei ae na waakinaki n te Kuura ni Kireata. Ikanne are e a riki iai bwa te tia reirei i nanon ririki aika mwaiti, ibukin kataneiaaia mitinare. A bae ni kukurei n ururinga aron ana angareirei teuaei, ataein te reirei n te kuura anne ao imwina riki n te Kuura ni Minita Ibukin te Tautaeka n Uea. E mamate nanona ni kani karina tangiran ana tua te Atua i nanoia aomata ake e reireinia, ao e kaatuua riain ataakin raoi Iehova.

N 1956, e a mare Brother Schroeder ma Nei Charlotte Bowin, ao e bungiaki natia ae Judah Ben, n 1958. E a riki bwa te buu-te-mwaane ao te karo ae tamaroa Brother Schroeder. E a kaaina te Rabwata n Tautaeka n 1974, ao e rangi ni manena ana atatai n ana mwakuri iai. E akoi ao e nanorinano, ao e moanibwaia kamoamoan aran te Atua ae kakannato. Ti aki nanououa ngkai bwa e a tia Brother Schroeder ni karekea kaniwangana i karawa, kioina ngkai bon te Kristian ae kabiraki ngaia, ae e ‘kimwareirei n ana tua Iehova.’—Taian Areru 1:2.

[Kabwarabwara ae nano]