E Kakorakoraki Te Ninikoria N Te Tangira

“E aki anganira te Atua te nano ae mamaku; ma E anganira te nano ae korakora, ae tatangira te aba, ae kawanawana te aba.”​—2 TIMOTEO 1:7.

1, 2. (a) E kona ni kaumaka te aomata te tangira nakon karaoan tera? (b) Bukin tera ngkai e rianako ninikorian Iesu?

A TEBO i taari ma aia bwai n tebo te taanga ae a tibwa mareaki, n te tabo ae uakaan ma te kaawa teuana i Aotiteria maeao. Ngke a nang otirake i aon taari, ao e a roko naba te bakoa ni neiere te aine. Ma e ninikoria te mwaane aei, n anga ngaia nakon te bakoa ao e butua nako buuna. E taku neiei ngke e taunaki buuna: “E anga maiuna ibukiu.”

² Eng, e kona te tangira ni kaumaka te aomata bwa e na kaota ninikoriana ae rianako. E bon taekina naba ae kangai Iesu Kristo: “Akea temanna ae e ababaki riki ana tangira nakon ana tangira te aomata ae e anga maiuna i bukia raona.” (Ioane 15:13, BK) E kee i aan 24 te aoa imwin taekinan taeka aikai iroun Iesu, ao e a anga naba maiuna tiaki tii ibukin temanna te aomata, ma te botannaomata ni kabane. (Mataio 20:28) Irarikin anne, e aki manennanti iroun Iesu te anga maiuna ngke e roko nanona n ninikoria. Ma e a kaman ataia ae e na bwainingareaki, e na bwainikirinaki, e na motikaki taekana ao n tiringaki i aon te kai ni kammaraki. E a kaman katauraoia naba taan rimwina ibukin aio ngke e kangai: “Noria, ti nako Ierutarem; ao ane E na kamwaneaki Natin te Aomata nakoia ibonga ake a kakanato, ma taani koroboki; ao ane a na motika taekana ba E na kamateaki, ao ane a na angania Tientaire: ao ane a na kakanikoa, ao a na kataerea, ao a na bawareia, ao a na kamatea.”​—Mareko 10:33, 34.

3. Tera ae e kakorakoraa ninikorian Iesu?

³ Baikara baike a karianakoa ninikorian Iesu? E karianakoaki man ana onimaki ao maakakin te Atua irouna. (Ebera 5:7; 12:2) Ma ae kakawaki riki, bwa ninikorian Iesu e aanaki man ana tangira ibukin te Atua ao taan rimwina. (1 Ioane 3:16) Ngkana ti karikirakea te aeka n tangira anne, irarikin te onimaki ao maakan te Atua, ti kona naba ni kaotiota te ninikoria are e kaotiotia Kristo. (I-Ebeto 5:2) Ti na kanga ni karikirakea te aekaki n tangira anne? Ti riai n ataa moa nibwan te tangira anne.

“Mairoun te Atua te Tangira”

4. Bukin tera ngkai e kona n taekinaki Iehova bwa Nibwan te tangira?

⁴ Iehova bon te tangira ao Nibwana naba. E korea ae kangai te abotoro Ioane: “Ngkami aika kam tangiraki, ti na i tangitangiri: ba mairoun te Atua te tangira; ao ane iai te tangira i rouna, ao e bungiaki mairoun te Atua, ao e ata te Atua. Ane akea te tangira i rouna, ao e aki ata te Atua, ba te Atua bon te tangira.” (1 Ioane 4:7, 8) Mangaia are, e tii kona te aomata ni karikirakea te tangira n Atua ngkana e kaania Iehova rinanon te atatai ae eti ao ni maiuakina te atatai anne ma nanona ni koaua.​—I-Biribi 1:9; Iakobo 4:8; 1 Ioane 5:3.

5, 6. Tera ae buokiia taan rimwin Iesu rimoa bwa a na karikirakea te tangira ae aekan ana tangira Kristo?

⁵ N ana kabanea n tataro Iesu ma ana abotoro aika 11 aika kakaonimaki, ao e kaota irekereken ataakin te Atua ao rikiraken te tangira ngke e kangai: “I a tia ni kaota taekam nakoia, ao N na kaotia riki, ba e aonga ni mena i nanoia te tangira are ko tangirai iai, ao I aonga ni mena naba i nanoia.” (Ioane 17:26, BK) E buokia taan rimwina Iesu bwa a na karikirakea te aeka n tangira are e reke i marenana ma Tamana, ao ni katereterei naba ni baike e taekin ao ni karaoi bwa aran te Atua e tei naba ibukin aroaron te Atua aika moanibaan te raoiroi. Mangaia are e a manga kangai Iesu: “Ane e a tia n norai ao e a tia n nora naba te Tama.”​—Ioane 14:9, 10; 17:8.

⁶ E reke te tangira are aekan ana tangira Kristo mairoun taamnein te Atua. (I-Karatia 5:22) A a aki tii uringi baika bati ake a reiakin iroun Iesu Kristian rimoa, ma a ataa riki nanon te Baibara, ngke a ruonaki n te taamnei ae raoiroi are e beritanaki, ni Bentekota 33 C.E. Ootaia ae nano anne, e a kateimatoaa aia tangira nakon te Atua. (Ioane 14:26; 15:26) Tera mwina? A ingainga nanoia ao n ninikoria n tataekina te rongorongo ae raoiroi n aki mamaaku, e ngae ngke a ruanikai maiuia iai.​—Mwakuri 5:28, 29.

Kaotiotan te Ninikoria ao te Tangira

7. Tera are a riai n nanomwaaka i aana Bauro ao Barenaba ngke a kaai ni mwananga ni mitinare?

⁷ E korea ae kangai te abotoro Bauro: “E aki anganira te Atua te nano ae mamaku; ma E anganira te nano ae korakora, ae tatangira te aba, ae kawanawana te aba.” (2 Timoteo 1:7) E taekina te bwai ae e tia n rinanona Bauro. Iangoia bwa tera are e riki nakoina ma Barenaba, ngke a kaai ni mwananga ni mitinare. A uarongorongo ni kaawa aika bati n aron Antioka, Ikonio ao Rutetera. Tabeman aomata ni kaawa aikai, a a riki bwa taan onimaki ao tabeman riki, a a riki bwa taan karitei nakon te koaua. (Mwakuri 13:2, 14, 45, 50; 14:1, 5) A un taan iowawa i Rutetera, ao a karebana Bauro ao ni kitanna ngke a taku bwa e a mate! “Ma ngke a tei reirei n otabaninia, ao e tei rake, ao e nako n te kawa: ao ngke e a ingabong ao e nako ma Barenaba nako Rerebe.”​—Mwakuri 14:6, 19, 20.

8. E kanga ninikoriaia Bauro ma Barenaba ni kaotiota korakoran aia tangira nakoia aomata?

⁸ Ma te koaua bwa kani kamatean Bauro aei, e a kakamaakaki iai ma Barenaba n te aro are a a katoka aia uarongorongo? Tiaki! ao ni kaaitaran anne, imwin ‘kakiritianakia aomata aika bati’ i Rerebe, “a a manga okira Rutetera, ao Ikonio, ao Antioka.” Bukin tera? Ibukini kaungaia ake a boou bwa a na teimatoa ni korakora aia onimaki. A taku Bauro ao Barenaba: “Ti riai n ri nanon rawawata aika a bati bwa ti aonga n rin n Uean te Atua.” E teretere bwa e reke ninikoriaia man korakoran tangiraia ana “tiibu aika ataei” Kristo. (Mwakuri 14:21-​23; Ioane 21:15-17) Imwin rineaia unimwaanen ekaretia nako aika boou, a tataro taari mwaane aika uoman aikai, “ao a anga te koraki nakon te Uea are a onimakinna.”

9. Tera aroia unimwaanen Ebeto nakon ana tangira Bauro ibukiia?

⁹ Bon te aomata ae tatangira ma n ninikoria Bauro, ao a mwaiti Kristian rimoa aika a rangi n tangiria. Uringnga bwa tera are e riki n aia boowi Bauro ma unimwaanen Ebeto, are e a tia ni kabanea tenua te ririki iai man n nori aaro ni karitei aika bati. (Mwakuri 20:17-31) Imwin kaungakia bwa a na kawakina ana nanai te Atua are a mwiokoaki iai, ao a a bobaraki n tataro ma Bauro. Ikanne are a a “bane n tang, ao a rabata Bauro ma ni kaboria ma ngaia. A nanokawaki riki n ana taeka ngke e taku ba a na aki manga nora matana.” Ai korakorara tangiran Bauro irouia taari aikai! A “karaure ma ngaia” n te tai are a nang raurenako iai Bauro ma raona ni borau, ao a a rawa unimwaanen te Ekaretia i I-Ebeto ni kanakoia.​—Mwakuri 20:36–​21:1, BK.

10. A kanga ana toro Iehova ni boong aikai n ninikoria ni kaotiota aia tangira i marenaia?

¹⁰ Ni boong aikai, e korakora naba tangiraia mataniwi aika mwamwananga, unimwaanen te ekaretia ao tabeman riki, ibukin ninikoriaia n tei ibukiia ana tiibu Iehova. N te katoto, n aaba aika karawawataki kaaia ibukin te buaka ae waakinaki i marenaia kaain te aba anne, ke e katabuakaki aia waaki n uarongorongo, a a tia naba mataniwi aika mwamwananga ma buuia ni kariaia bwa a na ruanikai maiuia ke ni kabureaki ibukini kawaran ekaretia aikai. N aron naba anne, a mwaiti taani Kakoaua ake a a tia n rotaki buaka n aia kakaaitara ae iowawa taan tautaeka ma aia aomata, ibukina bwa a aki kona ni kaota nanoia raoia aika taani Kakoaua bwa a na kabureaki naba, ke ni kaota te tabo are e rereke mai iai kanaia n taamnei. Ngaa ma ngaa ake a a bwainikirinaki, a kammarakaki ao n tiringaki naba ibukin aki katokan tataekinan te rongorongo ae raoiroi ke ni katoka reitakia ma raoia n onimaki ni kaakaean bobotaki ni Kristian. (Mwakuri 5:28, 29; Ebera 10:24, 25) Ti bia kakairi n aia onimaki ao n aia tangira taari mwaane ao aine aika ninikoria aikai!​—1 I-Tetaronike 1:6.

Tai Kariaia Bwa E na Mauna Am Tangira

11. N te aro raa, are e a karika iai te buaka ni kaineti ma te onimaki Tatan nakoia ana toro Iehova, ao tera ae a riai ni karaoia?

¹¹ Ngke e karenakoaki Tatan nako rarikin te aonnaba, e ingainga nanona ni kaota unna i aoia ana toro Iehova, ibukina bwa a “kakawakin ana tua te Atua, ma n taua kaotiotan Iesu.” (Te Kaotioti 12:9, 17) Teuana mai buakon ana waaki n nanowanawana te Riaboro bon te bwainikirinaki. N angiin te tai ao waaki n nanowanawana aika kewe aikai, a kariki aaro aika a aki kaantaningaki irouia ake a karaoi, ibukina bwa e a kaania riki ana aomata te Atua n te itangitangiri ni Kristian ao e kairiia aika mwaiti bwa a na ingainga riki nanoia. Teuana riki ana waaki n nanowanawana Tatan, bon anaakin nanoia aomata nakoni karaoan mwakuri aika bubuaka. Te rarawa nakon te iango aei, e kainnanoaki iai te aeka n ninikoria ae kaokoro, ibukina bwa te buaka iai bon i nanon te aomata, ike e na buakana iai tangiran baika a aki riai ake i nanona, ae “kakamarua.”​—Ieremia 17:9, BK; Iakobo 1:14, 15.

12. E kanga Tatan ni kabongana “nanon aon te aba” n iangoan kamamaraan tangiran te Atua iroura?

¹² Iai riki ana bwai ni buaka Tatan ae mwaakaroiroi mai buakon ana bwai ni buaka aika bati, bwa “nanon aon te aba.” Nanon aon te aba e kaineti ma te aroaro ae ituia angiia aomata, ae kaitaraa raoi ana mwakuri taamnein te Atua ae raoiroi. (1 I-Korinto 2:12) E karikirakea te mwangainrang ao te mataai ni kanibwaibwai nanon aon te aba ae “aia kaibabaru maata.” (1 Ioane 2:16; 1 Timoteo 6:9, 10) E ngae naba ngkai a aki kammaraki bwaai n rabwata ma te mwane, ma ngkana e a tokanikai riki tangiraia nakon tangiran te Atua iroura, e a tokanikai ngkanne Tatan i aora. E mwaaka nanon aon te aba ngkai e korakora ana anainano nakon kaibwabwarun te rabwata, e nanowanawana, e teimatoa, ao e taabangaki n ai aron te ea. Tai kariaia bwa e na kabarekaki nanom n nanon aon te aba!​—I-Ebeto 2:2, 3; Taeka N Rabakau 4:23.

13. E na kanga n kataaki ninikoriara ibukini kateimatoan te aroaro ni maiu ae riai iroura?

¹³ E kainnanoaki te ninikoria ibukini kateimatoan aroarora aika riai, ngkana ti na rarawa nakon nanon aon te aba. N te katoto, e kainnanoaki te ninikoria bwa ko aonga n teirake ao n otinako man te tabo n taamnei ke ni kamatea te kombiuta ke te TV ngkana a oti taamnei aika bwaitingako. E kainnanoaki naba te ninikoria n rawa nakoni karirii aika bubuaka mairouia tabonrorom ao katokan naba am iraorao ma akana buakaka. N aron naba anne, e kainnanoaki te ninikoria ibukini boutokaan ana tua ao ana boto n reirei te Atua, n aki ongei kakaniko tao mairouia raora n reirei, raora ni mwakuri, kaain rarikira, ke ara utu.​—1 I-Korinto 15:33; 1 Ioane 5:19.

14. Tera ae ti riai ni karaoia ngkana ti a kabarekaki n nanon aon te aba?

¹⁴ Ai kakawakira ae ti na kakorakoraa tangiran te Atua ao tarira ma mwanera n te onimaki! Karekea am tai n tuoi tiam ao anuani maium bwa ko aonga n ataia bwa tao e a tia ni kabarekako nanon aon te aba n te aro teuana ke e tuai. Ngkana e a tia, tao n te aro ae uarereke, tataro nakon Iehova bwa e na anganiko te ninikoria ni kanakoa ao n teimatoa ni kararoaa. E na boni mutiakin ara tataro ni bubutii Iehova. (Taian Areru 51:17) Irarikin anne, e rangi ni korakora riki mwaakan taamneina nakon nanon aon te aba.​—1 Ioane 4:4.

Kaitaraan Oin Kataakira ma te Ninikoria

15, 16. E na kanga ni buokira te tangira ae aron ana tangira Kristo ni kaaitarai oin kataakira? Anga te katoto teuana.

¹⁵ Kataaki riki tabeua ake a na kaaitara ma ngaai ana toro Iehova, e nanonaki naba iai mwin te aki kororaoi ao te kara, ao n angiin te tai bon namakinan te aoraki, te mwauku, te rawawatannano ao ai kangaanga riki tabeua. (I-Rom 8:22) E kona ni buokira te tangira are aekan ana tangira Kristo ni kaaitarai kataaki aikai. Iangoa ana katoto Namangolwa, are e kaikawaki n te utu ni Kristian i Zambia. E mwauku neiei ngke uoua ana ririki. E taku: “I rangi ni maamaa, n iangoan are a na rangi ni mimi aomata n taraakiu. Ma a buokai mwaneu n te onimaki, bwa N na bita au iango iai. N tokina, I a tokanikai i aon te maamaa bwa i mwin tabeua te tai ao I a bwabetitoaki.”

¹⁶ E ngae ngke iai ana kaa ae kokokaki Namangolwa, ma n angiin te tai e kawakawa n te kawai ae kaabikebike man baareka. Ma e boni buoka naba te mwakuri ni minita neiei ni karaoan te auxiliary pioneer uoua te namwakaina ni katoa ririki. E tang temanna kaain te auti are e uarongorongo Namangolwa nakoina. Bukin tera? Ibukini korakoran riingan nanona n noran ana onimaki ma ninikorian tarira aei. E noraki Ana kakabwaia Iehova ae bati, bwa ai niman aomata ake a reirei n te Baibara ma Namangolwa aika a a tia ni bwabetitoaki ngkai ao temanna e a riki bwa unimwaanen te ekaretia. E taku Namangolwa: “N angiin te tai a a korakora marakin waeu ma I aki kariaia bwa e na toki au mwakuri ibukin aei.” Te tari te aine aei, bon temanna mai buakoia taani Kakoaua ni katobibia te aonnaba, ae e mamaara rabwatana ma e rangi ni korakora ana onimaki ibukin tangiran te Atua ao aomata. Ai korakorara tangiraia aeka n aomata aikai ni kabane i matan Iehova!​—Akai 2:7.

17, 18. Tera ae e a tia ni buokiia aomata aika bati bwa a na nanomwaaka i aan aorakiia ao kataaki tabeua riki? Anga katoto tabeua aika riki man am tabo.

¹⁷ E kona ni kabwaranano naba te aoraki ae kakaiaki ke ni karawawataa te nano. E taku temanna te unimwaane n te ekaretia: “N te kurubu ibukin te reirei n te boki are I iriria ao temanna te tari te aine aorakina te tioka ao e mamaara naba ana kirine, are temanna e kaentia, taari aine ake uoman a korakora booriia, ao te tari te aine are temanna e reke irouna te aoraki ae te lupus ae a rotakibuaka iai tautian rabwatana ao te fibromyalgia ae aorakin ana mwatireti. A bon namakina naba te bwarannano n taai tabetai. Ma a tiku man bobotaki tii ngkana a a bon rangi n aoraki ke a rin n te oo-n-aoraki. A bane naba ni katoatai n roroko n te mwakuri ni minita. A kauringai ana taeka Bauro ae kangai: ‘Ngkana I mamara, ao I korakora.’ I mataiakina aroia n tatangira ao n ninikoria. Tao aroia aei e buokia ni kaatuui baika kakawaki riki ni maiuia.”​—2 I-Korinto 12:10.

¹⁸ Ngkana ko kabokorakora ma mamaaran rabwatam, te aoraki, ke kangaanga tabeua riki, “tataro n aki toki” ibukin buokam bwa e aonga n aki bwara nanom. (1 I-Tetaronike 5:14, 17) Ni koauana, ko bae n namakina te kukurei ao te nanokawaki, ma kataia ni kaatuua am iango i aoni baika a kaunganano, mwakuri aika kakukureia te Atua, ao riki te kaantaninga ae kakukurei ibukin te Tautaeka n Uea. E taku temanna te tari te aine: “Ngai irou, bon te bwainnaoraki te mwakuri ni minita.” E buokaki neiei bwa e na teimatoa n iaiangoi baika raraoi man uataboan tibwaakin te rongorongo ae raoiroi.

E Buokia Taani Bure te Tangira Bwa A na Okira Iehova

19, 20. (a) Tera ae kona ni buokia te koraki ake a a riki bwa taani bure, bwa a na manga karikirakea ninikoriaia n okira Iehova? (b) Tera ae na maroroakinaki n te kaongora ae imwina?

¹⁹ A mwaiti aomata ake a mamaara aia onimaki ke ake a a tia ni bure, aika a namakinna bwa e kangaanga irouia okiran Iehova. Ma e kona n reke te ninikoria ae a kainnanoia, ngkana a raraoma ni koaua ao ni karikirakea tangiran te Atua. Iangoa Mario ae maeka n te United States.a E kitana te ekaretia ni Kristian, ao e a riki bwa te tia mamanging ao ni kamanenai taian drug. Imwin 20 te ririki e a kabureaki. E taku Mario: “I a moanna ni kananoa au iango ibukin arou nakon taai aika a na roko ao ni manga wareka te Baibara. Imwin tabeua te tai, I a moanna n namakin raoi aroaron Iehova, riki ana nanoanga, are I aki toki n tataroia. Imwin kainaaomatakiu man te karabuti, I a kararoai ma raoraou ake rimoa, I a iriri ni bobotaki ni Kristian, ao I a manga kaokaki nakon te ekaretia n taina ae riai. I namakinna n rabwatau bwa I a anaa uaan are I a tia n unikia, ma e ngae n anne I ataia ngkai bwa e a reke irou te kaantaninga ae kakukurei. I rangi ni kakaitaua Iehova ibukin ana nanoanga ao nanona ni kani kabwarai buure.”​—Taian Areru 103:9-13; 130:3, 4; I-Karatia 6:7, 8.

²⁰ Te koaua bwa aomata n aron Mario, a riai ni kakorakoraia ngkana arona bwa a na okira Iehova. Ma rikiraken te tangira i nanoia imwin te reirei n te Baibara, kananoan aia iango, ao te tataro, e anganiia te ninikoria ao te nanomwaaka ae a kainnanoia. E kakorakoraki naba Mario n te kaantaninga ae kakukurei ibukin te Tautaeka n Uea. Eng, te kaantaninga ae raoiroi e kaai n ibuobuoki ma te tangira, te onimaki ao mwaakan te Atua, ni kanakoraoa maiura. N te kaongora ae imwina, ti na rinanon te bwaintangira ae irekereke ma te onimaki aei.

[Kabwarabwara ae nano]

Ko Kona ni Kaeka?

• E kanga te tangira ni buoka ninikorian Iesu bwa e na rianako?

• E kanga n reke ninikoriaia ae kaokoro Bauro ao Barenaba man tangiraia tariia?

• N te aro raa are e kataia iai Tatan n urua te tangira ni Kristian?

• Kataaki raa ae e kona tangiran Iehova n anganira te ninikoria bwa ti na nanomwaaka iai?