Rooro N Rikirake​—ukoukori Tiia Aika Karinea Te Atua

“Ko na kakorakorako n reireiko tangiran te Atua.”​—1 TIMOTEO 4:8.

1, 2. (a) E aera ngke e kamoamoaki Timoteo iroun Bauro? (b) A kanga rooro n rikirake ni boong aikai ni ‘kakorakoraia n reireiia tangiran te Atua’?

“BON TI ngaia au aomata ae e boraoi ana iango ma au iango, ao e tabe nanona iroumi ni koaua. . . . e a tia ni buokai n ai aron te nati ni buoka tamana, i bukin te Euangkerio.” (I-Biribi 2:20, 22, BK) E karin ana taeka aikai ni kamoamoaiia Kristian ake i Biribi te abotoro Bauro, n ana reta nakoia n te moan tienture. Antai are e taekinna iai? Bon Timoteo, are raona ni mwamwananga ae ataei riki. Iangoa kaungaan Timoteo n noran ana tangira ni koaua Bauro ao onimakinana irouna!

² A rangi ni kakawaki rooro n rikirake aika mamaaka te Atua n aron Timoteo, irouia ana aomata Iehova. (Taian Areru 110:3) E kakabwaiaki ana botaki te Atua ni boong aikai irouia rooro n rikirake aika mwaiti aika a bwaiania, a mitinare, aika anga nano ibukin te kateitei ao aika mena n te Betaera. A rangi ni kamoamoaki naba te koraki ake a uataboi mwakurin te ekaretia ma te ingaingannano, i rarikin tabeia tabeua. A a tia rooro n rikirake aikai, ni karekea te raunnano man ukoukoran tiia aika karinea Tamara ae Iehova. A ‘kakorakoraia n reireiia tangiran te Atua.’​—1 Timoteo 4:8.

3. Titiraki raa, aika a na maroroakinaki n te kaongora aei?

³ Ko kakorakorako n uaiakin tiia aika kakukureia te Atua, ngkai te roro n rikirake ngkoe? E na reke iia buokam ao kaungaan nanom n aei? Ko na kanga n rarawa nakon bwaikorakin te maiu aei? Baikara kakabwaia aika ko kaantaningai ngkana ko ukoukori tiia aika karinea te Atua? Ti na nori kaekaan titiraki aikai n rinanoan maiun Timoteo ao ana mwakuri.

Rongorongon Timoteo

4. Taekina nakoan Timoteo ni Kristian ni kakimototoa.

⁴ E ikawairake Timoteo i Rutetera, ae te kaawa ae uarereke ni mwakoron Rom i Karatia. E reiakina te aroaro ni Kristian teuaei ngke tebwi tabun ana ririki, n rokon Bauro n uarongorongo i Rutetera tao n 47 C.E. E waekoa n reke anuan maiun Timoteo ae moan te raoiroi i buakoia taari aika Kristian n te tabo anne. N okin Bauro nako Rutetera uoua te ririki imwin aei, ao ngke e a nora rikiraken Timoteo n te onimaki, e a rineia bwa raona n te mwakuri ni mitinare. (Mwakuri 14:5-​20; 16:1-3) Ngke e a ikawai riki Timoteo n te onimaki, e a anganaki mwiokoana aika kakawaki riki, n ikotaki naba ma te mwamwananga ibukin kakorakoraaia taari. Ngke e kororeta Bauro nakon Timoteo man te karabuti i Rom tao n 65 C.E., e a riki Timoteo n te tai anne bwa unimwaanen te ekaretia i Ebeto.

5. Ni kaineti ma 2 Timoteo 3:14, 15, BK, baikara baike uoua aika riai n iangoaki, ake a kaira Timoteo nakon ukoukoran, tiia aika kakukureia te Atua?

⁵ E teretere bwa e rinea ukoukoran tiia aika kakukureia te Atua, Timoteo. Ma tera ae kairia bwa e na karaoa aei? E taekin baika riai n iangoaki aika uoua Bauro n ana kauoua n reta nakon Timoteo ni kangai: “Ko na teimatoa i nanon te reirei ae ko a tia n anganaki ao ae ko a tia ni butimaia ma ni kakoaua. Ko bon ataia ba antai uake a reireiniko. Ko atai taiani Koroboki aika a tabu mangke te tei ngkoe.” (2 Timoteo 3:14, 15, BK) Ti na nenera moa ngkai aia mwakuri Kristian tabeman ni kaineti ma ana motinnano Timoteo.

Kakabwaiaki n te Kairiri ae Raoiroi

6. Tera te reirei are reke nakon Timoteo, ao tera arona iai?

⁶ E kaikawaki rake Timoteo n te mweenga ae a kakaokoro aia Aaro kaaina. Te I-Erene tamana, ao tinana ae Eunike ma tibuna ae Roiti kaain Iutaia. (Mwakuri 16:1) E reiakinaki Timoteo te koaua man te Baibara n Ebera, ma ngke te merimeri ngaia irouia Eunike ao Roiti. Imwin rairakia naakai nakon te Aro ni Kristian, e kakoauaki bwa a kaungaa Timoteo bwa e na kakoauaa te reirei ni Kristian. E mataata bwa e korakora kakabwaian Timoteo man te reirei ae moan te raoiroi aei. E taku Bauro: “I uringa te onimaki ni koaua ane i nanom, are maeka moa i nanon tibum are Nei Roiti ma tinam are Eunike; ao I bon ataia ba e mena naba i nanom.”​—2 Timoteo 1:5.

7. Baikara kakabwaia aika reke irouia rooro n rikirake aika bati, ao a na kanga ni kona ni kakabwaiaki mai iai?

⁷ Ni boong aikai, a mwaiti naba rooro n rikirake aika mamaaka te Atua aia karo ao tibuia aika titeboo aroia ma Roiti ao Eunike, aika a ataa kakawakin uaiakinan tiia aika kakukureia te Atua. N te katoto, e teimatoa Nei Samira n ururinga ana tai ni maroro aika moan te abwabwaki ma ana karo, ngke tebwi tabun ana ririki. E taku: “A reireinai tamau ma tinau bwa N na iaiangoi bwaai n aron iangoaia iroun Iehova, ao ni moanibwaia te uarongorongo ni maiu. A aki toki ni kaungaai bwa N na mwakuri ibukin te Atua ni kabwanina au tai.” E toua mwin aia kaungaunga ana karo Samira ao ngkai e a riki bwa kaain te utu ni Betaera i aon abana. Ngkana a kaungako am karo bwa ko na kaatuua am iango i aon tiia aika kakukureia te Atua, karaua raoi n iaiangoi aia reirei. A tangiria bwa ko na rangi ni kukurei i aoni maium.​—Taeka N Rabakau 1:5.

8. E kanga ni kakabwaiaki Timoteo n raoraonakia Kristian aika karikirakea te onimaki?

⁸ E kakawaki naba bwa ko na ukoukoriia raoraom mai buakoia taari aika katiteuanaki ni katobibia te aonnaba aika karikirakea am onimaki. E rikirake n rangi ni kinaaki Timoteo irouia unimwaanen te ekaretia n ana tabo ao ake i Ikonio naba, ae tao 30 te kiromita raroana man ana tabo. (Mwakuri 16:1, 2) E karikirakea ana iraorao ae kaan ma Bauro, ae te aomata ae ingainga nanona ma ni wanawana. (I-Biribi 3:14) E kaotaki n ana reta Bauro bwa e nabeakin reireiana Timoteo, ao e waekoa ni kakairi ni maiuia aomata aika onimaki. (1 I-Korinto 4:17; 1 Timoteo 4:6, 12-16) E korea ae kangai Bauro: “Ko toua mwin au reirei ngkoa, ma arou ni maeka, ma nanou, ma au onimaki, ma taotaonan nanou, ma au tangira, ma nanomwakau.” (2 Timoteo 3:10) Eng, e toua raoi mwin ana katoto Bauro, Timoteo. N aron naba anne, ngkana ko kaaniko ma aomata aika korakora aia onimaki n te ekaretia, ko na buokaki iai ni katei tiam aika kakukureia te Atua.​—2 Timoteo 2:20–​22.

Reiakin “Koroboki Aika A Tabu”

9. Irarikin rineaia raoraom aika riai, tera ae ko riai ni karaoia bwa ko aonga n ‘reireiniko tangiran te Atua’?

⁹ Te koaua bwa ti na roko n tiara aika kakukureia te Atua, tii man rineaia raoraora aika riai? Tiaki ngaia anne. N aron Timoteo, ko riai n neneri raoi “koroboki aika a tabu.” Tao e aki babane nanom n te reirei, ma uringnga bwa, e riai ni ‘kakorakora n reirei Timoteo ke ni kataneiaa n tangira te Atua.’ A aki toki naba ni kakorakoraia ni kataneiai taan takaakaro i nanon namwakaina aika bati, bwa a aonga n roko n tiaia. N aron anne, ti riai n anga naba nanora ao ni kakorakoraira bwa ti aonga n roko n tiia aika kakukureia te Atua. (1 Timoteo 4:8, 10) Tao ko kona n titiraki ni kangai: “Ma e na kanga ni kona ni karokoai n tiau reiakinan te Baibara?’ Ti na rinanon aanga aika tenua.

10, 11. Bukin tera ngkai a kona ni kaungako kiibu man te Baibara, bwa ko na roko n tiam aika kakukureia te Atua? Anga te katoto.

¹⁰ Te moan, e na karina i nanom kani karaoan te eti te Baibara. A kaota aroaron Tamara are i karawa aika kamimi, ana mwakuri n tangira ae te kabanea n raoiroi ibukira, ao te kakabwaia n aki toki are e kawakinna ibukia ana toro aika kakaonimaki. (Amota 3:7; Ioane 3:16; I-Rom 15:4) Ngkai e a rikirake am atatai ibukin Iehova, e nang rikirake naba tangirana ao nanom ni kani katabua maium nakoina.

¹¹ A taku rooro n rikirake aika bati, bwa e kakawaki te katoatai n reirei n te Baibara i bon irouia, ibukin karinan te koaua n aia kaantaninga. N te katoto, e kaikawaki Adele n te utu ni Kristian ma e aki kakatei tiana aika kakukureia te Atua. E taku neiei: “A kakairai au karo nakon te Tabo n Taromauri, ma I aki karaoa au ukeuke n reirei, ke ni kakauongo n taai ni bobotaki aikai.” Imwin bwabetitoan tarina ae ikawai riki, e a tibwa moanna Adele n iaiangoa te koaua ma nanona ni kabane. “I a moana warekan te Baibara ni kabanea. I wareware teutana, ao I a manga korea reireiau man te bwai ae I a tibwa tia ni warekia. I kawakin au koroboki aikai ni karokoa ngkai. I wareka te Baibara ni kabane i nanon teuana te ririki.” N tokina, e a kaungaki nanon Adele bwa e na katabua maiuna nakon Iehova. E ngae ngkai e mwauku neiei, ma e a riki ngkai bwa te bwaiania, ae kabwanina ana tai n tataekina te euangkerio.

12, 13. (a) Baikara bitaki aika e kona ni buokaki iai, te aomata ae reirei n te Baibara bwa e na karaoi, ao ni kanga? (b) Anga katoto i aon wanawana aika manena aika mena n Ana Taeka te Atua.

¹² Te kauoua, e na buokiko te Baibara bwa ko na bitii aroarom n aron ae riai. E tuanga Timoteo Bauro bwa a “manena” taiani “koroboki aika a tabu,” “nakon te reirei, ao nakoni kaotan ana buakaka te aomata nako ina, ao nakoni manga-kaetana, ao nakoni kawanawanana n te raoiroi: ba e aonga ni moan te raoiroi ana aomata te Atua, ao e na kabaneaki ni kataeaki nangina nakoni makuri aika raraoi ni bane.” (2 Timoteo 3:16, 17) Ngkana ko katoatai ni kananoa am iango i aon Ana Taeka te Atua, ao ni maiuakin ana boto n reirei te Baibara, ko a kariaia ngkanne taamnein te Atua bwa e na karaoiroa aroarom. A na rikirake iai i nanom aroaro aika riai, n aron te nanorinano, te nanomwaaka, te mwamwakuri ao tangiraia raom ni Kristian ni koaua. (1 Timoteo 4:15) Iai iroun Timoteo aroaro aikai, ao e a riki iai bwa buokan Bauro ao ekaretia ake e mwakuri iai Timoteo.​—I-Biribi 2:20-22.

¹³ Te katenua, e kawakinaki te wanawana ae manena n Ana Taeka te Atua. (Taian Areru 1:1-3; 19:7; 2 Timoteo 2:7; 3:15) E na buokiko n rineia raoraom ma te wanawana, rinean arom ni kakibotu ao ni kaaitarai kangaanga aika kakaiaki aika mwaiti kurikuri. (Karikani Bwaai 34:1, 2; Taian Areru 119:37; 1 I-Korinto 7:36) E kakawaki bwa ko na karaoi am motinnano ma te wanawana n taai aikai, bwa ko aonga n roko n tiia aika kakukureia te Atua.

“Buaka n te Buaka ae Raoiroi”

14. Bukin tera ngkai e aki bebete uaiakinan tiia aika kakukureia te Atua?

¹⁴ Moanibwaian tiia aika karinea Iehova, bon te maiu ae te kabanea n tamaroa, ma tiaki te kabanea ni bebete. Ngkana ko nang rinea nakoam, n te katoto, tao ko kona n taonaki nako ni kariri aika bati mairouia am koraki, tabonrorom ao taan reirei aika kakoauaa bwa baika kakawaki ibukin karekean te kabwaia ni koaua ao te kukurei, bon te reirei ae rietata riki ao te nakoa ae bubura te boo iai. (I-Rom 12:2) N aron Timoteo, ko riai ni “buaka n te buaka ae raoiroi,” ao ko na “taua te maiu are aki toki” are e katauraoia Iehova ibukim.​—1 Timoteo 6:12; 2 Timoteo 3:12.

15. Tera te riribai are e kona ni kaaitara ma ngaia Timoteo?

¹⁵ Ngkana a aki kariaia am motinnano kaain am utu aika tiaki kaain te onimaki, e kona ngkanne n rawawata riki kataakim iai. Tao e a tia n tokanikai Timoteo i aon te aeka n riribai anne. E kaotaki n te boki teuana bwa, tao ana utu Timoteo a “bubura aia reirei ao a kaubwai.” Tao e a tia ni kaantaningaia tamana bwa e na ukoukora te reirei ae rietata riki ao ni waakina nako ana bitineti n ana utu.a Iangoia bwa tera aron taman Timoteo, ngke e a ataia bwa e a kan minita natina i rarikin Bauro, ike e nang kaaitara iai ma kangaanga ao aki taun te kataumwane!

16. Tera aron temanna te roro n rikirake ni kaitaraa aia riribai ana karo?

¹⁶ A kaaitara rooro n rikirake aika Kristian ni boong aikai ma kangaanga aika aron aikai. E ururing rikaaki Mataio, ae mwakuri ni mwaangan aia aobiti n tararua Ana Tia Kakoaua Iehova ni kangai: “E rangi n aki kukurei tamau ngke I a moana au mwakuri ni bwaiania. E taku nakoiu bwa I ‘kabanebuakaa’ au reirei ni karaoan te mwakuri ae te kaitiaki ibukin boutokan au mwakuri ni minita. E bwainingareai, ni kauringai bwa e na rangi ni mwaiti ae I kona ni karekea ngkana I kabwanina au tai n te mwakuri ni kareketianti.” Tera aron Mataio ni kaineti ma te riribai anne? “I teimatoa ni kakoroa nanon au babaire ibukin au wareware n te Baibara ao I katoatai n tataro, riki n taai ake I namakinna bwa I a aki moa kona n taotaona nanou iai.” E kakabwaiaki nanomatoan Mataio. Imwin tabeua te tai, e a nakoraoi ana iraorao ma tamana. E a tia ni kaaniaki riki Mataio ma Iehova. E taku Mataio: “I a tia n namakina tabeakinan baika I kainnanoi iroun Iehova, e kaungaai ao e kamanoai man motinnano aika bubuaka. N na bon aki kona n nori baikai ngke arona bwa I aki ukoukori tiia aika kakukureia te Atua.”

Kaatuui Iangoan Tiia Aika Kakukureia te Atua

17. A na kanga tabeman ni kabwarai nanoia te koraki ake a iangoia bwa a na kabwanina aia tai ni mwakuri ibukin te Atua? (Mataio 16:22)

¹⁷ E kona naba ni bwara nanom man ukoukoran tiia aika kakukureia te Atua, mairouia raom ni onimaki. A kona n titirakiniko tabeman ni kangai: ‘E aera ngkai ko bwaiania?’ ‘Ko kona ni karaoa ae taneiai ni kaakaraoaki ao ni buoka naba te uarongorongo. Karekea nakoam ae bubura boom iai ao iangoia bwa ko na kaikoa am mwane.’ E kona n taraa ni manena te reirei aei, ma te koaua bwa ko na reireiniko tangiran te Atua, ngkana ko toua mwin te reirei anne?

18, 19. (a) Ko na kanga ni kaatuua am iango i aon tiia aika kakukureia te Atua? (b) Kabwarabwarai aanga aika ko na kakeako n taona nanom iai ibukin te Tautaeka n Uea, ngkai te roro n rikirake ngkoe.

¹⁸ Iai tabeman Kristian n ana tai Timoteo ake titeboo aia iango ma aei. (1 Timoteo 6:17) Ibukin buokan Timoteo bwa e na teimatoa n iangoi tiia aika kakukureia te Atua, e kaungaa Bauro ni kangai: “Akea te tia buaka temanna ae e na katabea nanona n taekan te maiu, ngkai e tabe ni kani kakukureia ana mataniwi are e karinna n ana taanga.” (2 Timoteo 2:4, BK) E aki kona te tautia ni kariaia bwa e na anaaki nanona nakon baika karaoaki irouia aomata aika tiaki tautia. E boto kawakinan maiuna ao maiuia tabeman riki n teimatoana n tauraoi ni karaoa are e tuangnga ana mataniwi. Ngkai te tautia ngkoe iroun Kristo, ko riai ni kaatuua naba am iango i aon te bwai ae tii teuana, ao rarawa ni kareketatiko ni bwain aon te aba aika aki rangi ni kakawaki, aika kona n tukiko man kakororaoan am mwakuri ni minita ae kakamaiu.​—Mataio 6:24; 1 Timoteo 4:16; 2 Timoteo 4:2, 5.

¹⁹ N onean mwin ae ko na uaiakina tiam ae te maiu ni kaubwai, karikirakea te nano ni kan anga boni ngkoe. “Ko na tauraoi ni kakeai toronibwain te maiu aei ngkai ko kaaina ana taanga ni buaka Kristo Iesu.” (2 Timoteo 2:3, The English Bible in Basic English) E reiakina karekean te raunnano n taai aika rangi ni karuanikai Timoteo, ngke e raona Bauro ni mwakuri. (I-Biribi 4:11, 12; 1 Timoteo 6:6-8) Ko kona ni karaoa aei naba. Ko a tia ni kataua bwa ko na kakeaa n taona nanom ibukin te Tautaeka n Uea?

Kakabwaia Ngkai ao n Taai Aika Imwaira

20, 21. (a) Taekin kakabwaia tabeua aika reke man ukoukoran tiia aika kakukureia te Atua. (b) Tera ae ko motinnanoia bwa ko na karaoia?

²⁰ I nanon 15 te ririki, ao e mwakuri Timoteo ma Bauro n taai nako. E nora moan katean taian ekaretia aika boou Timoteo, ngke e a buta nako te rongorongo ae raoiroi nakon angiin mwakoron te marawa ae te Mediterranean are mai meang. E a rangi ni kamimi riki maiuna ao ni karaunano riki nakon maiuna ngke arona bwa e rinea te maiu ae ‘taneiai ni kaakaraoaki.’ Ko na karekei naba kakabwaiam mairoun Iehova aika rangi ni manena, ngkana ko ukoukori tiia aika kakukureia te Atua. Ane ko na kaaniaki iai ma Iehova ao ni karekea tangiraia ao karineaia raom ni Kristian. N onean mwin karekean te maraki ao te bwarannano man ukoukoran te kaubwai, ko nang nora te kukurei ni koaua are reke man te mwakuri n tatangira. Ma ae rangi ni kakawaki mai buakon bwaai ni kabane, ko nang “taua te maiu ni koaua,” i aon te aba ae baretaiti.​—1 Timoteo 6:9, 10, 17-19; Mwakuri 20:35.

²¹ Mangaia are ngkana ko tuai karaoa aei, ti kaungako ma te tangira bwa ko na moanna n reireiniko tangiran te Atua. Kaaniko riki ma kaain te ekaretia ake a kona ni buokiko ni katei tiam aika kakukureia te Atua, ao ukoukora kairam mairouia. Moanibwaia te katoatai n reiakina Ana Taeka te Atua i bon iroum. Kananomatoako n rarawa nakon te nano n aonnaba ae tangiran te kaubwai. Ao uringnga n taai nako bwa e berita te Atua “ae kabane bwaai n anganira ba ti na kabatia te kukurei iai,” bwa ko kona ni karekei kakabwaia aika bati ngkai ao n te tai ae na roko ngkana ko rinei tiia aika karinea te Atua.​—1 Timoteo 6:17.

[Kabwarabwara ae nano]

Ko Uringnga?

• E na reke iia buokaia rooro n rikirake ibukin karokoaia n tiaia aika kakukureia te Atua?

• E aera ngkai e rangi ni kakawaki te reirei n te Baibara ae karauaki raoi n rinanoaki?

• A na kanga rooro n rikirake n rarawa nakon ana kariri bwaikorakin te aonnaba aei?

• Baikara kakabwaia aika reke man ukoukoran tiia aika kakukureia te Atua?

[Taamnei n iteraniba 28]

E ukoukori tiia aika raraoi Timoteo

[Taamnei n iteraniba 29]

Baikara kairiri aika raraoi ake a buoka Timoteo?

[Taamnei n iteraniba 30]

Ko kakorakorako ni karekei tiia aika kakukureia te Atua?