Akea Te Bwai Ni Buaka Teuana Ae Karaoaki N Ekiko Nako Ae Na Tokanikai
“Bon akea te kai-ni-buaka . . . ae karaoaki n ekiko nako ae na tokanikai.”—ITAIA 54:17.
1, 2. E kanga rongorongoia Ana Tia Kakoaua Iehova i Albania ni kaota koauan ana taeka Itaia 54:17?
TATABEBWI ririki n nako n te aba ae uarereke ae maungaunga i Eurobe Maiaki ao Mainiku, ao iai te koraki teuana ae kaainaki irouia Kristian aika ninikoria. E kabanea ana konaa te tautaeka ni Komuniti ae a taku bwa akea te Atua, ni kamaunaia te koraki aei. A kammarakaki n te aro ae iowawa, a kainaki n taabo ake a kamwakuraki iai n te aro ae rangi n rawawata ao a kabutaki rongorongoia aika kewe rinanon botaki ni kanakobwanaa, ma a bon aki kona ni katokiia baikai. Antai te koraki aei? Bon Ana Tia Kakoaua Iehova i Albania. E ngae ngke bobotakiia ao aia mwakuri n tataekina te rongorongo e rangi ni kangaanga, ma ibukina bwa a botumwaaka i nanon tatabebwi te ririki, e karineaki te aroaro ni Kristian ao e kamoamoaki aran Iehova. Ni katabuan aia aobiti n tararua ae boou n te ririki ae nako, e taekina ae kangai te tia kakoaua temanna ae teimatoa ni kakaonimaki n te tai ae maan: “N aki ongea ana kakorakora Tatan, ma e teimatoa ni konaaki iroun Iehova!”
2 Aikai boni bwaai ni kakoaua aika kaota koauan ana berita te Atua nakoia ana aomata ae koreaki n Itaia 54:17, ae kangai: “Bon akea te kai-ni-buaka teuana ae karaoaki n ekiko nako ae na tokanikai; ao ane ko na kabuakakai neewe ni kabane aika tei rake n ekiko nako ngkana e kaetaki taekam.” E kamatoaa naba anne rongorongon rimoa, bwa bon akea te bwai ae kona ni karaoia ana waaki Tatan ni katoka taromaurian Iehova ae te Atua, irouia ana toro aika a tia ni katabui maiuia.
E Matebuaka Ana Kakorakora Tatan
3, 4. (a) Baikara bwaai ni buaka aika e kabonganai Tatan? (b) N te aro raa ae kaotaki bwa a matebuaka ana bwai ni buaka te Riaboro?
3 Bwaai ni buaka aika kabonganaki ni kaaitaraki iai taan taromauri ni koaua, bon katabuakan aia mwakuri, kaaitarakiia irouia taan iowawa, te karabutinaki ao ai te “moti ae e buakaka.” (Taian Areru 94:20, BK) Ni koauana, n aaba tabeua ngkai a tabe Taani Kakoaua Iehova n rinanon te Kaongora aei, bon iai naba aika tabe ni “kataki” ni kaineti ma aia kakaonimaki iroun te Atua.—Te Kaotioti 2:10.
4 N te katoto, e ribootinna aia aobiti n tararua teuana Ana Tia Kakoaua Iehova bwa i nanon tii teuana te ririki, ao 32 te tai ae a kamwaruaaki iai ana toro te Atua n aia tai n ira te mwakuri ni minita. Irarikin anne, 59 te tai ae a katikaki iai irouia bureitiman ataei, kaara, mwaane ao aine ngke a tataekina te rongorongo. Tabeman a anaaki mwin tanen tabonibaia, a raweaki taamneia ao ni kamatawarikaki n ai aroia aomata aika taani kakeru. Tabeman a kakamaakaki bwa aongkoa a na kamwaruaaki. N te aba riki teuana, e raka i aon 1,100 ribooti aika tauaki mwiia ibukia Ana Tia Kakoaua Iehova aika katikaki ni kabureaki, a katuuaeaki n te mwane ke ni batibooaki. E raka i aon 200 man ribooti aikai, aika riki n aia tai ni botaki ibukin kanuringan maten Iesu! Ma e teimatoa taamnein Iehova ni kateimatoaia ana aomata, n aki ongei kangaanga aika korakora n aaba aikai, ao n aaba riki tabeua. (Tekaria 4:6) E aki konaa korakoran uniia taani kaaitara ni kaini wia te koraki aika a kamoamoaa Iehova. Eng, ti aki nanououa bwa bon akea te bwai ni buaka teuana ae kona n tuuka kakoroan ana kaantaninga te Atua.
A Kabuakakaki Taani Bukibuki ni Kewe
5. Baikara bukibuki ni kewe ake a kaitaraki iai ana toro Iehova n te moan tienture?
5 E taetae ni burabetinaki iroun Itaia bwa ana aomata te Atua a na kabuakakaia taani bukibuki ni kewe aika a kaaitaraia. N te moan tienture, a aki toki Kristian n uaraoaki ao ni kabuakakaki bwa taani kakaraoa ae buakaka. N te katoto teuana, a noraki taeka ni bukibuki ni Mwakuri 16:20, 21 ae kangai: “A bati ni kakiriwea ara kawa aomata . . . aikai, ao a reirei aaro aika aki riai ba ti na tauu, ke ti na karaoi, ngkai I-Rom ngaira.” N te tai teuana riki, kaain aaro aika taani kairiribai, a kataia ni kauekea i nanoia taan tautaekana te kaawa bwa a na kaaitaraia taan rimwin Kristo ngke a taku: “Uake a kakiriweia kaain aonaba a roko naba ikai; ao te koraki aei a bane n ri aon ana taeka Kaitara.” (Mwakuri 17:6, 7) E atongaki naba te abotoro Bauro bwa te tia “iowawa” ao mataniwin te katei n Aro teuana ae karika te kiriwe “i aonaba.”—Mwakuri 24:2-5.
6, 7. N te aro raa ae a kaotia iai Kristian bwa a kewe bukibuki aika bukinaki iai?
6 Ni kaineti ma aei, ti aki mimi irouia Kristian ni koaua ni boong aikai ngkai a kaitaraki ni bukibuki ni kewe, a uaraoaki n te aro ae kamarakinano ao waaki aika karaoaki ibukini kabuakakaaia. Ma ti kanga ni kaotia bwa a kewe taeka ni kabuakaka aikai?—Itaia 54:17.
7 E kaotaki kairuan bukibuki ma rongorongo ni kabuakaka, n aroaroia Ana Tia Kakoaua Iehova ni kaotiota te aroaro ni maiu ae raoiroi. (1 Betero 2:12) N aroia Kristian n ongeaba n tuan abaia, ni maiuakina te aroaro ni maiu ae riai ao n tabeakini mweeraoia aomata mai nanoia ni koaua, a kaotaraea iai bwa a kewe bukibuki aika bukinaki iai. Aroarora aika raraoi e riki bwa te bwai ni kakoaua. N norakira irouia aomata ae ti kateimatoai mwakuri aika raoiroi, a kairaki iai bwa a na neboa Tamara are i karawa ao ni kakoauaa ae a raoiroi riki aroaroni maiuia ana toro.—Itaia 60:14; Mataio 5:14-16.
8. (a) Tera ae kainnanoaki n taai tabetai ngkana ti na kaota tauani bukin ara koaua man te Baibara? (b) N arora ni kakairi iroun Kristo, ti na kanga ni kabuakakai taetae ni kakaaitara?
8 Irarikin maiuakinan aroarora ni Kristian, e kainnanoaki naba n taai tabetai kaotan tauan bukin ara koaua man te Baibara ma te ninikoria. Te anga teuana, ngkana ti kabaei tangira nakoni boowi ke tautaeka ibukini kamanoara. (Etita 8:3; Mwakuri 22:25-29; 25:10-12) N te tai teuana ngke e mena Iesu i aon te aba, e kaaitaraia taani bukinna i mataia aomata, ni kaota kairuan aia bukibuki. (Mataio 12:34-37; 15:1-11) Ti kakairi iroun Iesu, ngkana ti kamanenai taai aika angaraoi ni kamataatai iai baike ti kakoauai mai nanora nakoia tabemwaang. (1 Betero 3:15) Ti bia aki kariaia te kakaniko n ara tabo n reirei, n ara tabo ni mwakuri, ke mairouia ara koraki aika tiaki kaain te onimaki bwa e na katokiira man kaotiotan te koaua man Ana Taeka te Atua.—2 Betero 3:3, 4.
Ierutarem—“Te Atibu ae Rawawata”
9. Te Ierutarem raa ae kaikonakaki n te “atibu ae rawawata” are taekinna Tekaria 12:3, ao antai ae e tei ibukina i aon te aonnaba?
9 E kaota bukini kaaitaraia Kristian ni koaua ana taetae ni burabeti Tekaria. Iangoa ana taeka Tekaria 12:3 ae kangai: “Ao n te bong arei ao N na karaoa Ierutarem ba kaanga te atibu ae rawawata nakoia natanaomata ni kabaneia.” Ierutarem raa ae nanonaki n te taetae ni burabeti aei? E kaineti ana taetae ni burabeti Tekaria aei nakon “Ierutarem are i karawa,” ae te tautaeka n uea i karawa are a weteaki nako iai Kristian aika kabiraki. (Ebera 12:22) A teimatoa n tiku n te aonnaba ngkai nikiraia taan ababa n te Tautaeka n Uea Iroun te Mesia. Te koraki aei ma raoia aika “tiibu tabemang” a tabe ngkai ni kaumakiia aomata bwa a na rairi nanoia ngkai e reke aia tai, ao n aantaeka nakon Ana Tautaeka n Uea te Atua. (Ioane 10:16; Te Kaotioti 11:15) Ma tera aroia te botannaomata nakon te kakao aei? Ao tera ana boutoka Iehova nakoia taan taromauri ni koaua? Ti na noria ngkana ti nenera riki ae nanonaki n Tekaria mwakoro 12. Ni karaoan aei, ti a kona iai ni karekea te karaunano bwa ‘bon akea te bwai ni buaka’ ae na tokanikai n ekiia nako ana aomata te Atua aika kabiraki, ma raoia aika a a tia ni katabui maiuia.
10. (a) Bukin tera ngkai a kaaitaraki ana aomata te Atua? (b) Tera ae riki nakoia te koraki aika kataia n tabeka te “atibu ae rawawata” aei ao ni kanakoa?
10 E kaotaki n Tekaria 12:3 bwa a “bati n ikoaki” te natannaomata. E kanga n riki anne? E tua te Atua bwa e na tataekinaki rongorongon te Tautaeka n Uea. A mutiakina raoi mwiokoaia ae tataekinan te rongorongo Ana Tia Kakoaua Iehova. Ma e ngae n anne, tataekinan rongorongon te Tautaeka n Uea bwa te Tautaeka ae konaa ni katokii aia kangaanga aomata, e a riki bwa “te atibu ae rawawata” nakoia natannaomata. A kataia n tabekia ao ni kanakoa man aroia ni kamangaoia taan tataekina te rongorongo. Aio are a a “bati n ikoaki” iai taani kamangao aikai. A kabuakakaki taekaia ao aroaroia naba ngkai a aki tokanikai, n te aro ae kamaama. A bon aki kona ni kaini wia taan taromauri ni koaua, aika tangira mwiokoaia ae kakawaki ae taekinan te “euangkerio ae aki totoki,” ibukin ana Tautaeka n Uea te Atua Iroun te Mesia imwain tokin te waaki ae ngkai. (Te Kaotioti 14:6) E taekina ae aron aei mataniwin te karabuti n aban Aberika teuana n noran te mwakuri n iowawa ae karaoaki nakoia ana toro Iehova: ‘Kam kabanebuakai korakorami ni bwainikirinia te koraki aei. A na bon aki kakeaa aia onimaki ma a na rikirake riki.’
11. E kanga te Atua ni kaota kawakinan ana berita ae koreaki n Tekaria 12:4?
11 Wareka Tekaria 12:4. E berita Iehova bwa e na kamatakia n te aro ni kaikonaki ao n oreiia n te “kuba ni maku” te koraki ake a buakania ana aomata aika ninikoria, aika taan uarongorongoa te Tautaeka n Uea. E kawakina raoi ana berita Iehova. N te katoto, n te aba teuana ao e katabuakaki iai aia mwakuri taan taromauri ni koaua, ma e teimatoa n reke irouia booki aika kabwarabwaraa te Baibara ao n aki konaaki n tukaki irouia taani kaaitara. E taku te nuutibeeba teuana bwa Ana Tia Kakoaua Iehova, a kabonganai katibu ibukin karokoan booki aika kabwarabwaraa te Baibara i abaia! E a kaotaki iai koauan ana berita te Atua nakoia ana toro aika kakaonimaki ngke e kangai: “N na kaurei matan te bata are Iuta, ma n oroiia aia aoti natannaomata ni kabaneia n te mataki.” A kamatakiaki ana kairiribai te Tautaeka N Uea ni korakoran uniia ao a aikoa ataa te kawai ae a na toua. Ma ti kakoauaa bwa Iehova e na kateimatoaia ao n tabeakin mweeraoia ana aomata aika ikoikotaki.—2 Uea 6:15-19.
12. (a) N te aro raa are e kauraa iai te ai Iesu ngke e mena i aon te aba? (b) A kanga te nikira ake a kabiraki ni manga kauraa te ai ni kaineti ma te onimaki, ao tera mwina?
12 Wareka Tekaria 12:5, 6. E kaineti “Mataniwin Iuta” nakoia te koraki ake iai mwiokoaia n tararuakiia ana aomata te Atua. E anganiia te koraki aei Iehova te ingaingannano ae korakora ibukini waaki ni kabane i aon te aba ake a irekereke ma te Tautaeka n Uea. E tuangiia taan rimwina Iesu n te tai teuana ni kangai: “I roko ba N na uota te ai nako aon te aba.” (Ruka 12:49, BK) Ni koauana, e kauraa te ai ni kaikonaki Iesu n arona ni mwakuri n tataekina te rongorongo ma te ingaingannano. E moanibwaia tataekinan rongorongon Ana Tautaeka n Uea te Atua nakoia aomata Iesu. Aio are e a karika iai te kauntaeka ae korakora i buakoia te botannaomata ake Iutaia. (Mataio 4:17, 25; 10:5-7, 17-20) N aron anne, taan tou mwini mwanekan Kristo, a kauraa te ai n te aro ni kaikonaki ni kaineti ma te onimaki bwa “kaanga te baan ae nen te ai i buakoni kaai, ao kaanga te oi ae te ai i buakoni bwabwati ni uita.” E kaotaraei aroia Aaro ake aongkoa Kristian ngaiia bwa taani mwamwanaa te aba te boki ae The Finished Mystery a ae boretiaki n 1917. Aio are e a karikirakea riki uniia mataniwin Aaro. N taai aika tibwa nako, e a tia Rongorongon te Tautaeka n Uea Na. 37 ae atuna “E a Kaan Tokiia Aaro Aika Kewe!” ni kairiia aomata bwa a na rineia bwa a na tei ibukin ana Tautaeka n Uea te Atua ke a na aki.
“E na Kamaiui Moa Umaia I-Iuta”
13. Tera ae nanonaki n “umaia I-Iuta,” ao bukin tera bwa Iehova e kamaiuia ake a rotaki buaka?
13 Wareka Tekaria 12:7, 8. E taabangaki ngkoa kabonganakin umwanrianna n aonon Iteraera irouia taani kawakin tiibu ao taan ununiki. A na bon moan rotaki buaka te koraki aei ao ni kainnanoa kamanoaia ngkana e niniaki Ierutarem iroun te botannaomata ae aia kairiribai. Te taeka ae “umaia I-Iuta” n te aro ni kaikonaki e nanonaki iai bwa nikiraia te koraki aika kabiraki, a maeka n te tawaana ke te kaawa ae aki nonoaki n ara tai aikai. A aki maaku ni boutokai waaki ni kabane ni kaineti ma te Tautaeka n Uea Iroun te Mesia. E na “kamaiui moa umaia I-Iuta” Iehova ae Atuaia taanga, ibukina bwa boni ngaiia aika taaketenaki iroun Tatan.
14. E kanga Iehova ni kamanoia te koraki ake a mena n “umaia Iutaia” ao ni kawakiniia bwa a na aki mamaara?
14 Ni koauana, rongorongon rimoa e kakoauaa bwa e teimatoa Iehova ni kamanoia taani kabiraki aika taan tei ibukin te Tautaeka n Uea, ni maekaia n “umaia” n te tawaana.b E kawakiniia bwa a na aki “mamara,” ao e kakorakoraia ni kaninikoriaia n ai aron Tawita are te uea, ae te tia buaka.
15. Bukin tera bwa Iehova e “ukoukora kamaunaia botannaomata,” ao n ningai ae na karaoa iai aei?
15 Wareka Tekaria 12:9. Bukin tera bwa Iehova e “ukoukora kamaunaia botannaomata”? Ibukina bwa a teimatoa ni kaitaraa te Tautaeka n Uea Iroun te Mesia. A kariki kangaanga ao ni bwainikirinia ana aomata te Atua, ao ibukin anne, e a motikaki taekaia. N te tai ae e a kaan roko, a nang buakanaki ibukin te kabanea n tai taan taromauriia te Atua ni koaua irouia ana koraki Tatan, ike a nang bane iai ngkanne ni kairaki kaain te aonnaba nakon te buaka ae aranaki n te Baibara bwa Aremaketon. (Te Kaotioti 16:13-16) E nang kamanoia ana aomata te Tia Moti ae Moan te Rietata ao ni kaitaraa niniakia, ao mani katabua arana i buakon te natannaomata.—Etekiera 38:14-18, 22, 23.
16, 17. (a) Tera “tibangaia ana toro Iehova”? (b) Tera ae kakoauaki iai man tokanikaira i aon ana waaki ni kakaaitara Tatan?
16 Akea ana bwai ni buaka Tatan ae kona ni kamamaraa aia onimaki, ke ni kamaunaa ingaingan nanoia ana aomata te Atua ni katobibia te aonnaba. Ti karekea te rau iroura ni kaineti ma ara onimaki ae “tibangaia ana toro” Iehova, ae reke man ataakin ae e boutokaira ni mwaakana ni kakamaiu. (Itaia 54:17) Akea temanna ae kona n anaa mairoura raunnanora ao mweeraoira n ara onimaki. (Taian Areru 118:6) E na teimatoa Tatan ni kauekea te kairiribai ao te bwainikirinaki, ma kakaonimakira n nanomwaaka ni kaaitara te taetaebuakaki, boni kakoauaan ae e memena taamnein te Atua i aora. (1 Betero 4:14) E a tabe ngkai tataekinan te rongorongo ae raoiroi ni katobibia te aonnaba, ae taekan ana Tautaeka n Uea Iehova ae e a tia n tei ngkai i karawa. “Atibun te bana” n te aro ni kaikonaki, boni kaitaraaia ana aomata te Atua irouia kairiribai, kaanga ai aron te bwai ni buaka ae katonga te aomata bwa e aonga n aki kona ni manga karaoa te bwai teuana. Ma e ngae n anne, a tokanikai ana toro Iehova i aon atibu aikai n akea rotakia iai, ni korakoran Iehova. (Tekaria 9:15) A bon aki kona ni katokaki man aia mwakuri nikiraia taani kabiraki, n ikotaki naba ma raoia aika kakaonimaki!
17 Ti kaantaningaa kamaiuara man ana kakaaitara ni kabane te Riaboro. E karaui nanora ataakin ae bon ‘akea te bwai ni buaka teuana ae karaoaki n ekira nako ae na tokanikai, ao ti na kabuakakai newe ni kabane aika teirake n ekira nako ngkana e kaetaki taekara’!
[Kabwarabwara ae nano]
a Boretiaki irouia Ana Tia Kakoaua Iehova ma e a toki boretiakina ngkai.
b Ibukin rongorongona riki, nora te boki ae Jehovah’s Witnesses—Proclaimers of God’s Kingdom, iteraniba 675-6, ae boretiaki irouia Ana Tia Kakoaua Iehova.
Ko na Kanga ni Kaeka?
• Tera ae kaotia bwa a aki tokanikai ana bwai ni buaka Tatan?
• E a kanga n riki Ierutarem bwa te “atibu ae rawawata”?
• E kanga Iehova ni kamaiua “umaia I-Iuta”?
• Tera ae ko onimakinna, ngkai ti a tabe ni kaania Aremaketon?
[Taamnei n iteraniba 29]
A teimatoa ni kakaonimaki ana aomata Iehova i Albania n aki ongea ana kakaaitara Tatan
[Taamnei n iteraniba 31]
E kaoti kairuan taian bukibuki Iesu