Tarataraa ‘Rabakaum N Angareirei’
“Tataekina ana taeka te Atua; . . . kaoti aia buakaka aomata nako ia, ko na boaiia, ko na kauungaia, n taotaonan nanom ni kabanea ma te [“rabakau n angareirei,” NW].”—2 TIMOTEO 4:2.
1. Tera te kaetieti are e tua Iesu nakoia taan rimwina, ao tera te katoto are e karaoia?
E NGAE ngke e katoki aoraki Iesu n te aro ae kamimi n ana mwakuri ni minita, ma e aki kinaaki n arona ae te tia katoki aoraki ke te tia karaoi kakai. E rangi ni kinaaki riki n nakoana ae te tia reirei. (Mareko 12:19; 13:1) Moan te kakawaki iroun Iesu ao ai uana naba ma taan rimwina ni boong aikai tataekinan te rongorongo ae raoiroi ae taekan Ana Tautaeka n Uea te Atua. Iai mwiokoaia Kristian ae a na teimatoa ni waakinna ae kakiritianakia ao reireiaia aomata bwa a na kabane n tauu baike e tua Iesu.—Mataio 28:19, 20.
2. Tera ae ti riai ni karaoia bwa ti aonga ni kakororaoa mwiokoara n uarongorongo?
2 Ti riai n teimatoa n ukoukora katamaroan riki rabakaura n angareirei bwa ti aonga ni kakororaoa mwiokoara ae karekeaia taan rimwin Kristo. E katuruturua kakawakin te rabakau aei te abotoro Bauro ni korean ae kangai nakon raona n uarongorongo ae Timoteo: “Tarataraiko ao tarataraa te reirei: ko na memena ni baikai; ba ngkana ko karaoa aei, ao ko kamaiuko iai ma ake a ongo i roum.” (1 Timoteo 4:16) Te angareirei are e iangoia Bauro, bon tiaki tii uarongorongoan te atatai. A riingaki nanoia aomata ao ni kaungaki bwa a na bitii maiuia irouia minita aika a kanakoraoa aia mwakuri. Bon te rabakau teuana aei. Ti na kanga ngkanne ni karikirakea te ‘rabakau n angareirei’ n tibwaan nako te rongorongo ae raoiroi ibukin Ana Tautaeka n Uea te Atua?—2 Timoteo 4:2.
Karikirakean te ‘Rabakau n Angareirei’
3, 4. (a) Ti na kanga ni karikirakea te ‘rabakau n angareirei’? (b) Ti na kanga ni buokaki n Te Kuura ni Kataneiai Ibukia Taan Uarongorongo n riki bwa taan angareirei aika uaana?
3 E kabwarabwaraki te taeka ae “rabakau” n te rikitinare teuana bwa te “konabwai ae reke man te ukeuke n reirei, te kataneiai ke te mamataku.” Mangaia are ti riai ni mutiakin itera aika tenua aikai, ngkana ti kan riki bwa taan angareirei aika uaana ibukin te rongorongo ae raoiroi. E kona n reke ara atatai ae eti ni kaineti ma ara reirei tii ngkana ti reiakinna ao n tataroakinna. (Wareka Taian Areru 119:27, 34.) Ti kona n reiakin aia angareirei minita aika uaana ao ni kakairi iai ngkana ti matakuakinia. Ti buokaki ni katamaroai riki arora n angareirei ngkana ti kakorakoraira ni katoa tai ni kakaraoa ae ti reiakinna.—Ruka 6:40; 1 Timoteo 4:13-15.
4 Bon ara tia Reirei ae Moan te Kakannato Iehova. E katauraoi kaetieti ibukin kairaia ana toro ni kakororaoa mwiokoaia ae te angareirei rinanon ana botaki i aon te aba. (Itaia 30:20, 21) Ibukin aei, a a kakaraoaki reirei ibukin Te Kuura ni Kataneiai Ibukia Taan Uarongorongo n ekaretia ni kabane ni katoa wiki, ibukin buokaia ake a a riki bwa kaaina n rikirake bwa taan tataekina Ana Tautaeka n Uea te Atua aika uaana. E boto kanoan te kuura ibukia taan uarongorongo aei man te boki ae te Baibara. Ti tuangaki n Ana Taeka Iehova ae kairaki koreana iroun taamneina baika ti riai n reireiia aomata iai. Irarikina, e kaotaki iai aanga n angareirei aika uaana ma ni manena. Ti katoa tai ni kauringaki n Te Kuura ni Kataneiai Ibukia Taan Uarongorongo, bwa ti na rikirake n riki bwa taan angareirei aika mwaatai, man kabotoan ara reirei n Ana Taeka te Atua, kamanenan titiraki n te aro ae uaana, te angareirei n te aro ae kai ota ao kaotiotan tabeakinaia aomata. Ti na neneri raoi reirei aikai teuana imwin teuana, ao imwina, ti na maroroakina aron riingan nanon te aomata ae ti reirei ma ngaia n te Baibara.
Kabotoa Am Angareirei Man Ana Taeka te Atua
5. Ti na kabotoi ara reirei i aon tera, ao bukin tera?
5 E kabotoi ana angareirei man te Baibara Iesu ae te kabanea ni kakannato mai buakoia taan angareirei i aon te aonnaba. (Mataio 21:13; Ioane 6:45; 8:17) E aki taetae n oini mwaakana, ma e taetae n aran Teuare e kanakomaia. (Ioane 7:16-18) Anne te katoto ae ti na kakairi iai. Ngaia are a riai ni boto i aon mwaakan Ana Taeka te Atua baika ti taekin n ara mwakuri ni minita ke n reireira ma aomata. (2 Timoteo 3:16, 17) E aki kona ni kabotauaki oin rabakaura ma nakoraoin ao mwaakan te Baibara ae kairaki koreana iroun te taamnei. E mwaaka te Baibara. N aki ongeia bwa tera te reirei ae ti kataia ni kamataata iai te aomata ae ti reirei ma ngaia, ma te anga ae te kabanea n tamaroa, bon kairana ni wareka ana taeka te Baibara ni kaineti ma te reirei anne.—Wareka Ebera 4:12.
6. E na kanga ni kakoauaa raoi te tia angareirei bwa e a ota n nanon te bwai ae rinanoaki, te aomata ae reirei ma ngaia?
6 Ni koauana, e nanonaki n aei, bwa e riai ni katauraoi te tia angareirei ae te Kristian imwain reireina ma aomata n te Baibara. Ngaia are e kainnanoaki berinoan kiibu imwain te reirei, ibukin bairean ake a na warekaki n tain te reirei iroun te aomata anne ke te tia angareirei. N angiin te tai, e raoiroi riki warekan kiibu aika aana te boto n iango ibukin ara koaua. E riai naba ni buokaki te aomata ae reirei bwa e na karekea otana n nanon kiibu akana e wareki.—1 I-Korinto 14:8, 9.
Kabonganai Titiraki Aika Uaana
7. Bukin tera bwa e uaana te angareirei ae e kamanenaki iai titiraki?
7 E kammwakura te iango te rabakau ni kabonganai titiraki, ao e buoka te tia angareirei n rota nanon te aomata ae reirei ma ngaia. Ngaia are n onean mwin are ko kabwarabwarai kiibu nakoina, butiia bwa e na kabwarabwarai. N tabetai, e kona ni kainnanoaki te titiraki teuana ke tao tabeua riki ibukin kairana nakon te iango ae eti. Ni kammwakuran ana iango te aomata n aron aei, e a ataia iai bwa bukin tera ngkai e riai te motinnano anne, ao ni buokia bwa e na onimakina te koaua anne i bon irouna.—Mataio 17:24-26; Ruka 10:36, 37.
8. Ti na kanga n ataa raoi nanon te aomata ae ti reirei ma ngaia?
8 Tein reirei aika kamanenaki n ara boki aika aanaki n te Baibara bon titiraki ma kaekaaia. Akea te nanououa, bwa a na baitii ni kaekai titiraki akana koreaki angiia aomata aika kam reirei ma ngaiia n te Baibara, ibukina bwa a kamanenai rongorongo akana ni barakirabe aika kaineti ma titiraki. Ma e na aki rauaki te tia angareirei ae e kan rota nanon ana aomata, n tii te kaeka ae eti man te barakirabe n akea iangoana. N te katoto, tao e a kona te aomata ae reirei ni kabwarabwaraa raoi te bwai ae taekinaki n te Baibara ni kaineti ma te wene ni bure. (1 I-Korinto 6:18) Kamanenan titiraki n te aro ae uaana ma te bwanaa n akoi, e kona ni kaota ana namakin ni koaua te aomata anne ibukin te bwai ae e reiakinna. Ngaia are e kona n titiraki ni kangai te tia angareirei: “Bukin tera ngkai e kabuakakaki n te Baibara te wene n taanga irouia aika a aki mare? Tera am iango ni kaineti ma ana tua te Atua aei? N am iango, iai te kakabwaia ni maiuakinan ana kaetieti te Atua ibukin te aroaro ni maiu ae riai?” E kona n oti ana iango te aomata anne ni kaekaan aeka n titiraki aikai.—Wareka Mataio 16:13-17.
Kabebetea n Taai Nako
9. Tera ae ti riai n iangoia ngkana ti tibwaa nako te rongorongo man te Baibara?
9 A kai ota angiin koaua aika n Ana Taeka te Atua. A kamangaongaoaki otaia aomata aika ti reirei ma ngaiia n te Baibara, n aia reirei Aaro aika kewe. Tabera ngkai taan angareirei ngaira, bon kamatataan te Baibara n te aro ae kai ota. A taekina te rongorongo taan angareirei aika mwaatai n te aro ae kai ota, e mataata ao man eti raoi. Ngkana ti toua mwin te babaire aei, e nang aki kangaanga ngkanne karekean te ota. Tai kabwarabwarai baika aki irekereke ma te maroro. E aki naba kainnanoaki kabwarabwaraan iteran nako kibun te Baibara aika ti wareki, ma kaatuui riki baika a na kamataataa te reirei. E na karekea otana te aomata ae reirei teutana imwin teutana, ni koaua aika nano riki ngkana e a tabe n rikirake otana.—Ebera 5:13, 14.
10. Baikara baika riai n taraaki ni bairean mwaitin te reirei ae na karaoaki n te angareirei?
10 Mwaitira te reirei ae na karaoaki n tain te angareirei? E kainnanoaki te wanawana ni bairean aei. E kaokoro aroaron ma ana konabwai te tia angareirei ma te aomata ae e reirei, ma e kakawaki iaiangoan tiara ngkai taan angareirei ngaira, buokan ara aomata anne bwa e na nene aan ana onimaki. Ngaia are ti anganna ana tai ae tau bwa e na wareware, e na karekea otana ao ni butimwaei koaua aika taekinaki n Ana Taeka te Atua. E na aki riaon ana konabwai ara angareirei ma ti na kateimatoaa waakinan te reirei ae bon tau. Ngkana e a reke otana, ti a manga nakon are imwina.—I-Korote 2:6, 7.
11. Tera reireiara ni kaineti ma te angareirei ae reke mairoun te abotoro Bauro?
11 E teimatoa te abotoro Bauro n taekina te rongorongo ae raoiroi n te aro ae kai ota n taetaena ma aika boou. E ngae ngke e bubura ana reirei, ma e aki kabonganai taeka aika matoatoa aika e kangaanga te ota iai. (Wareka 1 I-Korinto 2:1, 2.) A anaaki ao ni karauaki nanoia aomata aika raoiroi man ana koaua te Baibara ae bebete. E aki kainnanoaki te reirei ae rietata ibukin karekean te ota iai.—Mataio 11:25; Mwakuri 4:13; 1 I-Korinto 1:26, 27.
Buokaia Aika Reirei n te Baibara Bwa A na Ataa Kakawakin ae A Reiakinna
12, 13. Tera ae e kona ni kaira te aomata ae reirei n te Baibara ni maiuakin baike e reiakin? Kabwarabwaraa.
12 E riai n rotaki nanon te aomata ae ti reirei ma ngaia, ngkana ti tangiria bwa e na uaana ara angareirei. E riai n ota te aomata anne n arona ni kona ni maiuakina te reirei, arona ni kakabwaiaki iai ao ni kanakoraoaki riki maiuna ngkana e tou mwin ana kaetieti te Baibara.—Itaia 48:17, 18.
13 N te katoto, ti kona ni maroroakina are a kaungaki iai Kristian n Ebera 10:24, 25 bwa a na bobotaki ma raoia n onimaki ibukin te ikaungaunga man te Baibara ao te itangitangiri. Ngkana e tuai n iriri ni bobotaki te aomata anne, tao ti kona n taekinna ni kakimototoa aron kairan ara botaki ao baikara bwaai aika a na kabwarabwaraki ni botaki aikai. Ti kona naba n taekinna bwa boni kanoan ara taromauri bobotakira n te ekaretia ao ni kaotii kakabwaiakira iai. Imwina, ti a kona ni kaoa te aomata anne. E riai ni butimwaea ana tua te Baibara ni bon oin nanona ni kan ongeaba iroun Iehova, ma tiaki ibukin kakukureian ana tia reirei.—I-Karatia 6:4, 5.
14, 15. (a) Tera ae kona n reiakinna te aomata ae reirei n te Baibara ibukin Iehova? (b) E na kanga ni kakabwaiaaki te aomata ae reirei n te Baibara n ana atatai ibukin aroaron te Atua?
14 Oin te kakabwaia ae a karekea aomata aika reiakin ma ni maiuakin ana boto n reirei te Baibara, bon kinaakin ao tangiran Iehova n aron ae bon te aomata ni koaua. (Itaia 42:8) E aki riki Iehova bwa tii te Tama ae tatangira, te tia Karikibwai ao Teuare Ana Bwai te iuniweeti, ma e kaotiota naba aroarona ao rabakauna nakoia aika tangiria ao ni beku irouna. (Wareka Te Otinako 34:6, 7.) Ngke e nang kaotinakoia te natannaomata ae Iteraera Mote man tautoronakia i Aikubita, e a kamataata arona Iehova ni kangai: ‘N na bon riki bwa te bwai ae N na riki.’ (Te Otinako 3:13-15) E kaotaki n aei bwa e kona Iehova ni karikia nakon te bwai ae e tangiria ibukin kakoroan bukin ana kaantaninga, ni kaineti ma ana aomata ake e a tia n rineiia. Ibukin anne, a a kinaa Iehova tibun Iteraera bwa aia tia Kamaiu, te tia Buaka, te tia Katauraoi bwaai ao te tia Kakoroi bukin ana berita ao a bati riki.—Te Otinako 15:2, 3; 16:2-5; Iotua 23:14.
15 Tao a aki konaa aomata aika ti reirei ma ngaiia ngkai ni karekei buokaia n te aro ni kakai mairoun Iehova, n aron ngkoa Mote. Ma ngkana a tabe n rikirake aia onimaki ao n ota ni baika a reiakin ao ni maiuakin, a na kakoauaa raoi iai bwa a kainnanoa onimakinan Iehova ibukin kaninikoriaia, wanawanaia ao kairiraia. Ni karaoan anne, a nang rikirake iai ni kinaa Iehova bwa bon te tia Reirei ae wanawana ma n onimakinaki, te tia Kamanomano ao te tia Katauraoi baika a kainnanoi ae e atataiaomata.—Taian Areru 55:22; 63:7; Taeka N Rabakau 3:5, 6.
Kaota Tabeakinaia ma te Tangira
16. E aera ngkai e aki tii kakawaki ara konabwai i bon iroura n angareirei, ngkana ti kan riki bwa te tia reirei ae mwaatai?
16 Tai bwarannano ngkana ko namakinna bwa ko tuai mwaatai n angareirei n aron ae ko kaantaningaia. A tararuaa te waaki n reirei ae karaoaki ni katobibia te aonnaba Iehova ao Iesu ni boong aikai. (Mwakuri 1:7, 8; Te Kaotioti 14:6) A kona ni boutokaira n ara kekeiaki bwa a na kariki uaa ara taeka i nanoia aika raoiroi. (Ioane 6:44) E kona n tokanikai te tia reirei ae kaota te tangira ni koaua nakon ana reirei i aon tianakin ana konabwai n angareirei. E kaotia te abotoro Bauro bwa e ota raoi ni kakawakin tangiraia aika reirei.—Wareka 1 I-Tetaronike 2:7, 8.
17. Ti na kanga ni kaota tabeakinaia aomata n tatabemania nako aika ti reirei ma ngaiia n te Baibara?
17 N aron anne, ti kona naba ni kaota tabeakinaia aomata n tatabemania nako aika ti reirei ma ngaia n te Baibara, ni kabatiaan ara tai n ikikina ma ngaia. Ni maroroakinan booto n reirei man te Baibara ma ngaia, tao ti na bae ni kinaa raoi iai aroarona. Ti kona n noria bwa e a kaman boraoi maiuna ma ana kaetieti te Baibara tabeua ake e a tia n reiakin. N aaro tabeua riki, tao e riai ni karaoi bitaki tabeua. Ngkana ti buokia bwa e na ataa reitakin te bwai ae maroroakinaki ma arona ni maiuakinna, ti a kona iai ni buokia ma te nano n tangira bwa e na riki bwa te tia rimwin Kristo ni koaua.
18. E aera ngkai e kakawaki te tataro ma te aomata ae ti reirei ma ngaia ao mwaneweana n ara tataro?
18 Ma ae e kakawaki riki, ti kona n tataro ma ara reirei ao ni mwaneweia n ara tataro. E riai n teretere raoi nakoina bwa ti kani buokia bwa e na rikirake riki ni kinaa raoi ana tia Karikiriki, e na kaan riki ma Ngaia ao e na karekea kakabwaiana man Ana kairiri. (Wareka Taian Areru 25:4, 5.) Ngkana ti tataro nakon Iehova ibukin buokan ana kekeiaki ara reirei anne ni maiuakinan baika e reiakin, e a kona n nora kakawakin rikina bwa te tia “toua mwin ana taeka.” (Iakobo 1:22) N ongoraan te aomata anne n ara tataro ae nako mai nanora, e na reireiaki iai arona n tataro. Ai kakimwareireira buokaia aomata aika reirei n te Baibara ni karikirakei aia itoman ma Iehova!
19. Tera ae e na maroroakinaki n te kaongora ae imwina?
19 Ti rangi ni kaungaaki n ataan ae e a raka i aon onoua ao te iterana te mirion mwaitiia taani Kakoaua ni katobibia te aonnaba, aika tabe ni karikirakei ‘rabakauia n angareirei’ ibukin uaiakinan tiaia ae buokaia aomata aika raoiroi nanoia n tauu bwaai ni kabane ake e tua Iesu. Baikara uaan te mwakuri n uarongorongo aika reke? E na maroroakinaki kaekaan te titiraki aei n te kaongora ae imwina.
Ko Uringnga?
• Bukin tera bwa a riai Kristian ni karikirakei ‘rabakauia n angareirei’?
• Baikara anga aika a na uaana riki iai arora n angareirei?
• Tera ae e na katamaroaa riki ara angareirei e ngae ngke iai tianakin rabakaura n angareirei?
[Taamnei n iteraniba 13]
Ko a kaaina te Kuura ni Kataneiai Ibukia Taan Uarongorongo?
[Taamnei n iteraniba 14]
Bukin tera bwa e kakawaki kairan te aomata ae ko reirei ma ngaia bwa e na wareka te Baibara?
[Taamnei n iteraniba 16]
Tataro ma am reirei ao mwaneweia n am tataro