Menan Kristo Ma Aomata—Tera Nanona Nakoim?

“Ao tera kanikinaean rokom ma tokin aonaba?”​—MATAIO 24:3.

1. Tera te titiraki ae rangi ni kakannongora are a titiraki iai ana abotoro Iesu?

E KAANIA uoua tenga te ririki n nako, ao a tabeka te titiraki teuana aman ana abotoro Iesu ngke a mena i aon te Maunga are Oriweta ngke a maroro ma aia tia Reirei. A titiraki ni kangai: “A na roko n ningai baikanne? Ao tera kanikinaean rokom ma tokin aonaba?” (Mataio 24:3) A kabonganai uoua taeka aika rangi ni kamimi n aia titiraki anne ae, “rokom [menana ma aomata]” ao “tokin aonaba.” A kaineti nakon tera taeka aikai?

2. Tera raoi ae nanonaki n te taeka ae “tokin”?

² Ti na rinanon moa te kauoua n taeka, ao n iaiangoa nanon te taeka ae “tokin” ae rairan te taeka ni Kuriiti ae syn·teʹlei·a. Ma te taeka aio, e aki toki n rairaki n te New World Translation, bwa “raabanen,” ao te taeka ni Kuriiti ae kuri naba n irekereke ma anne ae te’los, e rairaki bwa “tokin.” A kona ni kamatataaki kaokoron nanon taeka aikai ngkana ti iangoa aron te kabwarabwara are e kakaraoaki n te Tabo n Taromauri. Raabanen te kabwarabwara bon kabanean iteran te maroro, ike e kabanea iai te tai ae uarereke te tia kabwarabwara ni kauring baike e a tia n taekin nakoia taan ongora, ao ni katerei naba baika a kakawaki ibukia. Ngkanne, tokin te kabwarabwara e nanonaki iai are e a kitana te tabo ni kabwarabwara mai moa te tia kabwarabwara. N aron naba anne, te Baibara e kabongana te taeka ae “tokin aonaba” ke raabanen te waaki ae ngkai ni kaineti ma te tai ae waaki nako ni karokoa tokina.

3. Baikara bwaai tabeua aika riki ni menan Iesu ma aomata?

³ Tera ngkanne ae nanonaki n ‘rokona [ke menana ma aomata]’ n aron are a titiraki iai abotoro? Aei bon rairan te taeka ni Kuriiti ae pa·rou·siʹa.a Menan Kristo ma aomata ke ­pa·rou·siʹa e moanaki man te tai are e a riki iai bwa te Uea i karawa n te ririki 1914, ao ni waaki nako ni karokoa tain te ‘rawawata ae korakora.’ N tain te rawawata aei e nang kamaunaia aomata aika buakaka. (Mataio 24:21) A mwaiti baika riki i nanon tain menan Iesu ma aomata, n aron “boong aika kaitira” ae te waaki aika buakaka, ikotakiia ake a rineaki, ao kautaia nakon te maiu i karawa. (2 Timoteo 3:1; 1 I-Korinto 15:23; 1 I-Tetaronike 4:15-17; 2 I-Tetaronike 2:1) E kona n taekinaki bwa te tai anne e nanonaki iai “tokin aonaba” ke raabanen te waaki ae ngkai (syn·te·ʹlei·a) are e kaineti naba raoi ma te tai are e mena Kristo ma aomata (pa·rou·siʹa).

Te Tai ae Maan

4. E kanga n titeboo menan Iesu ma aomata ma baike a riki n ana bong Noa?

⁴ Te koaua bwa te taeka ae pa·rou·siʹa e kaineti nakon te tai ae maan, ae e boraoi ma are e taekinna Iesu ni kaineti ma menana ma aomata. (Wareka Mataio 24:37-39.) E mataata bwa e aki kabotaua menana ma aomata Iesu ma te tai ae uarereke are e riki iai te Ieka n ana bong Noa. N onean mwin aei, e kabotaua menana ma aomata ma te tai ae rangi ni maan riki are imwain te Ieka. E nanonaki naba iai taai ake e katea te ake Noa ao ana mwakuri n uarongorongo, ni karokoa rokon te Ieka. A riki baikanne i nanon irabwi ma irabwi te ririki. N aron naba anne, menan Kristo ma aomata e nanonaki naba iai baike a a riki ni karokoa rokon te rawawata ae korakora.​—2 I-Tetaronike 1:6-9.

5. A kanga rongorongo ake a koreaki n Te Kaotioti mwakoro 6 ni kaotia bwa menan Iesu ma aomata, e bon nanona te tai ae maan?

⁵ A kaotaki ni Baibara tabeua bwa menan Kristo ma aomata e kaineti ma te tai ae rangi ni maan, ao tiaki te tai ae uarereke are e nanonaki iai rokona ni kamaunaia aika buakaka. E kaikonakaki taekan Iesu n te boki ae Te Kaotioti bwa e toka i aon te aoti ae mainaina ma ana baunuea. (Wareka Te Kaotioti 6:1-8.) Imwin kaueana n te ririki 1914 ao e a kaotaki iai Iesu bwa e a “oti nako n tokanikai, ao ba e na bon tokanikai.” E a manga kaotaki riki n te rongorongo bwa e taorimwiaki irouia taan toka i aoia aoti ake a toka i aon aoti aika kakaokoro karaia. E kaineti taetae ni burabeti aikai ma te buaka, akean te amwarake, ao aoraki aika kamamate, ake a riki n te tai ae rangi ni maan are e kaineti ma “boong aika kaitira.” Ti a nora kakoroan te taetae ni burabeti aei ni maiura.

6. Tera ae buokira n ota man Te Kaotioti mwakoro 12 ni kaineti ma menan Kristo ma aomata?

⁶ N Te Kaotioti mwakorona 12 e kabwarabwaraki riki iai bwaai tabeua ake a irekereke ma tein ana Tautaeka n Uea te Atua i karawa. Ti wareka iai taekan te buaka i karawa ae aki noraki. E buaka Mikaera, ae taekan Iesu Kristo n nakoana i karawa ao ana anera, ni buakana te Riaboro ma ana taimonio. N tokina, a karenakoaki Tatan te Riaboro ma ana anera nakon te aonnaba. Ibukin anne, e taku te rongorongo bwa e rangi n bati n unun te Riaboro, ngkai “e ataia ba a kani bane ana bong.” (Wareka Te Kaotioti 12:7-12.) Are e mataata raoi ngkanne bwa tein ana Tautaeka n uea Kristo i karawa, e taorimwiaki n te tai are e kateretereaki raoi ni korakoran te “rekenikai” nakon te aonnaba ao kaaina.

7. Tera are e taekinna te kauoua n areru, ao tera te kabwaia ae uki iai nakoia botannaomata?

⁷ N te areru mwakoro uoua, ao e taetae ni burabetinaki naba iai moan kaueakin Iesu n te Maunga are Tion i karawa. (Wareka Taian Areru 2:5-9; 110:1, 2.) Ma e kaotaki naba n te areru aio bwa iai te tai ae maan teutana are a anganaki iai tautaekan te aonnaba aio, ao aomata ni kabane ake a tautaekanaki, bwa a na kaota te aantaeka i aan ana kairiri Kristo. A kaungaaki bwa a na “wanawana” ao ni kariaia bwa a na “reireiaki.” Eng, n te tai anne are a nang bane ni ‘kabaia akana onimakina te Atua’ n toro iroun Iehova ma ana Uea are e a tia n rineia. Ai ngaia are e a reke aia tai taan tautaeka ao aomata ni bitii aroaroia i nanon tain menan Iesu ma aomata ma mwaakana n uea.​—Taian Areru 2:10-12.

Ataakin te Kanikinaa

8, 9. Antai ake a ataa raoi kanikinaea menan Kristo ma aomata ao n ota n ae nanonaki iai?

⁸ Ngke a titiraki Baritaio ibukin kanikinaean rokon te Tautaeka n Uea, ao e kaekaia Iesu bwa e na bon aki roko “n noraki” ni mataia. (Ruka 17:20, 21) A na bon aki ota iai akana tiaki kaain te onimaki. Bwa a na bon kanga ni kona n ota? A aki naba ataa Iesu ae ngaia aia Uea are a kakaantaningaia. Ma antai ngkanne aika a na kona n atai kanikinaean menan Kristo ma aomata ao baika nanonaki iai?

⁹ E reitia nako Iesu man taku nakoia taan rimwina bwa a na bon nora raoi te kanikinaa kanga n aron “te iti, ae iti mai rarikini karawa teuana, ao e iti nako rarikini karawa are teuana.” (Wareka Ruka 17:24-29.) E kakawaki bwa ti na ataia bwa ni Mataio 24:23-27 e kairekerekei kanikinaa aikai ma menan Kristo ma aomata.

Te Roro ae a Nora te Kanikinaa

10, 11. (a) Tera te kabwarabwara are e a kaman taekinaki ni kaineti ma te “roro” are e mwaneweaki ni Mataio 24:34? (b) Antai ae a kaantaningaia taan rimwin Iesu ae a na riki bwa kaain te “roro” anne?

¹⁰ E a tia te maekatin aei imwaina ni kabwarabwaraa bwa n te moan tienture ao e oti te taeka ae “te roro aei” ni Mataio 24:34 bwa e nanonaki iai “I-Iutaia aika akea aia onimaki ake a maiu n te tai arei.”b E tara n eti kabwarabwaraan te taeka anne, ibukina bwa ni katoa tai e kabongana te taeka ae “te roro” Iesu, ae e kairekerekea ma te bwai ae buakaka. N angiin te tai e kabonganai taeka tabeua Iesu n aron “buakaka,” ni kabwarabwaraa iai te roro anne bwa e buakaka. (Mataio 12:39; 17:17; Mareko 8:38) Ai ngaia are e iangoaki bwa kakoroan nanon te “roro” anne ni boong aikai ae taekinaki iroun Iesu, e nanonia iai te koraki aika tiaki taani kakoaua ake a nori kanikinaa ake a riki ‘n raabanen te waaki ae ngkai’ (syn·te·ʹlei·a) ao n tokin te waaki ae ngkai (teʹlos).

¹¹ E boni koaua bwa ngke e kabongana te taeka ae “roro” Iesu ni kaineti ma aroaro aika a aki riai, e bon taetae iai nakoia ke ibukia ake a bubuaka n ana tai. Ma e koaua bwa te taeka ane “roro” ae taekinaki ni Mataio 24:34 e bon kaineti naba nakoia aika buakaka? Uringia ngkoa taan rimwin Iesu ake aman ake a roko irouna ngke a “okoro.” (Mataio 24:3) Kioina ngke e aki taekinna Iesu bwa e buakaka te “roro aei” ngke e maroro ma ana abotoro, a na boni bae ngkanne ni kaantaningaia bwa boni ngaiia naba n ikotaki ma taan rimwina ae iteran te “roro” ake a na aki mate “ngkana a tuai ni bane n roko baikai.”

12. Tera ae kaotia tein te rongorongo ni kaineti ma te koraki ake e nanonia Iesu ngke e kabongana te taeka ae “roro”?

¹² E boto ara koaua i aon tera, ao ti kanga ni kakoauaa raoi anne? Man iangoan raoi tein te rongorongo. N aron ae taekinaki ni Mataio 24:32, 33, ao e kangai Iesu: “Ao kam na reireiaki te taetae ni kaikonaki ae taekan te biku: ngkana e ububu mwaangana, ao ngkana a riki baana, ao kam ataia iai ba e a kaan te moanibong; ao ai aromi naba, ngkana kam nori baikai ni kabane, ao kam na ataia iai ba e a kaan, bon ae i rarikin mataroa.” (Kabotaua ma Mareko 13:28-30; Ruka 21:30-32.) Imwina ao ti a manga wareka Mataio 24:34 ae kangai: “E koaua ae I a tuangngkami ba e na bon aki bane ni mate te roro aei ngkana a tuai ni bane n roko baikai.”

13, 14. E aera ngkai ti kona n taekinna bwa te “roro” are e taekinna Iesu e bon nanonia iai taan rimwina?

¹³ E taku Iesu bwa a riai taan rimwina ake a nang kabiraki n te taamnei are raoiroi, ni karaoi moti tabeua man noran rokon ‘baikai ni bane.’ Ai ngaia are e bon kainetia taan rimwina Iesu ngke e taekina ae kangai: “E na bon aki bane ni mate te roro aei ngkana a tuai ni bane n roko baikai.”

¹⁴ A na bon bae n aki tii nora te kanikinaa aei taan rimwina ma a na bon ataa naba nanona, tiaki n ai aroia te koraki ake a aki kakoauaa Iesu. A na “reireiaki” raoi taan rimwin Iesu man kanoan te kanikinaa aei ao a na ‘atai’ naba nanoia ni koaua. A na boni mataata raoi bwa e a mena ngkai Iesu “i rarikin mataroa.” E ngae ngke a nora naba moan kakoroan nanon ana taeka Iesu kaain Iutaia aika aki onimaki ao Kristian aika kabiraki aika kakaonimaki ake n te moan tienture, ma bon tii taan rimwin Iesu aika kabiraki ake a bon karekei raoi reireiaia, man baike a nori ao n ota n nanoia ni koaua.

15. (a) Antai aika kaaina te “roro” ni boong aikai ake a taekinaki iroun Iesu? (b) Bukin tera ngkai ti aki kona n ataa raoi maanin tain te “roro aei”? (Nora te bwaoki n te iteraniba 29.)

¹⁵ A taku te koraki aika e karako aia atatai n ana koaua te Atua ni boong aikai, bwa e aki “noraki” kanikinaean menan Iesu ma aomata. A taku bwa ai bon uaana nako naba bwaai ni kabane n ai aron are mangkoa. (2 Betero 3:4) Ma n te itera teuana ao a tia tarin Kristo aika kabiraki aika kakaonimaki aika te koraki ake a tei ibukin Ioane ni boong aikai, n ota ni kanikinaa aikai, n aron noran otan te iti mai karawa irouia ao a boni mataata raoi n nanona ni koaua. Bon te korakina taani kabiraki aikai ake kaain te “roro” ni boong aikai ake a na bon aki mate “ngkana a tuai ni bane n roko baikai.”c E nanonia iai tabeman mai buakoia tarin Kristo aika kabiraki ake a na bon teimatoa naba ni maiu i aon te aba ni karokoa moanakin te rawawata ae korakora are e a kaman taetae ni burabetinaki.

‘Teimatoa n Tantani’

16. Tera te bwai ae a riai ni karaoia taan rimwin Kristo ni kabane?

¹⁶ E bati riki ae kainnanoaki nakon ae tii ataakin te kanikinaa. E reitia ni kangai Iesu: “Ane I tuangingkami, ao I tuangia aomata ni kabaneia: Tantani!” (Mareko 13:37, BK) Moan te kakawaki taeka aikai nakoira ni bane n aki ongeia bwa taani kabiraki ngaira ke kaain te koraki ae uanao. E raka i aon 90 te ririki n nako ike e a kaueaki iai Iesu i karawa n te ririki 1914. E ngae ngke e rangi ni kangaanga ma ti riai ni kaotia bwa ti a tauraoi ao n teimatoa n tantani. Ataakin ae e a Uea ngkai Kristo ma mwaakan ana Tautaeka e ngae ngke e aki noraki, e na kona ni buokira ni karaoa anne. E kauringira naba te koaua are e nang roko ni kamaunaia ana kairiribai “n te tai are [ti] aki kantaningaia.”​—Ruka 12:40.

17. Tera aron rotakin ara namakin n te atatai aei, ao tera ae ti riai ni kakorakoraira ni karaoia?

¹⁷ Ataakin nanon menan Kristo ma aomata, e a kauekea i nanora te nano n umaki. Ti ataia bwa e a tia n riki bwa te Uea Iesu ao ni moana ueana ae aki noraki i karawa man 1914. E nang roko te tai are e na kamaunaia iai ana kairiribai ao n uotii bitaki aika mwaiti nakon te aonnaba aio ni kabutaa. Ti riai ngkanne ni kakorakoraira n ibuobuoki n te mwakuri ae e a kaman burabetinaki iroun Iesu ngke e kangai: “Ao ane e na tataekinaki euangkerion uean te Atua aei i aonaba ni bane ba te bwai ni kaotioti nakoia botanaomata ni kabaneia; ao ngkanne e na roko iai te toki [teʹlos].”​—Mataio 24:14.

Ko na Kanga ni Kaeka?

• Ti kanga n ataia ae menan Iesu ma aomata e nanona te tai ae maan?

• Antai aika a atai kanikinaean menan Iesu ma aomata ao n ota n ae nanonaki iai?

• E kaainaki te roro ae ni boong aikai are e taekinaki ni Mataio 24:34 irouia te koraki raa?

• E aera ngkai ti aki kona n ataa raoi maanin tain te “roro aei”?

[Bwaoki n te iteraniba 29]

Ti Kona n Ata Maanin Tain te “Roro Aei”?

N angin te tai ao te taeka ae te “roro” e aki toki ni kaineti ma aomata aika kakaokoro roroia ake a maiu n te tai ae titeboo. N te katoto, e tuangira ni kangai Te Otinako 1:6: “Ao e mate Ioteba, ma tarina ni kabaneia, ma te roro arei ni kabanea.” A kaokoro n aia ririki ni maiu Ioteba ma tarina nako, ma a maiu n te tai ae titeboo ao e kuri naba titeboo baika a noraki irouia. A ikotaki naba tarin Ioteba ake a bungiaki imwaina n te “roro arei.” Tabeman mai buakon te roro aei a bon maiunako naba imwin maten Ioteba. (Karikani Bwaai 50:24) Tabeman riki n aron Beniamin, a bungiaki imwin bungian Ioteba ao tao a teimatoa ni maiunako naba imwin matena.

Mangaia are ngkana e kabonganaki te taeka ae te “roro” ni kaineti ma aomata aika a maiu n te tai titeboo, e aki kona n ataaki raoi iai maanin ke tian te tai anne, ma bon iai tokin te tai aei ae e na aki rangi ni maan. Ngaia are kabonganakin te taeka ae te “roro aei” ni Mataio 24:34, e aki nanonaki iai bwa e angania taan rimwina Iesu aia kona ni wareki ao n atai tokin “bong aika kaitira.” Ma n onean mwin anne, e reitia nako riki Iesu ni katereterea bwa a na bon aki ataa rokon “te bong arei ma te aua arei.”​—2 Timoteo 3:1; Mataio 24:36.

[Taamnei n iteraniba 26]

Imwin rikin Iesu bwa te Uea n te 1914, e taekinaki bwa e na “tokanikai” iai

[Taamnei n iteraniba 28]

“E na bon aki bane ni mate te roro aei ngkana a tuai ni bane n roko baikai”