Ko Taraia Aomata N Aron Ana Taratara Iehova?
“E na aki riki te raure n te rabata . . . a na iakoakoi bwain nako te rabata n ti te arona.”—1 I-KORINTO 12:25.
1. Tera aron am namakin ni moan rinim n te baretaiti n taamnei?
NGKE ti moan kaokoroira ma te waaki ae buakaka n te aonnaba ao ni moanna n ikoikotaki ma ana aomata Iehova, ti boni bae ni kukurei n namakinan te tangira ae korakora ao te mwamwannano ae nonoraki i marenaia. Ai kabitaraara ma aroia aomata aika mena i aan ana kairiri Tatan bwa a kakaraoa ae aki riai, a kakairiribai ao a unun! Ti a rin ngkai n te baretaiti n taamnei ae taabangaki iai te rau ao te katiteuanaki.—Itaia 48:17, 18; 60:18; 65:25.
2. (a)Tera ae kona n rota aron taraakia aomata iroura? (b) Tera ae ti a riai ni karaoia?
2 Ni waakinakon te tai, tao e kona ni manga kairua ara taratara nakoia tarira ibukina bwa ti aki kororaoi. E kona ni kairira ara aki kororaoi bwa ti na karakarakai aia bure tarira, n onean mwin taraan aroaroia aika raraoi ni kabane ake a katotonga iai Iehova. E teretere raoi n aei, bwa ti mwaninga n taraiia n aron taraaia iroun Iehova. Ngkana ngaia aei ae ti kakaraoia, aio ngkai te tai ae ti a riai iai n tuoi raoi arora n taraiia aomata ao ni kaboraoia ma aron ana taratara Iehova ae itiaki.—Te Otinako 33:13.
Aron Iehova n Taraia Tarira
3. E kabotauaki ma tera te ekaretia ni Kristian n te Baibara?
3 N aron ae koreaki n 1 I-Korinto 12:2-26, e kabotaua te ekaretia ae kaainaki irouia Kristian aika kabiraki te abotoro Bauro, ma te rabwata ae “bati bwaina.” N aron ae a kakaokoro bwain te rabwata nako, a kakaokoro naba aroaroia ao aia konabwai kaain te ekaretia. Ma e ngae n anne, e boni butimwaeia naba kaain te ekaretia aika kakaokoro aikai Iehova. E tangiriia ao a bane ni kakawaki irouna. N aron naba anne, e reireinira Bauro bwa a riai kaain te ekaretia n ‘iakoakoi n te aro ae tii te arona’. E kona ni kangaanga karaoan aei, bwa a kona ni kakaokoro aroaroia aomata ma ngaira.
4. E aera ngkai ti bae ni kainnanoa bitakin arora n taraiia tarira?
4 Tao ti boni bae naba ni kani kaatuui riki ara taratara i aon mamaaraia tarira. Ni karaoan aei, ai aron ae ti katurua iai taraan te bwai ae uarereke i aon te taamnei teuana. Ma e raababa nako ana taratara Iehova, n te aro are e a kona n nora te taamnei ni kabane. Ti boni bae ni kani katurui ara taratara i aon baika uarereke ake ti aki tangiri, ma Iehova e kinaa raoi te aomata n ikotaki naba ma aroarona aika raraoi ni kabane. Ngkana ti kakorakoraira ni kakairi iroun Iehova, e na rangi ni korakora iroura ngkanne boutokan te nano n tatangira ao te katiteuanaki n te ekaretia.—I-Ebeto 4:1-3; 5:1, 2.
5. E aera ngkai e aki riai kabuakakaia aomata?
5 E ataia raoi Iesu bwa aroaroia aomata aika aki kororaoi bon te kakabuakaka. Mangaia are e anga te reirei ae kangai: “Katoka ami kabuakaka ba kam kawa ni manga kabuakakaki.” (Mataio 7:1, NW) Taraia bwa e aki kangai Iesu: “Tai kabuakaka” ma e kangai: “Katoka ami kabuakaka.” E ataia bwa e bati i buakoia ake a ongora irouna aika bon aroaroia te kakabuakaka. Tiaki te koaua bwa e a tia n rikirake iroura te anua anne? Ngkana iai iroura kani kakaraoan anne, ti riai ngkanne ni kakorakoraira ni bitii arora bwa ti aonga n aki manga kabuakakaki. Ni koauana, tera ara bwai ni kabuakakaa ae e a tia n anganaki te mwioko mairoun Iehova, ke n taekinna bwa e aki tau n riki bwa kaain te ekaretia? Tao e kona n iai mamaaran te tari anne, ma ngkana e teimatoa ni butimwaeia Iehova, e riai ngkanne bwa ti na katinanikua? (Ioane 6:44) Ti kakoauaa raoi bwa Iehova ae e kaira ana botaki ao ngkana iai bitaki aika riai ni karaoaki, e na boni karaoi n ana tai are e a tia n namatia?—Wareka I-Rom 14:1-4.
6. Tera aron Iehova n taraia ana toro?
6 E rianako aroaron Iehova ibukina bwa e kona n atai aia konabwai Kristian n tatabemania nako bwa aekan aomata raa ngaiia, ngkana e a roko te maiu ae kororaoi n te waaki ae boou i aon te aba. E atai naba aron rikirakeia ni kaineti ma maiuakinan baike a reiakin man te Baibara. Ngaia are akea bukina ae riai ngkai e na kaatuua taraan mamaaraia nako aomata. Ti wareka ae kangai n Taian Areru 103:12: “Ai aron raroani mainiku mai maeao kararoan ara bure i Rouna mai roura.” Ai kakaaitaura ngaira ibukin aei!—Taian Areru 130:3.
7. Tera reireiara man aron Iehova n taraa Tawita?
7 Ti nora koauana n te Baibara bwa e rianako ana konabwai Iehova ni kaatuua taraan raoiroin te aomata. E taekina Tawita te Atua ni kangai: “Au toro are Tawita, are kakawakin au tua, ma n ira nanou n nanona ni kabanea, ma ni kakaraoa ti te bae riai i matau.” (1 Uea 14:8) Ti ataia bwa e karaoi bwaai tabeua aika kairua Tawita, ma e teimatoa Iehova ni kaatuua taraakin raoiroina ngkai e ataia bwa e raoiroi nanona.—1 Rongorongo 29:17.
Ataakia Tarira n Aron Ataakia Iroun Iehova
8, 9. (a) N te aro raa, ae ti kona iai ni kakairi iroun Iehova? (b) E na kanga ni kona ni kabwarabwaraki aei ao tera reireiara iai?
8 E kona n atai naano Iehova ao ngaira ti aki. Aei bukina ae ti bon riai iai n aki kakabuakaka, bwa ti aki ataa ana iango te aomata ni kabane. Ti riai ni kataia ni kakairi iroun Iehova n aki kaatuua taraan aia aki kororaoi aomata, bwa boni baika a na mauna. Tiaki ngkanne te tia ae moan te raoiroi bwa ti na kakairi irouna n te itera aei? Ni karaoan aei, e na karikirakeaki iai te iraorao ae rau ma tarira ao mwaanera.—I-Ebeto 4:23, 24.
9 Ibukin kabwarabwarana, iangoa te auti ae uruaki, a a bwaka kaini kawawana, a uruaki kamamana ao a uruaki ana tiiring [nangoan te kabuebue man te kaabwa] imwin mwaimwaia n te ran. A kona n taraa te auti anne angiia aomata ao n iangoia bwa e riai n uruakaki bwa e a kamaraki mata tarataraana. Ma e kona n roko temanna ae kaokoro ana taratara iai. E kona n raababa riki ana taratara nakon ae tii taraan te uruaki, ao e noria bwa e matoatoa aan ma kain te auti ao e kona ni manga karaoaki. E kabooa te auti aei teuaei ao e onobwai baike e nori bwa a uruaki ao e a manga taraaraoi. Tabeua te tai imwina, a a mangaria aomata ake a rirarikina bwa te auti ae rangi n tamaroa. Ti kona ni katotonga te aomata aei ae kakorakoraa n onobwaia ke ni manga karaoa te auti? N onean mwin are ti na kaatuua taraan aia kairua tarira aika ti nori, ti kona n atai raoi aroaroia aika raraoi ao konabwaiia ni karikirakei aia onimaki? Ni karaoan aei, e na rikirake iai tangiraia tarira ibukin anuaia aika a kakairi n aroaron Iehova. Ao anne are e karaoia Iehova.—Wareka Ebera 6:10.
10. E na kanga ni kona ni buokira te reirei ae n I-Biribi 2:3, 4?
10 E anga reirei tabeua te abotoro Bauro aika kona ni buokira n ara iraorao ma kaain te ekaretia ni kabane. E kaumakiia Kristian ni kangai: “Tai karaoa te bwai teuana ni kakarabakau ma ni kainikatonga, ma kam na nanorinano n atongia raomi ba aongkoa a raoiroi riki nako imi. Ao kam na tai mutiakin ami bwai, ma kam na mutiakin naba aia bwai raomi.” (I-Biribi 2:3, 4) E na buokira bwainan te nanorinano bwa ti na taraia aomata nako n te aro ae riai. Ngkana ti kaotiota tabeakinaia aomata ao iaiangoan raoiroiia, ti na buokaki iai bwa ti na taraiia n aron ana taratara Iehova.
11. Baikara bitaki aika a a tia n noraki uaaia n ekaretia tabeua?
11 N taai aika tibwa nako, ao a a rangi ni korakora bitaki ni katobibia te aonnaba man batin mwamwaeia aomata. Iai kaawa tabeua aika abwabwaki aika maekanaki ngkai irouia aomata man aaba aika kakaokoro. A a tia tabeman ake a a tibwa roko n ara aono ni karikirakea te kan ongora nakon ana koaua te Baibara, ao ai raora ngkai n tataromauria Iehova. A roko koraki aikai “mai buakoia botanaomata ni kabaneia, ma baronga ma natanaomata ma taian taetae.” (Te Kaotioti 7:9) Ao n tokina, a a bati ara ekaretia aika kaainaki irouia aomata man aaba nako ni katobibia te aonnaba.
12. Tera aron ara taratara ae ti riai ni kateimatoaa i marenara, ao e aera ngkai e kona n riki aei bwa te kangaanga n tabetai?
12 Ti kona ni kainnanoa mutiakinan riki kateimatoan ara taratara ae riai i marenara n ara ekaretia. Ti kauringaki iai bwa ti na mutiakin ana reirei te abotoro Betero ibukin kaotiotan ‘tangiraia taari ae e aki mwamwanaa te aba, ao ni kakorakoraira n i tangitangiri n te nano ae itiaki.’ (1 Betero 1:22) E kona ni kangaanga karikirakean te tangira ni koaua ao te iakoakoi, n ekaretia aika bati iai aomata aika roko man taabo aika kakaokoro n te aonnaba. A kona ni kaokoro aia katei raora n taromauri ma ara katei, ao e kona n nanonaki naba n anne okoron aia reirei, kaubwaia ao aia reeti. Ko a tia n noria bwa e kangaanga otam n aia iango ao aia katei tabeua raom n onimaki tabeman? E kona naba n titeboo aia namakin ma ngkoe. N aki ongea anne, ti a bane n reireiaki ae kangai: ‘Tangiriia taari.’—1 Betero 2:17.
13. Baikara bitaki ni kaineti ma arora n iaiango aika ti riai ni karaoi?
13 Tao e riai karaoan bitaki tabeua ni kaineti ma arora n iaiango bwa ti aonga ni karababaa nako tangiraia tarira. (Wareka 2 I-Korinto 6:12, 13.) Iai te tai ae ti a tia iai n taekina ae titeboo ma aei, “I aki inanonano, ma . . . ” imwina I a manga kaokioka taekinan aroaro tabeua aika aki riai ake I taku bwa a a taabangaki i buakoia kaain te reeti teuana? E kaotaraeaki n aeka n namakin aikai, bwa ti kainnanoa katokan te inanonano ae teimatoa n titiku i nanora. Ti kona n titirakinira ni kangai, ‘I katoatai ni kakorakoraai ni kan kinaia raoi aomata aika kaokoro kateia ma au katei?’ A kona ni buokira aeka n tutuo aikai, ni katamaroai riki arora n tangiriia ao n nanoangaiia tarira ni katobibia te aonnaba.
14, 15. (a) Anga katoto tabeua ni kaineti ma aroia tabeman ni bitii aroia n taraia aomata? (b) Ti na kanga ni kona ni kakairi irouia?
14 Iai katoto aika raraoi tabeua n te Baibara, ni kaineti ma te koraki ake a a tia ni bitii aroia n taraiia aomata, ao temanna mai buakoia bon te abotoro Betero. E aki kakawara mwengan te Tientaire Betero kioina ngkai te I-Iutaia ngaia. Ma iangoa aron ana namakin ngke e a tuangaki bwa e na nakon mwengan te Tientaire ae aki korotobibiaki ae Korenerio! E bita ana iango Betero n ataan nanon te Atua ae a na kaaina te ekaretia ni Kristian botannaomata ni kabane. (Mwakuri 10:9-35) E a tia Tauro are e a riki bwa te abotoro Bauro rimwi riki, ni kataia ni bita arona ao ni katoka naba ana inanonano. E kaota naba ana bure are e rangi n riribaia Kristian, n te aro are e ‘kakorakoraa ni bwainikirina ana ekaretia te Atua ao e ururua.’ Mangaia are ngke e a kaetaki ana iango Bauro iroun te Uea ae Iesu, e a karaoi bitaki aika rangi ni kamimi ao ni butimwaai naba aia kairiri aomata ake e bwainikirinia ngkoa.—I-Karatia 1:13-20.
15 Akea te nanououa bwa ti kona naba ni bitii aroarora n ana ibuobuoki taamnein Iehova. Ngkana ti namakinna bwa iai te inanonano ae raba i nanora, ti bia kakorakoraira ni kanakoa ao ni “kawakina te nano ae ti teuana mairoun te Tamnei n te bwai ni kabaebae are te raoi.” (I-Ebeto 4:3-6) E kaungaira te Baibara bwa ti na ‘bwabwaina riki te tangira nakoni bwaai ni kabane are e na katiteuanaira n te aro ae kororaoi.’—I-Korote 3:14, BK.
Kakairi Iroun Iehova n Ara Mwakuri ni Minita
16. Tera ana kaantaninga te Atua ibukia aomata?
16 E korea ae kangai te abotoro Bauro: “Akea rinerineaia aomata iroun te Atua.” (I-Rom 2:11) Bon ana kaantaninga Iehova bwa a na bane botannaomata nako n ibuokanibwai n taromauriana. (Wareka 1 Timoteo 2:3, 4.) Ni kakororaoan te kaantaninga anne, e a tia ni baireia bwa e na tataekinaki “te euangkerio ae aki totoki . . . nakoia botanaomata ni kabaneia ma baronga ma taian taetae ma natanaomata.” (Te Kaotioti 14:6) E taku Iesu: “Nen aroka aonaba.” (Mataio 13:38) Tera kakawakin aei nakoim ma am utu ni kaan?
17. Ti na kanga ni kona ni buokiia aomata n aekaia nako?
17 A aki kona n reke angaia aomata ni kabane ni kawari aaba aika raroa nako ibukin uarongorongoan te Tautaeka n Uea nakoia aomata. Ma e ngae n anne, tao ti kona ni karokoa te rongorongo aei nakoia aomata aika roko man aaba ni kabane aika kakaokoro aika maeka n ara aono. Te koaua bwa ti kamarurungira n uarongorongo nakoia aomata n aekaia nako, ao tiaki tii ake ti a tia n tataekina te rongorongo nakoia i nanon ririki aika bati? E aera bwa ko aki kakorakorako ni karababaa riki am mwakuri nakoia aomata, ake e tuai n roko irouia te rongorongo?—I-Rom 15:20, 21.
18. Tera are e kaotiotia Iesu ni kaineti ma tabeakinaia aomata?
18 E korakora iroun Iesu namakinan ae a riai ni buokaki aomata ni kabane. E aki uarongorongo n te tabo ae tii teuana. Ti kaongoaki n te rongorongo teuana man te Baibara bwa e “nakonako Iesu ni kaawa ni kabane ma maeka nako.” Ao imwina, “ngke E noriia aomata aika bati, ao E nanoangaiia” ao e a kaotiota riain buokaia.—Mataio 9:35-37.
19, 20. Baikara aanga tabeua ake ti kona ni kaotiota iai ana mwamwannano Iehova ma Iesu nakoia aomata ni kabane n aekaia nako?
19 Baikara aanga tabeua ake ko kona ni kaotiota iai te anua ae titeboo ma anne? A a tia tabeman ni kakorakoraia n uarongorongo n aia aono ake a aki bati ni kakawaraki. E kona n nanonaki n aei taabo ni bitineti, taabo ni kamaangang, kai ni bwati ma marae ni wanikiba, ke auti ni maeka ake e kangaanga kawaraia bwa a roroka. Tabeman riki, a a tia n reiakina te taetae ae ianena bwa a aonga n uarongorongo nakoia reeti n aomata tabeua aika maeka n aia tabo ke nakoia kurubu ake e aki bati n uarongorongo te aba nakoia n taai aika nako. Reiakinan kamauraia n oin aia taetae, e a kaotaki iai nanom n tabeakin mweraoia. Ngkana tao ti aki kona n reiakina te taetae teuana, ti kona ni kaungaia te koraki ake a karaoa anne? Ni koauana, ti aki tangiria bwa ti na kabwarai nanoia ke n nanououa ngkai a a kakorakoraia tabeman n uarongorongo nakoia aomata aika roko man te aba teuana. A kakawaki maiuiia aomata nako iroun te Atua, ao ti tangiria bwa ti na tarai bwaai n aron anne naba.—I-Korote 3:10, 11.
20 Taraakiia aomata n aron ana taratara te Atua, e nanonaki naba iai te uarongorongo nakoia aomata ni kabane, n aki ongeia bwa tera aroia. Tao tabeman, akea mwengaia, a barekareka, ke a maiuakina te aroaro ni maiu ae aki riai. Ngkana iai aika ribuaka nakoira, ti aki riai ni karikirakei iango aika aki raraoi ibukin abaia ke aia reeti. E ribuakaki Bauro irouia tabeman, ma e aki kariaia te aro anne bwa e na katoka ana uarongorongo nakoia aomata aika roko man te tabo anne. (Mwakuri 14:5-7, 19-22) E kakoauaa teuaei bwa bon iai tabeman aika a na kukurei ni butimwaeia.
21. E na kanga n reke buokam ni kamanenan aron Iehova n taraia aomata?
21 E a teretere raoi riki ngkai nakoira bwa e kainnanoaki te taratara ae riai, ae ana taratara Iehova, nakoia tarira n ara aono, ara itaritari ni katobibia te aonnaba, ao aomata aika ti boo ma ngaiia n ara mwakuri ni minita. Ngkana ti kabatiaa riki kaotiotan aron Iehova n taratara, ane e na korakora riki iai angira ni boutokaa te rau ao te katiteuanaki. Ao ti nang mwaatai riki iai ni buokiia aomata nako bwa a na tangira Iehova, ae te Atua are e “aki nanonano” ma e kaotiota tabeakinaia aomata ni kabane, “ba bon ana makuri baina te koraki aei ni kabaneia.”—Iobi 34:19.
Ko Kona ni Kaeka?
• Tera arora n taraia tarira ae ti riai ni kakorakoraira ni katokii?
• Ti na kanga ni kona ni kakairi iroun Iehova n arora n taraia tarira?
• Baikara reireiam ni kaineti ma arora n taraia tarira ni katobibia te aonnaba?
• Ti na kanga ni kakairi n aron Iehova n taraia aomata, ngkana ti karaoa ara mwakuri ni minita?