Ukoukora Ana Kairiri Te Atua Ni Bwaai Ni Kabane
“Te Atua aei bon Atuara n aki totoki: E na kairirira ni karoko matera.”—TAIAN ARERU 48:14.
1, 2. E aera ngkai ti riai ni mutiakina ana kairiri Iehova nakon onimakinan oin wanawanara, ao baikara titiraki aika wai mai iai?
NGKANA ti iaiangoi baika akea maneia ke aika karuanikai, ti rangi ni kai mwamwanaira bwa aongkoa a raraoi. (Taeka N Rabakau 12:11) Ngkana bon nanora raoi bwa ti na karaoa te bwai teuana ae aki riai nakoia Kristian, n angiin te tai e aki toki n tuangira nanora bwa iai bukin karaoan aei. (Ieremia 17:5, 9) Mangaia are e kaotiota te wanawana te tia areru ngke e tataro nakon Iehova ni kangai: “Kaotinakoa am oota ma am koaua; [ao] a na kairirai.” (Taian Areru 43:3) E onimakina Iehova, ao tiaki oin wanawanana ae iai tiana, ao bon aei nibwan kairana ae moan te tamaroa. Ti riai ni kakairi iroun te tia areru ae e onimakina ana kairiri te Atua.
2 Ma bukin tera ngkai ti riai n onimakina ana kairiri Iehova bwa te kairiri ae rietata nakon aia kairiri aomata nako? N ningai ae ti riai n ukoukoria iai? Baikara anua aika ti riai ni karikirakei bwa ti aonga ni kakabwaiaki mai iai, ao tera aron Iehova ni kairirira ni boong aikai? A na rinanoaki titiraki aika kakawaki aikai n te kaongora aei.
E Aera Ngkai Ti Riai n Onimakina Ana Kairiri Iehova?
3-5. Bukin tera ngkai ti kona n onimakina raoi ana kairiri Iehova?
3 Iehova bon Tamara ae memena i karawa. (1 I-Korinto 8:6) E bane n ataira raoi n tatabemanira nako ao e kona n nori nanora. (1 Tamuera 16:7; Taeka N Rabakau 21:2) E taku te Uea ae Tawita nakon te Atua: “Ko ata tekatekau ma teirakeu, Ko ata nanou mai kiraroa. Ba noria, akea te taeka teuana i neweu, ae aki bane n ataki i Roum, Iehova.” (Taian Areru 139:2, 4) Kioina ngkai e ataira raoi Iehova, e aera ngkanne bwa ti na nanououa ngkai e bon ataa raoi ae te kabanea n tamaroa ibukira? Irarikin anne, moan te wanawana Iehova. E nori bwaai ni kabane, e tirotiroi raoi, ao e atai baika a na riki mani moan rikini bwaai. (Itaia 46:9-11; I-Rom 11:33) Bon “te Atua, are ti Ngaia ae rabakau.”—I-Rom 16:27.
4 Irarikina, e tangirira Iehova ao e kan anganira te kabanea n tamaroa n taai nako. (Ioane 3:16; 1 Ioane 4:8) Ngkai bon te Atua ngaia ae tatangira, e bon tituaraoi naba nakoira. E korea ae kangai te tia rimwin Kristo ae Iakobo: “A bane angabwai aika raraoi ma bwaai n tituaraoi aika moan raraoi n ruo mai eta mairoun Taman taian oota.” (Iakobo 1:17) A bati kakabwaiaaia te koraki ake a kariaia kairakiia iroun te Atua ibukin arona n tituaraoi.
5 Kabaneana ngkanne, moan te rietata Iehova. E taekina ae kangai te tia areru ni kaineti ma aei: “Te aomata ae memena n te tabo ae raba ae ana tabo Teuare Moan te Rietata e na mamaeka n nun Teuare Moan te Mwaka. N na taekina Iehova ni kangai, Boni neu ni kamaiu ao au nono; bon Atuau, ae I onimakinna.” (Taian Areru 91:1, 2) Ngkana ti mutiakina ana kairiri Iehova, ti a ukoukora iai kamanoara iroun te Atua ae akea te bwai ae e na kabwaka iai. E ngae naba ngkana ti kaaitara ma te karitei ma e na boni boutokaira Iehova. E na aki kamaneangira. (Taian Areru 71:4, 5; Wareka Taeka N Rabakau 3:19-26.) Eng, e ataa ae moan te tamaroa Iehova ibukira, e tangira ae moan te raoiroi ibukira ao iai mwaakana ni katauraoi baika a moan raraoi ibukira. Ai nanobabara ngaira ngkana ti kakeaa bongan ana kairiri! Ma n ningai ngkanne ae ti kainnanoa iai ana kairiri?
N Ningai ae Ti Kainnanoa Iai te Kairiri?
6, 7. N ningai ae ti kainnanoa iai ana kairiri Iehova?
6 N etina, ti kainnanoa ana kairiri te Atua i nanoni maiura ni kabane, ni moa man uarerekera ni karokoa ti a kara. E taku te tia areru: “Te Atua aei bon Atuara n aki totoki: E na kairirira ni karoko matera.” (Taian Areru 48:14) N aron te tia areru, Kristian aika wanawana a onimakina naba ana kairiri te Atua n taai nako.
7 N tabetai ti ienikuria reken te ibuobuoki ae ti kainnanoia, ngkana ti a rangi ni ‘kainnano’ bwa tao ti a kaaitara ma te bwainikirinaki, ke te aoraki ae kamamate, ke e a karina naba n akea ara mwakuri. (Taian Areru 69:16, 17) Ngkana e riki anne, e kabebetenano onimakinan Iehova ni kakoauan ae e na kakorakoraira bwa ti na nanomwaaka ao ni kairiira nakoni karaoan motinnano aika raraoi. (Wareka Taian Areru 102:17.) Ma ti boni kainnanoa naba buokara mairouna n taai riki tabeua. N te katoto, ngkana ti tataekina te rongorongo ae raoiroi ibukin Ana Tautaeka n Uea te Atua nakoia kaain rarikira, ti kainnanoa ana kairiri Iehova bwa e aonga n nakoraoi riki uaan ara uarongorongo. Ao ngkana ti riai ni karaoa te motinnano teuana ni kaineti ma te kakibotu, kunnikaira, katamaroaara, ara iraorao, ara mwakuri ni kareketianti, ara reirei, ke bwaai riki tabeua, ti wanawana tii ngkana ti mutiakin ana kairiri nako Iehova. Ni koauana, ti kainnanoa te kairiri n aroaroni maiura nako.
Karuanikain te Aki Ukoukora Ana Kairiri te Atua
8. Tera ae kaotaki ni kanakin te uaanikai ae katabuaki iroun Nei Ewa?
8 Ma uringnga bwa ti riai ni kukurei ni butimwaea ana kairiri Iehova. E na bon aki kairoroira te Atua ngkana ti aki kani karaoia. Te moan aomata are e rineia bwa e na aki ongeaba nakon ana kairiri Iehova, bon Nei Ewa, ao e oti n ana katoto bwa e kakaiaki mwin te motinnano ae buakaka. Iangoa te bwai ae kaotaki n ana mwakuri anne. E kana te uaanikai ae katabuaki ibukina bwa e kan “riki ba kaanga te Atua n ataa te raoiroi ma te buakaka.” (Karikani Bwaai 3:5) Ni karaoan anne, e kaotia iai bwa e kani karaoa taben te Atua are bon tiaki tabena, ae karaoan oin ana motinnano ni kaineti ma te raoiroi ao te buakaka, nakon are e na mutiakin ana kairiri nako Iehova. N tokina e a rawa ni butimwaea riain mwaakan Iehova n tautaeka. E kan taua taekana i bon irouna. E bon raonna naba buuna ae Atam n te karitei anne.—I-Rom 5:12.
9. Ngkana ti rawa n ongeaba nakon ana kairiri Iehova, tera ngkanne ae ti karaoia, ao bukin tera bwa ti aki wanawana iai?
9 Ni boong aikai, ngkana ti rawa n ongeaba nakon ana kairiri nako Iehova, ti a katotonga iai Ewa n rawa ni butimwaea riain mwaakan Iehova n tautaeka. Iangoa te katoto teuana ibukin te aomata ae karikirakea anuana ae matakuakinan te bwaitingako. Ngkana e a reitaki ma te ekaretia ni Kristian teuaei, e na bon ataa ngkanne ana kairiri Iehova n te itera aei. A riai n aki taekinaki bwaai aika kammaira ao a na aki taraaki ma te nano ni kaibwabwaru. (I-Ebeto 5:3) Aron teuaei n rawa nakon ana kairiri Iehova, e a kakewea iai riain mwaakan Iehova n tautaeka ao e a moamoa riki Ana babaire ibukin te aro ni kairiri. (1 I-Korinto 11:3) Anne ai boni kaotan te aki wanawana bwa e kangai Ieremia: “Tiaki ana bwai te aomata ae nakonako te kaeti eueutakina.”—Ieremia 10:23.
10. Bukin tera bwa ti riai ni kabonganai raoi inaomatara n te aro ae ti na kona n onimakinaki?
10 Tao a aki inanoi tabeman ma ana taeka Ieremia bwa a taku bwa e anganira te inaomata Iehova, mangaia are e aki kona ni kabuakakaira ibukin kabonganan inaomatara. Ma tai mwaninga bwa e ngae ngke te bwaintangira te inaomata ma bon te mwioko naba. Ti na boni kaekai bukinara iroun te Atua ni baike ti taekin ao ni karaoi. (I-Rom 14:10) E taku Iesu: “E taetae te wi man onraken te nano.” E a manga taku riki: “A nako man te nano naano aika bubuaka, ae te kamatea te aomata, te kimoa bun te aomata, te bo ma te nikiranroro, te ira, te bukibuki, te taetaebuaka nakon te Atua.” (Mataio 12:34; 15:19) Mangaia are e kaotaraeaki nanora n ara taeka ao ara mwakuri. A kaotia bwa tera arora ni koaua. Anne bukina ngkai e ukoukora ana kairiri Iehova ni bwaai ni kabane te Kristian ae wanawana. N te aro anne, e na taraia Iehova bwa e ‘eti nanon’ te aomata aei ao e na “karaoa ae raoiroi” nakoina.—Taian Areru 125:4.
11. Tera reireiara man rongorongoia kaain Iteraera rimoa?
11 Uringa rongorongoia kaain Iteraera rimoa. Ngke a rineia bwa a na karaoi motinnano aika raoiroi, n ongeaba nakon ana tua Iehova, ao e kamanoia. (Iotua 24:15, 21, 31) Ma n angiin te tai, a kabonganai inaomataia n te aro ae aki riai. E taekina ae kangai Iehova ibukiia n ana bong Ieremia: “A aki kan ongo, ao a aki katanimai taningaia, ma a nakonako n reken aia iango, ao ni matoatoan nanoia aika bubuaka, ao a kekerikaki ao a aki waki.” (Ieremia 7:24-26) Ai kananokawakira! Ti bia aki rawa nakon ana kairiri Iehova ao n nakonako n oin ara iango ibukin matoatoan nanora ao tabeakinan riki kakukureiara. Bwa ngkanne, ti na boni “kekerikaki ao [n] aki waaki” iai!
Tera ae Kainnanoaki Ngkana Ti na Mutiakina Ana Kairiri te Atua?
12, 13. (a) Tera te aroaro ae kairira bwa ti na kani mutiakina ana kairiri Iehova? (b) Bukin tera bwa e riai bwainakin te onimaki?
12 E kairira tangiran Iehova bwa ti na kani mutiakina ana kairiri. (1 Ioane 5:3) E ngae n anne, e katereterea te bwai teuana riki ae ti kainnanoia Bauro ngke e kangai: “Ti nakonako n te onimaki, ao ti aki n ane noraki.” (2 I-Korinto 5:6, 7) Bukin tera bwa e kakawaki te onimaki? Ibukina bwa e kairirira Iehova “i nanoni kawain te raoiroi,” ao a aki kairira kawai aikai nakon te kaubwai ke te kakannato n te aonnaba aei. (Taian Areru 23:3) Ibukin anne, ti riai ni katurui matara n onimaki i aoni kakabwaia aika akea kabotauaia aika reke man ara beku iroun Iehova. (Wareka 2 I-Korinto 4:17, 18.) Ao e na buokira te onimaki ni karaui nanora ma baika a tau ibukin maiura.—1 Timoteo 6:8.
13 E kaotia Iesu bwa e irekereke te taromauri ae koaua ma te nano ni kan anga, ao e kainnanoaki iai te onimaki. (Ruka 9:23, 24) A a tia tabeman taan taromauri aika kakaonimaki ni kabanei korakoraia n anga ngaiia, n aroia n nanomwaaka i aan te maiu ni kainnano, te karawawataaki, te inanonano, ao te bwainikirinaki ae kakaiaki. (2 I-Korinto 11:23-27; Te Kaotioti 3:8-10) A kona ni karaoa aei ma te kukurei tii man aia onimaki ae nene. (Iakobo 1:2, 3) Ti kairaki man ara onimaki ae nene bwa ti na kakoauaa raoi ae mutiakinan ana kairiri Iehova boni moan te tamaroa n taai nako. Boni ngaia n taai nako ae karekei kakabwaiara. Ti kakoauaa raoi bwa kaniwangaia te koraki ake a kakaonimaki n nanomwaaka, e a aki kona ni kabotauaki ma te karawawataaki ae aki teimaan are a rinanona.—Ebera 11:6.
14. Bukin tera bwa e riai ni kaotiota te nanorinano Nei Aka?
14 Iangoa naba bonganan te nanorinano ni mutiakinan ana kairiri Iehova. E kaotiotaki aei n ana katoto Nei Aka are ana toro Nei Tarai. Ngke e a ataia Tarai bwa e a aki kona ni kariki, ao e a angan Aberaam Nei Aka, ao e a bikoukou neiei. Imwina, e a karikirakea te kainikatonga Aka nakon ana toka ae kanoabo. Ao n tokina, e a “karawawata neierei” Tarai ao e a birinako Aka. Ao e roko ana anera Iehova iroun neiei ao e taku: “Okira am toka te aine, ao kariaia menam i aani baina.” (Karikani Bwaai 16:2, 6, 8, 9) Tao e na bae n tangiri aeka ni kairiri tabeua riki Aka. Ma ngkana e na ira nanon ana taeka te anera neiei, e na katoka moa anuana ae te kainikatonga. Ngaia are e a kananorinanoa Aka ao e karaoa are e tuangnga te anera, ao e a bungia natina te mwaane ae Itimaera n ana maeka tamana ae kamanoaki raoi iai.
15. Kabwarabwarai aaro tabeua ake e na bae ni kainnanoaki iai te nanorinano mairoura ni boong aikai, ni mutiakinan ana kairiri Iehova.
15 Mutiakinan ana kairiri Iehova, e nanonaki iai bwa ti na kananorinanoira. Tao tabeman, a na bae ni kariaia te iango ae e aki kukurei Iehova n aroia ni kakibotu ae a tatangiria. Tao e kona naba n ae e a tia temanna te Kristian ni kauna temanna ao e kan nako ni kabwaraa ana bure. Ke tao e a tia ni karaoa ae kairua ao e kani kaotia bwa boni ngaia ae bure. Ma tera arona ngkana iai ae karaoa te bure ae kakaiaki? E riai ni kananorinanoa ao ni kaota ana bure anne nakoia unimwaane. Tao iai naba ae e kona ni kabaneaki. Ngkana e tangiria bwa e na butimwaeaki kan okina nakon te ekaretia, e riai ngkanne n raira nanona ma te nanorinano ao ni bita maiuna. E kabebetenano n te itera aei ke n aaro riki tabeua taeka aika n Taeka N Rabakau 29:23 aika kangai: “E na karinanoa te aomata ana kainikatonga: Ma ane nanorinano e na reke te karineaki i rouna.”
E na Kanga ni Kairirira Iehova?
16, 17. Ti na kanga ni kakabwaiaki raoi man te Baibara ae nibwan ana kairiri te Atua?
16 Nibwan ana kairiri te Atua ae moan te kakawaki bon te Baibara, ae Ana Taeka ae kairaki koreana iroun te taamnei. (Wareka 2 Timoteo 3:16, 17.) Ngkana ti tangiria bwa ti na rangi ni kakabwaiaki man Ana Taeka, ti wanawana ngkana ti aki tataningaa rikin te kangaanga, ma ti katauraoira imwaina n ukoukori taeka n ibuobuoki i nanon te Baibara. Ma ti riai ni karekea anuara ae warekan te Baibara ni katoabong. (Taian Areru 1:1-3) Ao n te aro anne, ti a rikirake iai n ataa kanoan ana taeka te Atua ae kairaki koreana irouna. A boraoi ara iango ma ana iango te Atua, ao ti a tauraoi iai ni kaaitarai kangaanga aika ti aki kaantaningai.
17 Irarikina, e kakawaki kananoan ara iango i aon baika ti wareki n te Baibara ao n tataroakin. Ngkana ti kananoi ara iango i aoni kiibu man te Baibara, ti iangoa iai aron kamanenakiia n aaro tabeua. (1 Timoteo 4:15) Ngkana ti kaaitara ma kangaanga aika kakaiaki, ti tataro nakon Iehova bwa e na buokira bwa ti aonga ni kunea te kairiri ae ti kainnanoia. E na buokira taamnein Iehova bwa ti na kona n uringi ana boto n reirei n te Baibara aika manena ake ti a tia ni wareki i nanon te Baibara ke ni booki ake a boto i aon te Baibara.—Wareka Taian Areru 25:4, 5.
18. Baikara aanga ake e kabongana iai te botaki n itaritari ni Kristian Iehova ibukin kairara?
18 Te tabo riki teuana ae kakawaki ibukin ukoukoran ana kairiri Iehova, bon ara botaki n itaritari ni Kristian. Iteran te botaki n itaritari aei ae kakawaki bon te Rabwata n Tautaeka ae tei ibukin “te toro ae kakaonimaki ae wanawana” ake a kakatauraoi reirei ibukin maiuakinan te onimaki ni koaua n taai nako rinanon booki, maekatin ao kaetieti ibukin bobotaki ma ruunga. (Mataio 24:45-47; kabotaua ma Mwakuri 15:6, 22-31.) Irarikina, iai i nanon te botaki n itaritari ni Kristian, te koraki aika ikawai n te onimaki ao riki unimwaane ake a a tia ni katauaki ibukin buokaia aomata ao n anga taeka n reirei man te Baibara. (Itaia 32:1) Iai teuana riki te ibuobuoki ae kakawaki ibukia rooro n rikirake aika maeka ni mwengaia Kristian. A a tia aia karo aika kaain te onimaki n anganaki te mwiokoaki iroun te Atua bwa a na aki toki n angania natia ana kairiri te Atua, ao tabeia ataei bwa a na ongeaba iai.—I-Ebeto 6:1-3.
19. Baikara kakabwaia aika ti karekei n teimatoara n ukoukora ana kairiri Iehova?
19 Eng, e a tia Iehova n anganga te kairiri n aaro aika kakaokoro ao ti wanawana riki ngkana ti kamanenai raoi. E taku te Uea ae Tawita ngke e nora kakaonimakin te baronga ae Iteraera: “A onimakiniko ara bakatibu: A onimaki, ao Ko kamaiuia. A tang nako Im, ao a kamaiuaki: A onimakiniko, ao a aki maneang.” (Taian Areru 22:3-5) Ngkana ti onimakina ana kairiri Iehova ao ni mutiakinna, ti kona naba ngaira n “aki maneang.” A na aki bwara nanora n ara kaantaninga. Ngkana ti ‘angan Iehova arora nako,’ n onean mwin are ti na onimakin oin wanawanara, ti na taia iai kakabwaia aika rangi ni bati ngkai naba. (Taian Areru 37:5) Ao ngkana ti kakaonimaki ao n nanomwaaka n aron maiura aei, a na bon teimatoa n aki toki kakabwaia akanne. E korea ae kangai te Uea ae Tawita: “E tangira te kaeti-taeka Iehova, ao E aki kitania ana aomata aika itiaki. A kakawakinaki n aki toki: . . . A na abana te aba akana raoiroi, ao a na mamaeka iai n aki toki.”—Taian Areru 37:28, 29.
Ko Kona ni Kabwarabwaraa?
• Bukin tera bwa ti onimakina ana kairiri Iehova?
• Tera ae kaotaki n rawara nakon ana kairiri Iehova?
• Baikara aaro tabeua ake e kainnanoa iai te nanorinano te Kristian?
• E kanga ni kairirira Iehova ni boong aikai?
[Taamnei n iteraniba 13]
Ko onimakina Iehova ni maium ni kabane?
[Taamnei n iteraniba 14]
E tinanikua riain mwaakan Iehova n tautaeka Nei Ewa
[Taamnei n iteraniba 15]
Tera te aroaro are e kainnanoia Nei Aka ngkana e na karaoa nanon ana kaetieti te anera?