Taetae ni Burabeti Ibukin Taai Aika Imwaira Aika Uakaan

NGKE e taekin taai aika imwaira te abotoro Betero ao e korea ae kangai: “N ai aron ana taeka n akoi [te Atua], ti kaantaningai karawa nabangkai ma aonaba nabangkai, ake e mena iai te raoiroi.” (2 Betero 3:13) E moan taekinaki te berita ibukini “karawa nabangkai ma aonaba nabangkai” rinanon te burabeti ae Itaia. (Itaia 65:17; 66:22) Ngke e taekina te taetae ni burabeti aei Betero, ao e kaotia bwa e tuai ni kakoroaki raoi bukina n ana tai.

Rimwi riki tao n 96 C.E. ao te Kaotioti are taekinaki rinanon te abotoro Ioane, e boni kairekerekeaki iai te “aonaba nabangkai” ma kakabwaia i aan Ana Tautaeka n Uea te Atua. (Te Kaotioti 21:1-4) A a tabe ngkai ni kakoroaki bukin ana taeka Iesu n ikotaki naba ma ana taeka te abotoro Bauro ibukini baika riiriki n te aonnaba imwain raoi rokon Ana Tautaeka n Uea te Atua. Ngaia are, ti kona ni kantaningaa te Tautaeka n Uea anne bwa e na waekoa ni karokoa te waaki ae boou i aon te aba. A na tera aron te waaki ae boou i aon te aba? Ti na tuangaki ngkai mani bokin te Baibara ae Itaia.

Kakabwaia n te Waaki ae Boou i Aon te Aba

Te Rau ni Katobibia te Aonnaba ao te Katiteuanaki n Taromauri. “Ane a na ororoi aia kabaang ba winibarau, ao aia raanti n oniki ba bwaai ni koro-mwangani-kaai: a na aki tabeka te kabaang te botanaomata teuana ni buakana te botanaomata teuana, ao a na aki manga reireiia te buaka.”—Itaia 2:2-4.

Te Rau i Marenaia Aomata ao Maan. “E na maeka te kameanti i rarikin te tiibutetei, ao e na wene te rebari i rarikin te koti te tei; ao te kao te tei ao te raian te tei ao te kao ae kamarikaki, ni botaki; ao e na kaiririia te tei ae uarereke. Ao a na i-raorao te kao-aine ma te bea; a na botaki ni wene bunia: ao te raian e na katotonga te kao ni kaakang uteute aika mau. . . . E na aki tabare te aba ma n ururu n au maunga ae tabu ni kabuta: ba a na buta aonaba n atakin Iehova, n ai aron taari ngkae e kabuta marawa.”—Itaia 11:6-9.

Tirauan te Amwarake Ibukia Aomata ni Kabane. “Ao Iehova Tabaota E na karaoa te amarake ae moan te kangkang i aon te maunga aei, ba kanaia aomata ni kabaneia, ma te ninima ae te wain i aoni baninin benna, ma te amarake ae moan te kangkang ae nenea, ae te wain i aoni baninin benna ae raumeaki.”—Itaia 25:6.

Ai Akea Riki te Mate. “E oongaki te mate i Rouna [te Atua] n aki toki; ao E na kaoi rannimata te Uea ae Iehova mani maata ni bane; ao E na uota nako kamaamaaean ana botanaomata mai aonaba ni bane: ba bon ana taeka Iehova.”—Itaia 25:8.

A a Manga Kautaki Maate. “A na manga maiu am aomata aika mate; a na manga tei rake bannaia au aomata. Kam na uti ao anene ni kimareirei, ngkami aika kam maeka i buakon te tano . . . ao e na manga kaotinakoia maate te tano.”—Itaia 26:19.

Bon te Tia Moti ae Raoiroi te Mesia. “E na aki kaeti-taeka ni matairikini matana, ao E na aki motiki-taeka n ongon taningana: ma E na kaeti taekaia akana akea aia bwai n te raoiroi, ao E na motiki taekaia akana nimamanei n te aro ae riai.”—Itaia 11:3, 4.

A Noraaba Mataki ao A Uki Taningaia Bonotaninga. “A na kaureaki iai mataia akana mataki, ao a na kaukaki taningaia akana a bono taningaia.”—Itaia 35:5.

A Maiureirei Rereua. “E na kukurei te raereke ma te tabo ae kamaroa; ao e na kimareirei te rereua, ao e na ue n ai aron te roti. E na bati n ue, ma ni kimareirei ma te kakatonga ma te anene.”—Itaia 35:1, 2.

Te Aonnaba ae Boou. “I karika karawa nabangkai [te tautaeka ae boou i karawa] ao te aonaba nabangkai [te botanaomata ae raoiroi ae boou i aon te aba]; ao a na aki uringaki baike rimoa, ao a na aki manga rin n te nano. Ma kam na aki toki ni kakatonga ma ni kimareirei n ae I karikia. . . . A na katei auti [taani maeka n te waaki ae boou i aon te aba are beritanaki iroun te Atua], ao a na maeka i nanoia; ao a na uniki kurebe, ao a na kang uaaia. A na aki katea ae e na maeka i nanona temanna; a na aki unika ae e na kana uaana temanna: ba ai aron ana bong te kai aia bong au aomata, ao au koraki aika rineaki a na kamaania ni bwain aia mwakuri baiia. A na aki matebuaka aia makuri, ao a na aki bung ba a na reke kaiia natiia; ba bon aia kariki akana a kabaia mairoun Iehova, ao tibuia ma ngaia. Ao aio arona rimwi, ba ngkana a tuai ni wewete, ao I a kaekaia naba; ao ngkana a boni kume n taetae, ao I a ongo naba.” “Ba aroni karawa nabangkai ma aonaba nabangkai, aika N na karaoi, ngkai a na tei matoa i matau, bon ana taeka Iehova, ao ai aroia naba ami kariki ma arami ba a na tei matoa.”—Itaia 65:17-25; 66:22.

Taetae ni Burabeti Ibukin Taai Aika Imwaira Aika Tikauarerei

Tiaki tii bokin te Baibara ae Itaia ae taetae ni burabetinaki iai kakabwaia ibukin taai aika imwaira. A a rangi n tiraua taetae ni burabeti n te Baibara aika kabwarabwarai baika tikauarerei ake a na kakororaoaki iroun te Atua rinanon Ana Tautaeka n Uea i aan ana kairiri Kristo.a Ko kani maeka i buakon aaro aikai n te bwaretaiti? Ko boni kona! Ukoukoria i bon iroum bwa tera ana reirei ni koaua te Baibara ibukin ana kantaninga te Atua ibukin taai aika imwaira, ao reiakina arom bwa ko aonga ni maeka i buakoia. A na rangi ni kukurei Ana Tia Kakoaua Iehova ni buokiko.

[Kabwarabwara ae nano]

[Taamnei n iteraniba 8]

A na maeka ma te rau aomata i marenaia ao ma maan naba

[Taamnei n iteraniba 9]

A na manga maiu maate

[Taamnei n iteraniba 10]

E na riki te aonnaba ni kabutaa bwa te bwaretaiti