Tera Raoi Ae Riki Nakon Te Aomata Ngkana E Mate?

“A aki mamate taamneia aomata nako, n ikotaki naba ma ake a buakaka. . . Katuaaeaia n te ai ae e uramwaaka n aki totoki, ao aki mamateia iai, e bon aki kona ni katoka rawawataia.”​—Aikai ana taeka Clement ae kaain Arekanria, ae te tia koro rongorongo i nanon te kauoua ao te katenua n tienture  C.E.

TE KORAKI ake a boutokaa te reirei ae moone bon te tabo ni kammaraki n aki totoki n ai aron Clement, a kakoauaa naba bwa aongkoa e aki mamate taamnein te aomata. Ma e boutokaa te koaua aei te Baibara? Iaiangoi baika taekinaki n Ana Taeka te Atua ni kaineti ma kaekaan titiraki aikai.

Te koaua bwa e aki mamate te moan aomata are Atam? Imwini karikan Atam, ao e tua ni kangai te Atua: “Ko kona n amamarake raoi mani kaai ni kabane aika kain te ne n aroka aei: ma ko na tai amarake man te kai n ata te raoiroi ao te buakaka: ba n te bong are ko amarake mai iai ao ko na boni mate.” (Karikani Bwaai 2:16, 17) E kairua ae e aki mamate Atam kioina ngkai e boni mate.

Tera ae riki nakon Atam imwini karaoan te bure irouna? Bon tiaki te rekenikai ae te kammarakaki n aki totoki i moone ae e motikia te Atua. Ma e rairaki taekan ana motikitaeka te Atua n te Baibara ni Katorika ni kangai: “E na maono moam ibukini karekeani kanam, ni karokoa okim nakon te tano are ko anaaki mai iai. Ba te tano ngkoe ao ko na okira te tano.” (Ara bwai te man reireiti; Karikani Bwaai 3:19, BK) E oti n te bwai ane e taekinna te Atua anne, bwa bon akea riki iteran rabwatan Atam ae na manga teimatoa ni maiu imwini matena.

E koaua bwa e aki mamate te aomata? Bon akea te aomata ae aki mamate. E taekinaki ae kangai n te Baibara n Te Minita 3:20: “A bane nako n te tabo ae ti teuana; a bane n riki man te tano, ao a bane ni manga okira te tano.” E a manga korea ae kangai te abotoro Bauro: “E roko te bure i aon te aba iroun te aomata ae ti temanna, ao iriana te mate. Ai ngaia ae a bane ni mate aomata, ba a bane ni bure.” (I-Rom 5:12, BK) Kioina ngkai a bane ni bure aomata, ai ngaia ae a a mate iai.

Iai te bwai ae a ataia ke n namakinna akana mate? E taekinaki ae kangai n Ana Taeka te Atua: “Akana a maiu, a ataia ba a na mate, ma a aki ata te bai teuana akana a mate, akea riki kaniwangaia ba a manuokinaki taekaia.” (Te Minita 9:5, BK) Ni kabwarabwaraan te bwai ae riki nakon te aomata ngkana e mate e taekinaki n te Baibara ae kangai: “E okira tanona; A mauna nanona n te bongi naba arei.” (Taian Areru 146:4) Ngkana ngaia bwa a “aki ata te bai teuana akana a mate” ao a “mauna nanoia,” a na kanga ngkanne ni manga namakina te kammarakaki i moone?

E arana te mate Iesu Kristo bwa te matu, ma e aki nanona ae iai te namakinaaba.a (Ioane 11:11-14) Ma e na boni bae n iai tabeman naba aika a na kaitaraa aei, ma n taku bwa e reirei Iesu bwa bon te tabo ae kabuebue moone ao taani bure a na karenakoaki nako nanon te ai ni moone. Ti na rinanona bwa tera raoi ae taekinna Iesu ni kaineti ma moone.

[Kabwarabwara ae nano]