Tera Raoi Nanon Moone?

N AKI ongeia bwa tera taamnein te taeka ae “moone” ae e na tei n am iango, angiia aomata a iangoa moone bwa te tabo ni katuuaa ibukin te bure. E taekinaki ae kangai n te Baibara ni kaineti ma rikin te bure: “Ba ai aron rokon te bure i aon te aba iroun te aomata ae ti temanna, ma rokon te mate n te bure; ao e ituia aomata ni kabaneia te mate n te aro aei, ba a bane ni bure.” (I-Rom 5:12) E kaotaki naba ae kangai n te Baibara: “Boon te bure te mate.” (I-Rom 6:23) Kioina ngkai te katuuaa ibukin te bure bon te mate, oin te titiraki ngkanne i aon kakaaean raoi nanon moone e kangai: Tera ae e na riki nakoira ngkana ti mate?

Iai te aeka ni maiu riki teuana ae e na waaki nako imwin te mate? Tera moone, ao aekaki n aomata raa aika a na nako iai? Iai riki te kaantaninga ibukia ake a mena i moone? E kaotii kaekaan titiraki aikai te Baibara aika koaua ma ni karaunano.

Iai te Maiu Imwin te Mate?

Iai te bwai teuana ae mena i nanora ae e aki-mamate, are e maiu nako naba imwin matera? Iangoa aron te moan aomata are Atam, bwa e kanga ni maiu n te moan tai. E kaotia te Baibara ni kangai: “Iehova ae te Atua E karaoa te aomata ni bubun aontano, ao E uuka te ikeike ni maiu nako nanoni bangabangani bairina.” (Karikani Bwaai 2:7) E ngae ngke e kateimatoaki maiuna n te ikeike, ma e bati riki ae nanonaki ni karinan te “ikeike ni maiu” nako nanoni bwangbwangani bwairina, nakon ae tii uukan te ang nako nanon mamaana. E nanonaki n aei bwa e karina te korakora-ae-te-maiu te Atua i nanon rabwatan Atam are akea ngkoa te maiu i nanona, are e mwamwakuri i nanoia aomata ao maan. (Karikani Bwaai 6:17; 7:22) E taekina te korakora aei te Baibara bwa te “tamnei.” (Iakobo 2:26, BK) E kona ni kabotauaki te taamnei aei ma korakoran te iti are e mwamwakuri i nanon te mitin ke te bwai ni mwakuri teuana bwa e aonga ni karaoa te mwakuri are e na riai ni karaoia. E aki kona itin te bwai teuana ni katotonga rabwatan te bwai are e kamwakuria, ao e bon aki kona ni katotonga rabwatan te bwai are e kamaiua, te korakora-ae-te-maiu are mena i nanoia bwaai aika karikaki. Akea rabwatana, ao akea naba ana iango.

Tera ae na riki nakon te taamnei ngkana e mate te aomata? E kaekaa Taian Areru 146:4 ni kangai: “E oti nako ikeikena [taamneina, NW], e okira tanona; a mauna nanona n te bongi naba arei.” Mangaia are ngkana e mate te aomata, e aki maiu nako naba taamneina n te aeka ni maiu teuana. E “okira te Atua te tamnei are E a tia n anga.” (Te Minita 12:7) E nanonaki iai ngkanne bwa te kaantaninga ibukin maiun te aomata arei n taai aika a na roko, e a bon nakon te Atua baireana.

Tera ngkanne aroia maate? Ngke e motika taekan Atam Iehova, ao e taekina ae kangai: “Bon te tano ngkoe, ao ko na manga okira te tano.” (Karikani Bwaai 3:19) E mena iia Atam imwain karikana man te tano ao anganakina te maiu mairoun te Atua? Bon akea ngaia! Ngke e mate Atam ao e okira arona are ngke akea ngaia ngkoa. E rangi ni mataata aroia maate n Te Minita 9:5, 10 (BK), ike ti wareka iai ae kangai: “A aki ata te bai teuana akana a mate, . . . ko tabe n nakon te mate, ike akea iai te makuri ke te iango ke te wanawana ke te atatai.” E kaotaki n te Baibara bwa te mate bon akean te maiu. Ai akea te bwai ae a ataia maate, ao a aikoa kona n namakinaaba ao n iango.

Te Kammarakaki ae Akea Tokina ke te Rua ni Mate?

Ibukina bwa akea aia namakin maate, e a aki kona ngkanne n riki moone bwa te tabo are a na kammarakaki iai maate, kioina ngke a a tia ni kakaraoa ae buakaka ngke a maiu. Ma ai tera ngkanne moone? Ngkana ti karaua n iangoa te bwai are e riki nakon Iesu imwin matena, ao e na buokira ni kaekaa te titiraki aei. E taekina ae kangai te tia korea te Baibara ae Ruka: “E aki kitanaki i Eriti [moone, King James Version], [Iesu] ao e aki nora naba te mka rabatana.”a (Mwakuri 2:31) E ngaa moone are e nako iai Iesu? E korea ae kangai te abotoro Bauro: “I anganingkami moa are I anganaki . . . ba E mate Kristo i bukin ara bure n ai aron taekana n te Baibara; ao ba E taunaki, ao ba E a manga uti n te kateni bong n ai aron taekana n te Baibara.” (1 I-Korinto 15:3, 4) Ma ngaia are e boni mena Iesu i moone, ae te rua ni mate, ao e bon aki kitanaki iai bwa e a manga boni kautaki.

Iangoa naba rongorongon te aomata are moan te raoiroi are Iobi, are e bati ni kammarakaki. Ibukin ana iango Iobi ni kani kamwawaa man ana kangaanga, e bubutii ni kangai: “Antai ae e na kariaia nanou, ae ko na kawakinai i moone [Tiore] ma ni karabaai iai ni karokoa tokin unim?”b (Iobi 14:13, Douay Version) E bon aki kona n tangira te tabo ae e ura te ai iai Iobi bwa e na kamanoaki iai! Iroun Iobi, “moone” bon te rua ni mate, are a nang akea iai ana kangaanga. Moone are e taekinaki n te Baibara, bon te rua ni mate are a bane n nako iai aomata aika raoiroi ao aika buakaka naba.

E Kona n Nanona te Kamaunanakoaki te Ai ni Moone?

E kona n nanonaki te ai ni moone bwa kaikonakan te kamaunanakoaki? Ibukin kaotan te kaokoro i marenan te taeka ae te ai, ma taeka aika Eriti ke moone, e taekina ae kangai te Baibara: “Te mate ma Eriti a teweaki nako nanon te nama are te ai.” “Te nama” ae taekinaki ikai bon te taetae ni kaikonaki, ibukina bwa te mate ao moone (Eriti) aika karenakoaki i nanona, a aki kona ni kabuekaki. “Te nama are te ai [bon]. . . te mate are te kauoua,” are te mate are ai bon akea iai kaantaningan te manga-uti.​—Te Kaotioti 20:14.

Nanon te nama ae te ai, titeboo ma “Keenna are nen te ai [te ai ni moone, King James Version]” are e taekinna Iesu. (Mataio 5:22; Mareko 9:47, 48) E koreaki te taeka ae Keenna 12 te tai i nanon te Baibara ni Kristian n te Taetae n Erene, ao e nanonaki iai aia marua Natin Innom, are i tinanikun oon Ierutarem. Ni menan Iesu i aon te aba, ao te mwarua aei e kakabonganaki bwa te tabo are a kakarenakoaki iai bwaai aika bubuaka, “ike a karenakoaki iai rabwataia taani kakeru aika maate, ao bannaia maan ao bwaai ni kabane aika kammaira.” (Smith’s Dictionary of the Bible) E kateimatoaki uran te ai aei n te burimton are e kabwakaki i nanona, bwa a na kabuokaki iai taiani maange. E kaikonaka te mwarua aei Iesu ma te kamaunaki n aki toki.

Titeboo nanon Keenna ma te nama are te ai, are e kaikonakaki naba nakon te kamaunaki n aki toki. A ‘karenakoaki nako nanon’ te nama are te ai te mate ao Eriti n te aro are ai akea riki te mate ao te ruanimate ngkana a a kainaaomataki aomata man te bure ao te kabuakakaki nakon te mate. A na reke “tibangaia” n te nama ae te ai, taani bure aika a rawa n rairi nanoia. (Te Kaotioti 21:8) A na boni kamaunaki n aki toki. N iterana are teuana, aomata ake a a tia ni mate ake a uringaki iroun te Atua, e na reke irouia te maiu ae kakukurei nakon taai aika a na roko.

E Nang Akea Kaain Moone

E taekina ae kangai Te Kaotioti 20:13: “Marawa e anga maate ake i nanona; ao te mate ma Eriti a anga maate ake i nanoia.” Eng, e nang akea kaain moone are e taekinaki n te Baibara. N aron are e a tia ni beritanna Iesu, ‘e na bon roko te aua, ae a na bane iai n ongo bwanan Iesu, aomata ake a mena i nanon ruaia ni mate ao a na oti nako.’ (Ioane 5:28, 29) E ngae ngke a a bon aki maiu ngkai, ma mirion ma mirion mwaitiia aomata ake a a tia ni mate, ae e bon tiku naba uringaia iroun Iehova ae te Atua, a na boni kautaki nakon te maiu n te baretaiti ae e na kaokaki nakon te aonnaba aei.​—Ruka 23:43; Mwakuri 24:15.

N ana aonnaba te Atua ae boou, a na aki manga mate aomata ake a kautaki, ngkana a tou mwin ana tua te Atua aika raraoi. (Itaia 25:8) “E na kabane rannimataia [Iehova] ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki,” ibukina bwa, “a mauna nako bwaai rimoa.” (Te Kaotioti 21:4) Ai kakukureira te kaantaninga ae katauraoaki ibukia te koraki ake i moone, ke ‘te rua ni mate!’ Ao te kaantaninga aei, e kairira bwa ti na iangoa karikirakean riki ataakin Iehova ae te Atua ao Natina ae Iesu Kristo.​—Ioane 17:3.

[Kabwarabwara ae nano]