Te Reirei Ae Taabangaki Kakoauaana

“I aki toki ni mii buaka bwa I kabuekaki i moone! I mii bwa aongkoa I a karenakoaki n te tabo ae urarake iai te ai n te aro are I a teirake n tatakarua. Ao ibukin anne, I a rangi ni kekeiaki mwaaka bwa N na aki karaoa te bure.”​—Arline.

KO KAKOAUAA ae moone bon te tabo ni kammarakaki ae katauraoaki ibukia taani bure? A mwaiti aomata aika kakoauaa anne. N te katoto, e kunea te tia rabakau temanna n te University of St. Andrews i Tikaoteran n 2005, bwa teuana te katenimwakoro mai buakoia mataniwi n Aaro n te aba aei, ake a kakoauaa ae te koraki ake a raurenako ma te Atua a na boni kammarakaki “ni karawawataan aia iango n aki totoki i moone.” Teuana te kanimamwakoro ake a kakoauaa bwa a na boni karawawataaki ni kammarakaki rabwataia te koraki ake i moone.

E a taabangaki n aaba aika mwaiti kakoauaan te reirei ae moone. N te katoto, n 2007 ao e a kuneaki n te Gallup poll ae te kakaae teuana n te United States bwa 70 te katebubua mai buakoia ake a titirakinaki n tain te kakaae anne ae a kakoauaa moone. E riki naba anne n aaba ake kaaina a aki rangi n tabe ma te Aro. E kuneaki naba n te kakaae ae te Gallup poll i Kanata n 2004 bwa 42 te katebubua mwaitiia aomata ake a kakoauaa moone. Ao 32 te katebubua mwaitiia kaaini Great Britain ae a boni kakoauaa raoi bwa bon iai moone.

Aia Reirei Mataniwi n Aaro

A mwaiti mataniwi n Aaro ake a tia ni katoka aia reirei ae moone bon te tabo ni kammarakaki ike e ura iai te ai. Ma a a manga boutokaa te reirei teuana ae titeboo ma are e taekinaki n te Catechism of the Catholic Church, are boretiaki n 1994. E taekinaki ae kangai n te boki anne: “Te tuuaa ae te kabanea ni korakora i moone, e nanonaki iai te raurenako ma te Atua n aki toki.”

Ma e ngae n anne, iai naba aika a kakoauaa bwa moone bon te tabo ae a karawawataaki iai n aia iango aomata ke ni kammarakaki naba iai rabwataia. A taku te koraki ake a boutokoa te reirei aei bwa e boto i aon te Baibara. E taekina ae kangai R. Albert Mohler ae te beretitenti n te Southern Baptist Theological Seminary: “Bon ana koaua raoi te Baibara.”

E Aera Bwa E Kakawaki te Reirei ae Ko Kakoauaa?

Ngkana ngaia bwa moone bon te tabo ni kammarakaki, ngkanne ko bon riai ni maakua. Ma ngkana e kairua te reirei aei, ngkanne a a tia mataniwi n Aaro ake ngaiia ake a reireinia aomata te reirei aei ni kabatiaa te mangaongao ao karawawataan te iango ae aki riai irouia ake a kakoauaia mataniwi aikai. A boni kabuakakaa naba iai te Atua.

Tera ae taekinaki n Ana Taeka te Atua ae te Baibara ni kaineti ma te reirei aei? Ni kaongora aika imwin aikai, ao e na kabonganaaki te Baibara ni Katorika ao te Baibara ni Borotetanti ni kaekai iai titiraki aika tenua aikai: (1) Tera raoi ae riki nakon te aomata ngkana e mate? (2) Tera ana reirei Iesu ni kaineti ma moone? (3) Tera rotakim n reiakinan te koaua ibukini moone?