Antai Aika Nako Moone?

Ana kaeka te Baibara

Moone (“Tiore” ao “Eriti” n te taetae are e moan rairaki iai te Baibara) bon te ruanimate, ao tiaki te tabo ni kammarakaki ae ura iai te ai. Antai aika nako moone? Aomata aika raoiroi ao aika buakaka. (Iobi 14:13; Taian Areru 9:​17) E taku te Baibara bwa ruanimateia te botannaomata aei bon “te auti ae a na bane ni kaitiboo iai aomata aika maiu.”​—Iobi 30:23.

E nako naba moone Iesu ngke e mate. Ma “e aki teimatoa n tiku i moone,” bwa e kautia te Atua.​—Mwakuri 2:​31, 32, The Bible in Basic English.

E na teimatoa n aki toki moone?

Naake a nako moone a na manga otinako, ni kaokaki nakon te maiu iroun Iesu, rinanoni mwaakan te Atua. (Ioane 5:​28, 29; Mwakuri 24:15) Ni kaineti ma te mangauti ae e na roko, e kaotaki n te taetae ni burabeti are n Te Kaotioti 20:13 bwa te “mate ao moone a na kaotinakoia maate ake i nanoia.” (King James Version) N te tai are ai akea iai kaaini moone, ao e a mauna naba. Akea ae e na manga nako iai ibukina bwa “e nang akea riki te mate.”​—Te Kaotioti 21:​3, 4; 20:14.

Ma a aki nako moone aomata nako aika mate. E kaotia te Baibara bwa iai tabeman aomata aika a bon riao buakakaia, ao a aikoa kona ni bitaki. (Ebera 10:26, 27) Ngkana a mate te koraki aikai, a aikoa nako moone ma ai Keenna, are kaikonakan te kamaunanakoaki n aki toki. (Mataio 5:​29, 30) N te katoto, e katerea Iesu bwa tabeman mataniwi n Aaro aika mwamwanaa te aba ake n ana tai, a na bon nako Keenna.​—Mataio 23:27-​33.