E Maiu Ana Taeka Iehova
Reirei Aika Kakawaki Man Reeta Ake Mairoun Ioane ao Iuta
E TARAA n ae e korea ana reta te abotoro Ioane n te ririki 98 C.E. mai Ebeto ao reeta aika tenua aikai a mena i buakoni kabaneani bokin te Baibara. N ana moan reta ake uoua ao a kaungaaki iai Kristian bwa a na nakonako n te ota ao ni kakorakoraia ni kaaitarai aia reirei taani kabwaoua te koaua. N ana katenua n reta Ioane, e a taekina iai aron te nakonako n te koaua ao ni kaungaia naba Kristian bwa a na bwaina te ibuobuoki i marenaia.
Tao ni bon 65 C.E., ao e a korea ana reta ai tarin Iesu ae Iuta mai Baretain ike e a kauringia iai raao ni Kristian taekani manga rinia aomata aika bubuaka n te ekaretia, ao n anga ana taeka n reirei ni kaineti ma te rarawa nakoni kariri aika bubuaka. Ti kona ni buokaki n teimatoa n nene n te onimaki n aki ongei bwaai n tutuki, mani mutiakinan rongorongo ake n ana reta Ioane ake tenua ma are n ana reta Iuta.—Ebera 4:12.
TEIMATOA N NAKONAKO N TE OTA, N TE TANGIRA AO N TE ONIMAKI
N ana moan reta Ioane are e koreia ibukia kaain te ekaretia ni kabane ake a boonnano ma Kristo, e a anga iai te reirei ae manena ibukini buokaia Kristian ni kaaitarai reirei aika kabwaoua te koaua ao n teimatoa n nene n te koaua ao n te raoiroi. E katerea naba iai kainnanoan te nakonako n te ota, n te tangira ao n te onimaki.
E korea ae kangai Ioane: ‘Ngkana ti nakonako n te oota n ai aron te Atua ngkae E mena n te oota, ao ti a iraorao iai iroura.’ Kioina ngkai bon Nibwan te tangira te Atua, e a manga taku riki te abotoro: “Ti na i tangitangiri.” Ngkai e a kairira “tangiran te Atua” bwa ti na ‘tau ana tua iroura,’ ti a kataea iai ngkanne ana kai te aonnaba aei n ‘onimakinan’ Iehova ae te Atua, ana Taeka ao Natina.—1 Ioane 1:7; 4:7; 5:3, 4.
A Kaekaaki Titiraki Aika Boto i Aon te Baibara:
2:2; 4:10—E kanga n riki Iesu bwa te “kareanraoi”? Te taeka ae te kareanraoi, e kona n nanonaki iai “raoiakinna,” ke “karaua nanon.” E a tia n anga maiuna Iesu bwa te kareanraoi, ao n te aro anne e a kakoroa nanon te kantaninga ae kororaoi ni kaineti ma te kaetitaeka ae riai. Ibukin te kareanraoi anne e a kona iai te Atua ni kaota ana nanoanga ao ni kabwarai aia bure akana onimakina Iesu.—Ioane 3:16; I-Rom 6:23.
2:7, 8—Tera te tua are e taekinna Ioane bwa bwain “nikawai” ao bwain “nabangkai”? E taekina te tua Ioane are kaineti ma te anga boni ngkoe ibukin tangiran tarim. (Ioane 13:34) E aranna bwa bwain “nikawai” kioina ngke e a kaman taekina te tua aei Iesu 60 tabun te ririki n nako imwaini korean ana moan reta Ioane are e kairaki koreana rinanon te taamnei ae raoiroi. Are nanona ngkanne bwa e a reke naba irouia taani kakoaua ‘ngke a moa’ n riki bwa Kristian. E riki naba bwa te tua “nabangkai” kioina ngke e a korakora riki iai ae nanonaki nakon ae tii “tangiran raom n ai aron tangiram i bon i roum” bwa e a nanonaki naba iai te tangira ae te anga boni ngkoe.—Nakoaia Ibonga 19:18; Ioane 15:12, 13.
3:2—Tera are e “tuai ni kaotaki” nakoia Kristian aika kabiraki, ao antai are a na “nora arona ni koaua”? E tuai kaotaki nakoia bwa e na tera aroia ngkana a kautaki nako karawa ma rabwataia n taamnei. (I-Biribi 3:20, 21) Ma e ngae n anne, a ataia ‘bwa ngkana E kaotaki te Atua nakoia, ao a nang katotonga bwa a nang nora arona ni koaua,’ ae “te Tamnei.”—2 I-Korinto 3:17, 18.
5:5-8—E kanga te ran, te raraa, ao te taamnei, n riki bwa bwaai ni kakoaua ae “bon Natin te Atua Iesu”? N te tai are e bwabetitoaki Iesu n te ran ao e a kaota Ana akoi Iehova nakoina ike e a butimwaeia iai bwa Natina, ikanne are e a riki naba iai te ran bwa te bwai ni kaotioti. (Mataio 3:17) N raraan Iesu ke maiuna are e anga bwa “unoraia aomata ni kabaneia” e oti naba mai iai bwa boni ngaia Natin te Atua. (1 Timoteo 2:5, 6) Ao e kaotioti naba te taamnei ae raoiroi bwa Iesu bon Natin te Atua, ngke e ruonna n te tai are e bwabetitoaki iai ao ni buokia bwa e na “nakonako ni kakaraoa ae raoiroi, ma ni kamaiuia akana bainikirinaki iroun te riaboro.”—Ioane 1:29-34; Mwakuri 10:38.
Reireiara:
2:9-11; 3:15. Ngkana e kariaia te Kristian te bwai teuana ke te aomata temanna bwa e na uruana ana tangira ibukin tarina, ai aron ngkanne te aomata ae nakonako n te rotongitong n aki ataa ike e nako iai.
TEIMATOA N “NAKONAKO I NANON TE KOAUA”
E moana ana kauoua n reta Ioane ma taekinan ae kangai: “Te unimwane nakon te aine ane rineaki ma natina.” E bati ni kimwareirei te aine anne n noraia ‘natina temangina bwa a nakonako i nanon te koaua.’—2 Ioane 1, 4.
Ngke e a tia Ioane n anga te kaungaunga ni kaineti ma karikirakean te tangira, e a manga korea ae kangai: “Aio te tangira, ba ti na tou mwin ana tua nako.” E kauring naba Ioane ni kaineti ma te “tia mamana-te-aba ao te antekirito.”—2 Ioane 5-7.
A Kaekaaki Titiraki Aika Boto i Aon te Baibara:
1, 13—Antai “te aine ane rineaki”? E kona n ae e nanona temanna te aine Ioane ae aranaki bwa Kyria, ae te taetae ni Kuriiti ibukin te “aine.” Ke e kona naba ni kabongana bwa te taetae ni karariki ni kaineta iai te ekaretia teuana bwa a aonga n aki ota iai taani kakaaitara. Ngkana tao ngaia anne ae e nanonaki n te reta, ngkanne natin te aine arei boni kaain te ekaretia ao ‘natin tarina’ a kona n nanonaki iai kaain te ekaretia are teuana.
7—‘Rokon’ Iesu raa ae e nanonna ikai Ioane, ao n te aro raa are ‘a aki kaota iai tauani bukina’ taani mwamwanaa te aba? Te “roko” aio bon tiaki taekan rokon Iesu are e na roko iai n aki noraki, ma bon taekan rokona n aomata ao kabirakina bwa te Kristo. (1 Ioane 4:2) A aki kaota tauani bukin te roko aei taani mwamwanaa te aba. Tao ibukina ngke a kakeaa koauan ae e a boni kaman maiu Iesu ao a rawa naba ni kakoauaa ae e a tia ni kabiraki n te taamnei ae raoiroi.
Reireiara:
2, 4. Ataakin “te koaua” iroura ae nanonaki iai butimwaean reirei ni Kristian ni kabane aika a nako man te Baibara, ao maiuakinaia e rangi ni kakawaki ibukini kamaiuara.—3 Ioane 3, 4.
8-11. Ngkana ti aki tangiria bwa e na bua mairoura “te akoi, ma te nanoanga, ma te raoi, mairoun te Atua ae te Tama, ao mairoun Iesu Kristo” ao ara itoman ma raora n te onimaki, ti riai ngkanne n ‘tarataraa raoi’ korakorara n te onimaki ao n rawa n reitaki ma ake aki “teimatoa n ana reirei Kristo.”—2 Ioane 3.
RIKI BWA “RAAO NI MAKURI I BUKIN TE KOAUA”
E korea ana katenua n reta Ioane nakon raoraona ni koaua ae Kaio. E korea ae kangai: “Akea au kimareirei ae maiti riki nakon aei, ae te ongo ba a nakonako natiu n te koaua.”—3 Ioane 4.
E kamoamoaa Kaio Ioane ibukini ‘kakaonimakina ni karaoi baika riai’ ibukini buokaia taari aika kakawara te ekaretia. E a manga taku riki te abotoro aei: “E riai ba ti na akoakoiia aika aroia uaakai, ba ti aonga n riki n raao ni makuri i bukin te koaua.”—3 Ioane 5-8.
A Kaekaaki Titiraki Aika Boto i Aon te Baibara:
11—Bukin tera bwa iai tabeman ake a manga karaoi aroaro aika bubuaka? Ibukini mamaaran aia onimaki tabeman, a aikoa nori aroaron te Atua ni matan nanoia. A karaoi aroaro aika bubuaka aikai bwa aongkoa a aki noraki iroun te Atua, kioina ngke a aki noria n oini mataia.—Etekiera 9:9.
14—Antai ake aranaki bwa “raora”? Te taeka ae “raora” e aki tii kaineti nakoia te koraki ake a rangi ni kaan aia iraorao i marenaia. E kamanena te taeka aei Ioane ni kainetiia naba iai raao n te onimaki ni kabane.
Reireiara:
4. A rotaki n te kimwareirei ae korakora kaain te ekaretia ake a ikawai n te onimaki, n noraia rooro n rikirake bwa “a nakonako . . . n te koaua.” Ao ai bon akeara riki ngkanne kabotauani kimwareireia kaaro ake a a tia n tokanikai ni buokia natiia bwa a na riki bwa ana toro Iehova!
5-8. Tabeman riki aomata ake a mwakuri korakora ibukin tangiran tariia ao Iehova bon mataniwi aika mwamwananga, mitinare, taani beku n te Betaera ke ni mwaangan nako aobitina ao ake a riki bwa bwaiania. E rangi n uaana te kakairi n aia onimaki, ao a bon tau ni karekea te boutoka mairoura.
9-12. Ti riai ni kakairi n ana katoto te mwaane ae kakaonimaki are Temeterio, ao tiaki iroun te tia kabwararia ao te tia uarao are Rioterebe.
“KAWAKININGKAMI N TANGIRAMI IROUN TE ATUA”
E arania te koraki ake a kawakawa n rin i nanon te ekaretia Iuta bwa “taani bangantaeka . . . ao taani ngurengure ao a tou mwin aia kaibabaru.” A “kamoamoaia aomata ni karang ba a aonga n reke aia bwai.”—Iuta 4, 16.
A na kanga Kristian ni kona n totokoi karirii aika bubuaka? E korea ae kangai Iuta: “Ngkami aika kam tangiraki, kam na uring taeka ake a atongaki rimoa irouia ana tia tuatua ara Uea are Iesu Kristo.” E a manga reitia riki ni kangai: “Kawakiningkami n tangirami iroun te Atua.”—Iuta 17-21.
A Kaekaaki Titiraki Aika Boto i Aon te Baibara:
3, 4—Bukin tera ngke e kaumakiia Kristian Iuta bwa a na ‘kakorakoraia ibukin te onimaki’? Ibukina bwa iai ‘aomata tabeman aika aki tangira te Atua ake a kawakawa n rin n te ekaretia n aki ataaki.’ Te koraki aikai ake a “onika ana akoi Atuara bwa aonaia n tamare.”
20, 21—Ti na kanga ni kona ni ‘kawakina tangirara iroun te Atua?’ Ti kona ni karaoa aei rinanon aanga aika tenua: (1) ngkana ti kateimatoa ara “onimaki ae moan te raoiroi” rinanon taningamaraura n ukeuke n reiakina Ana Taeka te Atua ao n ingaingara n uataboa te mwakuri n uarongorongo; (2) rinanon te tataro ma “te Tamnei ae Raoiroi,” ke ni kaboraoa maiura ma ana kairiri; ao (3) rinanon onimakinan ana karea ni kaboomwi Iesu Kristo are e kona ni karekea te maiu are e aki toki.—Ioane 3:16, 36.
Reireiara:
5-7. A kona ni karabaia aomata aika bubuaka man ana motikitaeka Iehova? Ni kaineti ma ana kauring Iuta ake tenua, ao e oti iai bwa a bon aki kona.
8-10. Ti riai ni kakairi n ana katoto Mikaera are mataniwiia anera ao ni karineia ake a mwiokoaki ni mwaakan Iehova.
12. A rangi ni karuanikai nakon ara onimaki aia baka n tangira taani kabwaoua te koaua, kanga ai aron rakai aika raba i aantare aika kona n ruanikai iai kaibuke ma taan uaua. A na taraa n rangi n tituaraoi taan reirei ni kewe, ma ai bon aroia naang aika akea karauia, ngkai akea aia onimaki. A aki kariki uaa aeka n aomata aikai n aroia aroka aika mate. A na boni kaaitara ma te kamaunanakoaki, n aroia aroka aika taewakaaki. Ai ngaia are ti wanawana riki ngkana ti rarawa nakoia taani kabwaoua te koaua.
22, 23. A ribai baika bubuaka Kristian ni koaua. A kakorakoraia kaain te ekaretia aika ikawai n te onimaki, moamoa riki boni mataniwi aika rineaki, ni buokia “tabemang aika nanokokoraki” ao ni buritiia man te ai are taekan te kamaunanakoaki ao ni katauraoa te ibuobuoki are a kainnanoia ibukini kakorakoran aia onimaki.
[Taamnei n iteraniba 26]
E riki te ran, te taamnei ae raoiroi, ao te raraa bwa bwaai ni kaotioti ae “bon Natin te Atua Iesu”