TE MANGA BUNGIAKI—Tera Raoi te Kantaninga Iai?
A KAKOAUAA aomata aika mwaiti bwa a riai ni manga bungiaki ni karekean te kamaiuaki are aki totoki. Ma taraa raoi are e taekinna Iesu ni kaineti ma te kantaninga ibukin te manga bungiaki. E kangai: “Ba ngkana e aki manga bungiaki te aomata, ao e aki kona n nora uean te Atua.” (Ioane 3:3) E teretere ngkanne bwa e riai ni manga bungiaki te aomata bwa e aonga n rin n Ana Tautaeka n Uea te Atua, ma tiaki ibukini karekean te kamaiuaki. A kona n rawa tabeman ni butimwaea anne ma n taku, ‘Ma tiaki te koaua bwa e irekereke ma te kaniwanga ae tii teuana taeka aika uoua aikai, ae te rin n te Tautaeka n Uea ao karekean naba te kamaiuaki?’ Ma ni koauana a bon aki. Ti na rinanoni moa ae e nanonaki n te taeka ae “uean te Atua” ni karekean otara n te kaokoro i marenani baikai.
Bon te aeka n tautaeka teuana te tautaeka n uea. Ai ngaia are ngkanne te taeka ae “uean te Atua” e nanonaki iai “ana tautaeka te Atua.” E reiakinaki n te Baibara bwa Iesu Kristo are “natin te aomata” boni ngaia te Uea n Ana Tautaeka n Uea te Atua ao iai raona n tautaeka. (Taniera 7:1, 13, 14; Mataio 26:63, 64) Irarikin anne, e katereaki naba n te miitara are e anganaki te abotoro Ioane bwa raoni Kristo n tautaeka a rineaki “mai buakoia baronga nako, ma taetae, ma natanaomata, ma botanaomata” ao a na “tauu taeka i aonaba.” (Te Kaotioti 5:9, 10; 20:6) E manga kaotaki raoi riki n Ana Taeka te Atua bwa te koraki aika a na tautaeka, a riki bwa te “nanai ae uarereke” aika 144,000 mwaitiia “ake a kabooaki mai aon te aba.”—Ruka 12:32; Te Kaotioti 14:1, 3.
E tautaeka mai ia Ana Tautaeka n Uea te Atua? E atongaki “uean te Atua” bwa “te tautaeka n uea ae bwaini karawa” naba, are e oti iai bwa a tautaeka Iesu ma raona n uea mai karawa. (Ruka 8:10; Mataio 13:11, NW) Mangaia are e kaainaki Ana Tautaeka n Uea te Atua iroun Iesu Kristo ao raona n tautaeka ake a a tia n rineaki mai buakoia botannaomata.
Tera ngkanne ae e nanonna Iesu ngke e taekinna bwa e riai te aomata ni manga bungiaki bwa e aonga n “rin n uean te Atua”? E nanonaki n aei bwa e riai ni manga bungiaki bwa e aonga n riki bwa raoni Kristo n tautaeka i karawa. E teretere raoi bwa te kantaninga ibukin te manga bungiaki bon ibukini katauraoaia te koraki n aomata ake a tianaki mwaitiia aika a na riki bwa taan tautaeka i karawa.
Ti a tia n noria ngkanne bwa e bon rangi ni kakawaki te manga bungiaki are e riki mairoun te Atua ao e katauraoiia te koraki n aomata aika a na riki bwa taan tautaeka i karawa. Ma e kanga raoi n riki te manga bungiaki?
[Kabwarabwaraan n iteraniba 7]
Te kantaninga ibukin te manga bungiaki bon ibukini katauraoaia te koraki n aomata ake a tianaki mwaitiia aika a na riki bwa taan tautaeka i karawa
[Taamnei n iteraniba 7]
E kaainaki Ana Tautaeka n Uea te Atua iroun Iesu Kristo ao raona n tautaeka ake a a tia n rineaki mai buakoia botannaomata